“Maati 28–Eberi 3. Te Otinako 7–13: ‘Uringa te Bong Aei, Are Kam Otinako iai mai Aikubita,’” Nakomai, Iriirai—Ibukin te Moanrinan: Te O Tetemanti 2022 (2021)
“Maati 28–Eberi 3. Te Otinako 7–13,” Nakomai, Iriirai—Ibukin te Moanrinan: 2022
Te korotamnei iaoia Mote ao Aaron n ana kabowi Bwarao, iroun Robert T. Barrett
Maati 28–Eberi 3
Te Otinako 7–13
“Uringa te Bong Aei, Are Kam Otinako iai mai Aikubita”
Ngkana ko wareka Te Otinako 7–13, iangoia bwa a kanga koaua inanon mwakoro aikai ni kakorakorai am onimaki iroun Iesu Kristo. Ko na kanga ni buokiia ataei ake ko reireiniia ni karekea naba te taneiei aio?
Korei Am Namakin
Kaunga te Tibwatibwa
Katikui tabeua tamnei ake a tei ibukin bwai inanon Te Otinako 7–13 (n aron te biraoki, te nango, ao te tibu te teei) iaan te kunikai iaon te taibora. Kaoia tabeman ataei bwa ana anaa teuana te tamnei mai iaan te kunikai, ao kaoa te kiraati bwa e na tibwaua te bwai ae a reiakinna ibukin te tamnei aei n te mweenga n te wiiki aei.
Reirei te Reirei: Ataei aika a Uarereke
Iai mwakan te Uea iaon bwaai ni kabane.
A tautoronaki Iteraera ao aki kona ni kainaomataia, ma e kaota mwakana te Uea ao e kaotinakoia. Ko na kanga ni kabongana te karaki aei ni buokiia ataei n onimakina te Uea ao Mwakana?
Waaki ni Kakukurei aika Kona ni Karaoaki
-
Wareki kiibu aika rineaki man Te Otinako 7–11 n reireiniia ataei iaon kaai ake tebwina are e kanakoi te Uea nakoia kaain Aikubita (taraa naba “Mote te Burabeti,” inanon Karaki man te O Tetemanti). Kaoia ataei bwa ana koroi tamnei ake a tei ibukin tabeua kaai. Tuangiia ataei bwa ana tabekirake aia tamnei ngkai ko a manga maroroakin bwaai tabeua ibukin taian kai. Wareki kibuntaeka man Te Otinako 7:5 ao 9:14 ni kamataata bwa bukin tera ngkai e kanakoi kaai te Uea nako Aikubita.
-
Tibwauaia ma ataei bwa e kanga te Uea ni kaotia nakoimi ae “Bon akea temanna ae ai [Arona] i aonaba ni kabane” (Te Otinako 9:14). Tuangiia ataei bwa ana tibwauaia bwa a kanga n ataia ae e rangin ni mwaaka te Uea.
E kona te Toa ni buokai n uringa Iesu.
Te Toa are te Riao e reireiniia tibun Iteraera taekan te Tia Kamaiu ao te angakarea are n te bong teuana E na karaoia ibukira. N te bong aei, ti kana te toa ni kauringa ana angakarea Iesu.
Te Toa e buokira ni uringa Iesu Kristo.
Waaki ni Kakukurei aika Kona ni Karaoaki
-
Kabonganakin Te Otinako 12:1–13, tuangiia ataei te bwai ae tuangiia tibun Iteraera te Uea bwa ana karaoia bwa aonga ni kamaiuaki man te kabanea ni karekekai (taraa naba “Toan te Riao,” inanon Karaki man te O Tetemanti). Kaota tamnein Iesu ni Uota te Tibutetei ae Bua (Gospel Art Book, nambwa. 64), ao kabwarabwarai bwaai aika ti tebo imaren te tibutetei ae kabonganaki n te Toa Are te Riao ao Iesu Kristo, ana Tibutetei te Atua.
-
Tuangiia ataei bwa ana aran bwaai aika ti karaoi bwa ti aonga n uring bwai aika kakawaki n aron te bongnibung ao boong ni motirawa. Wareka Te Otinako 13:10, ao kabwarabwara bwa e tuangiia tibun Iteraera te Uea bwa ana bukamarua te Toa Are te Riao ni katoa ririki ni buokiia n uringa ae E kamaiuia mairouia kaain Aikubita. Tera kawai tabeua ae ti kona n uringa ae e kamaiura Iesu man te bure ao te mate?
-
Ngkana e kona, nakon te taibora n toa ma ataei, ao taekinna bwa e kanga te toa ni buokiira n uringa Iesu Kristo. Ikotaki n anenea “The Sacrament” (Aia Boki n Anene Ataei, 72) ke te anene teuana ae karinrine n taekan Iesu Kristo. Buokiia ataei bwa ana ataa te namakin ae karaunano ae a tia ni karekea ngke a iangoa te Tia Kamaiu, ao kaoia bwa ana ukoukora te namakin anne ngkana a taua te toa.
-
Anganiia ataei mwakoro ni beeba ma taeka “I kona n uringa Iesu Kristo n tain te toa man …” ae koreaki mai ieta. Kaoiia bwa a na korei tamnei aika a kona n taraia n tain te toa ao ni buokiia n uringa Iesu Kristo.
Reirei te Reirei: Ataei aika a Ikawai Riki
Iai mwakan te Uea ni kainaomataai.
A rinanon kaangaanga ataei ao a kainnanoa te Uea bwa e na buokiia. Karakinan taian karekekai ake tebuina are e kanakoi te Uea bwa e na kainaomataia kaain Iteraera e kona ni buokiia ataei n ataia ae iai naba Mwakana ni buokiia.
Waaki ni Kakukurei aika Kona ni Karaoaki
-
Anganiia ataei n tatabemaniia nako te beeba ae tibwauaki inanon tebuina mwakoro, ao kaoia ataei bwa ana korei tamnein taian karekekai aika kabwarabwaraaki ni kiibu aikai: Te Otinako 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7. Tera ae reireiniira taian karekekai ibukin mwakan te Atua? Bukin tera e kakawaki bwa ti na ataa Mwaakana?
-
Titirakiniia ataei iaon taai ngke a namakinna ae a kainanoa ana ibuobuoki te Uea. E kanga ni buokiira n taian kaangaanga aikai? Kaungaia bwa ana taetae iaon taai ngke ngaia ke aia utu a tia n taneiai ma mwakan te Uea inanon maiuia. Kaota am koaua ae iai mwakan te Uea ni buokiira.
E kona te Uea ni buokai ni karekea te nano ae tatauraoi.
E rineia Bwarao bwa e na imanono n aki kan ongo ngke e tuangaki iroun te Uea bwa e na kainaomataia tibun Iteraera. Ko na kanga ni kaungaia ataei ake ko reireiniia ni karekea te nano ae tatauraoi bwa aonga n tauraoi ni beku ibukin te Uea ao ni karaoa Ana kantaninga?
Waaki ni Kakukurei aika Kona ni Karaoaki
-
Uotia nakon te kiraati teuana te bwai ae matoatoa, n aron te bwa, ao teuana ae maraurau, n aron te bwai ni kaitiaki. Warekia ma ataei tabeua kiibu aika a kabwarabwara aron Bwarao ni kaeka nakon taian karekekai aika kanakoaki iroun te Uea (taraa Te Otinako 8:28–32; 9:7), ao titirakiniia ataei bwa tera te bwai ae tei ibukin nanon Bwarao ke kateina. Tera ae nanonaki ni karekean te nano ae marau? (taraa Motiaea 3:17).
-
Ma te kiraati, korei tabeua mwakuri are e na kona ni kaotia bwa e matoatoa nanora (te katooto, te un ma tarim ao mwanem ke n rawa n tataro). Ti na kanga ni kaotia nakon te Uea ae ti tangiria ni karekei naano aika marau?
Toan te Riao e kanikinaea mwakan Iesu Kristo ni kamaiu.
Toan te Riao e reireiniia tibun Iteraera ae e kainaomataia te Uea mai Aikubita. Toan te Riao bon kanikinaean naba ana mwakuri ni kamaiu Iesu Kristo, ae e kainaomataira man e bure ao te mate. N te bong aei, e buokira te toa n uringa ana karea Iesu Kristo ibukira. Reiakinaia ataei iaon taekan Toan te Riao e kona ni buokiia ni karekea te taneiai ma te toa ae uaana riki.
Waaki ni Kakukurei aika Kona ni Karaoaki
-
Tuangiia tabeman ataei bwa ana wareka Te Otinako 11:5–6 n reirei taekan te kabanea n rekenikai ae kanakoa te Uea nakoia kaain Aikubita. Tuangiia ataei ake tabeman bwa ana wareka Te Otinako 12:3, 5–7, 13 n reiakinna bwa a kanga ataein Iteraera ni kamaiuaki man te karekekai anne.
-
Ni buokiia ataei n ataia ae te Tia Kamaiu bon te Tibutetei ae kamaiura, kaota tamnein te tibutetei. Kaoia ataei bwa ana wareka Te Otinako 12:3–7 ni kakaea te aeka n tibutetei ae tangiriia ana aomata te Atua bwa ana kabongana ibukin te Toa Are te Riao. E kanga te tibutetei aei n aron Iesu Kristo? (Te katooto, e kororaoi Iesu, ao Iesu e kabwaroa Raraana ibukin kamaiura.) Raa kanikina riki tabeua aika a buokira n iangoa taekan Iesu Kristo?
-
Ikotaki ni wareki tataro n toa (taraa Reirei ao Berita aika Tabu 20:77, 79), ao mataku n te witeo “Always Remember Him” (ChurchofJesusChrist.org). E kanga te toa n ti tebo ma te Toa Are te Riao? Tera ae ti kona ni karaoia n iangoa taekan Iesu n tain te toa?
-
Tibwauaia ma ataei te anene n te toa ae mamate nanom iai (taraa Bokin Anene, nambwa 169–96), ao taetae iaona bwa e kanga ni buokiko n uringa ana anga karea te Tia Kamaiu. Kaoia ataei bwa ana tibwaua te anene ae karaoa naba ae aekan anne nakoia.
Kaungaa te Kamatebwai n te Mweenga
Kaoia ataei bwa ana tibwauaia ma aia utu bwaai aika a reiakin ibukin Iesu Kristo n tain te Moanrinan n te bong aei.
Kanakoraoan Ara Anga reirei
Buokiia ataei ni katea tamnein te karaki n aia iango. Ngkana a tia ataei ni katea tamneina n aia iango te bwai are a reiakinna, ana kona n ururingnga riki. Kakaai kawai ni buokiia ataei ni katamneia n aia iango karaki man booki aika tabu man kabonganakin bwaai n ibuobuoki n aron tamnei, korotamnei, witeo, taore, ke kain te karaki.