Kamataata n te korotamnei ngke Mote e katanua Iotua, iroun Darrell Thomas

Meei 23–29

Iotua 1–8; 23–24

“Ko na Korakora man Ninikoria”

Ngkana ko wareka Iotua 1–8 ao 23–24, korea te namakin n tamnei are ko karekei. Tera ae ko na karaoia ni kunea bwa tera kainanoia am ataei are ko reireiniia n reiakin man mwakoro aikai?

Korei Am Namakin

Kaunga te Tibwatibwa

Korea te tamnei iaon te burakiboooti te bwai teuana man te karaki inanon Iotua 1–8; 23–24, ao taraia ngkana ataei a na kona ni keetina te karaki bwa e roko mai ia. Te katooto, ko kona ni korea tamnei te karaanga ke oon te kaawa.

Reirei te Reirei: Ataei aika a Uarereke

Iotua 1:8

I kona n iangoa taekan koroboki aika tabu te ngaina ma te bong.

Te Uea e tuanga Iotua bwa ngkana e iango raoi iaon koroboki aika tabu ao n iriira te reirei inanoia, e na karekea te tokanikai ni kairiia kaain Iteraera nakon te aba ni berita. Tera ae ko kona n reireia ataei korakoran kakabwaia ake a roko man koroboki aika tabu?

Waaki ni Kakukurei aika a Kona ni Karaoaki

• Anganiia ataei n tatabemaniia te tamnei ke korotamneian taai ao namakaina. Wareware nakoia man Iotua 1:8: “Iango [iaon koroboki aika tabu] te ngaina ao te bong.” Kabwarabwara are iango raoi nanona n iango mwaaka iaon te bwai teuana. Kaokiokii kiibuntaeka tabeua te tai, ao kaoiia ataei n tabekarake taai ngkana ko taekina “ngaina” ao namakaina ngkana ko taekina “tairiki.” Anganiia ataei ni kaokioka te kibuntaeka ma ngkoe.

• Tuangiia ataei n aranii bwaai ake a karaoia inanon te ngaina ao bwaai ake a karaoi n te tairiki. Karakina nakoia are Iotua e bon tuangaki bwa e na iangoi taekan koroboki aika tabu n te ngaina ao n te bong. Buokiia n iangoi karaki ke angareirei man koroboki aika tabu are a na kona n iangoa taekana inanon te ngaina ao n te bong. Kaoiia bwa a na korei tamneia ke aia utu ni kamatebwaia koroboki aika tabu. Bukin tera a tangira kamatebwaian koroboki aika tabu? A na kanga ni kakabwaiaaki ngkana a karaoa anne?

Iotua 3

I riai ni bwabetitoaki n rin n abanuean karawa.

Karakinan Iotua ni kairiia kaain Iteraera rinanon te Karaanga ae Ioretan nakon te aba ni berita e karekea te tai n reireiniia ataei bwa ti riai ni bwabetitoaki n rin n abanuean karawa.

Waaki ni Kakukurei aika a Kona ni Karaoaki

• Manga rinanoi rongorongon karakinaia tibun Iteraera n rinanon te Karaanga ae Ioretan n roko n te aba ni berita (taraa “Iotua te Burabeti” inanon Karaki man te O Tetemanti). Ngkanne kaota tamnein Iesu ngke e bwabetitoaki, ao tuangiia ataei bwa Iesu e bon bwabetitoaki inanon te karaanga naba anne. Kaoiia ataei bwa a na tibwai bwaai aika a ataia n taekan bwabetitoan Iesu.

• Anenea te anene n taekan te bwabetito ma ataei, n aron “Bwabetito” (Aia Boki n Anene Ataei, 100–101). Buokiia ni kinaa bwa te anene aei e reireiniira bwa bukin tera Iesu e bon bwabetitoaki ao bukin tera ti riai n iriira Ana katooto. Anganiia ataei n tibwaua aia namakin n taekan aron te bwabetitoaki. Taekina taekana bwa tera ae a na karaoia ataei ngkai ni katauraoi ni bwabetitoaki ngkana a koro waniu aia ririki.

  

  Ti riai ni bwabetitoaki n rin abanuean karawa.

Iotua 24:15

I kona n rineia ni beku ibukin Iesu Kristo.

Ana kabanea n rongorongo Iotua nakoia ana aomata bwa iai aia rinerine n reitinako ni beku ibukin te Uea ke ni Kakea. Ma ai aron ana tangira Iotua ibukiia ana aomata, ko kona ni kaungaiia ataei ake ko reireiniia n rineia ni beku ibukin te Uea n te bong aei.”

Waaki ni Kakukurei aika a Kona ni Karaoaki

• Tuangiia ataei bwa a na taetae iaon tabeua rinerine ake a tia ni karaoi n te bong aei. Warekia nakoia ataei man Iotua 24:15: “Ao n te bong aei kam na rinea ae kam na toro i rouna; … ao ngai ma kaini batau, ti na toro iroun Iehova.” A na kanga ataei n tia n rineia ni beku ibukin te Uea n te bong aei? Tera tabeua kawai ake ti kona n rineia ni beku Irouna ni katoa bong?

• Anenea te anene iaon karaoakin rinerine aika raraoi, n aron “Choose the Right Way” (Aia Boki n Anene Ataei, 160–61). Tera aron ara namakin ngkana ti rineia bwa ti na beku iroun Iesu Kristo? Kaoiia ataei bwa a na korea tamneiia ngke a karaoa te bwai teuana ni beku ibukin te Uea. Tibwaua te karaki man maium ke man ana maekatin te Ekaretia n taekan te rinerine ni beku ibukin te Uea.

Reirei te Reirei: Ataei aika a Ikawai Riki

Iotua 1–4; 6

“Ko na Korakora man Ninikoria.”

Imwin rikin Iotua bwa te tia kairiiri irouia kaain Iteraera, te Uea e kaungaa man taekinna, “Ko na korakora ma ninikoria” (Iotua 1:6). Tera ae a kona n reiakinna ataei mairoun Iotua iaon bwa e kanga te riki ni korakora ao ninikoria ibukin Kristo?

Waaki ni Kakukurei aika a Kona ni Karaoaki

• Kaoiia ataei bwa ana kakaai kibuntaeka are a okioki inanon Iotua 1:6, 9, ao 18, ao koreia iaon te burakibooti (taraa naba kibu 7). Buokiia ataei n iangoi tabeua bukina ngkai ti na kainanoa te rongorongo aei, n aron ae karaoia Iotua. Manga rinanoi n te kiraati tabeua karaki inanon Iotua 1–4; 6 (taraa naba “Iotua te Burabeti” ao “Raaba ao taan karaba” inanon Karaki man te O Tetemanti), ao tuangiia ataei ni kinaa bwa a kanga aomata inanon te karaki aei ni kaota te ninkoria ao te korakora.

• Kaoiia ataei bwa a na taekina taekan temanna are a kinaa are e korakora ao ninikoria ibukin Iesu Kristo. Kaungaiia bwa a na korea te bwai teuana are a tangiria ni karaoia n riki ni korakora ao ninikoria riki ibukin Kristo.

Iotua 1:8

I kona n iango mwaaka iaon koroboki aika tabu te ngaina ao te bong.

Te kawai teuana ae te Uea e buoka iai Iotua ni katauraoi ibukin te kakaewenako are e mwakuriia bon man kaungaana n “iango raoi” iaon koroboki aika tabu “te ngaina ao te bong.” E na kanga te reirei aei ni kakabwaiaiia ataei ake ko reireiniia?

Waaki ni Kakukurei aika a Kona ni Karaoaki

• Kaoiia ataei bwa a na koreia bwa mwaitira taai ake a kabanea inanon te ikota ni bong iaon mwaitin waaki ni kakukurei. Ngkanne kaoiia bwa a na wareka Iotua 1:8, ni kakaea te bwai teuana are ti bane ni kainanoia ni karaoia ni katoaa te ngaina ao te bong. Buokiia bwa a na kunei taeka ao kibuntaeka n te kibu are e reireiniira taekan kakabwaia man kamatebwaian koroboki aika tabu. Ko na kanga n iango raoi iaon koroboki aika tabu ni buokiira ni karekea te tokanikai inanon bwaai tabeua ake ti karaoi ni katoabong?

• Kaoiia ataei n ikotaki ni wareki koroboki aika tabu aikai: Iotua 1:8; 1 Nibwaai 15:23–24; 2 Nibwaai 31:20; 32:3; Iakobwa 4:6; Ereman 3:29–30. Tuangiia ataei bwa a na kakaea te taeka ke kibutaeka inanon mwakoro aikanne ae reireiia taekan te mwaaka man kamatebwaian koroboki aika tabu. Baikara kouru aika a kona ni katei ibukin aia kamatebwai i bon irouiia ni koroboki aika tabu?

Iotua 24:15

I kona n rineia ni beku ibkin Iesu Kristo.

Ibuakon ana kabanea n taeka Iotua nakoia kaain Iteraera bon te bubuti n “rinea … n te bong aei ae kam na toro irouna.” Iangoia raoi bwa e kanga te reirei aei ni kona ni kakabwaiaia ataei aika ko reireiniia.

Waaki ni Kakukurei aika a Kona ni Karaoaki

• Kaoiia ataei ni karaoi boutita ni kabonganai tabeua oin taeka ao kibuntaeka inanon Iotua 24:15. Anganiia bwa a na tibwaua aia boutita ao ni kabwarabwara bwa bukin tera a rinei taeka akanne. Ti na kanga ni kaotia nakon te Atua bwa ti a tia n rineia ni beku Ibukina?

• Kaoiia ataei n taekin aroaro ake a na riai ni karekei n iangoia n rinea te Atua iaon bwaai tabeua. Tuangiia bwa a na iangoia bwa tera ae a na karaoia. Bukin tera ngkai e kakawaki n “rinea … n te bong aei” nakon riki te tataninga ibukin te aroaro teuana bwa e na riki? Ti kanga ni kakabwaiaaki ngkana ti karaoa te rinerine ae eti?

Kaungaa te Kamatebwai n te Mweenga

Kaoiia ataei bwa a na rinea te bwai teuana are ko taetae iaona are a tangiria n tibwaia ma aia utu. Kaungaiia n iangoi kawai ake a kona iai n tibwaia inanon te wiiki aei.

Kanakoraoan Ara Anga reirei

Buokiia ataei bwa a na riki bwa taan reiakinaki aika a tamaroa riki. Te kantaninga n am anga reirei nakoia ataei tiaki tii karinakin te koaua irouia. Ko riai naba ni buokiia bwa a na karikirakeia bwa taan ukoukoura te koaua i bon irouia.