Moses and the Burning Bush (Mote ao te Buakonikai ae e Ura), iroun Harry Anderson

Maati 21–27

Te Otinako 1–6

“I Uringa au Berita”

Moana am katauraoi n anga reirei man warekan Te Otinako 1–6. Te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu e kona ni buokiko ni kaotako ni mwakoro aikai, ao te kamataata aei e kona n anganiko iango n angareirei.

Korei Am Namakin

Kaunga te Tibwatibwa

Kaoti tabeua bwaai ake a kaineti nakon karaki inanon mwakoro aikai—te katooto, te bwatiketi ae bubura ke ana taore te ataei. Kaoia ataei bwa ana kabonganai bwaai aikai n tibwauai mwakoron ana karaki Mote aika a mamate nanoia iai.

Reirei te Reirei: Ataei aika a Uarereke

Te Otinako 1–2

E kona te Atua ni mwakuri rinanou ni kakoroi nanon Ana kantaningaia.

Iai taben Mote ae kakawaki ni kainaomatakiia kaain Iteraera man te tautoronaki. Ma e na bon aki kona ni kakoroa nanon aei ngke tinana, tarina, natin Bwarao te aine, ao tabeman riki aine aika kakaonimaki a tuai kawakinna ao n tabe ibukina.

Waaki ni Kakukurei aika Kona ni Karaoaki

• Kabongana te iteraniba n te waaki ni kakukurei n te wiiki aei ao “Miriam” (inanon Karaki man te O Tetemanti) tuangiia ataei bwa e kanga Iokebeta (tinan Mote), Miriam (mwanena), ao natin Bwarao te aine n tabeakina Mote. Katuruturua ni kamatataa bwa ibukin aikai ao aine tabeman ake a kakaonimaki, Mote e tauaki ni kawakinaki ao n te bong teuana e na kairiia tibun Iteraera nakon te kamanoaki. Kaoia ataei bwa ana korea tamneia aomata ake a tabe ibukiia.

  

  Moses in the Bulrushes (Mote inanon te Maunei), © Providence Collection/licensed man goodsalt.com

• Ikotaki n anenea te kuna iaon te mwakuri n ibuobuoki, n aron “‘Give,’ Said the Little Stream” (Aia Boki n Anene Ataei, 236). Buokiia ataei n iangoi bwaai aika bebetet aika a kona ni karaoi ni buokiia tabeman ni mwengaia, n te taromauri, ao n te reirei.

Te Otinako 3

E na buokai Iesu ni karaoi bwaai aika raraoi.

E raraoma Mote ngkana e na kona ni kainaomataia kaain Iteraera mai i Aikubita. Ma e berita te Uea bwa E na buoka Mote. Buokiia ataei ni karekea te onimaki ae e na kamaiuia naba te Tia Kamaiu.

Waaki ni Kakukurei aika Kona ni Karaoaki

• Tuangiia ataei aron te Uea n angan Mote te mwakuri ae kakawaki bwa e na karaoia. Wareki kiibu aika rineaki man Te Otinako 3, ke wareka “Mote te Burabeti” (inanon Karaki man te O Tetemanti). Tibwaua aron ana namakin Mote (taraa Te Otinako 3:6, 11) ao tera te bwai ae tuangnga te Uea (tarai kiibu 12 ao 14). Kaoia ataei bwa a na kaokia n taekinna ma ngkoe te kibuntaeka “N na bon memena i roum,” ao tibwaua te tai ngke te Uea e mena irarikim ngke iai te bwai ae kakawaki ae ko na karaoia Ibukina.

• Buokiia ataei bwa ana iangoi kaangaanga ngke a tuangaki bwa ana karaoa te bwai ae taraa ni matoatoa. Kabwarabwara bwa n te kawai naba ngke Iesu e buoka Mote, e na buokiia naba Iesu. Anenea te anene iaon bwa e kanga Iesu ni buokiira, n aron “I Will Walk with Jesus” (ChurchofJesusChrist.org). Kakoaua bwa e na buokira te Tia Kamaiu ngkana ti raraoma ke ni maaku.

• Koroi beeba ni katotongan te buroo ao koroi iaona kawai ae buokiiia iai ana ataei te Uea. Katikui iteran te buroo ake iai koroboki iaona ni kaitaraa naano. Kaoia ataei bwa ana ikaruoruo n rinei buroo, ao buokiia ni wareka te bwai are koreaki iaoia.

Te Otinako 3:1–5

I kona ni karekea te rau n taabo aika tabu.

Kabongana karakinan Mote ao te buakonikai are ura ni buokia ni kaotaia ataei bukina ngkai ti katitebooi bwaai aika tabu ma te karinerine.

Waaki ni Kakukurei aika Kona ni Karaoaki

• Wareka Te Otinako 3:1–5, ao kabwarabwara ae e kaota te karinerine Mote man kanakoan ana kau. Tera ae ti karaoia ni kaota te karinerine n te taromauri? Ikotaki n anenea kunan te karinerine, n aron “Reverence Is Love” (Aia Boki n Anene Ataei, 31). Buokiia ataei ni kinai taeka inanon te anene ake a reireiniira ni kaota te krinerine. Bukin tera e tangiria te Uea bwa ti na bwaina te karinerine?

• Kaoti tamnei tabeua n taian kaangaanga are ti riai ni bwaina te karinerine ao tabeua are tiaki kainnanoa iai te karinerine, n aron te botaki n toa, te tataro, te tabo ni katean kaa, ao te botaki n te koronririki. Tuangiia ataei bwa ana bairei tamnei ni kaota te tabo are ti riai ni bwaina iai te karinerine.

• Kaoia ataei bwa ana koroi tamneiia, ao kotei aia tamnei ngkana ko maroroakin kawai ae a kona ni karinerine iai ma iteran rabwataia aika kakaokoro, n aron mataia, taningaia, wiia, baiia, ao rangaia.

Reirei te Reirei: Ataei aika a Ikawai Riki

Te Otinako 1–2

E mwakuri te Atua rinanora n tatabemanira nako ni kakoroi nanon Ana kantaninga.

A mwaiti aomata aika a kakoroa nanon Ana kantaninga te Atua man kawakinan maiun Mote te ataei. Ko na kanga ni buokiia ataei aika ko reireiniia bwa a na ataa tabera ae ti bane ni karaoia ni kakoroa nanon ana kantaninga te Atua?

Waaki ni Kakukurei aika Kona ni Karaoaki

• Kaoia ataei bwa ana tibwaua te bwai ae ataia iroun Mote ngke e uarereke. Kabongana te iteraniba n te waaki ni kakukurei n te wiiki aei ao Te Otinako 1:22; 2:1–10 ni kakimototoa karakinan Mote ni uarerekena. Wareki kiibu man booki aika tabu iaon te iteraniba n te waaki ni kakukurei, ao tuangiia ataei te bwai ae a karaoia aine n tatabemaniia ni kamanoa maiun Mote.

• Tuangiia ataei taekaia aomata aika ko tangiriia ibukin aia kakaonimaki ni beku ibukin te Atua ao naake irarikiia, e ngae ngke a ibuobuoki ni kawai aika uarereke. Kaoia ataei bwa ana taekin taekaia aomata aika a ataia ake a tia ni beku ma te kakaonimaki ibukin te Atua ao tabeman. Tera tabera n ana mwakuri te Atua?

Te Otinako 3–4

E na buokai te Uea ni kakoroa bukin Ana kantaninga.

E namakina te aki tau Mote ibukin ana wewete, ma te Uea e berita bwa E na raona Mote ao ni buokia. E kanga te rongorongo aei ni kakabwaiaia ataei ake ko reireiniia?

Waaki ni Kakukurei aika Kona ni Karaoaki

• Kabonganakin te rongorongo inanon Te Otinako 3; 4:1–17, tuangiia ataei bwa ana ikaruoruo n riki kanga Mote. Ngkana e kona, uoti kai ni bakatoko bwa ana kabonganai, n aronotan te iti ao te aroka n tei ibukin te buakonikai ae ura.

• Tuangiia ataei bwa ana wareka Te Otinako 3:11; 4:1, 10 ao kakaea bwa e kanga ana namakin Mote n tuangakin Bwarao bwa e na kainaomataia tibun Iteraera. Ningai ae a karekei iai namakinan aika titebo? Tera te reirei ae a na tibwauaia ataei ma Mote bwa e na buokaki iai? Buokiia ni kakea aron te Uea ni kaunga Mote (taraa Te Otinako 3:12; 4:2–9, 11–12).

• Tibwaua te taneiai ngke ko namakina te Atua bwa e buokiko ni kakoroa nanon te wewete ke te beku Ibukina ni kawai tabeua. Kaoia ataei bwa ana tibwaua te tai ngke e buokiia te Uea.

Te Otinako 3:1–5

I kona ni karinerine n taabo aika tabu.

Te Uea e tuanga Mote bwa e na kanakoi ana kau n te buakonikai ae ura bwa te kanikina ibukin te mwamwannano ao te karinerine. Ko na kanga ni kabongana te rongorongo aei n reireiniia ataei ibukin te karinerine?

Waaki ni Kakukurei aika Kona ni Karaoaki

• Wareka Te Otinako 3:1–5, ao tuangiia ataei bwa ana koroi ni kakimototoi kibuntaeka aikai n oin aia taeka. Tera ae ti kona ni karaoia ni kaota te karinerine n taabo aika tabu, n aron n te umwantabu ke n te tembora? Buokiia ataei ni karekei “baeki ni karinerine” ni uoti nakon mwengaia ma kanoaia mwakoro ni beeba ma iango aika a kaotia bwa ti na kanga ni karinerine. Tuangiia bwa a na tibwauai iango aikai ma aia utu.

• Ikotaki anenea kunan te karinerine, n aron “Reverence Is Love” (Children’s Songbook, 31), ao tuangiia ataei n tatabemaniia bwa ana korea ao n tibwaua nanon te karinerine ae boboto iaon taekan te anene.

• Kabongana te tamnei ngke E kaitiaka te Tembora Iesu (Gospel Art Book, nambwa. 51) ni karakina te karaki inanon Mataio 21:12–13. E kanga aron katein Mote inanon Te Otinako 3:1–5 ni kaokoro ma katein te tia rairi mwane? Bukin tera e tangiriira te Tia Kamaiu bwa ti na katiteboi bwaai aika tabu ma aika karinerine?

Kaungaa te Kamatebwai n te Mweenga

Ni buokiia ataei n tibwaua te bwai ae a reiakinna man Te Otinako 1–6, kaungaia bwa ana korea tamnein temanna te aomata ae a ataa taekana n te kiraati bwa ana tibwauaia ma aia utu.

Kanakoraoan Ara Anga reirei

Ana reiakinaki riki ataei man kaokiokana. Tai maaku ni kaokioki waaki ni kakukurei n te tai ae mwaiti, riki ma ataei aika a uarereke. Aio are e na buokiia ataei n uringa te bwai are ko reiakinna.