“Meei 23–29. Iotua 1–8; 23–24: ‘Kam na Korakora ao Kam na Ninikoria,’” Nakomai, Iriirai—Ibukiia Aomata n Tatabemaniia ao Utu: Te O Tetemanti 2022 (2021)
“Meei 23–29. Iotua 1–8; 23–24,” Nakomai, Iriirai—Ibukiia Aomata n Tatabemaniia ao Utu: 2022
Tamnein Mote ngke e katabua Iotua, iroun Darrell Thomas
Meei 23–29
Iotua 1–8; 23–24
“Kam na Korakora ao Kam na Ninikoria”
Ngkana ko kamatebwaia ana boki Iotua, iangoia bwa tera bwaai aika ko reiakin irouia I-Iteraera aika a na kona ni karikirakei am onimaki iroun Iesu Kristo.
Korei Am Namakin
E ririki ni katoa rooro ma rooro, ma ana berita te Uea e na bon kakoroaki nanona: natin Iteraera aki toki ni kakarekea te aba ni berita. Ma bwaai aika imwaaia bon kangaanga aika a na riki ibukin karekean te aba ni berita are te karanga are Ioretan, nonon Ieriko, ao aomata aika buakaka man korakora ake a kaitaraa te Uea (taraa 1 Nibwaai 17:35). Irarikin anne, aia tia kairiiri ae moan te tangiraki ae Mote e a tia ni motirawa. Ao anne are e a riki mamaraia tabeman I-Iteraera ao ni maaku, ma te Uea e taku, “Kam na korakora ao kam na Ninikoria.” Bukin tera bwa a riai n namakin n te aro aei? A na riai n aki namakina bon oin korakoraia—e ngae ngke korakoran Mote ke Iotua—ma bukina bwa “e memena te Uea ae Atuam iroum ike ko nako iai” (Iotua 1:9). Ngkana iai oin rawawatara ke ara kangaanga, bwaai aika a tamaroa a kona n riki inanon maiura, bukina bwa “e [na] karaoi kamimi te Uea ningabong ibuako [ra]” (Iotua 3:5).
Ibukin te kamataata nakon te boki ae Iotua, taraa“Iotua, te boki” inanon te Bible dictionary.
Iango ibukin te Kamatebwai i bon Iroum ni Koroboki aika Tabu
Te Atua raou ngkana I kakaonimaki nako Ina.
Karaua iangoia ngke arona bwa Iotua e weteaki n onea mwiin Mote. Noora te bwai are e taekinna te Uea inanon Iotua 1:1–9 are e na kaungaa. Iangoi kangaanga ake ko a tia n rinanoi; tera inanon kiibu aikai ae anganiko te ungannano?
E na rangi ni kakaongora riki ngkana ko korea te ara ae Iotua (Yehoshua ke Yeshua n Ebera) nanona “e kamaiu Iehova.” Ao te ara Iesu e nako man Yeshua. Ao ngkana ko wareka rongorongon Iotua, iangoa aron ana mwakuri ni kairiia tibun Iteraera nako nanon te aba ni berita bwa e na kauringko n ana mition te Tia Kamaiu.
Taraa naba Ann M. Dibb, “Be of a Good Courage,” Liahona, May 2010, 114–16.
Te onimaki ao te mwakuri a uaia ni kainnanoaki ibukin te kamaiuaki.
Kiritian ngkoa a noora Raaba bwa te banna ni katoto ngaia ni mwaakan te onimaki ao te mwakuri (taraa Ebera 11:31; Iakobo 2:25). Ngkana ko wareka Iotua 2, iangoa mwakurian ana onimaki Raaba ao ana mwakuri ni kamanoa, ma ana utu, ao tikauti mai Iteraera. Tera ae e reiakiniko man am onimaki iroun Kristo ao am mwakuri ae e na kona n rootiko ma tabeman?
Ko na bon rangi ni kukurei n ataia ae Raaba bon kaain rimoa ni ikotaki ma te Uea ae Tawita ao Iesu Kristo (taraa Mataio 1:5). Tera reirei aika ti na kona n reiakin man aio?
Raaba n ana wintoo. Waiting for the Promise (Tataningaan te Berita), iroun Elspeth Young.
I kona n rinanon “kamimin” te Atua ngke arona bwa iai au onimaki iroun Iesu Kristo.
Te Uea e tangiria bwa “a aonga n ataa bain te Uea kaain aonnaba ni kabaneia, ba e mwaaka” (Iotua 4:24). Ngkana ko wareka Iotua 3–4, iangoia bwa e kanga bain te Uea ni mwaaka. E kanga te Uea ni karaoi “kamimi” inanon maium? (Iotua 3:5). Ko na kanga n rinanona—ke ni kinai—bwaai aika a kamimi aikai ni katoa tai? (te katooto, taraa Iotua 3:17).
Bukin tera ko na iangoia bwa I-Iteraera a kainanoia ni kaitiakiia imwaain ae mwananga rinanon te karanga are Ioretan? Tera te bwai ae kakawaki ae ko kona ni kunea ngkai te karanga e maenako tii ngkana “waeia ibonga … a tebo inanon tabon te ran ”? (Iotua 3:13, 15).
Ibukin kakawakin te bwai ae riki n te karanga are Ioretan, taraa 2 Uea 2:6–15; 5:1–14; ao Mareko 1:9–11. Ngkana ko iangoi raoi koroboki aika tabu aikai, tera reitakin baike ko noori imarenan waaki aika a riki aikai?
Taraa naba Gérald Caussé, “Is It Still Wonderful to You?” Liahona, Meei 2015, 98–100; “Exercise Faith in Christ” (witeo), ChurchofJesusChrist.org.
Te Ongotaeka e karekea mwaakan te Atua inanon maiu.
Mwakoro aikai a irekereke ma buaka ni katana te aba are Ieriko ao Ai. Ngkana ko warekii, iangoia bwa ko kanga ni buakana te kariri inanon maium (te katoto, taraa Iotua 7:10–13). Tera ae ko reiakinna ibukin te Atua bwa e na kona ni buokiko ao tera ae ko riai ni karaoia bwa ko na karekea Mwaakana? Te katoto, tera ae e anaa nanom iaon ana kaetieti te Atua ibukin tauan Ieriko? (taraa Iotua 6:1–5). Tao te rongorongo inanon Iotua 7 e na anganiko ana kairi te tamnei ni iangoia ngkana “e mena i buakomi te bwai ae tabuaki” inanon maium ae ko riai ni kanakoa (Joshua 7:13).
“Ma kam na nim ma te Uea ae Atuami.”
Imwiin kamaenakoan te aba ni berita imarenaia tengaum ma uoman ana baronga Iteraera (taraa Iotua 13–21), Iotua e anganiia ana kabanea n reirei. Ngkana ko warekii reirei aikai inanon Iotua 23–24, ko na bon bae ni kaawakin rinanin kauring, reirei, ao berita ni kakabwaia ake ko na kunei. Iangoi bwaai ni kabane are a tia n rinanoi I-Iteraera, bukin tera ko na taku bwa Iotua e rineia n tuangiia bwaai aikai n tokin maiuna? Tera ae ko kunea bwa e kaunga nanom n “nim ma te Uea”?(Iotua 23:8).
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Iotua 1:8.Tera ae katauira te kibu aio bwa tina kanga ni karaoa ara kamatebwai n koroboki aika tabu, n tatabemaniira ke n te utu? A kanga koroboki aika tabu ni katauraoa “kawaira nakon te kaubwai” ao ni karekea nakoira “te tokanikai ae tamaroa”?
-
Iotua 4:3, 6–9.Imwiin warekan baika e tangirii te Uea mai irouia I-Iteraera bwa a na karaoi ma atibu man te karanga are Ioretan, am utu a kona ni maroroakinii bwaai tabeua ibukin baika a korakora are e a tia ni karaoi te Uea ibukim. Ao ngkanne ko a kona n anganiia membwa n am utu te atiibu ao ni kaoiia bwa a na korea ke ni koroi tamnei iaona te bwai ae e a tia ni karaoa te Uea ibukiia.
-
Iotua 6:2–5.Am utu a na bon karekea te unga ngkana a ira te kaetieti are te Uea e a tia n anganiia I-Iteraera bwa a aonga ni kona n kaitaraa Ieriko. Tera ae tangiria te Uea mairoura bwa ti na reiakin man te karaki aio?
-
Iotua 24:15.Imwiin warekan te kibu aio, kaain te te utu a kona n tibwauai baika a rinanona riki ngkai a rineia ni beku ibukin te Uea e ngae ngke e rangi ni kangaanga. Bukin tera e kakawaki bwa ti na karaoa te rinerine bwa tina beku IBUKINA “n te bong aio” ao man aki tataninga n rinerine ni karokoa e a reke te kangaanga? Tina kanga ni boutokaia membwa n ara “auti” ngkai ti kekeiaki mwaaka ni “beku ibukin te Uea”?
Ibukin iango aika a mwaiti riki ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Anene ae rineaki: “Choose the Right,” Boki n Anene, nambwa. 239.
Kanakoraoan Ara Anga Reirei
Kaota Am Koaua n taainako. Am kakoaua ibukin te koaua ae e nako raoi mai nanom e na kona ni kakorakoraa am utu. E aki kainanoaki bwa e na rangi ni bwarabwara raoi ke n abwabwaki. Te kakoaua e bon rangi ni korakora ngkana e bon kaeineti ao e nako man te nano. (Taraa Reirei n ana Kawai te Tia Kamaiu, 11.)
Te Uea e karika oon Ieriko bwa e na bwaka. © Providence Collection/licensed from goodsalt.com