“Meei 9–15. Warekaia Iteraera 11–14; 20–24: ‘Ma Kam na Tai Rawa nakon Iehova, ao Tai Maaku,’” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022 (2021)
“Meei 9–15. Warekaia Iteraera 11–14; 20–24,” Nakomai, Iriirai–Ibukiia Aomata n Tatabemaniia ao Utu: 2022
Meei 9–15
Warekaia Iteraera 11–14; 20–24
“Ma Kam na Tai Rawa nakon Iehova, ao Tai Maaku”
Te kamataata aio e kanikinaei tabeua mai buakon mwaitin reirei aika rangi ni kakawaki n aia boki Warekaia Iteraera. Bwaina te iraorao ma tabeman are e na buokiko te Tamnei bwa ko na nooria.
Korei Am Namakin
Te rianna ke te nakonako iaon waem, e taraa n aki taneiai te aba ni kabanea 40 te ririki ni mwananga man rereuan Tinai nakon te aba ni berita are i Kanaan. Ma anne te maan ae a kainnaoia tibun Iteraera, n aki ti rinanon raroan te tabo ma a na riai n rinanon te raroa n te maiu n tamnei:te raroa imarenan ae antai ngaia ao antai ae kainnanoia te Uea bwa ana riki bwa Ana aomata ni berita.
Aia boki Warekaia Iteraera e kabwarabwarai tabeua bwaai aika a riki inanon 40 te ririki akanne, n raonaki ma reirei are a kainnanoia tibun Iteraera bwa a na reiakinaki iai imwaain rokoia n te aba ni berita. A reiakinaki taekan te kakaonimaki nakoia ana toro te Uea ake e a tia n rineiia (taraa Warekaia Iteraera 12). A reiakina taekan mwaakan te Uea, e ngae ngke taraan ae akea te kantaninga ibukin taai aika a na roko (taraa Warekaia Iteraera 13–14). Ao a reiakinaki bwa ngkana akea te onimaki ke n akea te kakoaua e na kaikoaka te tamnei, ma a kona n rairinanoia ao n taraa te Tia Kamaiu ibukin kamaiuakiia (taraa Warekaia Iteraera 21:4–9).
Titebo ngaira ni kabane ma tenaan Iteraera n tabeua aanga. Ti bane n ataia bwa aekakira aron te maeka n te rereua n tamnei, ao te reirei naba anne ae a reiakinna e kona ni buokiira ni katauraoira n rin n oin ara aba ni berita: te maiu ae akea tokina ma Tamara are i Karawa.
Ni kakimototoan te boki ibukin Warekaia Iteraera, taraa “Warekaia Iteraera” n te Bible Dictionary.
Iango ibukin te Kamatebwai i bon Iroum ni Koroboki aika Tabu
Warekaia Iteraera 11:11–17, 24–29; 12
Te kaotioti e tauraoi nakoia aomata ni kabane, ma te Atua e kaira Ana Ekaretia rinanoia Ana burabeti.
Ni Warekaia Iteraera 11:11–17, 24–29, ataa te kangaanga are e kaitara ma ngaia Mote ao katokana are e baireia te Atua. N am iango ao tera ae nanonna Mote ngke e taku bwa e kantaningaia “a bia riki ni burabeti ana aomata Iehova ni kabaneia”? (te kibu 29). Ngkai ko iangoi kiibu aikai, iangoi ana taeka Beretitenti Russell M. Nelson: “Te Atua e tangiria ni kan taetae raoi nakoim? Eng! … O, e rangi ni mwaiti riki te bwai ae tangiria Tamara are i Karawa bwa ko na atai” (“Te kaotioti ibukin te Ekaretia, te Kaotioti ibukin Maiura,” Riaona, Meei 2018, 95).
E ngae n anne, n taekinna bwa aomata a kona n riki bwa te burabeti e aki nanonaki bwa a bane ni kona ni kairiia ana aomate te Atua n aron are e karaoia Mote. Te bwai ae riki aei e koreaki inanon Warekaia Iteraera 12 e kamataata raoi aio. Ngkai ko wareka te mwakoro aio, tera tua ake ko kunei? Tera ae ko namakinna bwa te Uea e tangiria bwa kona mataata n te kaotioti ae onoti ao iriran te burabeti?
Taraa naba 1 Nibwaai 10:17; Reirei ao Berita aika Tabu 28:1–7; Dallin H. Oaks, “Two Lines of Communication,” Liahona, Nobembwa. 2010, 83–86.
Ma te onimaki iroun te Uea, I kona ni karekea te kantaninga ibukin taai aika a na roko.
Ngkai ko wareka Warekaia Iteraera 13–14, kataia kaakiko n te tabo are a mena iai tenaan Iteraera. Bukin tera n am iango ngkai a tangiria ni kan “okira Aikubita”? (Warekaia Iteraera 14:3). Ko a tia n riki bwa kanga aekakiia tekoraki ake a taraia bwa akea tekeraoia ibukin rokoia n te aba ni berita? Ko na kanga ni kabwarabwara te “nano” ae kaokoro are e reke iroun Kareba? (Warekaia Iteraera 14:24). Tera ae kakukureiko ibukin ana onimaki Kareba ao Iotua, ao ko na kanga ni kamwakuri aia katooto nakon kangaanga ake ko kaitara ma ngaai?
Taraa naba Aia Reirei Beretitenti n te Ekaretia: Gordon B. Hinckley (2016), 75–76.
Ngkana I taraa Iesu Kristo inanon te onimaki, E kona ni kamaiuai n tamneiu.
Burabeti n ana Boki Moomon a ataa te karaki are e koreaki ni Warekaia Iteraera 21:4–9 ao n ataa bonganana n te tamnei. Tera ae a reitia 1 Nibwaai 17:40–41; Aramwa 33:18–22; ao Ereman 8:13–15 nakon am atatai ibukin te karaki aei? Ngkai ko kamatebwai karaki aikai, iangoa taekan te kamaiuaki n tamnei are ko kantaningaia. A riai tibun Iteraera n “[taraa] te naeta are te burati” (Warekaia Iteraera 21:9) bwa aonga ni kamaiuaki. Tera ae ko namakinna bwa e anaaki nanom ni kabwaninna ni karaoia “taraa natin te Atua ma te onimaki”? (Ereman 8:15).
Taraa naba Ioane 3:14–15; Reirei ao Berita aika Tabu 6:36; Dale G. Renlund, “E Kabatiaaki ma Taian Kakabwaia,” Liahona, Meei 2019, 70–73.
A kamaiuaki kaain Iteraera man taraakin te naeta are te burati.
I kona n ira ana kantaninga te Atua, e ngae ngke a kataia ni kaumakai tabeman bwa N na aki.
Ngke Baraka, Uean Moaba, e ataia bwa a na nang kaoti kaain Iteraera, e wewetea Baraam, te mwaane ae kinaaki n te uawi e anga kakabwaia ao te kamaraia. Baraka e tangiria bwa a na kamamaraaki kaain Iteraera man anganaki te maraia. Ataia bwa e kanga Baraka ni kataia ni kaumaka Baraam (taraa Warekaia Iteraera 22:5–7, 15–17), ao iangoi taian kariiri ake ko kaitara ma ngaai ni kaitara ana kantaninga te Atua. Tera ae kakukurei n ana kaeka Baraam n Warekaia Iteraera 22:18, 38; 23:8, 12, 26; 24:13?
Ae kananokawaki, bwa taraan ae Baraam e ira nanon ana kairoro te aonaaba ao e a kamwanea Iteraera (taraa Warekaia Iteraera 31:16; Iuta 1:11). Iangoia bwa ko na kanga n teimatoa ni kakaonimaki nakon te Uea n aki tabe man aia kairoro tabeman.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Warekaia Iteraera 11:4–6.Anuara ti te arona ma anuaia kaain Iteraera are e kabwarabwaraki n Warekaia Iteraera 11:4–6? E kanga te reirei n Reirei ao Berita 59:15–21 n ibuobuoki?
-
Warekaia Iteraera 12:3.E kanga ni kaotia Mote bwa “e bati n nimamanei” ni Warekaia Iteraera 12 ke inanon tabeua rongorongo ni koroboki aika tabu ake ko a tia ni wareki? Ko kona ni rinanoa ana kabwarabwara Unimwaane David A. Bednar ibukin te nimamannei inanon ana rongorongo “Bwaina te Nimamannei ao te Nanorinano” (Riaona, Meei 2018, 30–33) ke inanon “Meek, Meekness” inanon te Kairi nakon Koroboki aika Tabu (scriptures.ChurchofJesusChrist.org). Tera ae ti reiakinna iaon ae ti na kanga n riki n nimamannei? Tera kakabwaia aika a na kaoti ngkana ti karaoia?
-
Warekaia Iteraera 13–14.A kona uoman (ke a mwaiti riki) kaain am utu ni baka n ae a “tuoa ni karaba” (Warekaia Iteraera 13:17) teuana mwakoron mweengam aongkoa are e riki bwa te aba ni berita. Ngkanne a kona n anga aia ribooti n tatabemaniia ae boboto iaon Warekaia Iteraera 13:27–33 ke Warekaia Iteraera 14:6–9. Tera ae ti reiakinna ibukin te onimaki man uoua ribooti aika a kakaokoro inanon kiibu aikai? Ti na kanga n riki n ai aron Kareba ao Iotua?
-
Warekaia Iteraera 21:6–9.Imwiin warekan Warekaia Iteraera 21:4–9, n raonaki ma 1 Nibwaai 17:40–41; Aramwa 33:18–22; ao Ereman 8:13–15,a kona am utu ni karaoa te naeta man te beeba ke te tano ae kabooaki ma te timanti ao korea iaona ke iaon te beeba tabeua bwaai aika bebete ake ko kona ni karaoi n “taraa natin te Atua ma te onimaki” (Ereman 8:15).
Ibukin iango riki tabeua ibukin reireinaia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae katauaki: “Jesus, the Very Thought of Thee,” Boki n Anene, nambwa. 141.
Kanakoraoan Ara Anga reirei
Buokiia am utu ni karikirakea te toronibwai n te tamnei. “Nakon ae ko na tii tibwaua te rongorongo, buokiia [kaain am utu] ni kakaei koaua n te euangkerio inanon booki aika tabu i bon ibukiia ao aia taeka burabeti” (Reirei n ana Kawai te Tia Kamaiu 28).
Mote ma te Naeta ae te Buraati, iroun Judith Mehr