Te Uea Tawita i aon ana kaintokanuea

King David Enthroned, iroun Jerry Miles Harston

Tuun 20–26

2 Tamuera 5–7; 11–12; 1 Uea 3; 8; 11

“E na Kateimatoaaki Abanueam n Aki Toki”

Ngkai ko wareki koroboki aika tabu, te Tamnei ae Raoiroi e na anganiko namakin ao ni kaungako bwa ko na atai baika a na rang ibuobuoki nakoia ataei ake ko reireiniia.

Korei Am Namakin

te aikaon ibukin te tibwatibwa

Kaunga te Tibwatibwa

Titirakinia tabeman ataei aroia ni wareki koroboki aika tabu (ibon irouia, ma aia utu, ke n te ekaretia). Ningai ao Ia ae ti wareware iai man koroboki aika tabu? Tera ae a namakinna n aia tai ni wareki koroboki aika tabu? Tera kakabwaia ae a karekei man te ongeaba nakon te tua aei?

te aikaon ibukin te anga reirei

Reirei te Reirei: Ataei aika a Uarereke

2 Tamuera 5:19, 23

Ngkana I kainnanoa te ibuobuoki, I kona ni butiia Tamara are i Karawa.

Kiibu aikai a kabwarabwara aron Tawita n tataro ibukin te kairi ao te kaetieti ngkai bon uean Iteraera. Ko na kanga ni kaungaia ataei n rairaki nakon te Atua n te tataro ngkana a kainnano?

Waaki ni Kakukurei aika a Kona ni Karaoaki

• Kabwarabwara nakoia ataei bwa ngke e kainnanoa te ibuobuoki Tawita, e “bubuti,” ke tataro, ibukin kaeka. Ngkai ko wareka 2 Tamuera 5:19, 23, kaoiia ataei bwa a na kakauongo nakon te taeka ae “titiraki”.ao ni booti baia ngkana a ongo. Kaota am koaua bwa ti kona n tainako n tataro nakon Tamara are i Karawa ngkana ti kainnanoa te ibuobuoki.

• Buokia ataei n iangoa te bwai ae a kona n taekina n aia tataro, ko kona n tuangiia bwa a na kabanei kibuntaeka n aron aikai: “Ti Karabwako ibukin …” ao “Ti Butiiko te …” Anga te tai nakoia ataei bwa a na korei tamnein bwaai ake a kan kakaitau iai ke ni bubuti n te tataro.

  e tataro te ataeinnaine

  Ti kona n tataro nakon Tamara are i Karawa ibukin te ibuobuoki ao te kairi.

• Tuangiia ataei rongorongom ngke ko tataro ibukin ana ibuobuoki Tamara arei Karawa. E kanga ni kaeka am tataro? Tera te kaokoro ngkai E buokiko? Kaoia ataei bwa ana tibwai rongorongoia.

2 Tamuera 7:16

Iesu Kristo bon ara Uea.

Ngke Tawita bon uean Iteraera, e tua te Uea nakoina bwa “e na kateimatoaaki ana kaintokanuea n aki toki” (2 Tamuera 7:16). Te berita aei e kaeineti nakon Iesu Kristo, ara Uea ae Akea Tokina, are e bungiaki ni kanoan Tawita.

Waaki ni Kakukurei aika a Kona ni Karaoaki

• Kaoa temanna te ataei bwa e na riki bwa te uea ke te uea n aine. Ngkana e kona, angania ataei bwai ni kaotioti bwa e na taua. Tera te uea ke te uea n aine? Tera tabeia? Tuangiia ataei bwa Tawita bon te uea, ao bon ngaia ana bakatibu Iesu Kristo, are ti aranna bwa “Aia Toka Tooka” (Te Kaotioti 19:16). Buokiia ataei ni iangoi kawai ake a kona ni kaotia iai bwa ti kakoaua Iesu Kristo bwa ara Uea ae Akea Tokina.

• Ngkai ataei a karaoa te mwakuri n te iteraniba ibukin te mwakuri ni kauring, anenea ke katanga te kuna are taekina Kristo bwa ara Uea, n aron “He Died That We Might Live Again,” “Called to Serve,” “Rejoice, the Lord Is King!” ke “I Believe in Christ” (Aia Boki n Anene Ataei, 65, 174–75; Hymns, nambwa 66, 134). Tuangiia ataei bwa a na kakauongo nakon te taeka ae “Uea” ao ni katea tamnein Iesu ngkana a ongo. Tera ae ti namakinna ngkana ti anenea taekan Iesu?

1 Uea 8:57–58

I kona n nakonako n ana kawai te Atua.

Irouia tibun Iteraera, katean ao katabuan te tembora bon te tai n raira nanoia nakon te Uea ao n motinnano n “nakonako n ana kawai ni bane” (1 Uea 8:58). Ko na kanga ni buokiia ataei ake ko reireiniia n “nakonako n ana kawai ni bane”?

Waaki ni Kakukurei aika a Kona ni Karaoaki

• Kaota tamenin te tembora ni bong aikai ao te tembora are kateia Toromon (tara te kabwarabwara n te wiki aei i nanon Nakomai, Iriirai—Ibukiia Aomata n Tatabemaniia ao Utu). Kabwabwara bwa ngke e katea te tembora Toromon ibukiia tibun Iteraera, e kaungaia bwa a na “nakonakon [n Ana Kawai] te Uea” (1 Uea 8:58). Tuangiia ataei bwa tera aron te tembora ni buokiko n nakonako n ana kawai te Uea. Kaoiia ataei bwa a na tibwa te bwai ae a namakinna ibukin te tembora. Botaki anene am ataei n te kuna i aon te tembora, n aron “I Love to See the Temple” (Children’s Songbook, 95).

• Angania tabeman ataei beba aika aati ao tabeman ataei beba aika mwaneka. Wareka 1 Uea 8:58, ao tuangiia ataei bwa a na katea te aati ngkana ko taekina te taeka ae “aati” ao te mwaneka ngkana ko taekina te kibuntaeka ae “nakonako n ana kawai.” Buokiia ataei n oota bwa ti nakonako n ana kawai te Uea ngkana ti iriira Iesu ao ni kataia n riki n ai Arona. Tuangiia ataei bwa tera ae a karaoia n nakonako n ana kawai te Tia Kamaiu. Kam kona n anenea te kuna i aon iriiran Iesu, n aron “I’m Trying to Be like Jesus” (Children’s Songbook, 78–79).

te aikaon ibukin te anga reirei

Reirei te Reirei: Ataei aika a Ikawai Riki

2 Tamuera 7:16–17

Iesu Kristo bon ara Uea.

Uea aika ti wareki rongorongoia n te O Tetemanti iai kabwakaia ao karaoi kairua—n ikotaki ma ake a raoiroi. Ma te Uea are e taetae ni burabetiaki man ana baronga Tawita, Iesu Kristo, e kororaoi ao e na tautaeka n aki toki.

Waaki ni Kakukurei aika a Kona ni Karaoaki

• Kaoiia ataei bwa a na wareka ana taeka te burabeti Natan nakon te Uea Tawita i nanon 2 Tamuera 7:16–17, ao tuangiia bwa tera nanon aei irouia. E na kanga n akea tokin abanuean Tawita? Buokiia ataei ni kakaea ao ni wareki kiibu are a reirei bwa Iesu Kristo, bon kanoan Tawita, ao te Uea, n aron Ruka 1:32–33; Ioane 18:33–37; ao Te Kaotioti 19:16. N te aro raa ae Iesu Kristo bon te Uea? Tera tabeua kawai ae ti kona iai ni kaotia bwa Iesu Kristo bon ara Uea ae Akea Tokina?

• Anene ma ataei kuuna are a kaeineti nakon Kristo bwa ara Uea, n aron “Come, O Thou King of Uea,” “Rejoice, the Lord Is King!” ke “Jesus, Once of Humble Birth” (Hymns, nambwa 59, 66, 196). Tera ae a reirei anene aikai i aon te bwai ae nanonaki bwa Iesu Kristo bon ara Uea?

2 Tamuera 11

I kona n tokanikai i aon kariiri.

Ataei ake ko reireiniia a karaoi rinerine aika uarereke ma a kaakawaki ni katoa bong. Ko na kanga ni buokiia n oota ni kakawakin rinean ae eti e ngkae ngke e matoatoa?

Waaki ni Kakukurei aika a Kona ni Karaoaki

• Manga wareka 2 Tamuera 11 ma ataei, ao tarai ana rinerine Tawita. Tuangiia ataei ana rinerine aika tamaroa Tawita ake e karaoi. Tera tabeua bwaai ae ti kona ni karaoia ngkana ti kaririaki are e kona ni buokira n rinea ae eti?

• Tibwa rongorongon temanna, ae e tokanikai i aon te kariiri, tiaki n ai aron Tawita, tuangiia ataei bwa a na uringa karakinan Iotebwa ao buun Botibara (tara Karikani Bwai 39:7–12). Ko kona ni manga wareka te karaki aei ma ataei ao buokiia ni kabotaua ma karakinan Tawita. Tera ae ti kona n reiakinna ni karakinan Tawita ao Iotebwa i aon aron totokoan te kariiri?

te aikaon ibukin te kamatebwai

Kaungaa te Kamatebwai n te Mweenga

Buokiia ataei n iangoa te bwai teuana ae a kona ni karaoia i aon te bwai are a reiakinna n te bong aei. Ngkanne kaungaia bwa a na karaoi baike a bairei.

Kanakoraoan Ara Anga Reirei

Rimwiian kakao ake a karaoaki ma mwakuriana. Ngkana ko kaoiia ataei bwa a na karaoa nanon are a reiakinna, manga rimwia te kakao anne n te kiraati are imwina. Aio are e kaotia nakoia ataei bwa ko mwannanoiia bwa e kanga ni kakabwaiaaki maiuia n te euangkerio. N tibwauan rongorongoia, a kona ni kakorakoraaki ao n ibuobuoki i marenaia ni maiuakina te euangkerio.

te iteraniba ibukin te mwakuri ni kauring: I kona n nakonako n ana kawai te Atua