Wāween an Alma im Amulek kar diwōj jān kaļbuuj, jān Andrew Bosley

Juun 24–30: “Deļo̧n̄ ilo Kakkije eo an Irooj”

Alma 13–16

Ilo elōn̄ wāween ko, ekar lukkuun em̧m̧an n̄an Amulek im Ziezrom. Amulek ekar “juon em̧m̧aan ejjab dik an bun̄bun̄,” kōn “elōn̄ ro nukū im jera” im “eļap m̧weie” (Alma 10:4). Ziezrom ekar juon rikien eo ebun̄bun̄ “kōn eļap jerbal” (Alma 10:31). Innām Alma ekar tōparļo̧k kōn juon kūr ekwojarjar n̄an ukweļo̧k im “deļo̧n̄ ilo kakkije eo an Irooj” (Alma 13:16). N̄an Amulek, Ziezrom, im ro jet, n̄an bōk kūr in ekar aikuj bwe ren kaarmejjet kōņaan ko aer innām deļo̧n̄ ilo apan̄ ko reppen n̄an jelmaeiki.

Ak aaet bwebwenato in ejjab jem̧ļo̧k ijeņ. Ilo Alma 13–16, jej ekkatak ta eo ej waļo̧k āliktata n̄an ro me rej tōmak “ilo kajoor an Kraist n̄an lo̧mo̧o̧r” (Alma 15:6). Jet iien elōn̄ lo̧mo̧o̧r, jet iien kōmour—im jet iien men ko me reppen ilo mour in. Ak aolep iien, “Irooj ej bōk er lōn̄ļo̧k [armej ro An], ilo aiboojoj” (Alma 14:11). Aolep iien, Irooj ej letok “kajoor, ekkar n̄an tōmak eo [ad] … ilo Kraist” (Alma 14:28). Im aolep iien, tōmak in ej letok n̄an kōj “kōjatdikdik bwe [jenaaj] bōk mour indeeo” (Alma 13:29). Ilo am̧ riiti jebta kein, kwomaron̄ bōk aenōm̧m̧an ilo kallim̧ur kein, im kwomaron̄ meļeļe ļo̧k ta meļeļein an Alma kar kōnono ke ej ba “kakkije eo an Irooj” (Alma 13:16).

Ļōmņak ko n̄an Ekkatak ilo Mweeo im ilo Kabun̄ in

Alma 13:1–19

Kain̄i ko an priesthood rej jitōn̄ļo̧k eō n̄an Jisōs Kraist kōn pinmuur.

Naan ko an Alma ilo Alma 13 rej kwaļo̧k m̧ool ko rekajoor kōn priesthood eo an Anij im jibadbad eo an—n̄an kōpooj kōj n̄an deļo̧n̄ ilo “kakkije eo an Irooj,” ak mour indeeo (Alma 13:16). Bōlen kwomaron̄ kajjieon̄ n̄an jeiki diktata juon iaan m̧ool ko ilo kajjojo eoon ko ilo Alma 13:1–9. Erkein rej jet ļōmņak ko kwomaron̄ jino kaki:

Eoon 1.Priesthood rej bar ņa etan “Laajrak an eo Nejin [Anij]” (bar lale Katak im Bujen Ko 107:1–4).

Eoon 2.Anij ekar kapit pris ro n̄an jipan̄ armej ro n̄an reiļo̧k wōt n̄an eo Nejin n̄an bōk lo̧mo̧o̧r.

Elōn̄ ke bar men kwoj loe? Elmen am̧ en̄jake kōn priesthood eo ilo am̧ kōļmenļo̧kjeņ kōn m̧ool kein?

Elmen am̧ ļōmņak kōn kain̄i ko an priesthood āinwōt juon menin letok jān Anij n̄an jipan̄ eok “reim̧aanļo̧k n̄an Nejin n̄an lo̧mo̧o̧r”? (eoon 2; bar lale eoon 16). Bōlen kwomaron̄ kōm̧m̧ane juon laajrak in kain̄i ko em̧ōj am̧ buki, āinwōt peptaijj, kapene, kwojkwoj eo, kōjenoļo̧k n̄an juon kūr, juon kōjeraam̧m̧an in kaenōm̧m̧an ak kōmour, juon kōjeraam̧m̧an an petriak, im kain̄i ko an tampeļ. Kōļmenļo̧kjeņ kōn en̄jake ko am̧ kōn kain̄i ko āinwōt kein. Ļōmņake kōkkaļļe eo ekitbuuji im Jetōb eo kwoj en̄jake. Elmen an kain̄i kein kajjojo jitōn̄ļo̧k eok n̄an Jisōs Kraist n̄an lo̧mo̧o̧rr?

Jet armej ebōd aer ļōmņak bwe kain̄i ko—im mālim an priesthood n̄an kōm̧m̧ani—rejjab aorōk. Elmen am̧ nej uwaake ļōmņak in? En̄in ruo iaan ennaan ko ilo kweilo̧k eo eļap me kwomaron̄ bar ļōmņake; bōk juon, im je jabdewōt uwaak me rej itok n̄an eok: Russell M. Nelson, “Mennin Aorōk ko ilo Jetōb,” Liaona, Okt. 2019, 76–79; Dale G. Renlund, “Priesthood eo im Kajoor Lo̧mo̧o̧r an Rilo̧mo̧o̧r eo,” Liaona, Nov. 2017, 64–67.

Bar lale Katak im Bujen Ko 84:19–22; Gospel Topics, “Covenant,” Gospel Ļāibrāre.

Kain̄i ko an priesthood rej jipan̄ kōj reiļo̧k n̄an Jisōs Kraist kōn pinmuur.

Alma 13

Irooj ej kajjitōk ippād n̄an deļo̧n̄ ilo kakkije eo An.

Kūr eo n̄an “delo̧n̄e ilo kakkije eo an Irooj” (Alma 13:16) emakijkij an waļo̧k ilo Alma 13. Bōlen kwomaron̄ pukot aolep eoon ijo naan eo “kakkije” ej waļo̧k im kōļmenļo̧kjeņ ta eo kajjojo eoon ej katakin eok ta imeļeļein “kakkije eo an Irooj.” Ewi wāween an oktak jān kakkije ilo mour in kanniōk? Elmen ad loe?

Bar lale Russell M. Nelson, “Anjo̧ Ioon Laļ n̄an Lo Ami Kakkije,” Liaona, Okt. 2022, 95–98; “Come unto Jesus,” Al, no. 117.

Alma 14

Ilo iien en̄taan, jej aikuj lōke Irooj.

Kwomaron̄ bwilōn̄, barāinwōt elōn̄ ro jet, etke men ko renana rej waļo̧k n̄an armej ro me rej kajjieon̄ mour erreo. Kwomaron̄ jab lo aolep uwaak ko n̄an kajjitōk in epen ilo Alma 14, ak eļapļo̧k an lōn̄ men ko n̄an ekkatak jān wāween eo me Alma im Amulek rekar kōm̧m̧ane kōn jekjek ko rekar jelm̧aeiki. Ta naan ko aer im kōm̧m̧an ko aer rej katakin eok kōn unin an Irooj jet iien kōtļo̧k bwe armej ro rōwānōk ren en̄taan? Ta kapilōk eo Alma im Amulek remaron̄ letok n̄an kōj n̄e jej ioon apan̄ ko reppen?

Bar lale Rom 8:35–39; 1 Piter 4:12–14; Katak im Bujen Ko 122:5–9; Dale G. Renlund, “Illu kōn Kalijōkļo̧k,” Liaona, Māe 2021, 41–45.

Pojak iien otemjej. Iien katakin ko rem̧ōkaj aer mootļo̧k, kōn menin bōk am iien kaki n̄e rej waļo̧k tok. Jorrāān ko ilo laļ in, n̄an waanjon̄ak, emaron̄ juon bar iien n̄an kwalok kōn katak ko jān Alma 14 kōn unin an Irooj jet iien kōtļo̧k bwe armej ro ejjeļo̧k ruweer ren en̄taan.

Aolep Men Otemjeļo̧k N̄an Em̧m̧an Eo Ad

Elder Gong ej lukkuun kwaļo̧k bwe ilo karōk eo an Jemedwōj Ilan̄, aaet jerata im mālijjon̄ ko jet remaron̄ n̄an em̧m̧an eo ad.

Alma 15:16, 18

Rikaļooraņ ebōk kaarmejete.

Emaron̄ kabwilōn̄lōn̄ n̄an kōm̧m̧an juon laajrak in men ko me Amulek ekar kōjekdooni n̄an dāpdep wōt ilo gospel eo (lale Alma 10:4–5; 15:16) im keidi n̄an juon laajrak in ta eo ekar bōke (lale Alma 15:18; 16:13–15; 34:8). Ta eo kwoj kōņaan n̄an kaarmejete n̄an erom̧ rikaļooraņ eo etiljek an Jisōs Kraist?

N̄an ļōmņak ko reļļapļo̧k, lale ennaan eo an allōn̄ in Liaona im N̄an Kōkajoorļo̧k Jodikdik Ro māākjiin ko.

Ļōmņak ko n̄an Katakin Ajri ro

Kōnke Jabōt in ej Jabōt ļalem ilo allōn̄ in, Rūkaki ro an Būraimere kar rōjan̄ er n̄an kōjerbale m̧akūtkūt in ekkatak ko ilo “Appendix B: Kōpoo Ajri ro n̄an juon Mour Ejjeļo̧k Jem̧ļo̧kin ilo Iaļen Bujen in an Anij.”

Alma 13:1–2, 16

Kajoor eo an Priesthood ejipan̄ eō epaakeļo̧k Kraist.

• Juon wāween n̄an jipan̄ ajri ro nejum̧ loe elmen an kajoor eo an priesthood jitōn̄ļo̧k kōj n̄an Kraist ej n̄an kwaļo̧k n̄an er pija ko elmen an kajoor eo an priesthood jerbal (lale Bok in Gospel Pija, nos. 103–110). Ajri ro nejum̧ remaron̄ jipan̄ eok ļōmņaki wāween ko Jisōs ekar kōjerbal An kajoor (lale, n̄an waanjon̄ak, Matu 26:26–28; Mark 5:22–24, 35–43; Bok in Gospel Pija, nos. 38–41). Innām kom̧ maron̄ riiti Alma 13:2 ippān doon im kōnono elmen an kajoor eo an priesthood jipan̄ kōj “reim̧aanļo̧k n̄an Nejin [Anij]” im erom̧ āinwōt E.

  
  

• Etke Anij ej letok n̄an kōj kain̄i ko an priesthood? Jipan̄ ajri ro n̄an pukot uwaak eo ilo Alma 13:16. Eļan̄n̄e rej aikuj jipan̄ n̄an jeļā ta eo kain̄i, ewōr laajrak ko ilo Bok in Bōk Meļeļe Eļap, 18.1 im 18.2. Bōlen kwe im ajri ro nejum̧ maron̄ kōnono kōn en̄jake ko n̄an būki kain̄i kein. Elmen an kain̄i kein jipan̄ kōj “reiļo̧k n̄an [Jisōs Kraist] kōn juon jeo̧rļo̧kin jerawiwi ko [ad]”? Al juon al āinwōt “When I Am Baptized” (Children’s Songbook, 103) emaron̄ jipan̄ ajri ro ļōmņake un ko jet n̄an kam̧m̧oolol kōn kain̄i ko an priesthood.

Alma 13:10–12

Jisōs Kraist emaron̄ kōm̧m̧an bwe in erreo.

• Ālkin riiti eoon kein ippān doon, ļōmņaki wāween ko n̄an jipan̄ ajri ro nejum̧ pijaikļo̧k ta eo rej kwaļo̧ke. Bōlen komi maron̄ kwaļ jet men ippān doon. Elmen ad en̄jake n̄e jej ettoon? Elmen ad en̄jake n̄e jej erreo? Elmen an en̄jake kein āinwōt n̄an ta eo jej en̄jake n̄e jej jerawiwi innām ukweļo̧k im erreo kōn Pinmuur eo an Rilo̧mo̧o̧r?

Alma 14:18–29

Jemedwōj Ilan̄ ej kōkajoorļo̧k eō n̄e ewōr aō tōmak ilo Jisōs Kraist.

• Peij in m̧akūtkūt eo an wiik in emaron̄ jipan̄ eok—ak ajri ro nejūm̧—kwaļo̧k bwebwenato eo ilo Alma 14:18–29 (bar lale “Jebta 22: Mijen eo an Alma n̄an Ammōnaia,” Bwebwenato ko an Bok in Mormon, 58–63). Kwaļo̧k bwe Alma im Amulek raar bōk kajoor kōn wōt “tōmak eo [kar] ilo Kraist” (Alma 14:26). Kwomaron̄ bar kōnono kōn juon tōre eo Anij ekar lewaj n̄an eok kajoor “ekkar n̄an tōmak eo [am̧].” Elmen ad maron̄ tiljek āinwōt Alma im Amulek?

  Chapter 22: Alma’s Mission to Ammonihah

Alma 15:3–12

Jisōs Kraist emaron̄ ukōt bōro ko.

• Oktak in bōro eo an Ziezrom ilo Jisōs Kraist eim̧we. Etale ippān ajri ro ta eo raar ekkatak wiik eo ļo̧k kōn Ziezrom. Riit ippān doon Alma 15:3–12 n̄an pukote elmen an kar oktak. Ta eo jej katak jān en̄jake eo an Ziezrom kōn kajoor eo an Irooj? (lale “Zeezrom Is Healed and Baptized” [video], Gospel Library).

  Zeezrom Is Healed and Baptized | Alma 15

  Zeezrom escapes from the leaders of Ammonihah and becomes very sick. Zeezrom thinks Alma the younger and Amulek have died because of his wickedness. Alma and Amulek heal Zeezrom, and he is baptized.

N̄an ļōmņak ko reļļapļo̧k, lale ennaan eo an allōn̄ in eo Jera māākjiin.

Alma im Amulek ilo Kalbuuj, jān Gary L. Kapp