“Tamuera te Burabeti,” Karaki man Te O Tetemanti (2022)
“Tamuera te Burabeti,” Karaki man Te O Tetemanti
1 Tamuera 2–3
Tamuera te Burabeti
Te ataenimwane e weteaki iroun te Uea
N te tai ae rang maa, kain Iteraera akea ana burabeti te Uea are e na kairiia. N onean mwiina, taan moti a tautaekana Iteraera n ririki aika a mwaiti. N te tai aei, Anna e kaira natina Tamuera bwa e na maeka ma Eri, te ibonga ao te tia moti i Iteraera. Tamuera e buoka Eri inanon te tembora.
Natin Eri ake uoman a ibuobuoki naba n te tembora, ma a iraei angabwai ake ana bwai te Uea. Tabeman aomata a kabuntaeka nakon Eri, ma Eri e aki katuaiia.
Te tairiki teuana Tamuera e ongo te bwana ni weweteia. E taku bwa Eri, ngaia are Tamuera e nako ni kawaria. Ma e aki weteia Eri. Eri e tuanga Tamuera bwa e na nako ni matu.
Tamuera e ongo te bwana ngke e weteia te kauatai. E nakon Eri ao e titiraki bwa tera ae e tangiria. Ma Eri e aki weteia. Eri e tuanga Tamuera bwa e na nako ni matu.
Tamuera e ongo te bwana ni weteia te kateniua n tai. E manga nakon naba Eri ao e titiraki bwa tera ae e tangiria. N te tai aei, Eri e ataia bwa te Uea are e taetae nakon Tamuera. Eri e tuanga Tamuera bwa e na nako ni matu. Eri e taku bwa ngkana e manga wewete riki te Uea, Tamuera e riai ni kakauongo.
Tamuera e a manga ongo riki te bwana ngke e weteia. N te tai aei Tamuera e tuanga te Uea bwa e na taetae bwa e kakauongo. Te Uea e tuanga Tamuera bwa e bure bwa Eri e na kariaia natina ake a buakaka bwa a na ibuobuoki n te tembora. Ana utu Eri a na aki kariaiakaki bwa a na manga oki n ibuobuoki ikekei.
Te bong are imwiina, Eri e tuanga Tamuera te bwai are e taku te Uea. Tamuera e tuangnga. Eri e ataia ae te Uea e taetae rinanon Tamuera.
Te rongorongo e butanako iaon aban Iteraera. Aomata a ataia bwa te Uea e rinea Tamuera bwa e na riki bwa Ana burabeti.