“Māe 27–Juun 2: ‘Raar Kūr Er Armej ro an Anij.’ Mosaia 25–28,” Itok, Ļoor Eō—N̄an M̧weeo im Kabun̄ in: Bok in Mormon 2024 (2024)
“Māe 27–Juun 2. Mosaia 25–28,” Itok, Loor Eō—N̄an M̧weeo im Kabun̄ in: 2024 (2024)
Oktak eo an Alma eo Edik, jān Gary L. Kapp
Māe 27–Juun 2: “Raar Kūr Er Armej ro an Anij”
Mosaia 25–28
Ālkin an epaakļo̧k jilu epepen in aer kar jokwe ettoļo̧k jān doon, RiNipai ro raar bar ippān doon im juon wōt. Armej ro an Limai, armej ro an Alma, im armej ro an Mosaia—barāinwōt armej in Zaraemla, ro me rejjab bwijin Nipai—kiiō rekar aolep “bōnbōn ippān RiNipai ro” (Mosaia 25:13). Elōn̄ iaer raar barāinwōt kōņaan erom̧ membōr in Kabun̄ eo an Irooj, eo an armej ro an Alma. Kōn menin aolep ro “raar kōņaan bōk ioer etan Kraist” raar peptaij, “im raar kūr er armej ro an Anij” (Mosaia 25:23–24). Ālkin iiō in poktak im kōm̧akoko ko, ilo kalimjōkeļo̧k āinwōt n̄e RiNipai ro raar lukkuun m̧ōņōņō kōn juon iien aenōm̧m̧an.
Ak ejjab to, ro me rejjab tōmak raar jino kakkure ro me raar tōmak. Ta eo eaar kōm̧m̧ane bwe menin eļap an kaburomōjmōj eaar bwe elōn̄ iaan rein me rejjab tōmak rekar ro nejin ritōmak—ro “rej epepen tokālik” (Mosaia 26:1), ekoba ļōmaro nejin Mosaia im juon nejin Alma. Bwebwenato in ej kwaļo̧k kōn loļo̧k eo ekabwilōn̄lōn̄ an juon enjeļ. Ak kabwilōn̄ļōn̄ eo em̧ool an bwebwenato in ejjab kōn wōt enjeļ eo eaar waļo̧k n̄an ļōm̧aro nejin. Oktak ej juon kabwilōn̄lōn̄ eo me, ilo bar juon wāween, aikuj in waļo̧k n̄an kōj aolep.
Ļōmņak ko n̄an Ekkatak ilo M̧weeo im ilo Kabun̄ in
Imaron̄ jipan̄ ro jet itok n̄an Jisōs Kraist.
Oktak ej an juon make—eban ajeej āinwōt menin jolet n̄an bar juon nejin armej. Ilo am̧ riiti Mosaia 26:1–6, ļōmņaki un ko rekkar “n̄an epepen tokālik” eo ekar wōtļo̧k, im kile jekjek in jab tōmak eo aer. Kwomaron̄ bar ļōmņak kōn armej ro me kwōj kōņaan bwe kwon bōktok er n̄an Kraist. Ilo aolepen am̧ ekkatak kōn Mosaia 25–28, Jetōb emaron̄ unoojdikdik n̄an eok men ko kwomaron̄ jipan̄ er kōļapļo̧k tōmak ilo Jisōs Kraist.
Ro rikarejeraņ Anij retiljek rej kappukot n̄an kōm̧anm̧an Ankilaan.
Jet iien jemaron̄ ļōmņak bwe juon ritōl an Kabun̄ in āinwōt Alma aolep iien ejeļā men eo ejim̧we n̄an kōm̧m̧ane. Ilo Mosaia 26 jej riit kōn juon jorrāān ilo Kabun̄ eo me Alma ejjan̄in kar ioone. Ta eo Alma eaar kōm̧m̧ane ilo jekjek in? (lale Mosaia 26:13–14, 33–34, 38–39). Ta eo me en̄jake eo an Alma ej kwaļo̧k kōn wāween am̧ maron̄ jelm̧ae apan̄ ko reppen ilo baam̧le eo am̧ ak ilo iien jar ko ilo Kabun̄ in?
Ta eo Irooj ekar katakin Alma ilo Mosaia 26:15–32? Kile bwe jet iaan m̧ool ko rejjab kajju kar uwaak kajjitōk eo an Alma. Ta eo menin ej kwaļo̧k n̄an eok kōn jar im bōk revelesōn ko an juon make?
Pedped in katak ko rej indeeo. Ļōmņak kōn wāween am̧ mour kaki bwebwenato ko im katak ko ilo jeje ko rekwojarjar. N̄an waanjon̄ak, kwomaron̄ kajjitōkin eok make, “Ta en̄jake ko aō me rej āinwōt Alma” ak “Ta m̧ool ko kar kwaļo̧k jen Alma emaron̄ jipan̄ eō?”
Anij ej jeo̧rļo̧k aō bōd n̄e ij ukweļo̧k im jeo̧rļo̧k an ro jet bōd.
Ukweļo̧k im jeo̧rļo̧k bōd rej men ko ekkā aer waļo̧k ilo Mosaia 26–27. Pukot naan ko im eoon ko me rej kwaļo̧k kōn ukweļo̧k im jeorlo̧k bōd ilo Mosaia 26:22–24, 29–31; 27:23–37.
Jet armej remaron̄ ļōmņak eļan̄n̄e Anij ej lukkuun jeo̧rļo̧k aer bōd. Elmen am̧ antooneļo̧k Alma eo Erūtto kar kapilōk membōr in Kabun̄ eo ilo Zarahemla eo ekar wōr an kajjitōk? Ta eo Alma ekar ekkatak jān Irooj ilo Mosaia 26:15–31 me ekar jipan̄ membōr in Kabun̄ eo? (bar lale Moronai 6:8; Katak im Bujen Ko 19:16–18; 58:42–43).
Kōn Jisōs Kraist, Imaron̄ oktak n̄an em̧m̧anlo̧k.
Ekar alikkar bwe Alma eo Edik ekar aikuj bar lo̧tak ilo jetōb. E im ļōm̧aro nejin Mosaia raar “rikajjōjōtata in ro rijero̧wiwi” (Mosaia 28:4). Ak ejjab to ālkin oktaktok eo an, Alma eaar kam̧ool bwe oktaktok epojak aolep iien—im emenin aikuj im aorōk—n̄an aolep armej: “Kwōn jab bwilōn̄,” eaar ba, “bwe aolep armej … reaikuj bar ļotak” (Mosaia 27:25; kar kobaiktok katak eo).
Ilo am̧ riiti en̄jake eo an Alma ej pād ilo Mosaia 27:8–37, kwomaron̄ kajjieon̄ likūt eok make ilo jekjek eo ekar pād ie. Kwomaron̄ ke ļōmņaki men ko kōn kwe make me raikuj in oktak? Wōn, āinwōt Jemān Alma, ej jipan̄ eok im jar kōn eok “kōn eļap tōmak”? Ta en̄jake ko me rekar jipan̄ “karreel [eok] kōn kajoor im maron̄ an Anij”? (Mosaia 27:14). Ta “men ko reļļap” me em̧ōj an Irooj kōm̧m̧ani n̄an eok ak baam̧le eo am̧ me kwomaron̄ “keememej”? (Mosaia 27:16). Ta eo kwoj ekkatak jān naan ko an Alma eo Edik im m̧akūtkūt ko an kōn ta meļeļein n̄an bar ļotak? Ta waanjon̄ak ko em̧ōj am̧ loi?
Bōk jidik iien n̄an je jet iaan wāween ko Rilo̧mo̧o̧r ej jipan̄ eok oktak—ak bar lo̧tak—men̄e en̄jake ko am̧ rejjab jejjet ak āinwōt ko an Alma. Ewōr ke juon al kwomaron̄ al kake ak ron̄jake n̄an kwaļo̧k en̄jake ko am̧, āinwōt “Ij Lokjenaō”? Al, no. 14). Wōn emaron̄ jeraam̧m̧an n̄an ron̄jake en̄jake ko am̧?
Elder David A. Bednar ekar keidi bar lo̧tak n̄an jerbal in kōm̧man kiudi n̄an an erom̧ pikōļ (lale “Ye Must Be Born Again,” Liaona, Māe 2007, 19–22). Ta eo oktak in ej katakin eok kōn oktak?
Bar lale Gospel Topics, “Become like Jesus Christ,” Gospel Library; “Alma Testifies He Has Been Born of God” (video), Gospel Ļāibrāre.
Anij ej ron̄jake jar ko aō im enaaj uwaaki ekkar n̄an Ankilaan im iien.
Bōlen em̧ōj am̧ pād ilo jekjek ko an Alma eo Erūtto ippān juon uwaan baam̧le eo ej kōm̧m̧ani kālet ko rebōd. Ta eo kwoj loe ilo Mosaia 27:8–24 me ej lewaj n̄an eok kōjatdikdik? Elmen an eoon kein im̧we jar ko am̧ kōn ro jet??
N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.
Ļōmņak ko n̄an Katakin Ajri ro
Irooj ekōņaan bwe in jeorļo̧k bōd.
-
N̄an jipan̄ ajri ro nejum̧ loe ta eo Irooj ekar katakin Alma kake kōn jeo̧rļo̧k bōd, kwomaron̄ kajjitōk ippāer n̄an riiti Mosaia 26:29–31 im bwine jete alen an naan in “jeorļo̧k bōd” waļo̧k. Ta eo eoon kein rej katakin kōj kōn jeorļo̧k an ro jet bōd? (Bar lale “Help Me, Dear Father,” Children’s Songbook, 99.)
-
N̄an kwaļo̧k waanjon̄ak eo an Rilo̧mo̧o̧r kōn jeorļo̧k bōd, kwomaron̄ kwaļo̧k juon pijain E ioon debweel eo im riit ippān doon Luk 23:33–34. Ta eo Jisōs ekar kajjitōk ippān Jemedwōj Ilan̄ n̄an kōm̧m̧ane n̄an armej ro raar likūt E ioon debweel? Ālkin kōnono menin, ajri ro nejum̧ remaron̄ ikkure kōn jeorlo̧k bōd an doon.
-
Jet iien epen n̄an jeorļo̧k ad make bōd n̄e jej kōm̧m̧an bōd. Elmen an naan ko an Anij jipan̄ Alma? Kajjitōk ippān ajri ro n̄an kōtōnn̄e rej kōnono n̄an juon eo me ejjab tōmak ke Anij emaron̄ jeorlo̧k an bōd n̄an jidik. Kajjitōk ippān ajri ro nejum̧ n̄an pukot men ko ilo Mosaia 26:22–23, 29–30 me emaron̄ jipan̄ armej eo.
Jisōs Kraist ej jipan̄ eō erom̧ eļapļo̧k āinwōt E.
-
Oktak eo an Alma eo Edik im ļōm̧aro nejin Mosaia emaron̄ kwaļo̧k n̄an ajri ro nejum̧ bwe, kōn kajoor eo an Rilo̧mo̧o̧r, jabdewōt emaron̄ oktak. Kwe im ajri ro nejum̧ maron̄ kōjerbal uno ko ilo laajrak in, peij in m̧akūtkūt eo an wiik in, im jet eoon jen Mosaia 27:8–37 n̄an kwaļo̧k bwebwenato eo (bar lale “Jebta 18: An Alma eo Edik Ukweļo̧k,” ilo Bwebwento ko ilo Bok in Mormon, 49–52). Kwaļo̧k eoon 24, n̄an kwaļo̧k bwe Alma ekar ukweļo̧k im Jisōs Kraist ekar jipan̄ e oktak. Kōtļo̧k an ajri ro nejum̧ n̄an kōm̧m̧ane m̧akūtkūt ko jān bwebwenato eo n̄e rekōņaan.
Jemān Eaar Lan̄lōn̄, jān Walter Rane
Imaron̄ jar im jitlo̧k n̄an Anij n̄an kōjeraam̧m̧an armej ro ij iakwe.
-
Riit ippān doon Mosaia 27:8–24, im kajjitōk ippān ajri ro n̄an pukōt ta eo Alma im armej ro an rekar kōm̧m̧ane n̄an jipan̄ Alma eo Edik. Kwonan̄in ke kar jitlo̧k im jar kōn ro jet? Kwaļo̧k en̄jake ko am̧ n̄an ajri ro nejum̧, im kōtļo̧k bwe ren kwaļo̧k ko aer.
-
Kwe ke ak ajri ro nejum̧ jeļā ke kajjien ro rej aikuji jipan̄ eo an Anij? Ļoor waanjon̄ak eo an Alma, bōlen kwomaron̄ jar ippān doon kōn armej eo im, n̄e ajri ro nejum̧ remaron̄, bar jitlo̧k kōn er.
N̄an ļōmņak ko reļļapļo̧k, lale ennaan eo an allōn̄ in eo Jera māākjiin.
Pija in juon enjeļ ej waļo̧k n̄an Alma eo Edik, jān Kevin Keele