“Meei 16–22. Te Tua-Kaua 6–8; 15; 18; 29–30; 34: ‘Ko na Tarataraiko Iai Bwa Ko na Aki Mwanuoka Iehova,’” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022 (2021)
“Meei 16–22. Te Tua-Kaua 6–8; 15; 18; 29–30; 34,” Nakomai, Iriirai–Ibukiia Aomata n Tatabemaniia ao Utu: Te O Tetemanti: 2022
Tamnein Mote iaon Maungan Nebo, © Providence Collection/licensed from goodsalt.com
Meei 16–22
Te Tua-Kaua 6–8; 15; 18; 29–30; 34
“Ko na Tarataraiko Iai Bwa Ko na Aki Mwanuoka Iehova”
Mote e tuangiia tibun Iteraera bwa a na reireia ana taeka te Uea nakoia natiia (taraa Te Tua-Kaua 6:7). Ngkai ko kamatebwaia Te Tua Kaua n te wiiki aei, kakaei kawai n tibwa are ko a tia n reiakinna ma kaain am utu.
Korei Am Namakin
E moanaki ana mwakui Mote iaon te maunga, ngke e taetae te Atua nakoina man te aroka ae urarake (taraa Te Otinako 3:1–10). Ao e toki naba iaon te maunga, n ae riaon riki 40 te ririki, ngke te Atua e angan Mote taraan te aba ni berita mai taubukin Maungan Nebo (taraa Te Tua-Kaua 34:1–4). E kabanea maiuna Mote ni katauraoiia tibun Iteraera bwa a na rin n te aba ni berita anne, ao ana boki Te Tua Kaua e korei ana kabanea ni kaetieti, kauring, kaunganano, ao te bubuti n onnon ma kaain Iteraera. Warekan ana taeka e kamataata raoi bwa oin te kantaninga n ana mwakuri Mote—te katauraoi are a kainnanoia aomata—tiaki ibukin te kamaiuaki n te rereua, te tokanikai iaon aaba, ke katean te kaomiuniti. Bon te reiakinaki ibukin tangiran te Atua, n ongotaeka Irouna, ao n teimatoa ni kakaonimaki Nakoina. Anne te katauraoi ae ti bane ni kainnanoia n te aro are ti aonga n roko n te aba ni berita are te maiu are akea tokina. Ngaia ae ngkai Moote e aki roko n te “aba ae ranga iai te rannimamma ao aia karewe maniberu” (Te Otinako 3:8), ibukin ana onimaki ao ana kakaonimaki, e bon roko n te aba ni berita are e a tia ni katauraoia te Atua ibukiia ni kabane ake a Iriiria.
Ni kakimototoan Te Tua Kaua, taraa “Te Tua-Kaua” n te Bible Dictionary.
Iango ibukin te Kamatebwai i bon Iroum ni Koroboki aika Tabu
Te Tua-Kaua 6:4–7; 8:2–5, 11–17; 29:18–20; 30:6–10, 15–20
Te Uea e tuangai bwa N na tangiria ma nanou ni kabane.
N ana moan anga reirei, Mote e kauringiia tibun Iteraera, “E memena Iehova ae Atuam i roum n ririki aika angaun aikai; akea te bwai teuana ae kainanom ngkai akea,” e ngae ngke ke kam mena inanon te rereua (Te Tua-Kaua 2:7). Ngkai a roko Iteraera n te aba ni berita, ma “kawa aika abwabwaki aika raraoi, aika [a] aki katei, ma auti aika on ni bwai aika raraoi ni kabane, aika [a] aki kaon” (Te Tua-Kaua 6:10–11), e maaku Mote bwa a na kamatoatoai nanoia ao ni mwanuokina te Uea.
Iangoa te bwai are e riki inanom ngkai ko wareka ana reirei Mote. Ko na tangiria ni kabanea nanom iaon kiibu akana imwiina ao korei am namakin:
Tera ae ko kona ni karaoia ni kateimatoa n aki kamatoa nanom ao n tangira te Uea ma nanom ni kabane? Tera te reitaki ae ko nooria imarenan Te Tua-Kaua 6:5–6 ao Mataio 22:35–40? (taraa naba Nakoaia Ibonga 19:18).
Taraa naba Dieter F. Uchtdorf, “A Yearning for Home,” Liahona, Nobembwa. 2017, 21–24.
“Ko na Tarataraiko Iai Bwa Ko na Aki Mwanuoka Iehova”
Angiin te roro mai Iteraera ake a na roko n te aba ni berita a aki nora te rekenikai n te aoraki i Aikubita ke n toua nanon Tari ae Uraura. E ataia Mote bwa ngaiia—ao rooro aika a na roko—a na riai n uring ana kakai ma ana tua te Atua ngkana a na teimatoa n riki bwa ana aomata te Atua.
Tera te reirei are e anga Mote inanon Te Tua-Kaua 6:4–12, 20–25 are e na buokiko n uring bwaai aika a korakora ake e a tia ni karaoi te Atua ibukim? Tera ae kaunga nanom bwa ko na karaoia n te aro are ana taeka te Uea ni katoa tai a na “mena i nanom”? (te kibu 6).
Ko na kanga ni bwaatina am onimaki nakoia rooro n taai aika a na roko?
Taraa naba Te Tua-Kaua 11:18–21; Gerrit W. Gong, “Always Remember Him,” Liahona, Meei 2016, 108–11; Bible Dictionary, “Frontlets or phylacteries.”
Buokaia ake a rangi ni kainnano e irekereke ma baai aika tituaraoi ao naano aika tatauraoi.
Te Tua-Kaua 15:1–15 e anga taeka n reirei ibukin buokakia ake a kainnano ao ake akea aia bwai, n raonaki ma tabeua mwakuri are aki iraki nanoia n te bong aei. Ma ataia bwa tera ae a taekinna kiibu aikai bwa bukin tera ngkai ti riai ni buokiia ake a kainnano ao aron anuara ngkana ti a buokiia e kakawaki iroun te Uea. Tera am namakin ae tangiria te Uea bwa kona reiakin man kiibu aikai n te beku ibukiia tabeman?
Taraa naba Russell M. Nelson, “Tuua aika Uoua aika Moan te Korakora,” Riaona, Nob. 2019, 96–100.
Iesu Kristo bon te Burabeti are e na kaikawakirake n aron Mote.
Betero, Nibwaai, Moronaai, ao te Tia Kamaiu ae Boni Ngaia a bane n taetae iaon te taetae ni burabeti inanon Te Tua-Kaua 18:15–19 (see Makuri 3:20–23; 1 Nibwaai 22:20–21; Iotebwa Timiti—Rongorongo 1:40; 3 Nibwaai 20:23). Tera ae ko reiakinna n rongorongon te Tia Kamaiu man kiibu aikai? E kanga te Tia Kamaiu n riki n ai aron ” Mote? (Tua-Kaua 18:15).
Iesu Kristo bon te burabeti n ai aron Mote.
Tera ae e riki nakon Mote?
E ngae ngke Tua-Kaua 34:5–8 e taku bwa e mate Mote, te atatai ni boong aika kaitira a kamataata bwa e onikaki rabwatana, ke ni bitaki bwa e aonga n aki rootaki n te maraki ke te mate ni karokoa e a manga kautaki (taraa Aramwa 45:18–19; Bible Dictionary, “Mote”; Kairi nakon Koroboki aika Tabu, “Translated Beings,” scriptures.ChurchofJesusChrist.org). E bon riai ibukin Mote bwa e na onikaki rabwatana ibukina bwa e kainnanoa rabwatana bwa e aonga n anga kiingin te nakoanibonga nakon Betero, Iakobo, ao Ioane iaon Maungan te Onikaki (taraa Mataio 17:1–13).
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Te Tua-Kaua 6:10–15.A na kona kiibu aikai ni kairi nanoia am utu bwa a na iangoi kawai ake a tia ni kakabwaiaki iai am utu. Ti kanga n ira te reirei “ko na tarataraiko iai bwa ko na aki mwanuoka Iehova”? (Tua-Kaua 6:12). Ko na bae ni kan korei am namakin ibukin am kakabwaia, tao inanon am tienoro, ke tao iaon te FamilySearch.
-
Te Tua-Kaua 6:13, 16; 8:3.Kiibu aikai a buoka te Tia Kamaiu inanon te tai ae kakawaki inanon maiuna, n taraia bwa e kanga, bane wareka Mataio 4:1–10. Tera karaki man booki aika tabu are a tia ni buokiira n taai are ti kainnanoa iai te buoka?
-
Te Tua-Kaua 7:6–9.Karaoa te bwai teuana ae na buokiia kaain am utu n namakina ae a kakawaki, n aron katauraoan te amwarake ae mamaten nanoia. Ngkanne ko kona ni wareka Te Tua-Kaua 7:6–9 ao maroroakinna tera am namakin n ae nanonaki n riki bwa “ana aomata ae bon ana botanaomata” (te kibu 6) iroun te Uea.
-
Te Tua-Kaua 29:12–13.Maroroakina taekan Te Tua-Kaua 29:12–13 e katauraoa te tibwanga ibukiia am utu ni maroroakin berita ake a na karaoi ke ake a tia ni karaoi ma Tamara are i Karawa. Tera ae e nanonaki n riki bwa ana aomata te Atua? E kanga ara berita aika tabu “ni kateimatoai [ra] … bwa ana botanaomata [te Atua]”? (te kibu 13).
Ibukin iango riki tabeuai bukin reiakinaia ataei, taraa te kamataata n te wiiki aei i nanon Nakomai, Iriirai—Ibukin te Moanrinan.
Te anene ae tamaroa: “I Want to Live the Gospel,” Aia Boki n Anene Ataei, 148.
Kananakoraoan Am Kamatebwai I Bon Iroum
Ukera oin am atatai. Te kamataata e kaoti kiibu ao reirei aika ko na katurui ami iango iaona, ma aio e na riai n aki kauarerekea am kamatebwai. Ngkai ko kamatebwai, ko na bae n reiakina taekan te reirei are e aki taekinaki ikai. Kariaia te Tamnei bwa e na kairiko nakon te bwai are ko kan reiakinna.
Te Uea e Kaoti Aba ni Kabane Nakoina, iroun Walter Ranee