Whither Thou Goest (Te Tabo Ane Ko Nako Iai), iroun Sandy Freckleton Gagon

Tuun 6–12

Ruta; 1 Tamuera 1–3

“E Kimwareirei Nanou iroun te Uea”

Ngkai ko wareka Ruta ao 1 Tamuera 1–3, butiia Tamara are i Karawa bwa ko na kanga ni buokiia ataei n reiakin koaua man mwakoro aikai. Korea am namakin ake ko karekei.

Korei Am Namakin

Kaunga te Tibwatibwa

Tuangiia ataei bwa a na tibwai baike a atai ibukin Ruta, Naomi, Anna, ke Tamuera. E kona n ibuobuoki kaotan tamnei, n aron ake i nanon te kabwarabwara n te wiki aei i nanon Nakomai, Iriirai—Ibukiia Aomata n Tatabemaniia ao Utu.

Reirei te Reirei: Ataei aika a Uarereke

Ruta

I kona ni kaota te tangira ao te akoia nakoia ake i rarikiu.

Ngke e mate buun Ruta, e kona n tiku i abana, ma e rineia bwa e na nakon tinan buuna, Naomi, ao n tabeakinna. Iangoa aron Ruta ae ai aron Kristo ni kona ni kaungaia ataei ake ko reireiniia n akoi nakoia ake i rarikiia.

Waaki ni Kakukurei aika a Kona ni Karaoaki

• Kaoia ataei bwa a na tei ibukiia Naomi, Ruta, Boata, ke tabeman riki kaain te karaki man te boki ae Ruta (tara naba “Ruta ao Naomi” n Karakin te O Tetemanti). Kaoia ataei bwa a na katei baia ni katoa te tai are a ongo iai te mwakuri n akoi i nanon te karaki. Tera ara namakin ngkana a akoi nakoira aomata? Tera ara namakin ngkana ti akoi nakoi tabeman?

• Bootaki anenea te kuna ae rongorongon te akoi, n aron “Kindness Begins with Me” (Children’s Songbook, 145). Buokiia ataei n iangoi kawai ake a kona iai n akoi nakoia aia utu ao raoraoia. Ngkana a kainnanoa te ibuobuoki, kaoti nakoia tamneia aomata aika a karaoa te akoi. N taian iango ake a mwaneweaki, tuangiia ataei bwa a na korea te aati i aon te burakibooti.

1 Tamuera 1:1–18

Tamara are i Karawa e ongo ao e kaekai au tataro.

Ngke e nanokawaki Anna ibukina bwa e aki kakariki, e rairaki nakon te Uea n onimaki ao E kaeka ana tataro. Buokiia ataei n ataia bwa a kona n tainako n tataro nakon Tamara are i Karawa, riki ngkana a nanokawaki.

Waaki ni Kakukurei aika a Kona ni Karaoaki

• N oin am taeka, tuangiia ataei bwa bukin tera e nanokawaki Anna (tara 1 Tamuera 1:2–8; tara naba “Anna” n Karakin te O Tetemanti). Tera ae ti kona ni karaoia ngkana ti nanokawaki? Wareka nakoia ataei 1 Tamuera 1:10, ao kaoiia ataei bwa a na kakauongo nakon ana mwakuri Anna. Tuangiia ataei bwa tera aia namakin ngkana a tataro. Wareware man kibu 18 ni kabwarabwara bwa imwin ana tataro, Ao Anna “e aikoa nanokawaki.”

  

  I Tataro Ibukin te Ataei Aei, iroun Elspeth Young

• Kabongana te iteraniba ibukin te mwakuri ni kauring ni kauring n te wiki aei n reireiniia ataei bwa a kona n tataro nakon Tamara are i Karawa ao E na bon buokiia. Ngkai a kara ataei, anenea ke katanga te kuna ae reirei taekan te tataro, n aron “A Child’s Prayer” (Children’s Songbook, 12–13).

1 Tamuera 2:1–10

E a tia te Uea ni karaoi bwaai aika tamaroa ibukiu.

E kaota ana kakaitau Anna nakon te Uea n te kario n nebonebo ae tamaroa. Ana katooto e kona ni buokiia ataei n iango bwaai aika mwaiti ake a kona ni kaitaua iai Tamara are i Karawa.

Waaki ni Kakukurei aika a Kona ni Karaoaki

• Warekia nakoia ataei tabeua bwai ake e taekin Anna imwin are kakabwaiaki iroun te Uea ma natina te mwaane (tara 1 Tamuera 2:1–2). Tibwaia nakoia ataei te kakabwaia are ko karekea mairoun te Uea ao tera am namakin iai. Ngkanne kaoiia ataei bwa a na maroroakini kakabwaia mairoun te Uea are e a tia n anganiia. Ti na kanga ni kaota ara kakaitau nako Ina?

• Bootaki anenea te kuna ae kaoti tabeua kakabwaia are e anganira te Uea, n aron “My Heavenly Father Loves Me” (Children’s Songbook, 228–29). Kaoia ataei bwa a na korei tamnein kakabwaia ake a karekei mairoun te Uea.

Reirei te Reirei: Ataei aika a Ikawai Riki

Ruta

I kona n onimakina te Uea.

E anga karea Ruta bwa e aonga ni kakaonimaki nakon te Uea ao n teimatoa ni kakaonimaki nakon Naomi. Ko na kanga ni buokia ataei n reirei man ana mwakuri n onimaki Ruta?

Waaki ni Kakukurei aika a Kona ni Karaoaki

• Kaota tamnein Ruta ao Naomi (tara te kabwarabwara n te wiki aei i nanon Nakomai, Iriirai—Ibukiia Aomata n Tatabemaniia ao Utu). Ngkanne korei teniua atuu n taeka i aon te burakibooti: Kakatai, Mwakuri, Kakabwaia. Kaoia ataei bwa a na wareka Ruta 1:3–5, 8, 16; 2:1–3, 8–12; 4:13–17, ao ni kanoai atuu n taeka ni baike a kunei ni kiibu aikai. E kanga Ruta ni kaota ana onimaki iroun te Uea? Tibwa te katooto n arom ngke ko kakabwaiaaki ibukin am onimaki iroun Iesu Kristo, ao angania aia tai ataei bwa a na tibwa rongorongoia.

• Botaki anenea te kuna i aon te onimaki, n aron “The Lord Is My Light” (Hymns, nambwa 89) ke “Faith” (Children’s Songbook, 96–97). Tera ae e reirei te kuna aei i aon onimakinan te Uea? Ti na kanga ni karekea te onimaki iroun Iesu Kristo inanon taai aika kaangaanga?

1 Tamuera 1

Te Tama are i Karawa e ongo ao e kaekai au tataro.

Ngke Anna “e bati n nanomaraki,” e rairaki nakon Tamara are i Karawa n te tataro (1 Tamuera 1:10). Ko na kanga ni kaungaia ataei ake ko reireiniia ni karaoa naba aei?

Waaki ni Kakukurei aika a Kona ni Karaoaki

• Buokia ataei n reirei taekan Anna man 1 Tamuera 1, angania ataei n tatabeman tabeua kiibu bwa a na wareki man te mwakoro aei (ke kaota te tamnei ae “Hannah’s Faith,” ChurchofJesusChrist.org). Imwina, kakibarakea te booro ke te bwai teuana nakon temanna te ataei ao kaoiia bwa e na karakina mwakoron te karaki imwain are e anga te booro nakon te ataei are imwina ao ni manga karakina ana itera. N te tai are e a bwanin te karaki, tuangiia ataei bwa a na tibwa te bwai teuana ae a reiakinna man ana katooto Anna.

• Botaki wareka 1 Tamuera 1:15, ao marooroakinna bwa tera nanon te bunra nanora i matan te Uea. Ma ataei, karekei bwaai ake ti kona ni maroroakin ma te Atua n ara tataro. Botaki anenea te kuna iaon te tataro, n aron “A Child’s Prayer” (Children’s Songbook, 12–13). Kaota am koaua n anga tangira te Atua ibukiia Natina ao Nanona n ongora ao n kaekai aia tataro.

• Tuangiia ataei bwa a na karekei (ibon irouia ke n te kurubu) bannaia aomata ni koroboki aika tabu ake a tataro nakon Tamara are i Karawa. (Ngkana a kainnanoa te ibuobuoki, ko kona ni kairiia nakon Ruka 22:41–43; Enoti 1:2–6; Iotebwa Timiti—Rongorongo 1:14–17.) Tuangiia bwa a na tibwai baike a reiakin man karaki aikai.

1 Tamuera 3:1–10

I kona n ongo ao n ongoeaba nakon bwanaan te Uea.

Ngke te ataeinimwaane Tamuera, e ongo bwanaan te Uea ma e aki kinaa n te moan tai. Ko na kanga ni buokiia ataei ake ko reireiniia n ongo ao ni karaoi wirikiriki ake a karekei?

Waaki ni Kakukurei aika a Kona ni Karaoaki

• Kaoa temanna te ataei bwa e na riki bwa Tamueara ao temanna bwa Eri 1 Tamuera 3:1–10 (ke kaota te tamnei ae “Tamuera ao Eli,” ChurchofJesusChrist.org). Tera ae ti kona n reiakinna mairoun Tamuera i aon aron te ongora nakon bwanaan te Uea? Ti na kanga ni kaotia bwa ti tauraoi n ongo ngkana e taetae nakoira te Uea?

• Kaoiia ataei bwa a na iangoia bwa a na kanga aroia ni kabwarabwara nakon temanna aron te Uea n taetae nakoia. Kaoiia bwa a na kakaei reeke n teuana te kibu ao e raka riki man aikai: Reirei ao Berita aika Tabu 6:22–23; 8:2–3; 9:7–9.

Kaungaa te Kamatebwai n te Mweenga

Kaungaia ataei bwa a na iangoa temanna ke te bwai ae a kona n tataro ibukina n te wiki aei. Angania aia tai n te tai ae na roko bwa ana tibwa aron Tamara are i Karawa ni kaeka aia tataro.

Kanakoraoan Ara Anga reirei

Ataei aika aki toamau. Taiaoka nakon disability.ChurchofJesusChrist.org n noria bwa ko na kanga ni buokiia ataei ake aki toamau.