“Eberi 18–24. Te Otinako 18–20: ‘Ti Na Tou Mwin Ana Taeka Iehova Ni Kabane,’” Nakomai, Iriirai—Ibukiia Aomata n Tatabemaniia ao Utu: O Tetemanti 2022 (2021)
“Eberi 18–24. Te Otinako 18–20,” Nakomai, Iriirai—Ibukiia Aomata n Tatabemaniia ao Utu: 2022
Te maunga i Aikubita are e kakoauaaki ngkoa bwa Maungan Tinai.
Eberi 18–24
Te Otinako 18–20
“Ti Na Tou Mwin Ana Taeka Iehova Ni Kabane”
E reirei Titita Michelle Craig, “Ngkai ngkami ana reirei aika kakaonimaki [Iesu Kristo] , kam kona ni karekei kairiiri ao kaotioti, are e booraoi ma Ana tua, are bon katauaki ibukim ” (“Konabwai n te Maiu n Tamnei,” Riaona, Nobembwa. 2019, 21). Korei ao mwakurii kairiiri ake ko karekei ngkai ko wareka Te Otinako 18–20.
Korea Am Namakin
Mwanangaia tibun Iteraera mai Aikubita nakon iteran Maungan Tinai ae te kabanea n rinano e kaonaki n taian kakai—are a kaota iai mwaakan, ana tangira, ao ana nanoanga ae abwabwaki te Uea. Ma, iai ana kakabwaia te Uea aika ana roko n taai aika ana roko ibukiia are e riaon riki are tii kainaomatakiia mai Aikubita ao katokan bakiia ao takaia n te rabwata. E tangiriia bwa a na riki bwa Ana aomata ni berita, Ana “aomata,” ao te “botanaomata ae tabu” (Te Otinako 19:5–6). Ni boong aikai, kakabwaia n te berita aei tiaki tii ibukin teuana te aba ke te botanaomata. Te Atua e tangiriia natina ni kabane bwa a na riki bwa Ana aomata aika rineaki, ni “bon ongeaba nakon [Ana] taeka, ao ni kawakina [Ana] berita ae tabu” (Te Otinako 19:5), bwa E anga Ana nanoanga nakoia “ngaa n aomata ake a [tangiria], ao a kawakin [Ana] tua nako” (Te Otinako 20:6).
Iango ibukin te Kamatebwai i bon Iroum ni Koroboki aika Tabu
I kona n ibuobuoki ni “kabebetea te uota” ni karaoan ana mwakuri te Uea.
Ngkai ko wareki taeka n reirei ake e karekei Mote mairoun taman buuna ae, Ietero, iangoia bwa ko na kanga n riki bwa “aomata aika kakaonimaki” (n tabetai e rairaki bwa aomata aika “onimakinaki” ) are kabwarabwaraki i nanon kibu 21. Ko na kanga ni buokiia ni “kabebetea uotaia” am taan kairiiri n te Ekaretia? (kibu 22). N aron te katooto, e kanga te reirei aei n uaana nakon am waaki n te mwakuri n ibuobuoki?
Ko kona naba n iangoia bwa iai taai, are ngkoe, n aron Mote, e kataia ni karaoa ae rangi ni mwaiti. E na kanga ana reirei Ietero n uaana nakoim?
Taraa naba Motiaea 4:27; Henry B. Eyring, “The Caregiver,” Riaona, Nobembwa. 2012, 121–24.
Te mwakuri n ibuobuoki nakoia tabeman bon teuana te kawai are ti kona ni karaoa ana mwakuri te Uea.
Ana aomata ni berita te Uea bon aomata aika kakawaki i Rouna.
Iangoia bwa tera ae nanonaki n te riki bwa “ana aomata” te Uea (Te Otinako 19:5). Beretitenti Russell M. Nelson e anga teuana te kabwarabwara i aon te kibuntaeka aei: “I nanon te O Tetemanti, te taeka n Ebera ae peculiar e rairaki man segullah, are nanona ‘te bwai ae kakaawaki,’ ke ‘te kaubwai.’ … Bwa ti aonga ni kinaaki irouia ana toro te Uea bwa ana aomata aika rineaki bon te kamataata are te kabanea n rietata” (“Children of the Covenant,” Ensign, Meei 1995, 34). E kanga ataakina bwa kawakinan ara berita aika tabu a karikira bwa “aomata aika rineaki” n roota aron maium?
Taraa naba Gerrit W. Gong, “Te Bwaibwai n te Berita,” Riaona, Nobembwa. 2019, 80–83.
Waaki aika tabu a kainnanoa te katauraoi.
Te Uea e tuanga Mote bwa tibun Iteraera a riai ni katauraoiia imwain ae a “kaitibo ma te Atua” (Te Otinako 19:10–11, 17) ao ni kawakina te berita ae tabu ma Ngaia (taraa Te Otinako 19:5). Tera ae ko karaoia ni katauraoiko ni baika a tabu i nanon maium, n aron kaean te tembora ke anaakin te toa? Tera ae ko kona ni karaoia ni katauraoiko riki ibukin bwaai aikai? Iangoi riki tabeua mwakuri aika tabu are a kainnanoa te katauraoi, ao iangoia bwa e na kanga am katauraoi n roota te bwai are ko na rinanona.
E rangi n nanoanga te Atua.
Ngkai ko wareka Te Otinako 20, iangoa taraakina bwa tera maibuakon Tua ake Tebwina ae ko ongeaba nako iai ao tera ae ko namakinna bwa ko riai ni katamaroaa. Ko kona n rinea teuana te tua ni mwakuri i aona ao ngkanne kamatebwaia riki man warekan kiibu ake a irekereke (taraa Kairi nakon Koroboki aika Tabu i aon scriptures.ChurchofJesusChrist.org) ke marooro n te maungatabu (taraa te topics section n conference.ChurchofJesusChrist.org). Iangoia bwa kanoan am kamatebwai kakabwaia are a roko man kawakinan te tua anne. A kanga kakabwaia aikai ni kaota ana nanoanga te Atua ao ana tangira ibukim?
Taraa naba Carole M. Stephens, “Ngkana Kam Tangirai, Kawakin Au Tua,” Riaona, Nobembwa. 2015, 118–20.
E bon kakaawaki bwa N na karimoa te Uea i nanon maiu.
Warekan Te Otinako 20:1–7 e kona ni kairiko nakon iangoan baika a moanibwai ni maium—ko bon kona ni korei. Tera tabeua taian “atua” ke “boua aika kaaraki [ae bati]” (Te Otinako 20:3–4) are ko kona ni kaririaki bwa ko na karimoai moa imatan te Atua? E kanga karimoaan te Uea ni buokiko ni bwaai ake tabeua i nanon maium? Tera ae ko kaungaaki bwa ko na karaoia ni kabotoa am taratara i aon Tamara are i Karawa ao Iesu Kristo?
Taraa naba Dallin H. Oaks, “No Other Gods,” Riaona, Nobembwa. 2013, 72–75.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Te Otinako 18:8–12.Tera korakoran ana koaua Mote n ana aro ni kamaiu te Atua i aon Ietero? Tera bwaai ake e a tia ni karaoia te Uea ibukin ara utu? Antai ae ti kona n tibwaua ara rongorongo ma ngaia? Ti na kanga ni kawakini rongorongo aikai ibukiia roro aika a na roko?
-
Te Otinako 18:13–26.Kiibu aikai a kona ni kaungaia am utu n iangoa aia mwakuri taan kairiiri n te tabo, n aron te bitiobi, taan kairiiri irouia kairake, ke taan reirei n te Moanrinan. Tera tabeia are a taraa n “rang rawawata” (Te Otinako 18:18) bwa e na uotia temanna n tii ngaia? Tera ae ti kona ni karaoia ni kabebetea uotaia?
-
Te Otinako 20:3–17.Iangoa te kawai ae tamaroa ni marooroakin Tua ake Tebwina n te utu. N aron te katooto, ko kona ni korei tuua i nanon Te Otinako 20:3–17 i aon tebwina beba. Kaain te utu a kona ngkanne ni bairei inanon uoua mwakoro: (1) karinean te Atua ao (2) tangiraia tabeman (taraa naba Mataio 22:36–40). Iangoa rinean teuana te tua ke uoua ni katoa bong n te wiiki aei ao bootaki marooroakinna n ae bwarabwara riki. N aron te katooto, e kanga te ongeaba nakon te tua aei ni kakorakora ara utu? E kanga te Tia Kamaiu n ongeaba nako iai?
-
Te Otinako 20:12.Ni kamatataaki riki n Te Otinako 20:12, e na ibuobuoki ngkana kaain te utu a taraa nanon te taeka ae “karinea.” Ngkanne a kona kaain te utu n anga bwaai ake ti kona ni karaoi ni karineia ara karo. Kam kona n anenea te anene i aon karineaia kaaro, n aron “Quickly I’ll Obey” (Aia Boki n Anene Ataei, 197), ao ngkanne kabonganai tabeua iango man are kam karekei ni karaoa kibun te kuna anne ae boou.
Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Anene aika katauaki: “Keep the Commandments,” Aia Boki n Anene Ataei, 146–47.
Kanakoraoan Am Kamatebwai
Kakaea te tai ae nakoraoi ibukim. N angin te tai e bebete te reirei man koroboki aika tabu ngkana akea te katabetabe n tain te kamatebwai. Kakaea te tai ae nakoraoi ibukim, ao karaoa am kabanea n tamaroa n teimatoa ni kamatebwai n te tai anne ni katoa bong.
Kamataataan tamnein Mote ngke taui Tuua ake Tebwina, iroun Sam Lawlor