“Tuun 6–12. Ruta; 1 Tamuera 1–3: ‘E Kakatonga Nanou i Nanon Iehova,’” Nakomai, Iriirai—Ibukiia Aomata n Tatabemaniia ao Utu: Te O Tetemanti 2022 (2021)
“Tuun 6–12. Ruta; 1 Tamuera 1–3,” Nakomai, Iriirai–Ibukiia Aomata n Tatabemaniia ao Utu: 2022
Bwa Ike Ko Nako Iai, iroun Sandy Freckleton Gagon
Tuun 6–12
Ruta; 1Tamuera 1–3
“E Kakatonga Nanou i Nanon Iehova”
Ngkai ko kamatebwaia maiuia Ruta, Naomi, Ana, ao tabeman riki n te wiiki aei, kakauongo kaaniko raoi nakon te Tamnei ao korei am namakin nako ake ko karekei. Tera bwaai aika a kaunga nanom bwa kona karaoi?
Korei Am Namakin
N tabetai ti iangoia bwa maiura a riai n ira te kawai ae itiaki man te moan ni karokoa te toki. Te raroa ae uarereke imarenan uoua botoniango bon te rain ae eti, iaon bwaai ni kabane. Ao irarikina te maiu e kaonaki ni baika a katabetabe ao kawai are a kairiira nakon taabo ake aki kantaningaki. Ti na bae ni kunea bwa maiura a bon kakaokoro man are ti taku bwa a riai n riki n aroia.
A rangi n ataa aei Ruta ao Anna. Tiaki kain Iteraera Ruta, ma e mare ma kaaina, ao ngke e mate buuna, iai ana rinerine ae karaoia. E na okiriia ana utu ao, maiuia ana utu are mai imwaaina, ke e na ramwanea ana onimaki te Iteraera ao te mweenga ae boou ma tinan buuna? (taraa Ruta 1:4–18). Ana babaire Anna ibukin maiuna bwa e na karikiia natina, ao ana aki konabwai ni karaoia e a tiku ma te “bati n nanomaraki” (taraa 1 Tamuera 1:1–10). Ngkai ko wareka taekan Ruta ao Anna, iangoa aia onimaki are e reke are a na katuka maiuia inanon bain te Uea ao ni mwananga ni kawaia aika akea kantaningakina. Ngkanne ko iangoa oin mwanangam. E na taraa ni kaokoro ma are irouia Ruta ao Anna—ao tabeman riki. Ma rinanon taian kakatai ao kakubanako imarenan ikai ao tokin kawaim, ko kona n reiakiniko n taetae ma Anna, “E kakatonga nanou i nanon Iehova” (1 Tamuera 2:1).
Ibukin manga rinanoan aia boki Ruta ao 1 Tamuera, taraa “Ruta” ao “Tamuera, ana boki” n te Bible Dictionary.
Iango ibukin te Kamatebwai i bon Iroum ni Koroboki aika Tabu
E kona Kristo ni bita te kabuanibwai nakon te tokanikai.
Ngke e mate buun Ruta, iai mwiin kabuanibwai ae taonaki iai are e taraa n rangin ni korakora nakon are e na kona ni kaitara te aine ae mate buuna. Ni katein Iteraera n te tai anne, te aine ae akea buuna ke naati mwaane akea inaomataia nakon bwaai ao bon akea te anga ae a na karekea oin maiuia. Ngkai ko wareka karakinan Ruta, ataia bwa e kanga te Uea ni bita te kabuanibwai nakon kakabwaia aika moan te korakora. Tera ae ko ataia iroun Ruta are ko na kona ni buokia iai? Tera taben Boati ni kamaiuan Ruta man ana kangaanga ae kakua? (taraa Ruth 4:4–7). Tera katein Kristo ake ko noori iroun Ruta ao Boati?
I kona n onimakina te Atua are e na kairai ao ni buokai n aki tabe ma au kangaanga.
Ko kona ni bon nooriko ni karakinaia Ruta, Naomi, ao Anna? Tao e mwaiti ae ko a tia ni kabua, n aron are e riki nakon Ruta ao Naomi (taraa Ruta 1:1–5). Ke tao, n aron Ana, ko kariariai kakabwaia ake ko bon tuai man karekei (taraa 1 Tamuera 1:1–10). Iangoia tera rongorongo ake kona reiakin man aia katooto aine aika a kakaonimaki aikai. A kanga Ruta ao Naomi ni kaota aia onimaki iroun te Atua? Tera kakabwaia ae a karekea? Ko na kanga n ira aia katooto? Iangoia ko kanga n “roko n onimakina” te Uea (Ruta 2:12) e ngae ngke e taraa ni kangaanga te maiu.
Taraa naba Reyna I. Aburto, “Thru Cloud and Sunshine, Lord, Abide with Me!” Riaona, Nob. 2019, 57–60.
Bwa I Tataro ni Bubuti ibukin te Teei Aei, iroun Elspeth Young
E kakatonga nanou i nanon te Uea.
Imwiin are ngke Ana e kaira te ataeinimwaane ae Tamuera nakon te tembora, e taekin taeka aika raoraoi ni kamoamoa iai te Uea, are a koreaki n 1 Tamuera 2:1–10. Taeka aika a rangi ni karaunano riki ngkana ko iangoia bwa te tai ae kimototo mai imwaaina, “e bati n nanomaraki, … ao e tangi ni korakai” (1 Tamuera 1:10). Ngkai ko kamatebwai kiibu aikai, tera rongorongo aika ko kunei are a karikirakea am namakin ni nebonebo ao ni kakaitau nakon te uea? Ko bae ni kaungaaki n ana anene Anna ni kakaean te kawai ae wanawana ni kaota am kakaitau nakon te Uea—te anene, te korobanna, te mwakuri n ibuobuoki, ke te bwai are e reita am namakin Nakoina.
Eng, tataro ni kabane ake a nako man te nano aki bane ni kaekaaki n aron are e tangiria Anna. Tera ae ko kunea n ana rongorongo Beretitenti Dieter F. Uchtdorf“Grateful in Any Circumstances”are e na kona ni buokiko ngkana aki kaekaaki am tataro n aron are ko kantaningaia? (Riaona, Meei 2014, 70–77).
I kona n ongo ao n te ongotaeka ni bwanaan te Uea.
N arora ngaira ni kabane, e riai Tamuera n reiakinna bwa e na kanga ni kinaa bwanaan te Uea. Ngkai ko kamatebwaia 1 Tamuera 3, tera ae ko reiakinna mairoun te ataeinimwaane aei ngke e ongo ao n ongotaeka ni bwanaan te Uea? Tera taneiai ake ko a tia ni karekei ngke ko ongo bwanaana? Tera tibwanga ake ko karekei, n aron Eri, ni buokiia tabeman bwa a na ataia ngke e taetae te Uea nakoia? (taraa 1 Tamuera 3:7).
Taraa naba Ioane 14:14–21; David P. Homer, “Kakauongo ni Bwanana,” Riaona, Meei 2019, 41–43.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Ruta 1:16–18; 2:5–8, 11–12.A kona am utu n tarai tabeua katooto n te akoi ao n te kakaonimaki inanon kiibu aikai. Ti na kanga ni kaota ara akoi nakoia ara utu ao tabemwaang ao ni kakaonimaki nakon Iesu Kristo? Te mwakoro “Ruta ao Naomi” (ni Karakinan te O Tetemanti) e kona ni buoka am utu n reiakinaki man ana katooto Ruta.
-
1 Tamuera 1:15.Tao ko na kona ni kabwaroa te bwai teuana man te boora ni buokiia kaain am utu bwa a na katamneia te bwai are e nanonna Anna ngke e taku, “I … nurakina tamneiu i matan Iehova.” Bukin tera ngkai aio te kawai ae tamaroa ni kabwarabwara bwa aekakira aron ara tataro? Ti na kangaa ni katamaroa ara tataro ae onoti ao ara tataro n utu?
-
1 Tamuera 2:1-10.Ana boem Anna n neboa te Uea e na kaira am iango nakon taian anene ake ko kabonganai ni kamoamoa iai te Uea. Ko kona n anenei tabeua ni kabane. A kona naba kaain am utu n iangoi tabeua kawai ni kaota aia namakin ibukin Iesu Kristo. N aron te katooto, a kona ni korea aia tamnei are e kaotia bwa bukin tera ngkai a tangira te Tia Kamaiu.
-
1 Tamuera 3:1–11.E kakukurei ngkana e kateaki kain te karaki ngke e weteaki Tamuera iroun te Uea, ke a kona am utu ni mataku n te witeo “Samuel and Eli” (ChurchofJesusChrist.org). A kona kaain te utu ni maroroakin taai are ngke a namakinna bwa e taetae te Uea nakoia ao a kanga ni mwakuri iaon Ana taeka.
Ibukin iango aika a mwaiti riki ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae katauaki: “There Is Sunshine in My Soul Today,” Boki n Anene, nambwa. 227.
Kanakoraoan Am Kamatebwai
Kariaia te Tamnei bwa e na kairiko n am kamatebwai. Tataro bwa e na kairiko Te Tamnei ae Raoiroi nakon koaua aika ko kainnanoi n reiakin. Ko na rangi ni kakauongo nakon Ana wirikirik, e ngae ngkana aio e na kairiko nakon warekan atuun te reirei ae ko aki kantaningaia ke ni kamatebwaia n te kawai ae kaokoro.
Tamnein Tamuera ngke e ongo bwanaan te Uea, iroun Sam Lawlor