Tawita ao Koria, iroun Steve Nethercott

Tuun 13–19

1 Tamuera 8–10; 13; 15–18

‘Ana Bwai Iehova te Boo Ni Buaka’

E ngae ngke te waaki ni kakukurei inano a bon baireaki ibukiia ake a uarereke ke ikawai, ko kona n kangaraoa teuana mai buakoia n tobwaa kainanoia ake ko reireiniia.

Korei Am Namakin

Kaunga te Tibwatibwa

Kaota tamneia Tawita ao Koria man bwaai aika a kakawaki n te wiiki aei n Nakomai, Iriirai—Ibukiia Aomata n Tatabemaniia ao Utu. Kaoiia ataei n tibwaua bwa tera ae ataia n taekan te karaki, ao titirakiniia titiraki ni buokiia n uringa mwakoron te karaki are a katukui.

Reirei te Reirei: Ataei aika a Uarereke

1 Tamuera 16:1–13

Te Uea e atai baike a mena i nanou.

Tibwaua te karaki bwa e kanga te Uea n tuanga Tamuera n rinea Tawita bwa te Uea e kona ni buokiia ataei n ataia bwa te Uea e kinaiira n tatabemaniira nako.

Waaki ni Kakukurei aika a Kona ni Karaoaki

• Tibwaia bwa e kanga te Uea n tuanga Tamuera are Tawiita e na riki bwa uean Iteraera (taraa 1 Tamuera 16:1–13). Ngkana ko a karakina te karaki, ko kona n angan temanna te ataei n riki bwa aongkoa Tamuera. Teuanne ke neienne e kona n angan te baunuea te beeba nakon temanna, are e tei ibukin Tawita. Tibwaua am koaua are te Uea e ataa nanon Tawita ao are E ataira n tatabemaniira nako.

• Tibwa am taneiai n are ko namakinna bwa te Uea e bon ataiko. Anenea te anene are e reireia bwa te Tia Kamaiu e kinaira ao e tangiriira, n aron “Jesus Is Our Loving Friend” (Aia Boki n Anene Ataei, 58).

1 Tamuera 17:10–54

Te onimaki iroun Iesu Kristo e kona ni buokai ni karekea te ninikoria.

Ataei e bebete rekerekeia ma Tawita te kairake ibukina bwa e ngae ngke Tawita e bon uarereke, e tokanikai iaon kakaewenako aika bubura. Buokiia bwa ana noria ae te bwai ae riki n ninikoriana ao korakorana bon ana onimaki iroun Iesu Kristo.

Waaki ni Kakukurei aika a Kona ni Karaoaki

• Manga rinanoa karakinan Tawita ao Koria ma ataei (taraa “Tawita ao Koria” inanon Karaki man te O Tetemanti), ao anganiia n tatabemaniia ni karaoa te kaotioti iaon te karaki. Tuanga te ataei are e riki bwa aongkoa Koria n taekinna, “Kanakomaia te aomata temanna, ba ti na uaia ni bo ni buaka” (1 Tamuera 17:10). Tuanga te ataei are e riki bwa aongkoa Tawita n taekina, “I nakoim n aran Iehova” (1 Tamuera 17:45). Kakoaua are ngkana iai ara onimaki iroun te Uea, E na buokiira ni karekea te ninikoria n aron are e reke iroun Tawita.

• Kabongana te iteraniba ibukin waaki ni kakukurei n te wiiki aei ni kaotia bwa abwakira Koria n riai ni kabotauaki nakon te ataeinimwaane ae kairake n aron Tawita. Kabwarabwara are ana taanga ni buaka Iteraera a bon maaka Koria. Tuangiia ataei bwa aongkoa a maaku. Ngkanne kaota tamnein Iesu Kristo, ao tuangiia ataei bwa ibukina ae iai ana onimaki Tawita iroun te Uea, e konaa n ninikoria. Tuangiia bwa a na tei ni kaetiiarake, n aron ae kaanga a ninikoria.

• Kaoiia ataei bwa a na mwaati n ae angkoa ngaiia Tawita ni waakirake ni boo ma Koria ngkai n anenea te anene n taekan te riki n ninikoria, n aron “I Will Be Valiant” (Aia Boki n Anene Ataei, 162).

1 Tamuera 18:1–4

Raao aika tamaroa a kona n riki bwa kakabwaia nakoira.

Aron aia iraorao Ionatan ao Tawita bon te katooto ae korakora n te kakabwaia are e konaa n roko mairouia rao aika tamaroa.

Waaki ni Kakukurei aika a Kona ni Karaoaki

• Korea uoua tamneia aomata iaon te burakiboti, teuana n tei ibukin Tawita ao are teuana e tei ibukin Ionatan. Warekia nakoia ataei tabeua kibuntaeka man 1 Tamuera 18:1–4 are e katuruturua aia tangira rao aika uoman aikai n aia namakin i bon imarenaia. Anganiia ataei n tatabemaniia te beeba ae te aati, ao tuangiia bwa a na kanga ni kaota te tangira nakon te rao. Imwiin tibwauaan aia iango ataei n tatabemaniia, kaoiia ataei n tatabemaniia ni kanimwa aia aati te beeba n te burakiboti.

• Tuangiia ataei taekan te rao ae tamaroa are e buokiko ni maiuakina te euangkerio ke ni karikirakea am koaua iroun Iesu Kristo, ao kaoiia ataei n tibwaia bwa antai ae buokiia. Kaoiia ataei bwa a na katea aron te mwakuri ae tamaroa are a karaoia nakon raraoia.

Reirei te Reirei: Ataei aika a Ikawai Riki

1 Tamuera 8:6; 9:15–17; 10:1–24; 16:1–13

Koraki ake a beku inanon te Ekaretia a bon weteaki iroun te Atua.

Rongorongon te Atua n rineiia Tauro ao Tawita n riki bwa taian uea e kona ni buokiia kaain am kiraati n oota bwa a kanga aomata ni weteaki ni beku inanon te Ekaretia. Rongorongo aikai e kona ni kamatoaa te onimaki are te wewete a roko mairoun te Atua rinanon Ana toro ake iai kariakaia irouia.

Kamatata n te korotamnei ngke Tamuera e kabira Tauro, © Lifeway Collection/licensed man goodsalt.com

Waaki ni Kakukurei aika a Kona ni Karaoaki

• Iaon uoua mwakoro ni beeba, korei taeka aikai ao kiibu ni koroboki aika tabu: aomata a tangira te uea (1 Tamuera 8:6); te Uea e tuanga Tamuera bwa Tauro e na riki ni uea (1 Tamuera 9:15–17); Tamuera e kabira Tauro (1 Tamuera 10:1); Tamuera e kaota Tauro nakoia aomata (1 Tamuera 10:24). Tuangiia ataei bwa ana wareki kiibuntaeka ni koroboki aika tabu ao katukua n aroia ae eti.

• Reiakinna n ikotaki te ka nimaua n taekan te onimaki. Kauarerekea n tuangiia ataei bwa ko kanga ni karekea weteam n tia reirei n te Moanrinan. Ko na kanga n ataia bwa ko weteaki iroun te Atua? Kakoaua are te Atua e kairiia ana taan kairiiri iroun te tamnei ni weteiia aomata ni beku.

1 Tamuera 16:11–13

“Te Uea e Taraa te Nano.”

E ririki ae e motikaki taekaia tabeman man te bwai are ti noria, ma mwakoron te riki n aron Iesu bon te reiakinaki bwa ti na kanga n taratara n ai Arona—man taraan “te nano” (1 Tamuera 16:7).

Waaki ni Kakukurei aika a Kona ni Karaoaki

• Kaoiia ataei bwa a na iangoia ae aongkoa a tuangaki bwa a na rinea temanna ae e na riki bwa te uea. Baikara arona aika raraoi ake a na tarai? Ikotaki wareka 1 Tamuera 16:6–7 ni ukoria bwa tera ae taku te Uea nakon Tamuera ngke e kakae ibukin aia uea kaain Iteraera ae boou. Tera ae ti reiakinna man ana kaetieti te Uea?

• Uota te bwai are e na kamataata te reirei nakoia ataei are te motikitaeka ae ti karaoi e boboto iaon “taraam mai tinanikum” (kibu 7) e na bon aki eti. Ibukin te katooto, ko kona ni kaota nakoia amwarake tabeua ke te boki ma nirana ke kunna mai tinaniku are aki boraoi ma etin kanoana. Tera ae anga 1 Tamuera 16:7 ao te bwai ni kamataata n te reirei bwa ti na kanga n taraira ao aomata tabeman?

• Tibwaua am taneiai are ko reiakinna iai bwa bukin tera ko riai n “taratara te nano,” tiaki ti “tinanikun taraana” (verse 7). Kaungaia ataei bwa a na tibwaua ae aekakin aei are a tia n rinanona. Anenea te anene are katuruturua te reirei aei, n aron “I’ll Walk with You” ke “We Are Different” (Aia Boki n Anene Ataei, 140–41, 263).

1 Tamuera 17:20–54

Iesu Kristo e kona ni buokai n tokanikai iaon kakaewenako nako.

Ataei a na kona ni kaaitarai kakaewenako are e taraa ni kangaanga n aron kakonakan te aintoa n aron Koria. Te katooto mairoun Tawita e konaa n anganiira te kantaning are te Uea e na buoka aia boo ni buaka.

Waaki ni Kakukurei aika a Kona ni Karaoaki

• Katabeia ataei ni korei tamnei man kakaokoron mwakoron te karaki inanon 1 Tamuera 17:20–54. Kaotii tamnei ni bairei iaon te burakiboti, ao kaoiia ataei n tibwaua te karaki n taetae iaon tamnei ake atia ni korei. Tera ae e tangiira te Uea bwa ti na reiakin man te karaki aei?

• Kaoiia ataei bwa a na karinani iaon te burakiboti tabeua kakaewenako aika a kangaanga are te aomata e kona ni kaaitarai. Kaoiia ni ukorii bwaai ake e taekin Tawita are e kona ni kaunga temanna are rinanon te kakaewenako n aron aikai (taraa 1 Tamuera 17:26, 32, 34–37, 45–47). Tuangiia ataei bwa e kanga Iesu Kristo n tia ni buokiko inanon am tai n rinanon te kangaanga.

Kaungaa te Kamatebwai n te Mweenga

Titirakiniia ataei te titiraki n taekan te bwai teuana are a reiakinna n te bong aei. Korea te titiraki, ao anganiia ataei n tatabemaniia ni uotii nakon mweengaia ao ni marooakin ma ana utu teuanne ke neienne.

Kanakoraoan Ara Anga reirei

Buokiia ataei ni katamneia n aia iango koroboki aika tabu. Ataei n taainako anga nanoia ae korakora nakon te reirei ngkana a konaa n tarai taian tamnei are e irekereke nakon karaki man koroboki aika tabu ke te angareirei. Iangoi ni kabonganai taian tamnei inanon te Gospel Art Book ke iaon ChurchofJesusChrist.org.