“Eberi 18–24. Te Otinako 18–20: ‘Ti Na Toui Mwiin Ana Taeka te Uea ni Kabane Do,’” Nakomai, Iriirai—Ibukin te Moanrinan: Te O Tetemanti 2022 (2021)
“Eberi 18–24. Te Otinako 18–20,” Nakomai, Iriirai—Ibukin te Moanrinan: 2022
Te maunga are i Aikubita e kakoauaaki bwa te Maunga ae Tinai.
Eberi 18–24
Te Otinako 18–20
“Ti Na Toui Mwiin Ana Taeka te Uea ni Kabane”
Ngkana ko wareka Te Otinako 18–20, iangoi reirei aika a na rangin ni uaana nakoia ataei. Ko na bae ni kaungaaki bwa ko na katuruturua ni kamaatata te reirei irarikin aika kaotaki inano.
Korei Am Namakin
Kaunga te Tibwatibwa
Kaoia ataei bwa ana tibwaua teuana mai ibuakon Tuua ake Tebuina (ke rinanon tabeua tuua ma ngaia) ao bukin tera a namakinna bwa e kakawaki karinean te tua anne.
Reirei te Reirei: Ataei aika a Uarereke
Tibwauakin au koaua e kona ni kakabwaiaia tabeman.
E kimwareirei Ietero ngke Mote e tibwaua te bwai ae a tia ni karaoia te Uea ibukiia natin Iteraera. E kona te karaki ni kaungaia ataei aika ko reireiniia n tibwauaia ma tabeman te bwai ae ataia ae koaua.
Waaki ni Kakukurei aika Kona ni Karaoaki
-
Warekia nakoia ataei taeka aikai man Te Otinako 18:8: “Ao Mote e tuanga tamani buna bwaai ni kabane ake e a tia ni karaoi te Uea.” Titirakiniia ataei ngkana a uringa te bwai ae karaoia te Uea ni buokiia ataein Iteraera ni kitana Aikubita. (Ni buokiia n uringnga, kaota tamnein ke iteraniba n te waaki ni kakukurei man reirei ake imwaina). Tera bwaai ake e a tia ni karaoi te Uea ni buokiira iai? Buokiia ataei n ataia bwa n aron Mote, ti kona n tuangiia aomata ake tabeman bwaai aika tamaroa ake e a tia te Uea ni karaoi ibukira.
-
E kona te kiraati n te Moanrinan n riki bwa te tabo ae moan te tamaroa ibukiia ataei ni kataneiaia n tibwauai koaua aika bebete. Tibwaua am koaua ma ngaia, ao buokiia n tibwauaia ma ngaia n tatabemaniia nako koaua n te euangkerio aika a kakoauai.
E anga tuua te Atua bukina bwa E tangirai bwa n na kukurei.
Tuua bon ana kaetieti Tamara are i Karawa ibukin kakaeakin te rau n te maiu aei ao te kimwareirei n te maiu are akea tokina. Ko na kanga ni kaungaia ataei bwa ana karinei ana tua te Atua?
Waaki ni Kakukurei aika Kona ni Karaoaki
-
Kaoti tamnei man “Tuua Ake Tebwina” (inanon Karaki man te O Tetemanti), ao kaoia ataei bwa ana tibwaua te bwai ae ataia n te karaki. Buokiia ni kaotaia n iteran te karaki ae aki rangin n taneiai mangaia.
-
Ngkana ko wareki tabeua tuua man Te Otinako 20:3–17 nakoia ataei (ke taekin n oin am taeka ae ana kona n ota iai), kaoia bwa ana anganiko te kanikina ni kaotia bwa e nakoraoi ngkana tuua bon bwaai aika ti na riai ni karaoi ao te kanikina ae ti riai n aki karaoia. Tibwaua am koaua iaon te kukurei ae roko man te ongotaeka nakon ana tua te Atua (taraa Motiaea 2:41).
-
Aneneia ma ataei te kuna iaon aron Tamara are i Karawa ni kakabwaiaira ngkana ti ongotaeka nakon ana tua, n aron “Keep the Commandments” (Aia Boki n Anene Ataei, 146–47). Kaoia ataei bwa ana kakauongo nakon taeka ni kakaea bwa tera kakabwaia aika ti kona ni karekei ngkana ti ongotaeka.
I kona ni karineia au karo.
Karineaia kaaro e raka riki nakon ae ti te ongotaeka nakoia. Buokiia ataei bwa ana atai kawai riki tabeua ae a kona iai ni karineia aia karo.
Waaki ni Kakukurei aika Kona ni Karaoaki
-
Buokiia ataei n reiakina te kibuntaeka “Karinea tamam ao tinam” (Te Otinako 20:12). Ngkana e kainnanoaki, kabwarabwara bwa ngkana ko “karinea” temanna e kona n nanonaki n ae kaotan te karinerine ibukiia ke ni uota te kukurei nakoia. Tera ae kona ni karaoia Iesu ni karinea Tamara are i Karawa? E kanga ni karinea tinana? (taraa Ruka 2:48–51; Ioane 19:26–27). Buokiia ataei n iangoi bwaai aika kona ni karaoi ni karineia aia karo, ao kaoia bwa ana karaoia n te kaotioti aia iango.
-
Kaoia ataei bwa ana karaoa te kaati ni karabwarabwa ibukiia aia karo. A kona ni koroia ke ni korotamnei inanon te kaati te bwai ae a na karaoia ni karineia aia karo.
Reirei te Reirei: Ataei aika a Ikawai Riki
I kona ni ibuobuoki ni “uouota te bwai ae awawata” ni karaoa ana mwakuri te Uea.
E reiakinna Mote bwa katakin kairakiia natin Iteraera ni kabane ti irouna e bon “aki raoiroi” (Te Otinako 18:17). Te tangira ao te beku bon imarenara e kona n ibuobuoki ni kabebetei rawawataia ara taan kairiiri.
Waaki ni Kakukurei aika Kona ni Karaoaki
-
Kaoia ataei bwa ana korea tamnein te mronron aika mwaiti iaon te burakibooti n tei ibukiia membea n te uoote. Korea tamnein te mronron ae koreaki iaona bitiobi. Bukin tera e na riki bwa te kanganga ngkana ti te bitiobi ae na buokiia ni kabane aomata? Bootaki ni wareka Te Otinako 18:13–26 ni kakaea te kaetieti ae anga Ietero ngke e kataia ni karaoi bwaai ni kabane Mote n tingaia. Tuangiia ataei bwa ana koroi taeka n mronron ake tabeua n tei ibukiia taan kairiri n te uoote ake tabeua ao membwa ake a buoka te bitiobi ni buokiia ake tabeman. A kanga taan kairiiri aikai ao membwa ni kabebetea rawawatan te bitiobi? Ti na kanga ni karaoa ae aekan naba aei ibukiia ara taan kairiiri n te uoote? ibukiia ara karo ni mweengara?
-
Buokiia ataei ni koroi araia am taan kairiiri n am uoote. N te kiraati, rinea tia kairiiri ao maroroakina te bwai ae karaoia te aomata aei ni kakoroa nanon ana mwakuri te Uea ao tera ae a kona ni karaoia ataei ni buokia.
Tamneite mwaane e iobai ma te aineTe beku ibukiia aomata riki tabeman bon te kawai teuana ae ti kona n ibuobuoki n ana kawai te Uea.
E kakawaki bwa ti na karimoa moa te Uea inanon maiura.
Ti bane n iai bwaai aika ti na kaririaki ni karaoi imwain te Atua inanon maiura. Ko na kanga ni buokiia ataei n ataia bwa tera ae nanonaki ni karimoan moa Tamara are i Karawa?
Waaki ni Kakukurei aika Kona ni Karaoaki
-
Bootaki ni wareka Te Otinako 20:1–7, ao kabwarabwara bwa bwaai aika ti katikui imatan te Atua inanon maiura e kona n ae ti tebo ma “atua ake tabeman” ao “te boua ae kaarak[i]” aika a taekinaki inanon kiibu 3–4. Titirakiniia ataei bwa bukin tera Tamara are i Karawa e tangiriira bwa ti na Karimoa moa. Tera kakabwaia aika E beritan nakoira ngkana ti karaoia? Titirakiniia ataei bwa ti na kanga ni kona ni kaota Tamara are i Karawa bwa E kakawaki riki nakon bwaai ni kabane inanon maiura.
-
Iangoa te mwakuri ae moa kakawakina, n aron tebokan baira imwain ae ti amwarake ke karinakin moa te tiaoki imwain ae ti karin ara kau. Tera ae kona n riki ngkana tiaki karaoi moa bwaai aika kakawaki riki? E kanga aron aei ni karimoan moa Tamara are i Karawa inanon maiura? Kaota am koaua bwa e kanga karimoan moa te Atua n tia ni kakabwaiako, ao kaoia ataei bwa ana tibwaua aia koaua, naba.
-
Aneneia ma ataei kunan ana karikibwai te Atua, n aron “My Heavenly Father Loves Me” (Aia Boki n Anene Ataei, 228–29). Tera ae ti reiakinna man te anene ibukin kakawakin karimoan moa Tamara are i Karawa inanon maiura?
E anga tuua te Atua bukina bwa E tangiriira bwa ti na kukurei.
Ana rangin ni kawakin riki tuua ataei ngkana a iangoia bwa kaotan ana tangira te Atua ao taai ni kaoti aia tangira Ibukina.
Waaki ni Kakukurei aika Kona ni Karaoaki
-
Katauraoi mwakorokoron beeba ma tuua inanon Te Otinako 20:3–17 iaoia. Korei nambwa man teuana nakon tebuina iaon te burakibooti, ao kaoia ataei bwa ana katikui mwakrokoro ni beeba n etin baireaia iaon te burakibooti. Taekinna bwa ti na kanga n irii tuua aikai. Ibukin aia iango, a kona n tarai Atuun Rongorongon te Euangkerio “Ten Commandments” (topics.ChurchofJesusChrist.org).
-
Kaoia ataei bwa a na korei tamnein taeka man tuua aika kakawaki ni buokiia n ururingi.
-
Karakina karakinan Chloe man ana rongorongo Titita Carole M. Stephens “Ngkana Kam Tangirai, Kawakin Au Tua” (Liahona, Nobembwa 2015, 118–20). E kanga te karaki ni buokiira n ataia bwa bukin tera ngkai e anganiira te Uea tuua? E kanga te ongotaeka ni kaota ara tangira ibukin te Atua?
Kaungaa te Kamatebwai n te Mweenga
Kaoia ataei bwa ana iangoa te bwai ae a tangiria ni karaoia ibukin te bwai ae a reiakinna n te kiraati. Buokiia ni karaoi kauring aika bebete n te bwai ae ana karaoia ae a kona ni uotia nakon mwengaia.
Kanakoraoan Ara Anga reirei
Buokiia ataei bwa a na kina te Tamnei. Ataei a kona ni kinaa uaan te Tamnei. Reireiniia bwa namakinan te rau, te tangira, ao te kimwareirei are a karekea ngkana a taetae ke n anenea taekan Iesu Kristo ao Ana euangkerio e roko mairoun te Tamnei ae Raoiroi.