I kakabwaiaki Man te Mwakuri ni Mitinare
Au tataro bwa ngkami kairake n ataeinimwane ao aine ao ami karo, kam na ataa te kakabwaia man te mwakuri ni mitinare.
Ko rabwa, Beretitenti Nelson, ibukin am reirei iaon te mwakuri ni mitinare.
Tariu ma mwaaneu, inanon ririki aika a bwakanako ngke I taetae n te maungatabu ni kabuta, e mabubu au taratara ni matau te angamaing man aorakin te mata ae uruakin ataein te mata, e rikirake ni korakora n te aro are I aki kona n noraba ni matau aei.
N aorakin matau aei, ai aron ae e raka au kakaitau n te konabwai n noraba, ai uana naba ma te taratara ae kororaoi. Ngkana I taraa anuan maiu, I noori bwaai aika a riki ake a uota te bitaki ae korakora nakoiu. Teuana rongorongou bwa inanon kairakeu ao I mitinare ike I a karekei kakabwaia ma kakorakoran tamneiu n au tai ni mwakuri n te aba ae Engiran.
I a tia n iangoi kaangaaanga aika a irekereke ma te mwane n tain Kerikakin Kaubwain te Aba n te ririki 1930 tabun are e bita aroia au karo ma utu. E kabanea korakorana tamau n ana karikirake ae te kabonako kaa ma ni kareke maiu ibukin ana utu n te tai anne are a aikoa nanako n te taromauri.
E boni ngae ngke e aki bwanin ara utu n te taromauri, e aki bwaka au taromauri irarikia raoraou.
Ni boong akekei, au kouru bwa N na nako ni mitinare, ma I tuai tuangiia au karo.
Ngke I reirei n te kuura n reirei ae rietata, ngai ma raoraou, ti motikia bwa ti na mwananga ni mitinare. I kawara au bitiobi; I kanoa au booma ngke a nako ni motirawa au karo. N okia au karo, I kakukabanakoia n te rongorongo bwa ngaia N na mwakuri i Buritan. I kaitau n aia boutoka ae korakora nakon au rinerine aei ao n aia ibuobuoki raoraou ake a boutokaai nakon te mwakuri.
Au mwakuri ni mitinare; e katauraoai nakon te nakoa ni kainnaba ao ni karo ao n au karikirake. E katauraoai naba nakon te beku iroun te Uea n Ana Ekaretia.
N te maungatabu ni kabuta n 1985, I mwiokoaki bwa N na maroro n aia bwabwaro kaain te nakoanibonga. I kaineta au maroro nakoia ataeinimwane. I maroro iaon te katauroi nakon te mwakuri ni mitinare. I taku n te tai anne, “Man tibwangau ake I karekei n te Ekaretia, bon akea ae moamoa riki nakon ribanakiu are I karekea ngke tebwi ma ruaiwa au ririki n au tai ni mwakuri ni mitinare.”1
E kinai ngkami te Uea. N ami tai ni mitinare, Kam na karekei bwaai ake a na buoki ngkami ni kakorakora ami atatai i Rouna. Kam na kakorakora tamneimi ngkana kam beku i Rouna. N Arana, kam na karaoa tibwangami ae te beku ibukia tabemwang. E na angani ngkami taai ike kam na ongo iai ana wirikiriki te Tamnei ae Raoiroi. Kam kariaiakaki iroun te Uea bwa kam na reirei n Arana. Kam kona ni katerea nakoina bwa E kona n onimakini ngkami ni karaoan tibwangami.
Nimaua te namwakaina n nako, Unimwaane Jeffrey R. Holland ao Unimwaane Quentin L. Cook, mmwaane aika a mitinare i Buritan, a raonai ngke I kawaria kaain te aro ao mitinare n te aba anne. N te tai anne, I karaua n iangoa au mwakuri ngke te kairake ni mitinare ngai. I kaota au koaua bwa n au mition are I karekea iai te atatai ae A tangirai Tamau are i Karawa ao au Tia Kamaiu, Iesu Kristo.
I kakabwaiaki bwa uoman au beretitenti n te mition, Selvoy J. Boyer ao Stayner Richards, ao kainnabaia aika botumwaaka Gladys Boyer ao Janem Richards. Ngkana I tanrikaki, I ataia bwa a tangirai man onimakinai. A reireiai te euangkerio. E korakora aia onimaki irou. A anganai tibwangau aika matoa ao nakoa ni kairiri ake a karikirakeai man katauraoai nakon au beku inanon maiu.
I a tia naba ni karaua n iangoa weteau iroun Beretitenti Spencer W. Kimball bwa N na tararuaa te Canada Toronto Mition ma kainnabau ae Barbara, ike a raonira natira. Ti weteaki nakon te beku iroun Beretitenti Kimball n Eberi 1974, imwin ana maroro iaon te mwakuri ni mitinare ae kangai atuna “Ngkana E Rairaki te Aonaaba.”2 N ana maroro, e kabwarabwara ana kataratara n uotakin te euangkerio nakon te aonaaba ae bwanin. E kaewenakoia aomata man mwakoron nako te aonaaba nakon te mwakuri ni mitinare. E kauringira ana kantaninga te Uea “bwa a riai aomata nako… n anga te bwanaa ni kauring nakoia aomatan te aonaaba.”3 Ana reirei Beretitenti Kimball are a riai ataeinimwane ni mwananga ni mitinare e riki bwa kanoan te maroro n te mwenga ni kabuta te aonaaba. E tuai bitaki te kantaninga aei. I kaitau bwa n te ingabong aei, e kamatoaki ana kantaninga te Uea aei iroun Beretitenti Russell M.Nelson.
E kaania 10 te ririki imwin ana katanoata Beretitenti Thomas S. Monson ni kerikakin te ririki ibukin te mwakuri ni mitinare ibukia ataeinimwane ma ataeinaine.4 N au taratara, oin te bitaki aei bwa e na reke aia tai kairake ni karekea te tibwanga ae tamaroa ni karaoa te mwakuri ni mitinare.
Ngai ae ana Abotoro Iesu Kristo, I kaewenakoi ngkami ataeinimwane—ao ataeinaine ake iai nanoia n te mwakuri ni mitinare—bwa kam na maroro ma ami karo ibukin te mwananga ni mitinare. I kaoi naba ngkami bwa kam na maroro ma raoraomi iaon te mwakuri ni mitinare, ao ngkana iai raoraomi ae tuai moti ana iango, kaungaa bwa e na maroro ma ana bitiobi.
Karaoa ami motinnano ibon iroumi ao nakon Tamami are i Karawa bwa kam na mitinare ao man te bong aei kam na kaitiaka nanomi, baimi, ao ami iango. I kaoi ngkami bwa kam na karekea ami koaua ae matoa n ana euangkerio Iesu Kristo.
Ngkami aia karo ma tinaia kairake, iai tabemi ae kakaawaki n te waaki ni katauraoi aei. Maroro ma natimi iaon te mwakuri ni mitinare. Ti ataia bwa e korakora ana ibuobuoki te utu ni katauraoaia ataeinimwane ma ataeinaine.
Ngkana e bwaka ami ririki n te roro ni mitinare ao kam tuai mitinare ibukin te butinaoraki ke bwaai riki tabeua, I kaoi ngkami nakon te beku. Maroro ma ami bitiobi, ao katauraoi nakon te beku ibukin te Uea.
I kaungai ngkami bitiobi bwa kam na buokia ataeinimwane ma ataeinaine ake a uakan ma te roro ni mitinare bwa a na katauraoia, ao I kaungai naba ngkami bitiobi bwa kam na kinaia naake a roro nakon te mwakuri ao a tuai mwananga. Kaoia ataeinimwane bwa a na mitinare, ai uana naba ma ataeinaine ake iai nanoia ni kan beku.
Nakoimi mitinare ake kam beku ngkai, ti karabwai ngkami. Kam mitinare n tain te butinaoraki n te aonaaba. Ibukin anne, e okoro tein ami mwakuri ma mitinare ake a tia ni mwakuri ni mitinare imwain te ririki 2020. I ataia bwa e aki bebete. Ma e ngae ngke e matoa kanoan te tai aei, bon aio ami mwakuri mairoun te Uea, ao kam a tia ni karaoa raoi tibwangami. Te katoto, kam a tia ni kabonganai bwaai ni mwakuri ni kawai aika a boou n ukeria naake a tauraoi n ongora Kaokakin ana euangkerio Iesu Kristo. Ngkai kam botumwaaka ni beku nakon ami kabanea ni kona, I ataia bwa e kukurei te Uea n ami mwakuri. I ataia bwa kam na kakabwaiaki n ami mwakuri.
Ngkana kam a kamotirawaki man ami mition, uringnga bwa kam aki kamotirawaki man te kakaonimaki n te Ekaretia. Kateimatoai katei aika tamaroa ake kam reiakin n ami mition, waaki nako ni kakorakora ami koaua, mwakuri korakora, bwaina te tataro, ao ongeaba nakon te Uea. Kawakin ami berita aika tabu. Reitanako ami mwakuri n ibuobuoki nakoia aomata.
Au tataro bwa ngkami kairake n ataeinimwane ao aine ao ami karo, kam na ataa te kakabwaia man te mwakuri ni mitinare. Ke roko te atatai n ami iango man namakina korakoran ana kakao te Uea are e anga nakoia natin Motiaea. E taku ana taeka, “Naako … ao katea au taeka; ma kam na taotaon nanomi n te tai ni kainnano ae maan ma karawawata, bwa kam aonga ni kaoti banna aika a raraoi … irou, ao N na karaoi ngkami bwa bwaai ni mwakuri i nanon baiu ibukin kamaiuaia aomata aika a mwaiti.”5
Au tataro bwa E na urakina ana kakabwaia te Atua iaoia kairake n te Ekaretia bwa a na karekea te nano ni katauraoi ao ni beku i Rouna.