Minerva Teichert (1888–1976), Escape of King Limhi and His People, 1949–1951, oil on masonite, 35 7/8 × 48 inches. Brigham Young University Museum of Art, 1969.

Mosaia 20–26: “Jaar Deļo̧n̄e juon Bujen Ippān”

Mosaia 18–24

Bwebwenato in armej ro an Alma ilo Mosaia 18; 23–24 ej kwaļo̧k ta meļeļein n̄an “itok ilo wōrwōr an Anij” (Mosaia 18:8). Ke armej ro an Alma raar peptaij, raar kōm̧m̧ane juon bujen ippān Anij n̄an “jerbal n̄an E im kōjparok kien ko An” (Mosaia 18:10). Ke menin ekar juon kallim̧ur an kajjojo armej ippān Anij, eaar barāinwōt kōn wāween aer kar kōm̧m̧an n̄an doon. Aaet, iaļ in n̄an jepļaak n̄an ippān Jemedwōj Ilan̄ ej an juon make armej, im ejjeļo̧k juon emaron̄ kōjparok bujen ko ad n̄an kōj, ak ejjab meļeļein jej make iaad. Jej aolep aikuji doon. Āinwōt membōr ro ilo Kabun̄ in eo an Kraist, jej bujen n̄an jerbal n̄an Anij ilo ad jipan̄ im jerbal n̄an doon ilo iaļ in, “in[eek] eddo ko an doon” (Mosaia 18:8–10). Armej ro an Alma rekar lukkuun eddodo, āinwōt bar kōj. Im juon wāween Irooj ej jipan̄ kōj, ej “kotak eddo ko [ad] ilo ejjeļo̧k pen” (Mosaia 24:15) ej ilo leļo̧k kapijuknen in Armej ro Rekwojarjar ro em̧ōj aer kar kallim̧ur n̄an buromōj ippād im kaenōm̧m̧an kōj, āinwōt ad kar kallim̧ur n̄an kōm̧m̧an āindein n̄an er.

Bar lale “The Lord Delivers the Covenant Peoples of Alma and Limhi” (video), Gospel Ļāibrāre.

Ļōmņak ko n̄an Ekkatak ilo M̧weeo im ilo Kabun̄ in

Mosaia 18:1–17

N̄e ij peptaij, ij kōm̧m̧ane juon bujen ippān Anij.

Ļōmņak elmen lukkuun tōmak eo an ro ilo Mosaia 18 kar en̄jake kōn Jisōs Kraist. Raar aikuj in kittileek, kōn kauwōtata eļap, n̄an ekkatak kōn E (lale eoon 3). Im ke ej etal jidik iien n̄an kwaļo̧k aer kallim̧ur kōn bujen peptaij “raar kabbokbok peier ilo m̧ōņōņō, im ļam̧ōj: En̄in ej ikdeelel eo an būruwōm̧” (Mosaia 18:11).

Riiti eoon kein emaron̄ in juon men em̧m̧an n̄an kōļmenļo̧kjeņ kōn aorōkin bujen ko am̧ ippam̧. Ilo am̧ ekkatak Mosaia 18:8–14 eļaptata, ļōmņak in kajjitōk kajjitōk kein āinwōt:

• Ta eo kwoj ekkatak jān eoon kein kōn kallim̧ur ko kwaar kōm̧m̧ani ilo iien peptaij? Ta eo Anij ej kallim̧uri eok? (lale eoon 10, 13).

• Elmen an bujen eo n̄an jerbal n̄an Anij eiokļo̧k jerbal in karejar eo ad n̄an ro jet? (lale eoon 8–9).

• Ta meļeļein n̄an kwe n̄an “jutak āinwōt [juon rikam̧ool] an Anij”? (eoon 9).

• Elmen an kōjparok bujen peptaij eo am̧ jipan̄ eok n̄an “obrak kōn Jetōb”? (Mosaia 18:14). Elmen an Jetōb jipan̄ eok kōjparok bujen ko am̧?

Uwaaki kajjitōk kein emaron̄ tōlļo̧k eok n̄an kōļmenļo̧kjeņ etke bujen ko im kain̄i ko raorōk ippān Anij. Kwomaron̄ lo ļōmņak ko ilo ennaan eo an Elder Gerrit W. Gong “Ribujen Ippān” (Liaona, Okt. 2019, 80–83) ak ennaan eo an Būreejtōn Jean B. Bingham “Bujen ko ippān Anij Rekajoorļo̧k, Kōjparok, im Kōpooj Kōj n̄an Aiboojoj eo Indeeo” (Liaona, Māe 2022, 66–69). Etke kwoj kam̧m̧oolol kōn bujen ko? Ta eo kwoj kōm̧mane n̄an kōjparok kallim̧ur ko am̧?

Bar lale Gospel Topics, “Baptism,” Gospel Library; “Alma the Elder Teaches and Baptizes at the Waters of Mormon” (video), Gospel Library.

Katak m̧ool jān jeje ko rekwojarjar im rikanaan ro ilo raan kein āliktata. Ilo am̧ katakin—im ekkatak—keememej bwe juon iaan wāween eo em̧m̧antata n̄an kōļapļo̧k tōmak ilo Kraist ej n̄an mije wōt jeje ko rekwojarjar im naan ko an rikanaan ro raan kein āliktata (lale Mosaia 18:19).

Mosaia 18:17–30

Anij ej kakien armej ro An n̄an aiindoon, kōlaajrak, im n̄an juon wōt.

Jet armej rej bwilōn̄, etke jej aikuji juon kabun̄? Lale Mosaia 18:17–31, pukot men eo eaorōk armej ro an Alma raar loe n̄an kuk ippān doon ilo “kabun̄ eo an Kraist” (Mosaia 18:17). Ta men ko rein juon wōt kwoj loe ilo Kabun̄ eo an Jisōs Kraist ilo tōre eo an Alma im tōre in ad?

Elmen am̧ uwaake eo m̧ōttam̧ ak uwaan baam̧le eo eo ejjab tōmak bwe jutak in bar juon kabun̄ eaorōk? Etke kwoj kam̧m̧oolol n̄an uwaanļo̧k Kabun̄ eo an Jisōs Kraist?

Ta eo kwomaron̄ kōm̧m̧ane n̄an jipan̄ membōr ro ilo ward ak branch eo am̧ bwe ren “kuk ippān doon ilo bōrokuk im ilo iakwe”(Mosaia 18:21).

Bar lale Dallin H. Oaks, “Aikuj eo n̄an juon Kabun̄,” Liaona, Okt. 2021, 24–26; “Love One Another,” Hymns, no. 308.

Mosaia 21–24

Anij ej jipan̄ eō ineek eddodo ko aō.

Armej ro an Limai im armej ro an Alma raar jim̧or en̄jake kōm̧akoko, men̄e ilo jekjek ko roktak. Ta eo kwomaron̄ ekkatak n̄an keidi bwebwenato in armej ro an Limai ilo Mosaia 19–22 im armej ro an Alma ilo Mosaia 18; 23–24? Ilo am̧ kōm̧m̧ane, pukōt ennaan ko me rekkar n̄an mour eo am̧. N̄an waanjon̄ak, ta meļeļein “jidik ilo̧k jidik”? (Mosaia 21:16). Elmen am̧ maron̄ mour kōņ pedped in?

Mosaia 23:21–24; 24:8–17

Imaron̄ lōke Irooj.

Men̄e rekar ukweļo̧k jān jerawiwi ko aer, Alma im armej ro an rekar kile ke rej pād wōt ilo kōm̧akoko. En̄jake ko aer ej kwaļo̧k bwe lōke Irooj im mour kake bujen ko ad ejjab aolep iien bōkļo̧k apan̄ ko ad, ak ej jipan̄ kōj anjo̧ jeni. Ilo am̧ riiti Mosaia 23:21–24 im 24:8–17, keememej naan ko im naan ko rekadu me remaron̄ jipan̄ eok ekkatak n̄an lōke Anij, jekdoon jekjek rot kopād ie.

Bar lale David A. Bednar, “Bear Up Their Burdens with Ease,” Liaona, Māe 2014, 87–90.

Ļōmņak ko n̄an Katakin Ajri ro

Mosaia 18:7–17

N̄e ij peptaij, ij kōm̧m̧ane juon bujen ippān Anij.

• Juon iaan wāween ko raorōk tata n̄an jipan̄ ajri ro nejum̧ m̧aanjabpopo n̄an peptaij ej n̄an katakin er kōn bujen eo renaaj kōm̧m̧ane n̄e rej peptaij. Menin emaron̄ pidodo ilo an kwaļo̧k pija eo ilo jem̧ļo̧kin laajrak eo an wiik in im riit kōn bujen eo ippāer ilo Mosaia 18:9–10. Ļōmņak in karuwaineneik juon ajri eo em̧ōj an kar peptaij n̄an kwaļo̧k menin n̄an ajri ro reddikļo̧k. Ajri ro nejum̧ remaron̄ m̧ōņōņō in ron̄ kōn peptaij eo am̧. Elmen an kōjparok bujen ko am̧ ippān Anij kar kōjeraam̧m̧an mour eo am̧?

• Ajri ro em̧ōj aer kar peptaij emaron̄ emakijkij aer keememej bujen eo raar kōm̧m̧ane n̄an kōkāāle kajjojo wiik ilo kwojkwoj eo. Bōlen ajri ro nejum̧ remaron̄ keidi bujen peptaij eo kar kōmeļeļeiki ilo Mosaia 18:8–10 ippān jar in kwojkwoj eo (lale Katak im Bujen Ko 20:77,79). Ekōjkan ad maron̄ kōm̧m̧ane kwojkwoj eo bwe en juon iien eaorōk, kautieje, ejja āinwōt kar iien peptaij ko ad?

Jej kōm̧m̧ane juon bujen ippān Anij n̄e jej peptaij.

Mosaia 18:17–28

Ke iaar peptaij, iaar erom̧ juon membōr in Kabun̄ eo an Jisōs Kraist.

• Ajri ro nejum̧ rejeļā ke ta meļeļein n̄an erom juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata? Ļōmņak in jipan̄ er pukot pija ko me rej pinej jenkwan men ko membōr ro an Kabun̄ in rej kōm̧m̧ane ilo Mosaia 18:17–28. N̄an waanjon̄ak, pija in Ekkapit n̄an Priesthood im Kōļļā juon M̧ōttan Jon̄oul (Gospel Art Book, , 113) maron̄ pinej jenkwan eoon 18 im 27–28. Jiron̄ er etke kwoj kam̧m̧oolol n̄an juon membōr in Kabun̄ eo an Jisōs Kraist.

• Jipan̄ ajri ro en̄jake “kuk ippān doon ilo bōrokuk im ilo iakwe” (Mosaia 18:21) jipan̄ er pen wōt ilo Kabun̄ in ilo aolepen mour ko aer. Ļōmņak in karuwaineneik ajri ro nejum̧ n̄an riiti Mosaia 18:17–28. Ta eo membōr in Kabun̄ eo an Kraist ilo tōre eo an Alma rekar kōm̧m̧ane n̄an iakwe im jerbal n̄an ro jet? Elmen ad kōm̧m̧ane menin ilo ward, branch, im jukjukinpād eo ad? Al juon al kōn iakwe, āinwōt “I’ll Walk with You” (Children’s Songbook, 140), emaron̄ kapen ennaan in.

Mosaia 24:8–17

Anij emaron̄ kōmeraik eddodo ko aō.

• Juon katak eo epidodo emaron̄ kōm̧m̧an eļap keememej. Ļōmņak in kanne juon pāāk kōn men ko reddo (bwe en pinej jenkwan eddodo ko) im kūr juon ajri n̄an jibwe pāāk eo. Ilo am̧ riiti Mosaia 24:8–17 ippān ajri ro nejum̧, kajjitōk ippāer n̄an kōm̧akūt juon aitōm̧ jen pāāk eo aolep iien rej ron̄ kōn men ko Alma im armej ro an rekar kōm̧m̧ane n̄an pukot jipan̄ jān Anij kōn eddodo ko aer. Innām kwomaron̄ kōnono ippāer kōn wāween an Jemedwōj Ilan̄ maron̄ kōm̧m̧an bwe eddodo ko ad ren mera n̄e jej pukot An jipan̄.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Dān ko an Mormon, jān Jorge Cocco