“Eberi 4–10. Te Otinako 14–17: ‘Tei Moa, ao Nora ana Aro ni Kamaiu te Uea,’” Nakomai, Iriirai—Ibukiia Aomata n Tatabemaniia ao Utu: O Tetemanti 2022 (2021)
“Eberi 4–10. Te Otinako 14–17,” Nakomai, Iriirai—Ibukiia Aomata n Tatabemaniia ao Utu: 2022
Te Taari are Uraura
Eberi 4–10
Te Otinako 14–17
“Tei Moa, ao Nora ana Aro ni Kamaiu te Uea”
E tua te Atua nakon Mote ni korea are rinanona “bwa te kauring n te boki, ao n taekinna” nakon Iotua (Te Otinako 17:14). N aron anne, korean baike ko rinanoni aika tabu a na buokiko ao naake ko tangiria n uringa raoiroin te Uea.
Korea Am Namakin
A kamwaneaki Tibun Iteraera. Taari are Uraura e mena n te itera are teuana, ao ana taanga ni buaka Barao a mwananga man te itera are teuana. Birinakoia mai Aikubita, e taraa, n ae rangi ni kimototo. Ma iai ana taeka te Atua nakoia tibun Iteraera are E tangiria bwa a na uringa inanon roro aika mwaiti: “Tai maku. … E na buaka te Uea ibukimi” (Te Otinako 14:13–14).
Man te tai anne, ngke ana aomata te Atua a kainnanoa te onimaki ao te unganano, a oki rikaki nakon rongorongoia tibun Iteraera aio ni kainaomatakiia. Ngke e tangiria Nibwaai ni kaungaia tarirna, e taku, “Ti a kakorakoraira n ai aron Mote; bwa e koaua ae e taetae nakon ranin Taari are Uraura ao a bwenaaki nako ikai ao nako iekeke, ao a rinanona ara bakatibu, n otinako man te tautaekanaki, i aon te tano ae mwau” (1 Nibwaai 4:2). Ngke e tangiria ana aomata te Uea ae Rimwaai bwa a na “tabeki rake [atuuia], man kimwareirei,” e kauringia naba te karaki aei (Motiaea 7:19). Ngke e tangiria Aramwa ni kakoaua nakon natina te mwaane ni mwaakan te Atua, e taekina naba te karaki aei (taraa Aramwa 36:28). Ao ngkana ti kainnanoa te kainaomataaki—ngkana ti kainnanoa te onimaki riki, ngkana ti kainnanoia bwa ti na “tei moa, ao n nora ana aro ni kamaiu te Uea”—ti kona n uringnga aron “te Uea ni kamaiuia Iteraera n te bong arei mai inanon baia I-Aikubita” (Te Otinako 14:13, 30).
Iango ibukin te Kamatebwai i bon Iroum ni Koroboki aika Tabu
Iai mwaakan te Atua ni kainaomataai.
Ngkai ko wareka Te Otinako 14:1–10, iangoia bwa tera aia namakin tibun Iteraera ngke a nora ana taanga ni buaka Barao ni uakaan. Tao ko namakinna bwa ko kainnanoa te kakai n tokanikai i aon te kakaewenako ae matoa are ko kaitaraa. Tera ae ko reiakinna man Te Otinako 14:13–31 are kona ni buokiko n ukora ana kainaomata te Atua i nanon maium? Tera ae ko a tia n reiakinna i aon kawai are te Atua e anga te kainaomataaki man te kangaanga? Iangoia bwa ni baikara ae ko nora iai Mwaakana ni kainaomata i nanon maium.
Taraa naba Reirei ao Berita aika Tabu 8:2–3; L. Tom Perry, “The Power of Deliverance,” Riaona, Meei 2012, 94–97; Mwabe n te Baibara, nambwa. 2, “Te Otinako mai Aikubita ao te Rin nako Kanan.”
E kona te Uea ni bitii baika a mangingi nakon ae karewe.
Ngkai ko wareka rongorongon mwanangaia tibun Iteraera i nanon Te Otinako 15:22–27 nakon te aba ni berita, iangoi bwai i nanon maium are e taraa ni “mangingi” n aron ranin Mara. Iangoi titiraki aikai ngkai ko iangoi kiibu aikai: E na kanga te Uea ni bitii baika a mangingi i nanon maium nakon ae karewe? Tera kakawakin bwaai aikai i nanon maium? Tera ae e anga kiibu 26 ao 27 i aon aron te Uea ni kakabwaiaira ngkana ti ongo nakon Bwanaana?
Te Otinako 15:23–27; 16:1–15; 17:1–7
I kona n onimakina te Uea, i nanon naba taai ni kangaanga.
Tao ti na kaririaki bwa ti na motiki taekaia tibun Iteraera ibukina bwa a ngurengure ke a un ngkana a angabuaka baike a riki, riki imwin baike e a tia ni karaoi te Atua ibukiia. Ma ngkai ko wareka Te Otinako 15:23–27; 16:1–15; 17:1–7, iangoia bwa ko a tia naba ni karaoa ae aron are a karaoia. Tera ae ko reiakinna man are a rinanona tibun Iteraera are e kona ni buokiko ni kauarerekea te ngurengure ao n onimakina riki te Atua? N aron te katooto, tera te kaokoro ae ko noria n anuaia tibun Iteraera nakon kangaanga ao te anua are e karaoia Mote? Tera ae a rereiniko kiibu aikai ibukin te Atua?
Taraa naba 1 Nibwaai 2:11–12; “Sin of Murmuring” (video), ChurchofJesusChrist.org.
Te manna mairoun te Atua e kamwarakeia tibun Iteraera; ti kainnanoa naba kanuaakin tamneira. Fresco iroun Leopold Bruckner
I riai n ukoukora kanan tamneiu ni katoa bong.
E mwaiti reirei n tamnei are ti kona n reiakinna man te berena, are e kuneaki i nanon Te Otinako 16. Taraa te kaetieti ae bwarabwara raoi are a anganaki tibun Iteraera i aon aron bootana, kabonganaana, ao kawakinan te berena (taraa Te Otinako 16:16, 19, 22–26). Tera ae ko kunea i nanon kaetieti aikai are e uaana nakoia ngkai ko ukoukora kanan tamneim ni katoa bong?
Taraa naba Ioane 6:31–35, 48–58 ao taian witeo “Daily Bread: Pattern,” “Daily Bread: Experience,” ao “Daily Bread: Change” (ChurchofJesusChrist.org).
Iesu Kristo bon au bwa ao au ran ni kamaiu.
Iangoa te Tia Kamaiu ngkai ko wareka Te Otinako 17:1–7. N te aro raa ae Iesu Kristo bon te bwaa nakoim? (taraa Taian Areru 62:6–7; Ereman 5:12). N te aro raa ae Ngaia te ran? (taraa Ioane 4:10–14; 1 I-Korinto 10:1–4; 1 Nibwaai 11:25).
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Te Otinako 14:13–22.A kona n unga kaain am utu ni “bwenaa” te ran i nanon te boora ke te taabu n tebotebo, n aron are e karaoia Mote nakon Taari are Uraura. Buokiia kamatataia bwa e aki kona ni bwenaaki Taari are Uraura n akean mwaakan te Atua. Ni baikara ae ti nora mwaaakan te Atua ni maiura ao ni maiuia ara bakatibu?
-
Te Otinako 15:1–21.Imwin mwanangaia ni kawain Taari are Uraura, tibun Iteraera a anenea te kuna n nebonebo are aranaki bwa kunan Mote, are kuneaki i nanon Te Otinako 15:1–21. N te utu, wareki kiibu aikai ao tarai taeka are a kakoaua are e karaoaia te Atua ibukiia tibun Iteraera ao kibuntaeka riki ake a uaana. Ngkanne ko kona n anenea te kuna are e kauringa am utu baike e a tia ni karaoia te Atua ibukimi.
-
Te Otinako 16:1–5; 17:1–7.Warekan Te Otinako 16:1–5 ao 17:1–7 e kona n moana te maroro i aon te Tia Kamaiu bwa te Berena ni Kamaiu, bwa te Ran ni Kamaiu, ao bwa ara Bwaa. A kanga karaki aikai ni kauringiia te bwai are e karaoia Iesu Kristo ibukira? Bwa mwakoron ami marooro, kam kona ni wareka Ioane 4:10–14; 6:29–35, 48–51; Ereman 5:12; Reirei ao Berita aika Tabu 20:77, 79.
-
Te Otinako 17:8–16.Kam kona ni karaoia nakon te kaotioti karakinan Aaron ao Ura n tabeka rake bain Mote ao ni marorooakinna bwa e kanga aei n tei ibukin kamatoakiia naake a rineaki iroun te Atua bwa a na kairiira. Ko kona naba ni kakaei kaokoron bannaia Aaron ao Ura ma tibun Iteraera ni ngurengure nakon Mote (are e kabwarabwara i nanon mwakoro 15–17). Tera tabeua kawai are ti kona n ibuobuoki ao ni kamatoaia ara taan kairiiri? Tera kakabwaia ae ti karekea ao ara taan kairiiri ngkana ti karaoa anne?
Ibukin riki iango ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Te anene ae tamaroa: “Te Tia Kamaiuia Iteraera,” Anene n Taromauri, nambwa 6.
Katanakoraoan Am Kamatebwai
Ukera oin am atatai. N am kamatebwai ibon iroum ao n te utu, tiaki tokimi kiibu are a kaotaki ni kanoa n reirei aikai. Tao iai ana taeka te Uea nakoimi i nanon mwakoro aikai are a aki katuruturuaki ikai. Ukeuke ma te tataromwaaka ibukin te kairaki.
Kamataataan tamnein Mote ngke e bwenaa Taari are Uraura, iroun Robert T. Barrett