Tamnein Iotebwa mai Aikubita inanon te karabuuti, iroun Jeff Ward

Maati 7–13

Karikani Bwaai 37–41

“E Memena Te Uea iroun Iotebwa”

Tera koaua man Karikani Bwaai 37–41 aika a kainnanoi ataein am kiraati bwa ana kaotaaki riki iai? Kabanea am iango nakon te wirikiriki are e roko nakoim n am tai ni katauraoi n angareirei.

Korei Am Namakin

Kaunga te Tibwatibwa

Anganiia ataei aia tai tabeua te miniti bwa ana korea tamnein te bwai ae a tia n reiakinna n taekan te euangkerio ni mwengaia ke n te taromauri. Tuangiia ataei bwa ana tibwaua ao n taekina taekan aia tamnei.

Reirei te Reirei: Ataei aika a Uarereke

Karikani Bwaai 37

I kona n akoi nakoia au utu.

Tarin Iotebwa a bakantang irouna ao a karaoia n te aro ae aki raoiroi. Ko na kanga ni buokiia ataei bwa a na ataa kakawakin bwainakin te tangira nakoia tabeman, riki kaain am utu?

Waaki ni Kakukurei aika Kona ni Karaoaki

• Ni karakina karakin Iotebwa ao tarina man Karikani Bwaai 37, ko kona ni kabonganai tamnei inanon Nakomai, Iriirai—Ibukiia Aomata n Tatabemaniia ao Utu ke “Iotebwa i Aikubita” (inanon Karaki man te O Tetemanti). Kariaia ataei bwa ana ibuobuoki n tibwauai taekan te karaki. Titirakiniia titiraki n aron, “A kanga tarin Iotebwa ni bwainikirinna?” Buokiia ataei n iangoi bwaai aika a kona tarina n tia ni karaoi ni kaota te tangira nakon Iotebwa. Tera ae ti na karaoia ngkana ti namakina te un iroun temanna kaain ara utu?

• Kaota tamnein te utu (taraa Gospel Art Book, nambwa 112), ke kaoia ataei bwa ana korei tamneia kaain aia utu. Tuangiia bwa ana tibwauai kawai aika a kona iai ni kaota te tangira nakoia kaain aia utu.

• Botaki n anenea te kuna ibukin tangiraia ara utu, n aron “Te Utu ae Kakukurei” (Aia Boki n Anene Ataei,198). Tera ae ti kona ni karaoia bwa a na kukurei iai ara utu?

• Tuangiia ataei bwa ana karan iteraniba ibukin waaki ni kakukurei n te wiiki aei, korea tamneia kaain te utu ngkai a bwaina te akoi.

Karikani Bwaai 37:18–28; 39:20–23

E kona te Atua ni buokai ngkana a riki bwaai aika buakaka.

A mwaiti bwaai aika buakaka aika riki nakon Iotebwa, ma e rineia bwa e na kawakin tuua ao e mena irarikina te Uea. A kona ataei n reirei man te bwai aei ae te Atua e tangiria ni buokiia n aia tai n rawawata.

Waaki ni Kakukurei aika Kona ni Karaoaki

• Kabwarabwarai tabeua bwaai aika riki nakon Iotebwa aika a kaangaanga (taraa Karikani Bwaai 37:23–28; 39:20; ke “Iotebwa ao Miina” ao “Iotebwa i Aikubita,” inanon Karaki man te O Tetemanti). Imwiin ae ko tuangiia ataei te kaangaanga ae e kaitara ma ngaia Iotebwa, kaoia bwa ana kaokia n taekina, “E memena te Uera iroun te Iotebwa” (Karikani Bwaai 39:2).

• Tibwauai tamnein te Tia Kamaiu ni buokiia aomata aika a kaitara ma kaangaanga (taraa Gospel Art Book, nambwa 40–43). Kaoia ataei bwa ana tibwauaia bwa e kanga te Tia Kamaiu ni buokiia aomata. Kaota am koaua ae e kona te Uea ni buokiira ngkana a riki bwaai aika buakaka nakoira.

• Anenea te anene ibukin ana tangira n tabe ibukira te Tia Kamaiu, n aron “Jesus Is Our Loving Friend” (Aia Boki n Anene Ataei,58). Tibwaua te taneiai ngke ko a tia n namakina ana tangira te Atua n te tai are ko kaitara iai ma te kaangaanga. Kaota tamnein Iesu, ao kaoiia ataei bwa a na tibwaua aron aia namakin Ibukina.

Karikani Bwaai 41:15–36, 47–57

E kona te Atua ni kauringai ibukin te kaangaanga.

Te Atua e buoka Iotebwa bwa e na ataia ae miin Bwarao bon te kauring ni katauraoi ibukin bwaai aika a kaangaanga nakon taai aika ana roko. Buokiia ataei ni kaotaia bwa e kona te Atua ni kauringiia n te kaangaanga, n raonaki ma te kaangaanga n te tamnei.

Joseph Interpreting the Butler and Baker’s Dreams ( Iotebwa Kabwarai Miia te Tia Taraa Niman ao ana Tia Umuum Barao), iroun François Gérard

Waaki ni Kakukurei aika Kona ni Karaoaki

• Kamaenakoi tamnein te amwarake ni katobibia te ru, ao kaoia ataei bwa ana bobotii ao ni “kawakin” inanon te kaontaina. Kabongana te waaki aei n tuangiia ataei bwa e kanga te Atua ni kauringa Bwarao bwa e na katauraoia imwain te tai are e nang akea te amwarake iai (taraa Karikani Bwaai 41:15–36, 47–57). Tuangiia ataei bwa ana korei tamnein bwaai aika e miakin Bwarao ao kabonganai aia tamnei n reireiniia aia utu ni mwengaia.

• Kaota tamnein te burabeti ae maiu ngkai. Tuangiia ataei taekan te angareirei ke kauring ae e a tia te Atua n anganiira rinanona. Kabwarabwara bwa ti na kakabwaiakaki ao ni kamanoaki ngkana ti ira te burabeti. Kaoia ataei bwa a na katei kain bwaai aika a kona ni karaoi n ira ana reirei te burabeti.

Reirei te Reirei: Ataei aika a Ikawai Riki

Karikani Bwaai 39:1–3, 20–23; 41:38

Ngkana I kakaonimaki, te Atua e na buokai n taai ni kaangaanga.

E ngae ngke a rangin n rawata katakin Iotebwa, e teimatoa ni kakaonimaki ao “e memena te Uea irouna” (Karikani Bwaai 39:3). E kona ana taneiai ni buokiia ataei n namakina te koaua ae te Atua e na buokiia n aia tai ni kataaki.

Waaki ni Kakukurei aika Kona ni Karaoaki

• Tuangiia ataei bwa ana kakaei taeka ke kibuntaeka inanon Karikani Bwaai 39:1–3, 20–23; 41:38 are e kaotia bwa te Atua bon raon Iotebwa n ana tai ni kaangaanga. Ngkana e kona, kaoia ataei bwa ana karaoa te kanikina ae uarereke ni kaota te kibuntaeka teuana ae a kunea. Kaungaia bwa ana uota aia kanikina nakon mwengaia ni kauringiia bwa e na raoraoniia te Uea n aia tai ni kataaki.

• Kaoia ataei bwa ana tibwaua aia iango n nanon te kibuntaeka “ao e memena te Uea iroun Iotebwa” (Karikani Bwaai 39:2). Kaoia bwa ana tibwai aia taneiai ngke a namakinna ae e mena irarikiia ke aia utu te Uea ke aia utu n te tai ae kaangaanga. Tibwaua te aeka n taneiai anne ni maium.

Karikani Bwaai 37:3–28

I kona ni kukurei ngkana a riki bwaai aika raraoi nakoia tabeman.

Te bwakantang e kaira tarin Iotebwa nakon karaoan rinerine aika buakaka. Aia rinerine aika bure e kamaraka Iotebwa ao e karika te nanokawaki ae korakora. E kona te karaki aei ni buokiia ataei n rineia bwa ana kukurei ngkana a kakabwaiaki ake tabeman iroun te Uea.

Waaki ni Kakukurei aika Kona ni Karaoaki

• Kaoia ataei bwa ana rinanon Karikani Bwaai 37:3–11 ao ni koroi tamnein ana kooti Iotebwa ao miina ake uoua. A kanga aia namakin tarin Iotebwa ibukin Iotebwa? A na kanga n tia ni kaeka n ae kakaokoro? Maroroakinna bwa bukin tera e kakawaki bwa ti na kukurei ngkana a riki bwaai aika raraoi nakoia aomata tabeman.

• Tuangiia ataei bwa a na tibwauai kaangaanga tabeua are e na kona iai te aomata n namakina te bwakantang iroun temanna. Bootaki n anenea te kuna ae kaota te tangira nakoia tabeman, n aron “Love One Another” (Aia Boki n Anene Ataei, 136–37). Katuruturua ni kamataata ae e kona Tamara are i Karawa ni buokiira n onei mwiin namakin ni bakantang ma namakin n tangira.

Karikani Bwaai 39:7–12

Man ana ibuobuoki te Uea, I kona ni kanakoi kariiri.

Ngkai atei aika ko reireiniia a rinanon kariiri inanon maiuia, a kona ni karekei korakoraia man ana banna ni katooto Iotebwa ni kanakoa te kariiri.

Waaki ni Kakukurei aika Kona ni Karaoaki

• Kaota tamnein Iotebwa ao buun Botiba (taraa Gospel Art Book, nambwa 11), ao tibwaua te karaki inanon Karikani Bwaai 39:7–12. E kanga Iotebwa n tokanikai iaon te kariiri? Buokiia ataei ni kakaei taeka inanon Karikani Bwaai 39:7–12 are e na kaekaa te titiraki aei—te katooto, e ataia Iotebwa bwa menana ikekei ma buun Botiba bon te “bure nakon te Atua” (te kibu 9).

• Kaoia ataei bwa ana iangoi kaangaanga ike ataei aika aia roro ana kaririaki bwa ana karaoi rinerine aika bure. Tuangiia bwa ana katea kaina bwa ana kanga n ira ana katooto Iotebwa n taian kaangaanga aikai—te katooto, tera kawai tabeua aika ti kona n uringa te Atua ngkana ti kariiriaki?

• Katei uoua maekaneti, ae tei ibukin te Atua ao Tatan, ao te biti ae uarereke n aron kiribin te beeba, e tei ibukira. Kabonganai maekineti ni kamatataa bwa kaniakira riki nakon te Atua, ao e na korakora riki ana kairoro iaora, ao titebo naba ma kaniakira riki nakon Tatan. Tera ae ti kona ni karaoia ni kaniira riki nakon te Atua? E na kanga te Tamnei ae Raoiroi ni buokiira?

Kaungaa te Kamatebwai n te Mweenga

Kaoia ataei bwa a na tibwauai kawai ni katabwanina te tiententi aei: “I kona n riki n aron Iotebwa man .” Tuangiia bwa a na tibwauaia ma aia utu bwa a kanga ni kabwanina te tiententi.

Kanakoraoan Ara Angareirei

Kaungaa te tibwatibwa. Ngkai kam maroroakin ana reirei te euangkerio, tuangiia ataei bwa ana tibwauai aia iango, namakin, ao aia atatai. Ko na kunea bwa a rawata otaia aika nano aika uaana.