“Tawita ao Koria,” Karaki man Te O Tetemanti (2022)
“Tawita ao Koria,” Karaki man Te O Tetemanti
1 Tamuera 17
Tawita ao Koria
Kaitaraan ana kakaewenako te aintoa
I-Biritia a buakaniia kain Iteraera. Ni katoa ingabong te aintoa mai Biritia ae arana Koria e kakaewenakoaia kain Iteraera bwa e na un ma ngaia. Koria e bubura ao e abwabwaki riki nakoia aomata nako, ao e korakora. E kabongana te otanga ae tinebu ao e uota te kabaang, kainiwai, ao te otanga ae bubura. Akea ae e kan un ma ngaia.
Tawita bon te ataeinimwane ae te tia kawakin tibu are iai ana onimaki iroun te Uea. Tarina ake a ikawai bon tautia n ana taanga ni buaka Iteraera. N te bong teuana, Tawita e uota kanaia tarina. Ngke e roko n ana kaembwa te taanga ni buaka, e ongo ana kakaewenako Koria.
Tawita e titiraki bwa bukin tera akea ae e katoka kain Iteraera. A un tarina ao a tuangnga bwa e na nako ni kawakiniia tiibu. Ma Tawita e ataia bwa te Uea e na irantangaia kain Iteraera.
Te Uea Tauro e ata ana onimaki Tawita, ngaia are e tua bwa e na noora Tawita. Tawita e tuanga Tauro bwa e aki maaku n un ma Koria. Tawita e kabwarabwara bwa ngke e tararuaia ana tiibu, e tiringa te raian ao te bea. Te Uea e na kawakinna, ao Tawita e ataia bwa te Uea e na bon kawakinna n te tai aei.
Tauro e angan Tawita ana otanga. Ma e aki tau, ngaia are e a butia Tawita. E baireia bwa e na un n akea otangana.
Tawita e rikoi nimaua atibu aika maran ao e karinna n ana baeki. E ana ana kai ni bana ao ana bwai ni kawakin tibu ao e nako ni kaitara Koria.
Ngke Koria e noora Tawita, e takarua ni bwainingareia. E taku bwa te ataeinimwaane ae te tia kawakin tibu e aki kona ni kaitara. Tawita e kaeka n takarua bwa e onimakina te Uea bwa e na kawakinna! Tawita e taku bwa e na kona Koria ni kaota mwaakan te Uea.
Tawita e biri ni kaineta Koria. E waekoa ni kareia n te atibu n ana kai ni bana. E teke ramwan Koria n te atibu, ao te aintoa e bwaka i aontano. Te Uea e buoka Tawita ni konaaki Koria n akea ana kabaang ke otangana.
Ngke a noora Koria I-Biritia bwa e mate, a birinako bwa a maaku. A tokanikai n te buaka kain Iteraera. Tawita e onimakina te Uea, ao te Uea e kawakina Iteraera.