“Eberi 4–10. Te Otinako 14–17: ‘Tei Moa, ao Nora Ana Aro ni Kamaiu te Uea,’” Nakomai, Iriirai—Ibukin te Moanrinan: Te O Tetemanti 2022 (2021)
“Eberi 4–10. Te Otinako 14–17,” Nakomai, Iriirai—Ibukin te Moanrinan: 2022
The Red Sea
Eberi 4–10
Te Otinako 14–17
“Tei Moa, ao Nora Ana Aro ni Kamaiu te Uea”
Ngkana ko wareka Te Otinako 14–17, korei am namakin n tamnei ake ko karekei . A konaa namakin aikai ni buokiko ni bairea am reirei n koroboki aika tabu ao koaua ake ko reiakin nakoia ataei.
Korei Am Namakin
Kaunga te Tibwatibwa
Te Otinako 14–17 e onrake ma karaki aika teimatoa uringakiia. Kaoia tabeman ataei bwa ana tibwaua te karaki ae ataia man mwakoro aikai, n raonaki ma te bwai ae a reiakinna mai iai.
Reirei te Reirei: Ataei aika a Uarereke
Te Uea e kainaomata Mote ma ana aomata.
Kitanan Taari ae Urura bon te kakai are a kaota iai aron mwakan te Uea Mote ao tibun Ieraera. Atakin taekan Mwakana e kona ni buokiia ataei n Onimakinna.
Waaki ni Kakukurei aika Kona ni Karaoaki
-
Iangoi kawai aika ko na tibwaua iai aia karaki tibun Ieraera n rinanon Taari ae Uraura n te kawai ae kakaongora ao n ururingaki. Te katooto, ngkoe ke temanna kain te uote kam kona ni kunnikaini ngkami n aron Mote n taekina te karaki man Te Otinako 14:5, 9–10, 13–16, 19–22. A kona ataei ni kabotaui kaintekateka bwa kanga Taari ae Uraura, ao a kona n ira te aomata are e tei ibukin Mote ngke e karekea kawaina imarenaia. Ke a kona ataei ni kabotauia bwa aongkoa ngaia te ran ao ni mwaing n nako ni bwenaua iteran te ruu n aron are karaoia Mote ni bwenauaia. Katuruturua bwa te Uea e angan Mote te mwaaka bwa e na bwenaua taari bwa aonga tibun Iteraera ni kainaomataki man te tautoronaki.
-
Kaoia ataei bwa ana karana te iteraniba n te waaki ni kakukurei ngke ko rinanon te karaki ma ngaia man Te Otinako 14:5–22. Ngkanne a kona ni botaki ni mwakuri ni karakina te karaki ni kabongana te iteraniba n te waaki ni kakukurei.
Te Otinako 15:23–25; 16:14–15; 17:1–6
E na karekei kainnanou te Uea.
Rongorongon te Uea ni katauraoa te amwarake ao te ran ibukiia tibun Iteraera n te buakonikai e reireiniira bwa E kona ni buoki kainnanora. Iangoia bwa tera ae ko kona ni karaoia ni katabeia ataei ni kamatebwai karaki aikai.
Berena mairoun te Atua e kamwarakeia tibun Iteraera; ti kainnanoa naba kamwarakeara n te tamnei ni katoabong. Te Korobanna n te Kara ae e Ran iroun Leopold Bruckner
Waaki ni Kakukurei aika Kona ni Karaoaki
-
Buokiia ataei ni katea kain bwaai aika riki inanon Te Otinako 15:23–25; 16:14–15; 17:1–6, ni baka n riki bwa Mote ke tibun Iteraera. Ngkana e kona, uota te bwai ae na kona ni buokia n taekin karaki n tatabeua nako, n aron te mwaanga (ni kamaiua te ran i Mara), te katibu ke te bwaata (ni kaonna n te berena), ao te kai ao te bwa (ibukin te ran i Orebi). E kanga te Atua n tararuaia tibun Iteraera? E kanga n tararuaira ni katoabong?
-
Tibwaua te karaki inanon Te Otinako 15:23–25; 16:14–15; 17:1–6 (taraa naba “Mote E Kairiia Iteraera,” inanon Karaki man te O Tetemanti). Ngkai ko tibwatibwa, kaoia ataei bwa ana korei tamnein te karaki n tatabeua nako. Tera ae ti reiakinna ibukin te Atua man taian karaki aikai?
I kona ni boutoka ara burabeti.
Karakinan Aaron ma Ura n taua ieta bain te burabeti Mote e kona ni kabotauaki ma ara kekeiaki ni boutoka ara burabeti ae maiu.
Waaki ni Kakukurei aika Kona ni Karaoaki
-
Kaoia teniman ataei bwa ana teirake i moan te ru ao n tei ibukin Mote, Aaron, ao Ura ngkai ko taekina te karaki man Te Otinako 17:8–16. Tera ae ti kona ni karaoia n te bong aei ni buoka ara burabeti, kanga aron Aaron ao Ura ni buoka te burabeti Mote?
-
Kaota tamnein te burabeti ae maiu, ao titirakiniia ataei bwa antai ngaia. Buokiia ataei n uring tabeua bwaai ake e a tia te burabeti n reireiniira n te tai ae aki maan n nako. Tuangiia ataei bwa a na tibwauai tabeua kawai aika a ira te burabeti. Ikotaki n anenei tabeua kibun “Follow the Prophet,” n raonaki ma te kabanea ni kibu (Aia Boki n Anene Ataei, 110–11).
Reirei te Reirei: Ataei aika a Ikawai Riki
I kona n reiakinna n iriira n tainako te Tamnei.
E ataia man te kaotioti Mote aron kairakiia tibun Iteraera rinanon Taari ae Uraura (taraa Reirei ao Berita aika Tabu 8:2–3). E kanga te karaki aei ni buokiia ataei aika ko reireiniia n reirei ni mwakurii aia kaotioti?
Waaki ni Kakukurei aika Kona ni Karaoaki
-
Kaota tamnein Mote ngke e bwenaua Taari ae Uraura te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu. Tuangiia ataei bwa ana rinanon Te Otinako 14:5–22 ao tibwaua te bwai ae ataia man te karaki. Tera ae karina te Reirei ao Berita aika Tabu 8:2–3 nakon otara n te karaki? Taekina am taneiai ngke e tuangko te Tamnei ae Raoiroi te bwai teuana n am iango ke n nanom, ao kaoia ataei bwa ana taekina aia taneiai.
-
Kauringiia ataei ni karakinan Nibwaai n ira te Tamnei ngke e nako n anai bwatua buraati (taraa 1 Nibwaai 4:1–6). Buokiia ataei n ataia bwa e riai naba Mote n ira te Tamnei ngkana e kairiia ana aomata rinanon Taari ae Uraura. Buokiia ataei ni korea teuana te kibu ae boou nakon “Nephi’s Courage” (Aia Boki n Anene Ataei, 120–21) iaon taekan te Uea ngke e katauraoa te kawai ibukin Mote ngke e kaota te ungannano ao e ira te Tamnei. Anenea te kibu ae boou ni botaki.
Te Otinako 15:23–25; 16:14–15; 17:1–6
Te Uea e na katauraoi ibukin kainnanou.
Ngkana ti rairaki nakon Iesu Kristo, E kona ni buokiira n taai ni kangaanga ni maiura, n aron are E buokiia natin Iteraera.
Waaki ni Kakukurei aika Kona ni Karaoaki
-
Tibwaua te kiraati ni kakauoman ke ni kurubu aika uarereke, ao anganiia kurubu n tatabeua nako bwa ana wareka teuana mai ibuakon kibuntaeka aikai: Te Otinako 15:23–25; 16:14–15; 17:1–6. Tuangiia ataei inanon kurubu n tatabeua nako bwa ana korei tamnein te bwai ae a warekia inanon kiibu aikai, ao imwiina tuangiia kaain te kiraati ake tabeman bwa ana ketina te bwai are a tia ni koroia. Buokiia ataei n ata te bwai ae a reirei karaki aikai n taekan Iesu Kristo. Tera kataaki aika iai irouia aomata n te bong aei? A kanga Tamara are i Karawa ao Iesu Kristo ni buokiira ni kataakira?
-
Ngkana ko rinanon karaki aikai, titirakiniia ataei bwa bukin tera te kariki ao te ran a rangin ni kakawaki nakoia ana bakatibu Iteraera. Tera ae na kona n tia n riki ngke arona bwa akea irouia bwaai aikai? Buokiia ataei ni kaotaia bwa te kariki ao te ran n te toa bon bwaai aika riai n te tamnei nakoira (taraa Ioane 4:13–14; 6:35, 48–51). Ko na bae n tuangiia ataei bwa ana tibwauai aia namakin iaon te toa.
Ti kakabwaiakaki ngkana ti kamatoaia ara taan kairiiri n te Ekaretia.
Ataein Iteraera a tokanikai n te buaka ni kaitara Amareka ti ngke e tabeki baina Mote nako karawa. Tera ae ti kona n reiakinna iaon taekaia ara taan kairiiri man te karaki aei?
Waaki ni Kakukurei aika Kona ni Karaoaki
-
Ni buokiia ataei n rinanon te karaki aei n Te Otinako 17:8–16, koroia iaon te burakibooti: Antai ae buoka Mote n tain te buaka? Tera te bwai ae a karaoia? Tera mwiina? Kaoia ataei bwa ana kakaai kaeka inanon kiibu aikai. Tera ae reireiniira te karaki aei n aron buokan abanuean te Atua bwa e na nakoraoi? Tera ae ti kona ni karaoia ni boutoka, kamatoa, ao n iriia ara taan kairiri n te Ekaretia?
-
Kaoia ataei bwa ana wareka Te Otinako 17:8–16 ao ni korea tamnein te bwai ae a warekia. Kaungaia bwa ana koroi iaon aia korotamnei te rongorongo ae a reiakinna man te karaki. Bukin tera ngkai e rangin ni kakawaki te rongorongo aei ibukira n te bong aei?
Kaungaa te Kamatebwai n te Mweenga
Kaoia ataei bwa ana rinea teuana te karaki man am marooro n te bong aei. Buokiia bwa ana iangoa te bwai ae a kona ni karaoia n te wiiki are imwiina ni kabongana te bwai ae e reirei te karaki anne.
Kanakoraoan Ara Anga reirei
Ataei a tatangiri taian karaki. A kona ataei n ota riki n reirein te euangkerio ngkana a kona n noriia inanon maiuia aomata inanon maiuia. Ngkana ko tibwauai karaki man koroboki aika tabu, iangoia n tibwauai taneiai man maium are e reirei naba te reirei anne. Ko kona naba ni kaoia ataei bwa ana tibwaua aia taneiai.