“Tuun 13–19. 1 Tamuera 8–10; 13; 15–18: ‘Ba a na Bai Iehova te Bo ni Buaka,’” Nakomai, Iriirai—Ibukiia n Tatabemaniia ao Utu: O Tetemanti 2022 (2021)
“Tuun 13–19. 1 Tamuera 8–10; 13; 15–18,” Nakomai, Iriirai—Ibukiia n Tatabemaniia ao Utu: 2022
Tawita ao Koria, iroun Steve Nethercott
Tuun 13–19
1 Tamuera 8–10; 13; 15–18
“Ba a na Bai Iehova te Bo ni Buaka”
Te katautau n te kamataata aio e na kona ni buokiko ni kinai tabeua reirei aika a kakawaki inanon mwakoro aikai. Ko na bon bae ni kunei tabeua reirei ngkana ko kamatebwai.
Korei Am Namakin
Inanon taai ake ana baronga iai Iteraera a reke tikuia n te aba ni berita, I-Biritia a bon teimatoa n reke n te kangaanga. A mwaiti taai ake ngkoa, ae e a tia iai te Uea ni kamaiuia I-Iteraera mairouia aia kairiribai. Ma ngkai unimwaanen Iteraera a taku bwa, “Ti tangira te Uea… [bwa] e na mena iaora, ao ni buaka n ara buaka” (1 Tamuera 8:19–20). Te Uea e ibita nanona, ao Tauro e katabuaki bwa te Uea. Ao te aintoa are e rangi kakamaaku are Koria e kareia ana taanga ni buaka Iteraera, Tauro—ai aroia ana taanga ni buaka ake te korakina—a bon “rangi ni maaku” (1 Tamuera 17:11). N te bong anne, bon tiaki te Uea are Tauro ae kamaiua Iteraera ma bon te tia kawakin tiibu ae nanorinano ae arana Tawita, are akea kunikaina ni buaka iaona ma tii ana kunnikai ma te onimaki ae matoatoa iroun te Uea. Te buaka aio e kaotia nakoia Iteraera, ao naake a buaka man te tamnei ae raoiroi, bwa “e aki kamaiua te aba te Uea n te kabaang ke raanti” ao bwa ana “Bai Iehova te Bo ni Buaka” (1 Tamuera 17:47).
Iango ibukin te Kamatebwai i bon Iroum ni Koroboki aika Tabu
Iesu Kristo bon au Uea.
Ngkana ko wareka 1 Tamuera 8, ataa ana namakin te Uea irouia I-Iteraera ngke a tangira riki temanna te uea nakon are boni Ngaia. Tera ae kananonaaki n rinean te Uea bwa e na “tautaeka [iaom]”? (1 Tamuera 8:7). Ko na bae naba ni iangoi kawai ake ko a tia n kaririaki bwa ko na iri kawai aika a buakaka ao n aki ira te Uea. Ko na kanga ni kaotia ae ko tangira Iesu Kristo bwa am Uea n Aki Toki?
Taraa naba Tani Motiki Taeka 8:22–23; Motiaea 29:1–36; Neil L. Andersen, “Overcoming the World,” Liahona, Meei 2017, 58–62.
1 Tamuera 9:15–17; 10:1–12; 16:1–13
Te Atua e weteia aomata man te taetae ni burabeti bwa a na beku n aan Ueana.
Te Atua e rinea Tauro ao Tawita bwa a na riki n uea rinanon te taetae ni burabeti ao te kaotioti (taraa 1 Tamuera 9:15–17; 10:1–12; 16:1–13). Aio aron Ana waaki ni weteia mwaane ao aine bwa a na beku n Ana Ekaretia n boong aikai. Tera ae ko reiakinna man rongorongo aikai iaon nanon te taeka “weteaki mairoun te Atua, man te taetae ni burabeti”? (Taekan te Onimaki 1:5). Tera kakabwaia ae reke man te wewete ao te kamatoaki man ana kariaia ana toro te Uea?
Tamnein Tamuera ngke e katabua Tauro, © Lifeway Collection/licensed from goodsalt.com
“Te ongeaaba e raoiroi riki nakon ae te angakarea.”
E ngae ngke te aomata ae rangi n ananau Tauro, e namakinna bwa e “uarereke [n] oin ana taratara” ngke e riki bwa te uea (1 Tamuera 15:17). Ma, ngke e kakabwaiaki ma te tokanikai, e a moanna n onimakinna i bon irouna riki ao e a karako onimakinan ana Uea. Tera te kakoaua ae ko nooria ikai inanon 1 Tamuera 13:5–14; 15? Ngke arona bwa ko a tia ni maeka ma Tauro, tera ae ko na riai n taekinna nakoina bwa e na kona ni buokaki n tokanikai man “rarawana” ao “imanonona”? (1 Tamuera 15:23).
Taraa naba 2 Nibwaai 9:28–29; Ereman 12:4–5; Reirei ao Berita aika Tabu 121:39–40; Thomas S. Monson, “Ponder the Path of Thy Feet,” Liahona, Nobembwa. 2014, 86–88.
“Te Uea e Taraa te Nano.”
Tera kawai tabeua ae aomata a motika iai taekaia tabeman “kam tarai baika mena i matami”? Tera ae nanonaki n taraa “are n te nano,” n aron are e karaoia te Uea? (1 Tamuera 16:7). Iangoia bwa ko na kanga ni karaoa te reirei aio n aron are ko nooria iai tabeman —ao bon ngkoe. E kanga karaoan aio n roota irekerekem ma tabeman?
Man ana buoka te Uea, I kona n tokanikai iaon kangaanga.
Ngkana ko wareka 1 Tamuera 17, iangoi raoi aia taeka aomata aika a kakaokoro n te mwakoro aio (tarai titiraki aika oti inano). Tera aia taeka ae oti ibukiia? E kanga ana taeka Tawita ni kaota ungannanona ao ana onimaki iroun te Uea?
-
Koria: kiibu 8–10, 43–44
-
Eriaba: kibu 28
-
Tauro: kibu 33
-
Tawita: kiibu 26, 32, 34–37, 39, 45–47
Iangoi raoi buaka aika a rinanoi aomata n tatabemaniia. Tera ae ko kona ni kunea inanon 1 Tamuera 17 ae e kakorakoraa am onimaki bwa te Uea e kona ni buokiko?
Taraa naba Gordon B. Hinckley, “Overpowering the Goliaths in Our Lives,” Ensign, Meei 1983, 46, 51–52.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
1 Tamuera 9:15–21; 16:7.Warekan kiibu aikai ni ikotaki ma irarkin ana taeka Unimwaane Dieter F. Uchtdorf e kona ni kaunga te nano bwa bukin tera te Uea e rinea Tauro ao Tawita “Ngkana ti bon taraira rinanon matara aikai, tao ti na aki noorira bwa ngaia ti rangin n tamaroa. Ma e noriira Tamara are i Karawa n arora ae antai raoi ngaira ao ti kona n riki n ai arona” (“It Works Wonderfully!” Liahona, Nobembwa. 2015, 23). Ma kaain te utu a na bon karekea aia tai ni maroroakin bwaaai aika a tamaroa ake a nooria irouia inanoia tabeman (taraa 1 Tamuera 16:7).
-
1 Tamuera 10:6–12.Nningai te tai ae ti a tia n noora iai te Uea ni kakabwaiaia tabeman ma mwaakan te tamnei ni kakoroa nanon katabeana ke nakoana n aiaron ae e kakabwaia Tauro? Tera te atatai ae ti kona n tibwauaia ngkana “Te Atua e [anganiira] nanora tabeua” ke “tamnein te Atua e nako [aora]” n Ana mwakuri n ibuobuoki? (kiibu 9–10).
-
1 Tamuera 17:20–54.Am utu a na bon kimwareirei ngkana a kaai ni ikotaki ni wareka rongorongon Tawita ao Koria (“Tawita ao Koria” inanon Karaki man te O Tetemanti e kona n ibuobuoki) ke n tamnei n te witeo “The Lord Will Deliver Me” (ChurchofJesusChrist.org). Aio e kona ni kairiira nakon te maroro iaon kangaanga aika ti kaitara ma ngaai ae ti taku bwa taian “kangaanga aika akea ae kona aona nakon Koria” nakoira. Ko kona naba ni koroi kangaanga aikai iaon te taakete ke ni korea tamein Koria ao karaoa te ikaruoruo ibukin karenakoan bwaai (n aron booro aika karaoaki man te beeba) nako aona.
E na bon rangi ni kakaongora naba warekan te otanga ao ana bwai ni buaka Koria (tarai kiibu 4–7). Tera ae iai iroun Tawita? (taraa kiibu 38–40, 45–47). E kanga te Uea ni katauraoa te kawai ni buokira bwa ti na kaitarai ara kangaanga aika akea ae kona aoia?
-
1 Tamuera 18:1–4.A kanga Tawita ao Ionatan n riki bwa rao aika a tamaroa I bon imarenaia? A kanga ni kakabwaiaira raoraora aika a tamaroa? Tera ae ti kona ni karaoia bwa ti na riki bwa rao aika tamaroa—nakoia riki kaain ara utu?
Ibukin iango aika a mwaiti riki ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Anene aika Rineaki: “I Will Be Valiant,” Aia Boki n Anene Ataei, 162.
Kanakoraoan Ara Anga reirei
Kaota Am Koaua n taainako. “Am kakoaua ae bebete, man tangira ae nako man te koaua n tamnei e na iai mwiina ae korakora iaoia [am utu]. Te kakoaua e bon rangi ni korakora ngkana e bon kaeineti ao e nako man te nano. E aki kainnanoaki bwa e na taekinaki raoi ke n abwabwaki” (Reirei n ana Kawai te Tia Kamaiu, 11).
Tamnein David, iroun Dilleen Marsh