“Maati 14–20. Karikani Bwaai 42–50: ‘E Kani Karekea te Kabwaia te Atua,’” Nakomai, Iriirai—Ibukin te Moanrinan: Te O Tetemanti 2022 (2021)
“Maati 14–20. Karikani Bwaai 42–50,” Nakomai, Iriirai—Ibukin te Moanrinan: 2022
Tamnein Iotebwa mai Aikubita, iroun Robert T. Barrett
Maati 14–20
Karikani Bwaai 42–50
“E Kani Karekea te Kabwaia te Atua”
E kakawaki bwa ko na atai booki aika tabu aika ko angareirei iaona, ma e kakawaki naba bwa ko na kinaia ataei aika ko reireiniia. Karekea te tai n iangoia ao n tataroakin bwaai aika uoua aikanne.
Korei Am Namakin
Kaunga te Tibwatibwa
Ibukin te karaki inanon Karikani Bwaai 42–50 bon reitan te karaki n te reirei n te wiiki ae nako, man Karikani Bwaai 37–41, ana te tai ni moan te kiraati ni karekea aia tai ataei n tibwaua te bwai ae a uringnga n taekan Iotebwa, n raonaki ma te bwai are a reiakinna n te Moanrinan ao n te mweenga.
Reirei te Reirei: Ataei aika a Uarereke
I kona ni kaota au tangira nakon au utu.
Ibukiia ataei aika uarereke, kam na bae n tangiria ni kamatataa mwakoron te karaki aei are e kaota iai ana tangira Iotebwa nakon ana utu.
Waaki ni Kakukurei aika Kona ni Karaoaki
-
Kabonganakin tamnei inanon Nakomai, Iriirai—Ibukiia Aomata n Tatabemaniia ao Utu, taekinna nakoia ataei manga reitakin Iotebwa ma tarina. Katuruturua ni kamatataa aron kaotan ana tangira Iotebwa nakoia tarina.
-
Wareki kibuntaeka man Karikani Bwaai 45:4–15 are e kabwarabwarai bwaai aika e karaoi Iotebwa ni kaotia bwa e tangiriia ana utu. Kaoia ataei bwa ana karaoia ae ao ngkoa a karaoa are e kabwarabwaraaki n taian kibu. Te katooto, a kona n ae aongkoa a titirakiniia kaain te utu bwa a “na kaniia” (kibu 4) ke angan te utu te amwarake (taraa te kibu 11).
-
Anenea kunan te tangira, n aron “Love One Another” (Aia Boki n Anene Ataei,136). Buokiia ataei ni korea tamnein baia ao koroia inanon te tamnei te bwai ae a kona ni karaoia ni kaota te tangira nakoia aia utu.
Kakabwaia n te nakoanibonga a buokai.
Iakobwa e kakabwaiaia natina mwaane ao tibuna mwaane (taraa Karikani Bwaai 48–49). N te bong aei ti kona ni karekei kakabwaia n te nakoanibonga ake anganiira te rau, te kamaiuaki, te kairi, ao te korakora n tamnei.
Ti kona ni karekei kakabwaia mairouia naake iai irouia te nakoanibonga.
Waaki ni Kakukurei aika Kona ni Karaoaki
-
Kaota tamnein Iakobwa nakoia ataei ni kakabwaiaia natina mwaane ke tamnein kakabwaia riki tabeua n te nakoanibonga (tarao tamnei n te kamataata aei; taraa naba Gospel Art Book, nambwa 12). Tuangiia ataei bwa a na kabwarabwara te bwai ae e riki n te tamnei.
-
Warekia nakoia ataei Karikani Bwaai 48:8–9. Kabwarabwara bwa Iteraera, ae arana naba teuana Iakoba, bon taman Iotebwa ao are e tangiria n angan natin Iotebwa te kakabwaia n te nakoanibonga. Ngkana iai mai ibuakoia ataei aika a tia ni karekea te kakabwaia n te nakoanibonga, kaoia bwa ana taekina aia taneiai. Ke tibwaua oin am taneiai.
-
Buokiia ataei n iangoi tabeua bukina ngkai ana bubuti ibukin te kakabwaia n te nakoanibonga. Buokiia naba n araniia naake iai irouia te nakoanibonga ae a kona ni butiia, n aron te karo, te tibu te unimwaane, ke te tari n ibuobuoki.
I kona ni kabwara bure.
Tera ae a kona n reirei ataei iaon taekan te kabwarabure man ana banna ni katooto Iotebwa ni kabwarai aia bure tarina?
Waaki ni Kakukurei aika Kona ni Karaoaki
-
Kabongana te iteraniba ibukin waaki ni kakukurei n te wiiki aei ni buokiia ataei n uringiia tarin Iotebwa ake a tia n aki raoiroi nakoina. Warekia nakoia ataei Karikani Bwaai 50:17, ni katuruturua ni kamatataa bwa a kabwarai aia bure tarina ibukin te bwai are a tia ni karaoia ao a tangira Iotebwa bwa e na kabwarai aia bure. Wareka kibu 21 ni kaotia bwa Iotebwa e kabwarai aia bure tarina—e aki manga un irouia.
-
Ikotaki n anenea “Help Me, Dear Father” (Aia Boki n Anene Ataei,99). Ngke ko anenea taekan te kabwarabure, kaoia ataei bwa ana kotea Iotebwa iaon te teraniba ibukin waaki ni kakukurei. Ngkana ko anenea taekan te rairannano, kaoia bwa ana koteia tarina.
-
Buokiia ataei n iangoi kaangaanga ake a na kainnanoi ni kabwara ana bure temanna. Kaoia ataei bwa ana kamatenanoa te bwai are ana taekinna ke ni karaoia ni kaota te kabwarabure nakon te aomata anne.
Reirei te Reirei: Ataei aika a Ikawai Riki
Te Kabwarabure e uota te rau.
A tia tarin Iotebwa ni karaoi bwaai aika buakaka nakoina. E ngae n anne e kabwarai aia bure Iotebwa ao ni uota te rau nakon ana utu.
Waaki ni Kakukurei aika Kona ni Karaoaki
-
Buokiia ataei ni karaoia nakon te kaotioti tamnei man Karikani Bwaai 42–44. Ngkai a karaoia, titirakiniia bwa a kanga aia iango n ana namakin Iotebwa ni manga nora tarina ke a na kanga aia namakin tarina ngke a tibwa kina Iotebwa.
-
Titirakiniia ataei bwa tera ae nanonaki ni kabwaraan ana bure temanna. Buokiia bwa ana ataia ae kabwaraan ana bure temanna e raonaki ma karikan teuanne ke neienne n aron ana tangira Kristo. Titirakiniia ataei te bwai ae ataia ni karakinan Iotebwa ngke e kabwarai aia bure tarina, ke warekia ma ataei kiibu man Karikani Bwaai 45:1–15. Tera ae karaoia Iotebwa ke te bwai ae taekinna ni kaotia nakoia tarina bwa e a kabwarai aia bure? Tera ae ti kona n taekinna ke ni karaoia ngkana a bubutiira tabeman bwa ti na kabwarai aia bure?
-
Tuangiia ataei bwa ana iangoa te tai ngke a kabwara ana bure temanna ke ngkana temanna e kabwarai aia bure. N anganiia aia tai n iangoi, tibwaua am taneiai, ao kakoauai kakabwaia aika a roko man te kabwarabure. Kaoia ataei bwa ana tibwauai aia taneiai, ngkana a tangiria ni karaoia. Tera ae a namakinna? Tera ae ti reiakinna ibukin te kabwarabure man ana banna ni katooto te Tia Kamaiu? (taraa Ruka 23:33–34).
Tamara are i Karawa e kanakoa Iesu Kristo bwa e na kamaiuai.
Karakinan Iotebwa ngke e kamaiuia ana utu man te baki e kona n reireiniira taekan Iesu Kristo, are e kamaiuira man te bure ao te mate.
Waaki ni Kakukurei aika Kona ni Karaoaki
-
Koroia iaon te burakibooti Iotebwa ao Iesu Kristo. Buokiia ataei ni ukoukori koroboki aika tabu aikai ao koroia iaon te burakibooti bwaai aika iai irouia Iotebwa ao Iesu: Karikani Bwaai 37:3 ao Mataio 3:17; Karikani Bwaai 37:26–28 ao Mataio 26:14–16; Karikani Bwaai 45:5–7 ao Ruka 4:18; ao Karikani Bwaai 47:12 ao Ioane 6:35.
-
Titirakiniia ataei bwa tera te bwai ae nanonaki ni kamaiuia ke ni kainaomata temanna. Ngkana iai mai ibuakoia ae a tia ni karekea ana taneiai ae e a tia ni kamaiuaki ke ni kainaomataki man te kabuanibwai, kaoia bwa ana tibwauaia. E kanga Iotebwa ni kamaiuia tarina? (taraa Karikani Bwaai 42:1–3; 45:5–7). Kaota tamnein te Tia Kamaiu. E kanga Iesu ni kamaiuira?
2 Nibwaai 3:4-16
Tamara are i Karawa e katauraoa Iotebwa Timiti bwa e na riki bwa te burabeti n ara bong.
Ngaa n riki imwain taina, Iotebwa mai Aikubita e noria bwa te Uea e na wetea Iotebwa Timiti bwa e na karaoa te mwakuri ae korakora ni boong aika kaitira. Te burabeti n ana Boki Moomon Riaai e kabwarabwara nakoia ataei ana kaotioti Iotebwa n te 2 Nibwaai 3 bwa e kanga te Uea ni kakabwaiaira rinanon te Burabeti Iotebwa Timiti.
Waaki ni Kakukurei aika Kona ni Karaoaki
-
Anganiia ataei kanikina iaon Iotebwa Timiti, ao kaoia bwa ana ketinna bwa antai ae ko kabwarabwara. Karin kanikina man 2 Nibwaai 3:4–16 , n aron are “e reireiniira taekan berita aika tabu” (taraa kibu 7), “e anganiira ana taeka te Uea” (taraa te kibu 11), ao e ingoanaki n aran ana karo” (taraa te kibu 15). Imwiin aia keeti ataei aika eti, kaoia bwa ana kakaei kanikina aikai inanon kiibu. Tera riki ae ti reiakinna ibukin Iotebwa Timiti man a na taeka ni burabeti Iotebwa mai i Aikubita?
-
Kaota aia tamnei ataei are e tei ibukin bwaai aika kakawaki aika e karaoi ao n reirei iai Iotebwa Timiti (taraa, ibukin te katooto, Gospel Art Book, nambwa. 89–95, 97, 98, 117, 118). Buokiia ataei bwa ana iangoi kakabwaia aika iai iroura ibukin Iotebwa Timiti. Te katooto, e kanga ana mwakuri ni buokiira ni kaniira riki nakon Iesu Kristo?
Kaungaa te Kamatebwai n te Mweenga
Kaoia ataei bwa ana tibwaua te iteraniba n te waaki ni kakukurei n te wiiki aei ma aia utu ni mwengaia. A kona ni kabongana n rinanon karakinan Iotebwa ao tarina ao ni maroroakina kakawakin te tangira ao te kabwarabure inanon ara utu.
Kanakoraoan Ara Anga reirei
Kaota am koaua iroun Iesu Kristo. E ngae ngke e aki taekinaki aran Iesu Kristo n te O Tetemanti, e kananonaki Nakoina n aara riki tabeua, ao e Kakoaua rinanon kanikina ao karaki. Buokiia ataei n rerei aron kakaean koaua n taekan te Tia Kamaiu n tainako ngkana a wareki booki aika tabu.