“Eberi 25–Meei 2. Te Otinako 24; 31–34: ‘E na Airi Matau ma Ngkoe,’” Nakomai, Iriirai—Ibukiia Aomata n Tatabemaniia ao Utu: Te O Tetemanti 2022 (2021)
“Eberi 25–Meei 1. Te Otinako 24; 31–34,” Nakomai, Iriirai—Ibukiia Aomata n Tatabemaniia ao Utu: 2022
Tamnein Iehova ngke e kaoti nakon Mote ao 70 unimwaanen Iteraera, iroun Jerry Harston
Eberi 25–Meei 1
Te Otinako 24; 31–34
“E na Airi Matau ma Ngkoe”
Aki kona ni bane ni kaotaki aan reirei n te koroboki ae e tabu ni karinan aikai. Ongora nakon te Tamnei bwa buokam ni katurua am iango iaon koaua ake ko kainnanoi.
Korei Am Namakin
Iai bukin reken te kantaninga bwa natin Iterarera a na bon tiku ni kakaonimaki nakon te Atua imwiin kaotakin Ana tua nakoia (taraa Te Otinako 20–23). E ngae ngke a tia ni ngurengure ao man n aki kakoaua n taai akekei, ngke Mote e wareka te tua i nano i oin te maunga are Tinai, a karaoa te berita aio: ”Ti na toua mwin ane E atongnga Iehova ni kabanea, ma n ira nanona” (Te Otinako 24:7). Ngkanne te Atua e wetea Mote nako aon te maunga, n tuangnga bwa e na katea te tabaenako n te aro “ba I aonga ni maeka i buakoia” (Te Otinako 25:8; taraa mwakoro 25–30).
Ma ni menan Mote iaon te maunga n reiakina bwa a na kanga kaain Iteraera ni kamenaa te Atua ibuakoia, e nage n anne a mena tibun Iteraera i nano i oin te maunga ni karaoa te bouananti ae e karaoaki n te koora bwa a na taromauria. A tibwa tia ni karaoa aia berita bwa “a na tai Atuana te Atua temanna irarikiu,” ma a “kai rairaki” man ana tua te Atua (Te Otinako 20:3; 32:8; taraa naba Te Otinako 24:3). Bon te oki ae e kamimi ma ti a ataia man te taneiai bwa te onimaki ao te motinnano e na kona ni konaaki n te aki tataonaki n nano, te maaku, ke te nanououa. Ngkai ti ukeukera menan te Uea inanon maiura, e kaungaa te nano ataakina bwa te Uea e aki kaakea Iteraera are ngkoa ao E na bon aki naba kaakeaira—ibukina bwa e “atataiaomata ao e akoi, ae iremwe n un, e bati irouna te nanoanga ao te koaua” (Te Otinako 34:6).
Iango ibukin te Kamatebwai i bon Iroum ni Koroboki aika Tabu
Au berita a kaota au anganano n ongotaeka n ana tua te Atua.
Ngkai ko wareka Te Otinako 24:3–8 taekaia Iteraera ni karaoa te berita bwa a na ongotaeka n ana tua te Atua, am iango e na rairaki nakon berita ake ko a tia ni karaoi ma te Atua. Aia berita Iteraera iai inanona waaki aika a kaokoro ma are e kantaningaia te Atua ngkai, ma kam kona n noori tabeua aika ti te arona, riki ngkana ko na iangoi koaua aika akea tokina are rabwatanaki ni waaki aikai.
N aron te katooto, kiibu 4, 5, ao 8 a taekina te baonikarea, karea ibukiia maan aika kabuokaki, ao te raara. A na kona bwaai aikai n tei ibukin te raa, ao a na kanga n irekereke ma am berita? A na kanga am berita ni buokiko ni karaoi ”ake e a tia n taku te Uea”? (te kibu 7).
Taraa naba Mote 5:4–9; Becky Craven, “Te Taratara Raoi ni kaitaraaki ma te Mamanikangare,” Riaona, Meei 2019, 9–11.
Te bure bon te tannako mairoun te Atua, ma E anga kawaira n oki.
Ni iangoia bwa a kanga natin Iteraera ni waekoa ni “kabuakakaia” (Te Otinako 32:7) n uruakan aia berita, ti kona n totokoi kairua aika ti te arona. Ngkai ko wareka Te Otinako 32:1–8, kataia kamenako n aia tabo tibun Iteraera—ko a mena n te rereua, e a tia n nako Mote inanon 40 te bong, ko aki ataia bwa e na oki nningai, ao aitaraia ma kaain Kanaan iaon te Aba ni Berita e mena bwa kanoan am tai ae e na roko (taraa naba Te Otinako 23:22–31). Tera am iango irouia natin Iteraera n tangiran te boua ae e kaaraki ae koora? E aera ngkai a rangi ni bure kakaiaki tibun Iteraera? Kiibu aikai a na kaungako bwa ko na iangoi kawai ake a na kabwakako bwa ko na onimakina temanna ke te bwai teuana irarikin te Tia Kamaiu. Iai te bwai ae e kaira am namakin bwa ko na karaoia bwa ko aonga ni karika te Uea bwa te kabanea ni kakawaki ni bwai inanon maium? Tera ae e kaira nanom n taekan ana bubuti Mote nakon te Uea Te Otinako 33:11–17?
E ngae ngke e rangi n rawawata aia bure tibun Iteraera, te karaki aio iai inanona rongorongon ana nanoanga te Atua ma ana kabwarabure. Tera ae reireiniko Te Otinako 34:1–10 n taekan te Tia Kamaiu? A kanga ana mwakuri Mote ibukiia tibun Iteraera ni kauringko bwa teraa are e karaoia Iesu Kristo ibukiia aomata ni kabaneia? (taraa Te Otinako 32:30–32; Motiaea 14:4–8; 15:9; Reirei ao Berita aika Tabu 45:3–5).
Ana Rairairi Iotebwa Timiti, Te Otinako 34:1–2 (n te Bible appendix)
Tera te kaokoro imarenan uoua n tiete ni baba ake atibu ake e karaoi Mote?
Ngke e ruorikaaki Mote man te maunga, e uoti tuaa ake a koreaki iaon baba ake atibu. Ao imwiin kuneana bwa a tia tibun Iteraera n urua aia berita, e urui baba aika atibu Moote (taraa Te Otinako 31:18; 32:19). Imwiina, e tuatua te Atua nakon Mote bwa e na manga karaoi riki uoua baba aika atibu ao n uotirikaaki nakon te maunga (taraa Te Otinako 34:1–4). Ana Rairairi Iotebwa Timiti, Te Otinako 34:1–2 (n te Bible appendix) e kamataata bwa moan tiete ni baba aika atibu iai inanona ana otenanti te Atua “ota ae tabu,” ke te Nakoanibonga ae te Merekitereka. Te kauoua n tiete iai inanona ” te tua ibukin te aro n aomata.” Aio te tua ae e karako riki are e tararuaki n te “ nakoanibonga ae rinano riki“ (taraa Reirei ao Berita aika Tabu 84:17–27), are e nanonaki bwa e na katauraoia tibun Iteraera nakon te tua ae e a rietata riki ao te nakoanibonga ae e rietata riki bwa aonga ni kona n rin imatan te Atua.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Te Otinako 31:12–13, 16–17.Imwiin warekan kiibu aikai, tao a kona kaain am utu ni maroroakina ana titiraki Beretitenti Russell M. Nelson ibukin anuara n te Tabati:”Tera te kanikina ae ko na angan te Uea ni kaota am tangira nakoina?” (“Te Tabati Bon te Bong ni Kakukurei,” Riaona, Meei 2015, 130). A kona kaain am utu ni karaoi kanikina ao ni katikui ni katomimia am autu ni kauringkami bwa ko na kanga ni kaota am tangira ibukin te Uea n te Tabati. (Taraa naba ikota ni witeo “Sabbath Day—At Home” [ChurchofJesusChrist.org].)
Man karinean te Tabati, ti kaota ara tangira nakon te Uea.
-
Te Otinako 32:1–8.Ni buokiia kaain am utu ni marorokinna bwa a kanga Iteraera n tannako mairoun te Atua, iangoa korean te kawai iaon tano ( ke kakaea teuana ae e kaan ma mwengam). I nanon tain te nakonako iaon te kawai, kaain te utu a kona n taekini kariri aika ti na boo ma ngaai bwa ti na tionako ”man te kawai are e tuatua [te Uea].” Ti na kanga n teimatoa iaon te kawai? Ngkana ti a tia n tionako, ti na kanga ni kaokiira nako iai? E kanga te Tia Kamaiu ni buokiira ni karaoa aei?
-
Te Otinako 32:26.Imwiin kuneakiia Iteraera n taromauria te bouannanti, e titiraki Mote ”Antai ae e mena n ana itera te Uea?” Ti na kanga ni kaotia bwa ti mena n ana itera te Uea?
-
Te Otinako 33:14–15.A na kona kaain te utu n tibwaua aia taneiai ngkana a tia n namakinna bwa teraa ana berita te Atua nakon Mote:”E na airi matau ma ngkoe, ao N na anganiko te motirawa.” Ko kona n anenea te anene n taromauri ibukin ara katan iaan te Atua, n aron “Tiku Irou!” (Anene n taromauri, nambwa 166).
Ibukin iango riki tabeua ibukin reireinakiia ataei, taraa te kamataata n te wiiki aei inaon Nakoai, Iriirai—Ibukin te Moanrinan.
Te anene ae katauaki: “Antai ae mena n ana itera te Uea?” Anene n Taromauri, nambwa. 260.
Kanakoraoan Ara Anga reirei
Kaoa te Tamnei. Iangoia e na kanga katangitang aika a tabu, mwakuri ni korotamnei, ao kaotan te tangira ni kairoroa namakinan te tamnei inanon mweengam n am tai n reireiniia kaain am utu (taraa Reirei n ana Kawai te Tia Kamaiu, 15).
Taromaurian Bunin te Kao, iroun W. C. Simmonds