Iehova e kaoti nakon Mote ao unimwaanen Iteraera

Kamataata n te korotamnei ni kaotin Iehova nakon Mote ao itingaun unimwaanen Iteraera

Eberi 25–Meei 1

Te Otinako 24; 31–34

“E na Airi Matau ma Ngkoe”

Ngke Mote e katauraoi ni kairiia Tibun Iteraera nakon te aba ni berita, te Uea e taku, “E na Airi Matau ma Ngkoe” (Te Otinako 33:14). Ngkai ko katauraoi n reireiniia ataein am kiraati, iagoia ko na kanga ni kaoa te Uea n “nako ma ngka [mi].”

Korei Am Namakin

te aikaon ibukin te tibwatibwa

Kaunga te Tibwatibwa

Tuangiia ataei n tatabemaniia n rinea te mwakoro ni beeba ae nambanaki. Kabonganai nambwa aikai n taraia bwa ana karinanak ataei ni kona n tibwaua te bwai teuana are a reiakinna man koroboki aika tabu, tao ni mweengaia ke n te Moanrinan.

te aikaon ibukin te anga reirei

Reirei te Reirei: Ataei aika a Uarereke

Te Otinako 31:13, 17

Karinean te Tabati bon kanikinaean au tangira ibukin te Uea.

Te Uea e tuanga Mote bwa ngkana tibun Iteraera a kawakina te bong ae te Tabati n tabuia, a kaotia nako Ina ae a tangiria n riki bwa Ana aomata.

Waaki ni Kakukurei aika a Kona ni Karaoaki

• Korea tamnein te aati iaon te burakibooti, ao tuangiia ataei bwa tera ae nanonna te kanikina aei. Buokiia bwa a na iangoi bwaai tabeua are e kona n riki bwa te kanikina ibukin te tangira, n aron te irabwati ke karaoan te mwakuri n ibuobuoki. Warekia nakoia Te Otinako 31:13. Buokiia n ataia bwa ngkana ti kawakina te bong ae te Tabati n tabuia, bon te kanikina nakon te Uea bwa ti Tangiria.

• Tuangiia ataei taekan kawai tabeua are ko kataia ni kaota aron am tangira ibukin te Uea iaon te Tabati. Anganiia bwa a kanga ngaiia ao aia utu ni karaoa aei. Kaoiia bwa a na kabongana te iteraniba ibukin waaki ni kakukurei n te wiiki aei n tibwaua riki aia iango.

  ataei ao kaaro ni mweengaia

  Man kawakinan te Tabati, ti kaota ara tangira ibukin te Uea.

Te Otinako 32:1–8, 19–24

I kona ni karika te Uea bwa te kabanea ni kakawaki inanon maiu.

Ngke Mote e mena iaon te maunga are Tinai n taetae ma te Uea, tibun Iteraera a rineia n taromauria te bwai ae kaaraki ae koora irarikin are Ngaia. Te karaki e kona ni kauringiia ataei ake ko reireiniia bwa ti riai n aki karaoi bwaai tabeua bwa a na kakawaki riki nakoira nakon te Uea.

Waaki ni Kakukurei aika a Kona ni Karaoaki

• Anaa te tai ae uarereke n rinanoi Tuua ake Tebwina ma ataei, katuruturua te moan ake uoua (taraa Te Otinako 20:3–6). Kabongana “Tuua ake Tebwina” (n Karaki n te O Tetemanti) n tibwai ma ngaiia te karaki man Te Otinako 32:1–8, 19–24. Ngkana e riai, anganiia ataei bwa a na buokiko ni karakina te karaki. Buokiia ataei n ataia bwa kaain Iteraera a karaoa ae bure inanon te karaki aei (ko na bae n tangiria ni kauringiia ataei te moan ake uoua man Tuua ake Tebwina). Tera ae a kona ni karaoia kaain Iteraera n oneamwina?

• Kaota tamnein Iesu Kristo, ni kaairia ma tamnein bwaai tabeua are ataei a na kona ni kabanea aia tai iaona, n aron taore, bwai n takakaro, ao a bati riki. Tuangiia ataei ni kakae tamnei are e kaotia bwa tera ae moan te kakawaki nakoira. Tibwaia ma ataei bwa ko kanga n kakabwaiaaki ibukin karimoan te Uea inanon maium—iaon riki bwaai aika tamaroa.

Te Otinako 33:11

Te Uea e taetae nakon Mote n iitaramata.

Imwin tian Mote n urua te kao teteei ae koora, “te Uea e taetae ma Mote n itaramata, ai aron te aomata e taetae ma raoraona.” Ataakin aei e konaa ni katea aia onimaki ataei bwa te Uea bon te aomata ni koaua are e tangiriia.

Waaki ni Kakukurei aika a Kona ni Karaoaki

• Tuangiia ataei bwa e kanga am namakin ngkana ko taetae ma raoraom ae tamaroa, titirakiniia bwa e kanga aia namakin. Wareka nakoia te moan tiententi n Te Otinako 33:11. Titirakiniia ataei bwa teraa aia iango n ana namakin te burabeti Mote. Tuangiia ataei taekan taai ngke ko a tia namakina te kaan nakon te Uea, e ngae ngkana ko aki Nooria ni matam.

• Ikotaki n anenea te anene ae kabwarabwara bwa te raa ana namakin Tamara are i Karawa ao Iesu ibukira, n aron “Jesus Is Our Loving Friend” (Aia Boki n Anene Ataei, 58). Kaota tamnei te Tia Kamaiu ni kaotii ana tangira nakoia tabeman (taraa Gospel Art Book, nambwa. 36, 41–43, 46–47). Kaungaiia ataei n tibwaia bwa e kanga aia namakin iaon Tamara are i Karawa ao Iesu.

te aikaon ibukin te anga reirei

Reirei te Reirei: Ataei aika a Ikawai Riki

Te Otinako 31:12–17

Karinean te Tabati bon kanikinaean au tangira ibukin te Uea.

Kawakinan te bong ae te Tabati e kona ni bebete—ao e raka kakukureina—ibukina ngke ataei a ataia bwa bon kanikinaean aia motinnano nakon te Uea.

Waaki ni Kakukurei aika a Kona ni Karaoaki

• Titirakiniia ataei tabeua titiraki ni buokiia n ota bwa tera te kanikina—ibukin te katooto, “Tera kanikina ae ko na ataia bwa ea roko te tiburing ke are ko nai rootaki n te mariiri?” Kaoiia ni wareka Te Otinako 31:13, 16–17 ao kakaea te taeka “kanikina.” Tere ae taekinna te Uea bwa bon te kanikina imarenara ao Ngaia? Bukin tera e rang kakawaki te kanikina aei?

• Kaoiia ataei bwa a na ikaruoruo ni kabwarabwara bukin tera a rineia n karinea te Tabati. Witeo n aron “The Sabbath Is for You” ke “Upon My Holy Day—Honoring the Sabbath” (ChurchofJesusChrist.org) a kona n ibuobuoki.

• Kaoiia ataei ni korei bwaai ni kabane ake a kona n iangoia are a kona ni karaoia n te Tabati ni kaotia nakon te Uea ae a Tangiria. Kaungaia n tibwaua tabeua bwaai man ake a korei. Kaoiia ni uotii karinanin bwai ake a korei nakon mweengaia, n tibwauai ma aia utu, ao n okiriia ngkana iai kainanoan tabeua iango bwa tera ae e na karaoaki n te bong ae te Tabati.

Te Otinako 32:1–8, 19–24

I konaa ni moanibwaia te Uea inanon maiu.

Teuana te rongorongo man te karaki inanon Te Otinako 32 bon kakawakin kawakinan moan tua ake uoua man Tuua ake Tebwina—tai taromauria temanna ke te bwai teuana irarikin te Uea.

Waaki ni Kakukurei aika a Kona ni Karaoaki

• Tuangiia ataei n tibwaua te bwai ae ataia iaon karakinan Aaron ngke e karaoa te kao teteei ae te koora ibukiia Iteraera n taromauriia. Ngkana a kainanoa te ibuobuoki, kaokiia nakon Te Otinako 32:1–8, 19–24, ke tibwaia ma ngaiia “Tuua ake Tebwina” (inanon Karaki man Te O Tetemanti). Bukin tera e bure bwa Iteraera a na taromauria te bwai ae kaaraki? (Ko na riai n kaokiia ataei nakon moan tua ake uoua man Tuua ake Tebwina inanon Te Otinako 20:3–6.)

• Buokiia ataei n iangoi katooton bwaai ake aomata a kona ni kariiriaki n taromauri ao tiaaki te Uea—bwaai are karika tannakon ara kantaninga n aki kaeineti nako Ina. Ngkanne tuangiia bwa a na tibwai katooton bwaai are e buokiia ni kainetii aia iango iaon te Tia Kamaiu ao n Taromauriia.

Te Otinako 32:1–5, 21–24

I kona n tei ni kamanoa te raoiroi.

Ngke kaain Iteraera a tuanga Aaron ni karaoa te bwai ae kaaraki ae koora, e kariaia ni karaoia, e ngae ngke aei e bure (taraa Te Tua Kaua 9:20). Iangoia ko na kanga ni kaungaiia ataei n tei ibukin te raoiroi, riki ngkana tabeman a kairoroia bwa a na aki.

Waaki ni Kakukurei aika a Kona ni Karaoaki

• Kaoiia ataei ni wareka Te Otinako 32:1–5, 21–24, n tatabemaniia ke ni katoatoa, ao tibwai aia iango bwa tera Aaron ae e riai ni karaoia ngke kaain Iteraera a tuangnga bwa e na karaoa te kao teteei ae koora. E na kangaa Aaron n tia ni buokiia aomata?

• Buokiia ataei n iangoi aroaro are a na rinanona ngkana tabeman aomata a tuangiia ni karaoa te bwai teuana ae ataia e bure. Tuangiia ataei n tibwai iango ma tatabeman iaon bwa tera ae na karaoaki n aroaro akanne.

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na tibwauaia ma aia utu taian iango are a ongo n te bong aei iaon e kanga kawakinan te bong ae te Tabati n tabuia.

Kanakoraoan Ara Anga reirei

Kaoiia ataei ni kaota aia koaua. Te titiraki are ko titirakiniia e kona ni kaungaiia ataei n tibwaia bwa e kanga aia namakin iaon te Tia Kamaiu ao e kanga maiuakinan te euangkerio n tia ni kakabwaiaiia. Ngkana a karaoa aei, a bon kaotii aia koaua. (Taraa Reirei n Ana Kawai te Tia Kamaiu, 11, 32.)

iteranibaan waaki ni kakukurei: Karinean te Tabati bon kanikinaean au tangira ibukin te Uea