Meei 2–8

Te Otinako 35–40; Nakoaia Ibonga 1; 16; 19

“E Tabu bwa Ana Bwai Iehova”

Ngkai ma te tataro ko kamatebwaii koroboki aika tabu n te wiki aei, iangoia ataei ake ko reireiniia. Te Tambeu ae Raoiroi e kona ni buokiko n atai koaua ake a riai n reiakin ao bwa ko na kanga n reirei koaua akanne nakoia.

Korei Am Namakin

Kaungaa te Tibwatibwa

Karini araia ataei nako inanon te turumwa. Tuanga temanna te ataei bwa e na rinea teuana te ara, ao kaoa te ataei ane e rineaki arana bwa e tibwaua te bwai teuana are e a tia n reiakinna man te O Tetemanti. Marorooakinna ma ataei bwa a kanga bwaai ake a reiakinii ni buokiia ni kaan ma Iesu Kristo. Karaoa aei ni karokoa are e a bane n reke aia tai ataei ni bane.

Reirei te Reirei: Ataei aika a Uarereke

Te Otinako 36:1

I kona n ibuobuoki n ana mwakuri te Uea.

Ataei aika a uarereke iai irouia bwai n tituaraoi aika a kona ni kabonganai ni karaoa ana mwakuri te Uea i aon te aba. Ko na kanga ni buokiia ataei ni karekea te namakin ni kamanena te bwai are e a tia n anganiia te Uea?

Waaki ni Kakukurei aika a Kona ni Karaoaki

• Wareka Te Otinako 36:1 nakoia ataei, ao tuangiia bwa a na kakauongo bwa tera ae e anga te Uea nakon te“uma are tabu” (tabanaeko). Tuangiia ataei n tatabeman te bwai n tituaraoi are iai iroun teuanne ke neienne ( e kona n ibuobuoki titirakinaia aia karo). Kaota am koaua bwa E a tia te Atua n “anga” bwai n tituaraoi nakoia Natina ni bane.

• Tuangiia ataei bwa bukin tera ko tangiria n ibuobuoki n ana mwakuri te Uea. Buokiia n iangoi kawai ake a kona naba iai n ibuobuoki (n aron reiakinan rongorongoia aia bakatibu, karakinan rongorongon Iesu nakon temanna, ke buokan temanna kaain aia utu). Korei iango i aon mwakoro ni beba, ao karini n te konteina, ao kaoiia ataei n tatabeman bwa a na rinea teuana ao ni karaoa nanon are koreaki.

Te Otinako 40:17–34

I kona n namakina te Atua n taabo aika a tabu.

E tua te Uea nakoia tibun Iteraera bwa a na katea te tembora bwa E aonga n “maeka i buakoia” (Te Otinako 25:8). Ko kona ni buokiia ataei n reiakini taekan taabo aika a tabu are e a tia n anganiira te Atua ni buokiira n namakina ae Maeka i buakora.

Waaki ni Kakukurei aika a Kona ni Karaoaki

• Kaota tamnein te uma are tabu rimoa (tara te kabwarabwara n te wiki aei i nanon Nakomai Iriirai—Ibukiia Aomata n Tatabemaniia ao Utu). Tuangiia ataei bwa ana kakaei mwakoron te uma are tabu nako n te tamnei aei, n aron te nenea ke te bao ni karea, ao kabwarabwarai bongan bwaai aikai ni buokiia tibun Iteraera n iangoa te Uea (ibukin riki rongorongon te uma are tabu, tara Te Otinako 40:17–34). Tera taabo aika a tabu are a buokiira n iangoa te Uea?

• Kaota tamnein te uma are tabu, ao wareka Te Otinako 25:8 nakoia ataei. Kabwarabwara bwa ni bong aikai, E a tia te Atua n anganira taabo aika a tabu bwa ti aonga ni kaan ma Ngaia. Buokiia ataei ni karekei tabeua taabo aikai. Tuangiia ataei bwa tera aia namakin ibukin taabo aikai. Tibwauaia ma ngaiia bwa ti kona naba n namakina te kaan ma te Atua ngkana ti tataro, n tabo ake ti mena iai.

• Katiaa kanoan ana iteraniba te waaki ni kakukurei ma ataei. Ni karaoan aei, anenea te kuna ma ngaiia n rongorongon te tembora, n aron “I Love to See the Temple” (Aia Boki n Anene Ataei, 95).

  

  N aron te uma are tabu rimoa, te tembora e kairiira nakon te Tia Kamaiu.

Reirei te Reirei: Ataei aika a Ikawai Riki

Te Otinako 35:20–29; 36:1

E a tia te Atua n anganai bwai n tituaraoi ni buoka Ana mwakuri.

Ni kabane natin Tamara are i Karawa iai ana tarena ae kona n anga nakon Ana mwakuri. Ataei ake ko reireiniia tao a na kainnanoa am ibuobuoki ni kinai bwai n tituaraoi ake a kona ni kabonganai n ana mwakuri te Atua.

Waaki ni Kakukurei aika a Kona ni Karaoaki

• Kaota tamnein te tabanaeko (tara te kabwarabwara n te wiki aei inanon Nakomai Iriirai—Ibukiia Aomata n Tatabemaniia ao Utu). Tuangiia ataei bwaai aika a kainnanoaki bwa e aonga ni kona ni kateaki te uma are tabu. Wareka Te Otinako 35:20–29ma ataei, ao tuangiia bwa a kanga ni karekeaki bwaai ake a kainnanoaki. Kaota am koaua bwa ataei ni bane iai te bwai ae a kona ni anga nakon ana mwakuri te Uea.

• Tuangiia ataei bwa a na wareka Te Otinako 36:1 n noria bwa tera ae e anga te Uea nakoia naake a weteaki bwa a na katea te tabanaeko. Kaoiia ataei bwa ana tibwauai aia namakin ni baike e anganiia te Uea ni katea Abanueana (anga iango ngkana e riai). Ti na kanga ni kabonganai bwai n tituaraoi aikai ni kakabwaiaia tabeman?

Te Otinako 40:17–33

I kona n riki n ai aron Iesu Kristo ao Tamara are i Karawa.

Te tabanaeko e aki tii uotiia tibun Iteraera bwa e na maeka te Atua i buakoia, ma e reireiniia naba bwaai ake a kona ni karaoi n riki n ai aron te Atua.

Waaki ni Kakukurei aika a Kona ni Karaoaki

• Kaoia ataei bwa a na kabongana Te Otinako 40:17–33 ni kinai bwaai ake mwakoron te tabanaeko ao kakaei bwaai akanne n tamnein te tabanaeko rimoa (tara te kabwarabwara n te wiki aei inanon Nakomai Iriirai—Ibukiia Aomata n Tatabemaniia ao Utu). Kaoia ataei bwa a na korei oin aia tamnei i aon te tabanaeko. Marooroakinna bwa a kanga mwakoron nako te tabanaeko n reirei taekan Iesu Kristo ao Tamara are i Karawa. N aron te katooto, te aake ni koaua e kona ni kauringia ana tua te Atua, te bao ni karea e kona ni kauringira maten Iesu Kristo, te taura te nenea e kona ni kauringa bwa te Tia Kamaiu bon Ootan te Aonaba, ao e mwaiti riki.

• Tuangiia ataei bwa a na wareka Te Otinako 25:8 bwa a na kakaea bwa bukin tera te Uea e tangira tibun Iteraera bwa a na katea te “uma are tabu” (ke te taebanaeko). Buokiia ataei ni karekei aran taabo ao waaki are a kona iai n namakina ae maeka te Uea i buakoia. A kanga taabo aikai ni buokiira n riki n ai aron Tamara are i Karawa ao Iesu Kristo?

Nakoaia Ibonga 1:1–4

Rinanon Ana Mwakuri ni Kamaiu Iesu Kristo, E kona ni kabwaraaki au bure.

Karea maan ake a karaoaki n te O Tetemanti bongaia bwa a na reireniia tibun Iteraera taekan kabwaraan te bure are e riki rinanon Ana Mwakuri ni Kamaiu Iesu Kristo.

Waaki ni Kakukurei aika a Kona ni Karaoaki

• Kaota tamnein Iesu Kristo i Ketetemane ao i aon te kaibangaki (tara Boki n Tamnei n te Euangkerio, nambwa. 56, 57). Kabwarabwara bwa E tua te Uea nakoi tibun Iteraera bwa a na karaoi anga kareka bwa e na reireiniia bwa a kona ni kabwaraaki aia bure rinanon Ana Mwakuri ni Kamaiu Iesu Kristo. Wareka Nakoaia Ibonga 1:1–4nakoia ataei, ao kaoiia bwa a na tarai taeka ao mwakoro n taeka ake a kauringia taekan maten Iesu Kristo.

• Kaota tamnein Iesu Kristo ngke e kawara Amerika ngkoa (n aron Boki n Tamnei n te Euangkerio, nambwa 82). Kabwarabwara bwa imwin tauran ao mangautin Iesu Kristo, E reireiniia aomata i Amerika bwa bukin tera a aikoa kainnanoa karaoan te anga karea are maan. Bootaki wareka 3 Nibwaai 9:19–20, bwa ai tera ae ti a tuangaki bwa ti na anga bwa ara karea. Tera ae nanona n ara karea ae te nano ae uruaki ao te tamnei ae raraoma? Tuangiia bwa a kona n taraa “Te nano ae uruaki” i nanon te Kairi nakon Koroboki aika Tabu (scriptures.ChurchofJesusChrist.org) ni buoka kaekan te titiraki aei. Kaoiia bwa a na iangoia bwa a na kanga n anga te nano ae uruaki ao te tamnei ae raraoma nakon te Uea.

Kaungaa te Kamatebwai n te Mweenga

Kaoiia ataei bwa a na butiia Tamara are i Karawa n te wiki aei bwa tera ae E tangiria bwa a na anga nakon Ana mwakuri n aia utu.

Kanakoraoan Ara Anga reirei

Kairiia ataei nakon Tamara are i Karawa ao Iesu Kristo. Oin raoi te kaantaninga bon buokaia ataei ake ko reireiniia bwa e na korakora aia onimaki iroun Tamara are i Karawa ao Iesu Kristo. Tera ae ko kona ni karaoia ni buokiia n oota bwa e kanga maiuakinan koaua n te euangkerio ni buokiia n riki ai aron te Tama ao te Nati?