“Māe 13–19: ‘Juon Meram … Meram eo Ejjeļo̧k Jem̧ļo̧kin.‘ Mosaia 11–17,” Itok, Ļoor Eō—N̄an M̧weeo im Kabun̄ in: Bok in Mormon 2024 (2024)
“Māe 13–19. Mosaia 11–17,” Itok, Ļoor Eō—N̄an M̧weeo im Kabun̄ in: 2020 (2024)
Abinadai ej Pād Im̧aan Kiin̄ Noa, jān Andrew Bosley
Māe 13–19: “Juon Meram … Meram eo Ejjeļo̧k Jem̧ļo̧kin”
Mosaia 11–17
Kijeek ko reļļap remaron̄ jino jān juon jekadļo̧k. Abinadia eaar juon wōt em̧m̧aan ej kam̧ool ņae juon kiin̄ ekajoor im jikin ekajet eo an. Naan ko an kar julo̧ki elōn̄ wōt iaer, im kar liakeļo̧k n̄an mej. Aaet an naan in kam̧ool kōn Jisōs Kraist , eo ej “meram eo … eo emaron̄ jab tinaad” (Mosaia 16:9), kar kairuj juon men itulowaan pris eo edik Alma. Im bwe jekadļo̧k in oktaktok eo eaar jino eddōkļo̧k ilo an Alma kar bōktok elōn̄ ro jet n̄an ukweļo̧k im tōmak ilo Jisōs Kraist. Uruur in kijeek ko me rekar m̧an Abinidai āliktata kar mājkunļo̧k, bōtaab kijeek in tōmak eo me naan ko an raar ejaaki maron̄ kar wōr juon kilaan aitok kitien ioon Rinipai ro—im ioon ro rej riiti naan ko an rainin. Elōn̄ iaad naaj jamin jelm̧ae āinwōt ta eo Abinidai eaar jelm̧ae kōnke kōn naan in kam̧ool ko ad, bōtaab ewōr ad aolep iien ko n̄e ļoor Jisōs Kraist ej juon idajon̄jon̄ in peran im tōmak eo ad. Bōlen ekkatak kōn naan in kam̧ool eo an Abinadai enaaj kōkajoorļo̧k kijeek ko an naan in kam̧ool eo im peran eo ilo būruwōm̧ barāinwōt.
Bar lale “Abinadi Testifies of Jesus Christ” (video), Gospel Lāibrāre.
Ļōmņak ko n̄an Ekkatak ilo M̧weeo im ilo Kabun̄ in
Imaron̄ jutak kōn Jisōs Kraist, jekdo̧o̧n n̄e ij jutak make iaaō.
Ilo am̧ ekkatak Mosaia 11–13; 17, lale pija in Abinadai. Ta eo kwoj katak kake n̄an jutak āinwōt juon rikam̧ool an Kraist? Im eļaptata, kwomaron̄ mije wōt am̧ ekkatak ilo eoon ko im kajjitōk ko āinwōt kein:
-
Elmen am̧ kwaļo̧k kadkadin Noa im armej ro an? Etke Abinadai eaikuj peran n̄an kwaļo̧k ennaan eo an Anij n̄an er? (lale Mosaia 11:1–19, 27–29; 12:9–15).
-
Ekōjkan am̧ kwaļo̧k kadkadin Abinadai? Ta jeļā eo an Abinadai me ekar jipan̄ e peran ilo naan in kam̧ool eo an? (lale Mosaia 13:2–9, 28, 33–35; 17:8–10, 20).
N̄aat eo kwaar en̄jake āinwōt kwaar jutak make iaam̧ n̄an jutak kōn Rilo̧mo̧o̧r im gospel eo An? Elmen An kar jipan̄ eok en̄jake ke Ekar pād ippam? Ilo am̧ lin̄uri menin, kwomaron̄ riiti bwebwenato eo an Ilaisha im rijerbal eo an ilo 2 Kiin̄ Ro 6:14–17. Ta eo ej im̧we eok kōn bwebwenato in?
Kwomaron̄ bar lale peij 31–33 ilo N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet ko n̄an pukot naan ko me rej lewaj n̄an eok kajoor n̄an jurake m̧ool eo. Ak kwomaron̄ kōm̧m̧ane ilo ejja al eo āinwōt “Kōmmōne Ta Eo Ejimwe” ak “Jen Wōnmanlok Wōt” (Al, no. 24, 7).
Elmen am̧ naaj mour kake ta eo kwaar ekkatak jān Abinadai? Pija eo “Dare to Stand Alone” (Gospel Library) pija ko ilo jekjek ko me kwomaron̄ jutak kōn Kraist im gospel eo An. Ta taitōļ ko jet me kwomaron̄ bar ļōmņaki?
Bar lale Rom 1:16; 2 Timote 1:7–8; “Jebta 8: The Call for Courage,” Teachings of Presidents of the Church: Thomas S. Monson (2022), 135–47; Gospel Topics, “Faith in Jesus Christ,” Gospel Library.
Katakin kōn Jetōb eo “Kwaļo̧k gospel eo ekajoor ejjab wōt ilo kepooj juon katak ak kepooj eok make ilo jetōb [n̄an] ron̄jake im ļoor tōl eo an Jetōb ilo am̧ katakin” (Teaching in the Savior’s Way, 17).
Ij aikuj mour kake ilo būruwō n̄an meļeļe naan eo an Anij.
Pris ro an kiin̄ Noa raar jeļā kōn naan in Anij. Remaron̄ kouti naan ko jen jeje ko rekwojarjar n̄an kwaļo̧k kōn kien ko. Im aaet, eaar jab jelet mour ko aer jen gospel eo an Rilo̧mo̧o̧r. Etke?
Ļōmņak kōn menin ilo am̧ riiti Mosaia 12:19–37. Ta meļeļein ilo am̧ ļōmņak n̄an meļeļe naan eo an Anij ilo būruōm̧? Ta naan ko ak eoon ko rej im̧we eok n̄an kōm̧m̧an oktak ilo wāween am̧ ekkatak gospel in?
Kien ko an Anij raikuj jeje ilo būruwō.
Ļōmņake naan ko an Abinadai bwe kien ko raar “jab jeje [ilo] būruōn” pris ro (Mosaia 13:11). Ta meļeļein naan in? Ilo am̧ riiti Mosaia 13:11–26, ļōmņake n̄e kien kein rej jeje ilo būruōm̧.
Bar lale Jeremaia 31:31–34; 2 Korint 3:3.
Jisōs Kraist eaar en̄taan kōn eō.
Ilo Mosaia 14–15, keememej naan ko im eoon ko me rej kōmeļeļeik Rilo̧mo̧o̧r im ta eo Eaar en̄taan kōn eok. Eoon ta ko rej kam̧wilaļļo̧k iakwe eo am̧ im kam̧m̧oolol eo am̧ n̄an E?
Elmen an Jisōs Kraist jim̧or Jemen im Nejin?
Abinadai eaar kwaļo̧k bwe Anij Nejin—Jisōs Kraist—enaaj Rilo̧mo̧o̧r eo (lale Mosaia 15:1), jokwe ilo kanniōk, erom̧ jim̧or armej im Anij (eoon 2–3). Eaar lukkuun in ajeļo̧k E make n̄an ankilan Anij Jemen (eoon 5–9). Kōnke menin, Jisōs Kraist ej jim̧or Nejin Anij im eo eweppān ioon laļ in ej itok ilo etan Anij Jemen (lale Jon 14:6–10).
Jisōs Kraist ej bar Jemed ilo jeļā bwe jej bōk pinmuur eo An, jej erom̧ “ro ineen” im “rijolōt e aelōn̄ in Anij” (Mosaia 15:11–12). Ilo bar juon wāween ba, jej erom bar ļotak ilo jetōb kōn E (lale Mosaia 5:7).
Etke kwoj en̄jake eaorōk n̄an jeļā m̧ool kein kōn Jemedwōj Ilan̄ im Jisōs Kraist? Elmen an naan in kam̧ool eo an Abinadai kōkajoorļo̧k tōmak eo am̧ ilo Er?
Ļōmņak ko n̄an Katakin Ajri ro
Imaron̄ jutak kōn Jisōs Kraist, jekdo̧o̧n n̄e ij jutak make iaaō.
-
Ilo jet iien ilo mour ko ad, jej aolep ioon inepata n̄an kōm̧m̧an bwe kālet ko ren jum̧aik tōmak eo ad ilo Jisōs Kraist. Ta eo ajri ro nejum̧ remaron̄ katak jān Abinadai n̄an jutak āinwōt juon rikam̧ool an Jisōs Kraist, men̄e ejjab emejaja? Pija in ilo laajrak in ak “Jebta 14: Abinadai im Kiin̄ Noa” (ilo Bwebwenato ko an Bok in Mormon, 38–42) emaron̄ jipan̄ er lo bwebwenato eo ilo Mosaia 11–13; 17. Kajjitōk ippāer ta eo em̧m̧an ippāer kōn Abinadai.
-
Ajri ro nejum̧ remaron̄ kōņaan kōm̧m̧ane jidikin bwebwenato eo an Abinadai. Innām remaron̄ kōm̧m̧ane ilo m̧oolin n̄an kōjerbale ta eo remaron̄ kōm̧m̧ane n̄e ro jet rekōņaan kōm̧m̧ani men ko rebōd. Ak remaron̄ kwaļo̧k en̄jake ko ke raar peran n̄an ļoor Jisōs Kraist. Elmen an Abinadai kar ļoor Jisōs Kraist? (lale Mosaia 13:2–9; 17:7–10). Etke Kiin̄ Noa eaar jab kōm̧m̧ane ta eo ekar jeļā ke ejim̧we? (lale Mosaia 17:11–12).
Ij aikuj pokake Kien ko Jon̄oul.
-
Pris ro an Kiin̄ Noa raar jeļā kōn kien ko ak eaar jab “jeje [ilo] būruweer” (Mosaia 13:11). Elmen am̧ naaj jipan̄ ajri ro nejum̧ jeļā kōn kien ko im iakwi? Bōlen remaron̄ je kien ko jān Mosaia 12:33–36 im 13:11–24 ioon m̧ōttan peba annan̄in menono eo. Ilo aer kōm̧m̧ane, kōnono ippāer kōn ta meļeļein kien kein im elmen ļoori. Elmen ad je kien kein ilo būruwōd?
-
Al ippān doon kōn juon al kōn kien ko, eo āinwōt “Keep the Commandments” (Children’s Songbook, 146–47). Ta kōjeraam̧m̧an ko rej itok jān kōjparok kien ko?
Jeje ko rekwojarjar rej katakin kōj kien ko an Anij.
Jemedwōj Ilan̄ ekar jilkintok Jisōs Kraist n̄an tōlļo̧k eō n̄an Ippān.
-
Men̄e ej juon jebta ekadu, Mosaia 14 ewōr jet naan ko im eoon ko me rej kōmeļeļeik Jisōs Kraist. Bōlen kwe im ajri ro nejum̧ maron̄ kōlaajraki ilo ami riiti jebta in ippān doon. Innām kwomaron̄ kōnono kake elmen am̧ en̄jake kōn Rilo̧mo̧o̧r ilo am̧ ekkatak naan im eoon kein.
-
N̄an katakin kōn Jisōs Kraist, Abinadai eaar kōnono jān rikanaan Aiseia, eo eaar keidi kōj n̄an jiip eo ejebwābwe. Bōlen ajri ro nejūm̧ remaron̄ kwaļo̧k en̄jake ko aer ke raar luuji juon men ak kar jōbwābwe. Elmen aer kar en̄jake? Ta eo raar kōm̧m̧ane? Innām kwomaron̄ riit ippān doon Mosaia14:6 im 16:4–9. Elmen ad āinwōt jiip eo ej jebwābwe jān Anij? Ekōjkan an Jisōs Kraist kar jipan̄ kōj bar ro̧o̧ltok?
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.
Turin Mejān eaar Romaakļo̧k kōn Eļap Meram, jān Jeremy Winborg