“Meei 9–15. Warekaia Iteraera 11–14; 20-24: “Kam Na Tai Rawa Nakon Iehova, Tai Maakuia,’” Nakomai, Iriirai—Ibukin te Moanrinan: O Tetemanti 2022 (2021)
“Meei 9–15. Warekaia Iteraera 11–14; 20-24,” Nakomai, Iriirai—Ibukin te Moanrinan: 2022
Meei 9–15
Warekaia Iteraera 11–14; 20–24
“Kam Na Tai Rawa Nakon Iehova, Tai Maakuia”
Te kabwarabwara aei e aki riai ni warekaki bwa te wareware. N onean mwiina, kabongana bwa kona karekei iango ao kairi ibukin ataakin waaki ni kakukurei ake a na kakabwaiaia ataein am kiraati.
Korei Am Namakin
Kaunga te Tibwatibwa
Kaotia nakoia ataei teuana man te tamnei inanon te kabwarabwara aei ke inanon te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu. Angania bwa a na tibwa te bwai are a ataia bwa tera ae e riki n te tamnei aei.
Reirei te Reirei: Ataei aika a Uarereke
I kona ni kakaitau ibukin te bwai ae anganai te Atua.
E ngae ngke te Uea e a tia ni karaoi bwaai aika kamiimi ibukiia tibun Iteraera, n taainako a oneamwina n aia taratara n te bwai ae akea irouia. Buokiia ataei n reiakina bwa a na kakaitau ibukin te bwai ae e a tia n anganiia te Atua.
Waaki ni Kakukurei aika a Kona ni Karaoaki
-
Titirakiniia ataei ngkana a uringi tabeua ana kakai te Uea ae karaoia ni kakabwaiaiia kaain Iteraera n te rereua. (Ngkana ataei a kainanoa buokaia, kaoti tamnei nakoia man te kabwarabwara n Eberi 4–10 inanon Nakomai, Iriirai—Ibukiia Aomata n Tatabeman ao Utu; taraa naba Te Otinako 14:21–22; 15:23–25; 16:4.) Ngkanne kabwaranakoa ibukiia Warekan Iteraera 11:4–10, katereterea bwa te Uea e aki kukurei ibukina kaain Iteraera a ngurengure. Buokiia ataei n iangoi kawai ake a kona ni kaota iai aia kakaitau nakon te Uea.
-
Anene n ikotaki n anenea taekan te kakaitau, ngkai n aron “Wareki Am Bwai” (Anene n Taromauri, nambwa. 241). Kaoiia ataei n tatabeman ni korea tamnein kakabwaia ake e a tia te Uea n anganiia ke aia utu. Kaugaiia n iangoi taekan ke n tarai aia tamnei bwa tera are a kaririaki ni ngurengure iaon te bwai are a akea irouia.
Warekaia Iteraera 13:17–33; 14:6–9
Te onimaki e buokai bwa n aki maaku.
Ngke Mote e kanakoia 12 mwaane ni ukora taekan te aba ni berita, 10 mai buakoia a oki rikaaki bwa a maaku ibukin korakoraia aomata ake a maeka ikekei. Uoman mai buakoia, Kareba ao Iotua, aki maaku, ibukina iai aia onimaki iroun te Uea.
Waaki ni Kakukurei aika a Kona ni Karaoaki
-
Kabonganai taian tamnei ke korotamnein taian kureebe, aia karewe manibeeru, aintoa, ao taian taake n tuangiia ataei ni kakimototoa taekaia 12 mwaane ake a kanakoaki iroun Mote bwa ana ukora te aba ni berita (taraa Warekaia Iteraera 13:17–33; taraa naba “Abwi te Ririki inanon te Rereua” inanon Karaki man te O Tetemanti). Kamataata bwa a kunei mwaitin uanikai ao tabeua amwarake (kaoiia ataei are aongkoa a kang amwarake), ma a maaku naba ibukina aomata ikekei a korakora ao aintoa (kaoiia ataei are aongkoa a maaku). Kaota tamnein Iesu, ao katerea nakoia bwa uoman Iteraera, Kareba ao Iotua, a bon aki maaku ibukina iai aia onimaki iroun Iesu Kristo.
-
Wareka Warekaia Iteraera 14:9 nakoia ataei, ao taetae iaon te tai are ngke ko maaku ma am onimaki iroun Iesu Kristo e buokiko ni karekea te ninikoria. Buokiia ataei bwa ana iangoia bwa ngkana atia n rinanon te taneiai ae aiaekan aron anne.
Tamneimwaane n kaoti taian uanikai nakon MoteTengaun mai ibuakoia ana tibwaai Iteraera a bon maaku; Iotua ao Kareba iai aia onimaki. © Lifeway Collection/licensed from goodsalt.com
I kona n taraa Iesu Kristo.
N aroia tibun Iteraera a bon kamaiuaki man taraakin te naeta ae buraati, ataein am kiraati a na karekea te kamaiuaki man aia taratara nakon te Tia Kamaiu.
Waaki ni Kakukurei aika a Kona ni Karaoaki
-
Kabongana iteranibaan te waaki ni kukurei n te wiiki aei ke te tamnei inanon te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu, tuangiia ataei bwa tera ae riki ngke “naeta aika tiritiri” a roko iaoia kaain Iteraera n aia tabo ni kaemba (taraa Warekaia Iteraera 21:6–9). Buokiia n taraia bwa e kanga te naeta buraati kanga ai aron Iesu Kristo (taraa Ioane 3:14–15). Anganiia ataei bwa a na ikaruoruo ni kabonganai tamnei ni karakina te karaki nakoia n tatabemaniia.
-
Tuangiia bwa a na kamakii mataia ngkai ko katuka tamnein Te Tia Kamaiu inanon te ruu. Ngkanne kaoiia ataei ni kauki mataia, ao ni kakaea te tamnei, ao n taraia. Anganiia ataei aia tai ni kaairuruo bwa temanna e na manga katuka te tamnei inanon te ruu. Ni katoaan te tai are a kunea iai te tamnei, buokiia n iangoa te bwai teuana are a na kona n karaoia n taraa te Tia Kamaiu.
Reirei te Reirei: Ataei aika a Ikawai Riki
E tangirai te Uea bwa N na iriira Ana burabeti.
Warekaia Iteraera 12 iai inanona tabeua reirei aika kakawaki are e na kona ni buokiia ataei ngkana a ongo irouia aomata n taekini bwaai aika aki raoiroi n taekan ana burabeti te Uea ke taekaia tabeman taan kairiiri n te Ekaretia.
Waaki ni Kakukurei aika a Kona ni Karaoaki
-
Tuangiia ataei bwa n tetaina, te Uea e bon aki kukurei ma Aaron ao Miriam, tarin ao mwaanen Mote. Kaoiia bwa a na wareki Warekaia Iteraera 12:1–12 ni kakaea bwa bukin tera. Ni kaeineti nakon kiibu 5–8, e kanga ana namakin te Uea ibukiia Aaron ao Miriam n taetae ni kaitaraa Ana burabeti?
-
Buokiia ataei n iangoi katootongaia aomata inanon koroboki aika tabu ake a iriira te burabeti ao a kakabwaiaaki (ibukin te katooto, taraa Karikan Bwaai 7:7; 1Nibwaai 3;7). Tera tabeua bwaai are ara burabeti ae maiu e a tia n reireiniira? Ti na kanga ni kakabwaiaaki ngkana ti iriira ana reirei?
Iesu Kristo iai mwaakana ni kamarurungai n te maiu n tamnei.
A mwaiti kaain Iteraera ake a mate ibukina akea aia onimaki are te Uea e na kamarurungiia ngkana a taraa te naeta ae buraati (taraa Aramwa 33:18-20). Ko na kanga ni buokiia ataei ake ko reireiniia bwa a na karekea te onimaki ni mwaakan ana kamaiu Iesu Kristo?
Waaki ni Kakukurei aika a Kona ni Karaoaki
-
Kaoiia ataei bwa a na korei tamneia bwaai ake a wareki inanon Warekaia Iteraera 21:4-9. Anganiia ni kabonganai aia tamnei ni karakina aia karaki. Tuangiia ataei n tatabemaniia nako bwa ana iriiri koroboki aika tabu ao n tibwaia bwa tera ae e anga riki nakon mataatara n te karaki: Ioane 3:14–15; 1 Nibwaai 17:41; Aramwa 33:18–20; Ereman 8:13–15; Reirei ao Berita aika Tabu 6:36.
-
Koreia iaon te burakibooti te titiraki n aron Tera ti kona ni karaoia n “Taraa Natin te Atua ma te Onimaki”? (Ereman 8:15). Anganiia ataei n tatabemaniia nako te mwakoro ni beeba, ao kaoiia ni korei aia reke ae mwaiti nakon te titiraki ngkai a iangoia. Rikoi taian beeba, warekii tabeua kaeka n kabaibati, ao kaoiia ataei n taekinna bwa e kanga bwaai aikai ni kona ni buokiira ngkana ti kainanoa mwaakan te Tia Kamaiu.
I konaa n iriira ana kantaninga te Atua, riki ngkana tabeman a kataia n imanonoai n aki.
Baraka e kataia n kairoroa Baraam ni katekebuakaia kaain Iteraera, ma Baraam e ataia bwa aei e bon kaitaraa ana kantaninga te Atua. Ana katooto Baraka e kona ni buokiia ataei ngkana a rinanon te kairoroaki bwa a na aki ongo nakon te Atua.
Waaki ni Kakukurei aika a Kona ni Karaoaki
-
Kamataata Warekaia Iteraera 22:1–18 ibukia ataei, katuruturua bwa e kanga Baraam n rawa ni katekebuakaia ana aomata te Atua, e ngae ngke Baraka, uean Moaba, e na anganna te karineaki ao te kaubwai. Tuangiia ataei ni kakaai inanon kiibu aikai kibuntaeka are a namakina kaotan nanomaakan Baraam n iriira te Atua: Warekaia Iteraera 22:18; 23:26; 24:13. Kaoiia ataei n anaa teuana te kibuntaeka ae a tangiria ao koreia iaon te kaati ni buokiia ni uringnga n ogotaeka nakon te Uea.
-
Marooro ma ataei iaon bwai aika ana riki ngkana raoraoia, ke tabeman a kataia n imanonoiia ni karaoa te bwai ae bure, n aron are e karaoia Baraka nakon Baraam. E kanga ana motinnano Baraam nakon te Uea ni buokiia n totokoi n ana waaki ni kairoroi Baraka? Kaoia ataei bwa ana kataneiaia ni kaeka nakon aro aikai ni kabonganai taeka n aron ana taeka Baraam.
Kaungaa te Kamatebwai n te Mweenga
Kaoiia ataei bwa a na tibwa te bwai teuana ma aia utu, n aron te tamnei, boki aika tabu, ke te anene, are kaotia bwa tera ae a reiakinna n te Moanrinan.
Kanakoraoan Ara Anga reirei
Kauka am iango nakon te kairi mairoun te Tamnei. “N taainako tamaroan te tai n angareirei aki kantaningaki—ibukin te katooto, ngkana temanna e tibwai ana taneiai ke n titirakin titiraki are e kairaki nakon te marooro ae uaana. … Kukurei ni bita am baire ngkana e riai man iriira te wirikiriki ae namakinaki are ko karekei” (Reirei n Ana Kawai te Tia Kamaiu, 10).