Tamnen Tebora ngke e kaira ana tanga ni buaka Iteraera, © Lifeway Collection/licensed from goodsalt.com

Meei 30–Tuun 5

Tani Motiki Taeka 2–4; 6–8; 13–16

“Iehova e Kateirakea te Tia Kamaiu”

Koroboki aika tabu a kaota koauan Iesu Kristo. Iangoia bwa a kanga karaki ake ko wareki inanon Tani Motiki Taeka ni buokiko ni kaan riki ma Ngaia.

Korei Am Namakin

Ti bane n ataia bwa aekara aron karaoan te kairua, namakina te nakobuaka iai, ao ngkanne ti rairinanora ao n raoiakinaki ni biti kawaira. Ma n tabeua keiti, ti mwanuokina aron moan raoiakinara mai imwaaina, ao, ngkana ti kaitara ma te kariiri, ti kuneira ni karaoa riki te kairua. Te banna ae kauruakinano aei bon are a rinanona tibun Iteraera are e kabwarabwaraki n aia boki Tani Motiki Taeka. Ni kairoroaki man aia koaua ao aron aia taromauri kaain Kanaan—ake koraki ake a bon riai ni kakionakoaki man te aba—tibun Iteraera a urui aia berita ma te Uea ao a rairaki mairouna n aki taromauria. Ao n tokina, a kabua Ana kamanomano ao a bwaka inanon te tautoronaki. Ao ni katoa tai are e riki aei, te Uea e anganiia aia tai bwa a na rairinanoia ao e kateirake te tia kamaiu, te mataniwi n te tanga ni buaka ae aranaki bwa te tia “motikitaeka.” Aki bane n raoiroi tani moti taeka n aia boki Tani Motiki Taeka, ma tabeman ibuakoia a kamwakura aia onimaki ae korakora ni kainaomataia tibun Iteraera ao ni manga kanakoraoi aroia n aia reitaki n te berita ae tabu ma te Uea. Karaki aikai a kauringiira bwa e aki kakawaki bwa baika aika ti katikaki nako mairoun Iesu Kristo, bon Ngaia te Tia Kabooa Iteraera ao e tauraoi n taainako ni kamaiuiira ao ni butimwaea okira Nakoina.

Ibukin rinanoakin aia boki tani motiki taeka, taraa “Te Otinako, ana boki” n te Bible Dictionary.

Iango ibukin te Kamatebwai i bon Iroum ni Koroboki aika Tabu

Tani Motiki Taeka 2:1–19; 4:1–16

Te Uea e anganai te kamaiuaki ngkana I tiotionako.

Aia boki tani Motiki taeka e riki bwa te kauring nakoira: e ngae ngke imwiin are ti a tia n namakina mwaakan te Atua inanon maiura, n taainako ko bon kona ni bwaka. E kona ni karekea te ungannano te boki aei nakoia naake a bwaka, bwa te Uea e katauraoa te kawai ni manga oki. N aron te katooto, ngkai ko wareka Tani Motiki Taeka 2:1–19, tarai mwakuri ake e kairiia kaain Iteraera ni kararoaia mairoun te Uea ao e kanga te Uea ni kamaiuiia. Tera ae e reireiniko kiibu aikai ibukin te Uea? Tera ae ko kona ni karaoia bwa ko na reitinako riki ni kakaonimaki Nakoina?

Kona kunea te banna n kakaitara, nanokawaki, ao te kamaiuaki ake a kaokiokaki ni kabuta te boki ae Tani Motiki Taeka (tarai riki mwakoro 3, 4, 6, ao 13). Ngkai ko wareka aia boki Tani Motiki Taeka, iangoia tera ae a karaoia tani motiki taeka ni kamaiua Iteraera ao e kanga te Tia Kamaiu ni buokiko ngkana ko kainnanoa te kan kamaiuaki.

Teuana te katooto ae kakawaki ibukin temanna are e buoka ni kamaiuiia Iteraera bon Tebora. Wareka rongorongona inanon Tani Motiki Taeka 4:1–16, ao ataa ana anainano are a rootaki iai aomata ake irarikina. Tera ana taeka ao ana mwakuri Tebora ake a kaotia nakoim bwa iai ana onimaki iroun te Uea? N am namakin tera ae nanonna Tebora n ana titiraki n te kibu 14: “Tiaki e nako n rimoam Iehova?”

Taraa naba Aramwa 7:13; Reirei ao Berita aika Tabu 84:87–88.

Tani Motiki Taeka 2:13

Antai Baara ma Atitoreta?

Baara bon atuan te angibuaka mai Kanaan, ao Nei Atitoreta bon atuan te mari mai Kanaan. Taromaurian boua aika uoua aikai a kaota kakawakin te mari iaon te aba ao ibukiia aomata aika kaain Kanaan. Aron aia anga aomata n taromauri bwaai aikai ao tabeman riki atua aika kewe—n raonaki ma, inanon taai, aroaro n te wenenibure ao karaoaia ataei bwa te anga karea—a kamatauninga te Uea.

Tani Motiki Taeka 6-8

Te Uea e kona ni karaoi kakai ngkana I onimakina Ana kawai.

Ni karekei ana kakai te Uea inanon maiura, ti riai n onimakina Ana kawai, e ngae ngke e aki taneiai te aba iai. Karakinan Kiteon, e kuneaki inanon Tani Motiki Taeka 6–8, bon te katooto ae tamaroa ibukin aei. E kanga te Uea ni mwakuria te kakai ae aki kona ni karaoaki ngke a konaaki Mitianaite iroun ana tanga ni buaka Kiteon? Tera am namakin ae kataia n reireiniko iai te Uea? Ko kanga n tia n noora te Uea ni karaoa Ana mwakuri n anga ake a taraa n aki kona ni karaoaki?

Russell M. Nelson, “With God Nothing Shall Be Impossible,” Ensign, Meei 1988, 33–35.

Tani Motiki Taeka 13-16

E roko te korakora man te kakaonimaki nakon au berita ma te Atua.

Tamton e bua korakorana n rabwata ao n tamnei ibukina bwa e uruaka ana berita ma te Atua, n raonaki ma ake a kaeineti riki nakoia tenaan i Natareta (ibukin rongorongoia tenaan i Natareta, taraa Warekaia Iteraera 6:1–6; Tan Motiki Taeka 13:7). Ngkai ko wareka karakinan Tamton inanon Tani Motiki Taeka 13–16, iangoi berita n tatabeua ake ko a tia ni karaoi. Ko kanga n tia ni kakabwaiaki ma te korakora ibukina ngkai ko a tia ni kawakin berita akanne? Tera ae ko reiakinna man karakinan Tamton are e kaungako bwa ko na teimatoa ni koaua n am berita ma te Atua?

Tamton e Karuoi taian Boua, iroun James Tissot ao tabeman

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Tani Motiki Taeka 2:10.Imwiin maten Iotua, te rooro are imwiina are Iteraera “a aki ata Iehova.” Maroro ma am utu bwa a kanga n ataa te Uea ma “ana mwakuri are [e] a tia ni karaoi” ibukiia. Ko na kanga ni kakoaua bwa te rabakau aio e na kawakinaki ibukiia rooro ake imwiina?

Tani Motiki Taeka 3:7–10.Kiibu aikai a kakimototoa te banna are n angin te tai e riki ni karokoa aia boki Tani Motiki Taeka. Ngkai a wareki kiibu aikai kaain am utu, a kona ni kunea bwa tera ae e karaoia Iteraera are e a tiotionako mairoun te Uea ao tera are e karaoia te Uea bwa e na kamaiuiia. Tera ae na kairiira bwa ti na mwanuokina te Uea? E na kanga ni kamaiuiira? Ti na kangaa ni kakaonimaki riki Nakoina?

Tani Motiki Taeka -16:25-30.E kaota ninikoriana ae korakora Kiteon n ongotaeka iroun te Uea, e ngae ngke aki rangi n tanoata ana mwakuri. Tera ae tuangiira te Uea bwa ti na karaoia are e aki booraoi ma nanoia tabeman? E kanga ana taeka te Uea nakon Kiteon inanon kiibu 13–16 ni kaungaira bwa ti na karaoa te bwai ae eti?

Tani Motiki Taeka 7.Ko kona ni karaoa te kaotioti ke tabeua waaki ni kakukurei aika wanawanwa ni buoka am utu n reiakinaki n te bwai are a rinanona ana tanga ni buaka Kiteon are e kabwarabwaraki inanon te mwakoro aei? E kanga ana taeka te Atua n te mwakoro aei (taraa, n aron te katooto, kiibu 2 ao 15) ni kaeineti nakon maiura?

Tani Motiki Taeka 13:5.Ana berita Tamtom ma te Uea e anganna te korakora, n aron ara berita ae anganiira naba te korakora. A na kona am utu ni karaoi tabeua mwakuri ni kamarurung ao ni maroroakinna bwa a kanga mwakuri ni kamarurung akanne ni kona ni buokiira ni karekea te korakora. Tera ae ti kona ni karaoia bwa e na buokiira n riki ni korakora n te tamnei? Ibukin tabeua iango, a kona kaain te utu ni wareka Motiaea 18:8–10; Reirei ao Berita aika Tabu 20:77, 79. E kanga kawakinan ara berita n anganiira te korakora n tamnei?

Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.

Te anene ae tamaroa: “Te Tia Kamaiuia Iteraera,” Bokl n Anene, nambwa 6.

Kanakoraoan Am Kamatebwai

Mwakuriia te bwai ae ko reiakinna. Ngkai ko kamatebwai, titirakiniko i bon iroum ko na kanga ni maiuakina are ko reiakinna, ao ngkanne motnnanoia bwa kona karaoia. Kaoa te Tamnei bwa e na kairiko. (Taraa Reirei n ana Kawai te Tia Kamaiu, 35.)

Ana Tanga ni buaka Kiteon, iroun Daniel A. Lewis