“Maati 28–Eberi 3. Te Otinako 7–13: ‘Uringa te Bong Aio, are Kam Otinako Iai mai Aikubita,’” Nakomai, Iriirai—Ibukiia Aomata n Tatabemaniia ao Utu: O Tetemanti 2022 (2021)
“Maati 28–Eberi 3. Te Otinako 7–13,” Nakomai, Iriirai—Ibukiia Aomata n Tatabemaniia ao Utu: 2022
Korobanan Mote ao Aaron i nanon ana tabo ni kabowi Pharaoh, iroun Robert T. Barrett
Maati 28–Eberi 3
Te Otinako 7–13
“Uringa te Bong Aio, are Kam Otinako Iai mai Aikubita”
Ngkai ko wareka man iangoa Te Otinako 7–13, korei iango ake a roko iroum. Ngkan ko karaoa aei ni katoa te tai, e na rikirake am kona ni kinaa ana wirikiriki te Tamnei ae Raoiroi.
Korea Am Namakin
Te karekekai teuana imwin teuana e roota Aikubita, ma e teimatoa Barao n aki kan kainaomataia tibun Iteraera. Ma e ngae n anne e reitinako te Atua ni kaota mwaakana ao n anga Barao te tai n butimwaea “bwa Ngai te Uea” ao “akea aekakiu ni kabanea te aonaba” (Te Otinako 7:5; 9:14). N te tai aei, Mote ao tibun Iteraera tao a mataku ma te miimi ni kaotin mwaakn te Atua ibukiia. E koaua bwa kanikina aikai a kamatoaa aia onimaki iroun te Atua ao a kakorakora nanoia ni ira ana burabeti te Atua. Ngkanne, imwiin taian karekekai aika ruaiwa aikai aki kainaomataia tibun Iteraera, bon te katebwina ni karekekai—mateia karimoa, n ikotaki ma natin Barao are te karimoa—are e a katoka te tautoronaki. Aio e kakan ibukina bwa n taian tautoronaki n te maiu n tamnei, bon iai teuana te kawai nakon te kainaomataaki. Tao tera ae ti a tia ni kataia n taai aika nako, e titebo arona ma are irouia tibun Iteraera. Bon tii rinanon maten Iesu Kristo, te Karimoa ni Mwaane—raraan te tiibu te teei ae itiaki—are e na kamaiura.
Iango ibukin te Kamatebwai i bon Iroum ni Koroboki aika Tabu
I kona n rineia bwa N na kamaraua nanou.
Te kantaninga bwa e aki rangi ni korakora nanom ni kakaitara te Atua n aron nanon Barao. Ma, bon iai naba taai are nanora aikoa rangi ni marau nakon are e kantaningaaki nako iai, ngaia are iai te bwai ae ti kona n reiakinna man ana waaki Barao are koreaki i nanon Te Otinako 7–10. Ngkai ko wareka taekan taian karekekai n mwakoro aikai, tera ae ko noria n ana kaeka Barao? Ko nori tabeua anua n te matoa n nano ake a titebo ma ake iroum? Iangoia bwa ko na kanga n reirei man mwakoro aikai bwa tera ae nanonaki n te nano ae marau.
Uringnga bwa n Ana Rairairi Iotebwa Timiti n Te Otinako 7:3, 13; 9:12; 10:1, 20, 27; 11:10 e kamataata bwa tiaki te Uea are kamatoaa nanon Barao—bon Barao are e kamatoaa oin nanona (tarai footnotes ibukin kibu ni kabane).
Tera ae ko reiakinna man kiibu aikai i aon karekean te nano ae marau? 1 Nibwaai 2:16; Motiaea 3:19; Aramwa 24:7–8; 62:41; Ita 12:27.
Taraa naba Michael T. Ringwood, “An Easiness and Willingness to Believe,” Riaona, Nov. 2009, 100–102.
Te Toa are te Riao e kanikinaea Ana Mwakuri ni Kamaiu Iesu Kristo.
Tii teuana te kawai are a na mauri tibun Iteraera man te katebwina ni karekekai, are kabwarabwaraki i nanon Te Otinako 11:4–5, bwa iran raoi kaetieti are e anga te Atua nakon Mote i nanon Te Otinako 12, te waaki ni bootaki are aranaki bwa te Toa are te Riao. Te Toa are te Riao e reireiniira rinanon kanikina bwa ngkai e a tia te Uea ni kainaomataia tibun Iteraera man te tautoronaki i Aikubita, E kona naba ni kainaomataira man ana taurekereke te bure. Tera ae ko kunea n taian kaetieti ao kanikina n te Toa are te Riao ae kauringko iaon Iesu Kristo ao Ana mwakuri ni Kamaiu? Tera ae a kaotia nakoim kanikina ao kaetieti aikai i aon aron karekean ana kakabwaia Ana Mwakuri ni Kamaiu? N aron te katooto, tera ae tei ibukina kanimwan raran te tiibu i aon bouan te mataroa? (kibu 7). Tera ngkoe iroum ae nanonaki n are a na “mena ami kau i waemi, ao okomi i nanon baimi”? (kibu 11).
Taraa naba Reirei ao Berita aika Tabu 89:21.
Te toa e buokiira ni kauringiira ara Tia Kainaomataira, Iesu Kristo.
Te Otinako 12:14–17, 24–27; 13:1–16
E buokai te toa n uringa kainaomataakiu rinanon Iesu Kristo.
E tangiria te Tia Kamaiu bwa tibun Iteraera a na uringa n taainako ae E a tia ni kainaomataia, e ngae ngke tautoronakiia te bwai ae e a maan nako. Aio bukina ngkai E tua nakoia bwa a na kakaraoa te Toa are te Riao ni katoa ririki. Ngkai ko wareka Ana kaetieti i nanon Te Otinako 12:14–17, 24–27; 13:1–16, iangoia bwa tera ae ko karaoia n uringa ana kakabwaia te Atua nakoim. Ko na kanga ni kateimatoaa te kauring anne “irouia kanoam”? (taraa Te Otinako 12:14, 26–27).
Tera baika a titebo ake ko nori imarenan oin te kantaninga n te Toa are te Riao ao te toa? E kanga warekan taekan te Toa are te Riao n kauringko te toa ao ni kakorakora kakawakin te otenanti anne? Iangoia bwa ko na kanga n “aki toki n ururinga” Iesu Kristo (Moronaai 4:3; 5:2; taraa naba Ruka 22:7–8, 19–20).
Ko kona n iangoi naba bwaai are e tangiria te Uea bwa ko na uring; taraa, te katooto, Ereman 5:6–12; Moronaai 10:3; Reirei ao Berita aika Tabu 3:3–5, 10; 18:10; 52:40.
Taraa naba Ioane 6:54; “Always Remember Him” (video), ChurchofJesusChrist.org; “The Sacrament of the Lord’s Supper,” i nanon Teachings of Presidents of the Church: Howard W. Hunter (2015), 197–206.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Te Otinako 7–12.Tao imwin warekan taian karekekai are e karokoia te Uea i aoia kaain Aikubita bwa kanikinaean Mwaakana, a kona kaain am utu n tibwauai kawai are e kaotii iai Mwaakana ni bong aikai.
-
Te Otinako 8:28, 32; 9:27–28, 34–35.Kiibu aikai a kona ni kabonganaki ni moana te marooro i aon kakawakin kakoroan nanon ara taeka. Tao a kona kaain te utu n tibwauai karaki are a tia n noria tabeman ni karaoi baike a kariaia ni karaoi.
-
Te Otinako 12:1–42.Imwin te bootaki ni wareka Te Otinako 12:1–42 , kam kona ni koroboki iaon moti ni beba bwai ake ko kona ni karaoi n te utu n uringa Ana Mwakuri ni Kamaiu Iesu Kristo. Ibukina bwa raraan te tibu te teei i aon bouan te mataroa (taraa kibu 23) e tei ibukin te Tia Kamaiu, ko kona ni kamenai beba aikai i rarikin mataroan mwengami. Kam kona naba ni kanii amwaraken te Toa are te Riao, n aron te kariki are e aki karikaki (craker ke tortillas) ke amwarake aika mangingi (parsly ke horseradish), ao ni marooro bwa e kanga te Toa are te Riao ni buokira n uringa aron te Atua ni kainaomataia Ana aomata. N aron te katooto, te kariki are e aki karikaki e kauringiira bwa bon akea te tai ibukin aia kariki bwa e na riki imwain are a kitana te tautoronaki. Amwarake ake a mangingi a kauringiia buakakan te tautoronaki.
-
Te Otinako 12:14, 24–27.Tao ko kona n manga wareki kiibu aikai n te utu imwain te bootaki n toa ae na roko. A kanga kiibu aikai n irekereke nakon te toa? Ti na kanga ni karika riki te toa bwa te “kauring” n te bwai are e karaoia te Tia Kamaiu ibukira?
Ibukin riki iango ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Te anene ae tamaroa: “In Memory of the Crucified,” Anene n Taromauri, nambwa 190.
Kanakoraoan Ara Anga reirei
Tibwauai reirei man bwaai ni kabootau. Kaoia kaain te utu ni kakaei bwaai ake a na buokiia n oota n reirei i nanon koroboki aika tabu ake a warekii. N aron te katooto, bwaai aika mamarau ke mamatoa a kona ni buokiia kaain te utu ni marooroakina te kaokoro imarenan te nano ae marau ao ae matoa.
Korobanan amwaraken te Toa are te Riao, iroun Brian Call