“June 17–23: ‘Jisōs Kraist Enaaj Itok im Lo̧mo̧o̧ren Armej ro An.’ Alma 8–12,” Itok, Ļoor Eō—N̄an M̧weeo im Kabun̄ in: Bok in Mormon 2024 (2024)
“Juun 17–23. Alma 8–12,” Itok, Ļoor Eō—N̄an M̧weeo im Kabun̄ in: 2024 (2024)
Katakin Katak ko Rem̧ool, jān Michael T. Malm
Juun 17–23: Jisōs Kraist Enaaj Itok im Lo̧mo̧o̧ren Armej ro An
Alma 8–12
Jerbal ko an Anij reban likjab. Ak kijejeto ko ad n̄an jipan̄ ilo jerbal in An jet iien rej likjab—ak ebwe, jemaron̄ jab kajju lo tōprak ko jej kōjatdikdik kaki. Jet iien jemaron̄ en̄jake jidik ad āinwōt Alma ke ekar kwaļo̧k gospel ilo Ammōnaia—rekar makoko kake, kabiloiki, im kadiwōjļok. Ak lo ke juon enjeļ ekar kōmeļeļeiki bwe en roolļo̧k im bar kajjieon̄, Alma ekar lukkuun peran im “kakaiururļo̧k im roolļo̧k” (Alma 8:18), im Anij ekar kōpooj iaļ im̧aan. E ekar jab leļo̧k wōt kijen Alma im jikin an jokwe, ak Ekar bar kōpooj Amulek, eo ekar erom̧ juon rikarejaran, juon rijojomar eo ellāj an gospel eo, im juon mōttan eo etiljek. N̄e jej ioon inepata im illu ilo ad jerbal ilo aelōn̄ in kiin̄ eo an Irooj, jemaron̄ keememej wāween an Anij kar rie im tōl Alma, im jemaron̄ lōke bwe Anij enaaj barāinwōt rie im tōl kōj, men̄e ilo jekjek ko reppen.
Ļōmņak ko n̄an Ekkatak ilo M̧weeo im ilo Kabun̄ in
Kijejeto ko aō n̄an kwaļo̧k kōn gospel eo ebōk kijenmej.
Kwaar ke kajjieon̄ in kwaļo̧k gospel eo an Jisōs Kraist n̄an ro jet, ak karuwainene eo am̧ ejjab tōprak? Alma eaar bar ioone. Ta eo kwoj katak jān e ilo Alma 8:13–16 n̄an kwaļo̧k gospel eo jekdo̧o̧n apan̄ im jum̧ae ko? Riiti wōt eoon 17–32, n̄an pukot eoon ko me rej im̧we eok n̄an kajjieon̄ kwaļo̧k gospel eo, men̄e emaron̄ in jab tōprak.
Rikanaan ro im rijilōk ro rej rikam̧ool ro rejenoļo̧k an Kraist, kōn menin ewōr ippāer elōn̄ im̧we n̄an kapilōk n̄an kwaļo̧k kam̧ool kōn E. Lale ta eo Elder Dieter F. Uchtdorf eaar ba ilo“But What If It’s Hard?” (juon jekjen ilo “Missionary Work: Sharing What Is in Your Heart,” Liaona, May 2019, 18) ak ta eo Elder Gary E. Stevenson eaar kwaļo̧k ilo “Iakwe, Kwaļo̧k, Karuwainene,” (Liaona, Māe 2022, 84–87). Ta eo kwoj loe ijeņ me emaron̄ jipan̄ ro jet rej jino en̄jake ebbweer n̄an kwaļo̧k gospel eo?
Elmen am̧ kōmeļeļeik aolep men kwaar ekkatak ijin n̄an juon ak ruo ennaan in kōketak n̄an kwaļo̧k gospel in? Ļōmņak in kōm̧m̧ane juon peba kileplep me emaron̄ im̧we eok (im ro jet) n̄an kajjieon̄.
Bar lale “Help Me Teach with Inspiration,” Hymns, no. 281; “Alma Is Commanded by an Angel to Return to Ammonihah” (video), Gospel Library; Gospel Topics, “Inviting All to Receive the Gospel of Jesus Christ,” Gospel Library.
Kōjeraam̧m̧an ko an Anij rej itok kōn eļap eddo.
N̄e jej riit kōn wāween an riNipai ro ilo Ammōnaia kar kōm̧m̧an n̄an ro rikarejeran Irooj, epidodo ad meļo̧kļo̧k ke rekar bar mour kōn gospel eo, im kar “kanooj utiej ippān Irooj” (Alma 9:20). Ilo am̧ kar riit kōn kōjeraam̧m̧an ko reļļap an Anij me ekar leļo̧k n̄an armej ro an Nipai (lale eļaptata Alma 9:14–23), kejōkļo̧kjeņ kake kōjeraam̧m̧an ko reļļap me Em̧ōj an lewaj n̄an eok. Ta eddo ko rej itok ippān kōjeraam̧m̧an kein? Ta eo kwoj kōm̧m̧ane n̄an ped wōt ilo am̧ m̧ool n̄an eddo kein?
Lale Katak im Bujen Ko 50:24; 82:3; 93:39.
Karōk eo an Anij ej juon karōk in lo̧moor.
Ilo Alma 11–12, Alma im Amulek rej ņa etan karōk eo an Anij āinwōt karōk in lo̧mo̧o̧r. Ilo am̧ riiti jebta kein, kōļmenļo̧kjeņ etke naan in pinmuur ej jerbal n̄an kōmeļeļeiki karōk eo an Anij. Ļōmņak in je juon kōm̧eļeļe ekadu kōn ta eo Alma im Amulek rekar katakin kōn m̧ōttan kein rej ellajrak kōn karōk eo:
-
Wōtlo̧k Eo
-
Ripinmuur Eo
-
Ukweļo̧k
-
Mej
-
Jerkakpeje
-
Ekajet
Lale jon̄an kajoor in naan ko an Amulek n̄an armej ro (lale Alma 11:46). Elmen an jeļā eo am̧ kōn karōk eo an Anij jelet eok?
Bar lale Dallin H. Oaks, “Karōk eo Eļap,” Liaona, Māe 2020, 93–96; “Amulek Testifies of Jesus Christ” (video), Gospel Library.
Eļan̄n̄e iban kapen buruō, imaron̄ bōk eļapļo̧k naan an Anij.
Jet armej remaron̄ ļōmņak etke Jemedwōj Ilan̄ ejjab kalikkar men otemjej n̄an kōj. Ilo Alma 12:9–14, Alma eaar kōmeļeļeik juon un em̧m̧an. Kajjitōk kein remaron̄ jipan̄ eok ļōmņak kōn ta ko ekar kwaļo̧k kake:
-
Ta meļeļein kapen n̄an buruōm̧? Ta uwaak ko n̄an kapen būruwōd? (bar lale Alma 8:9–11; 9:5, 30–31; im 10:6, 25).
-
Ta eo kwomaron̄ kōm̧m̧ane n̄an ukōt būruōm̧ n̄an Anij? (lale Jeremaia 24:7; Alma 16:16; Hilamōn 3:35).
-
Ta eo kwomaron̄ kōm̧m̧ane n̄an kalikkare ke naan ko an Anij ej “pād ilo [kwe]”? (Alma 12:13). N̄e ewōr naan in Anij ilo kwe, ekōjkan an jelet “naan,” “jerbal,” im “ļōmņak” ko am̧? Alma 12:14
Ta en̄jake an Amulek ej katakin eok kōn kōjeraam̧m̧an ko n̄an kapidodoik būruōd (lale Alma 10:1–11).
Bar lale “Alma Warns Zeezrom” (video), Gospel Ļāibrāre.
N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.
Ļōmņak ko n̄an Katakin Ajri ro
Imaron̄ kwaļo̧k gospel eo an Jisōs Kraist.
-
Peij in m̧akūtkūt eo an wiik in emaron̄ jipan̄ eok kōmeļeļeik iien ko ilo Alma 8–10 n̄an ajri ro nejum̧. Kwomaron̄ kōņaan jipan̄ er pukot pedped ko me ekōm̧m̧m̧an an Alma im Amulek mijenede ro rem̧m̧an. N̄an waanjon̄ak, rekar jab ebweer (lale Alma 8:8–13), raar kam̧ool kōn Kraist (lale Alma 9:26–27), im raar jerbal ippān doon (lale Alma 10:12).
-
Al juon al kōn jerbal in mijenede, āinwōt “I Want to Be a Missionary Now” (Children’s Songbook, 168) emaron̄ leļo̧k n̄an ajri ro nejum̧ ļōmņak ko kōn wāween kwaļo̧k gospel eo n̄an ro m̧ōttaer. Kajjitōk ippāer n̄an kōllaajraki ļōmņak ko rej loi im armej ro remaron̄ kwaļo̧k gospel eo ippāer. Kwomaron̄ bar kōtļo̧k aer kōnono kake ta eo remaron̄ ba ak kōm̧m̧ane.
Kōketak er n̄an bōk kuņaer. Ilo am̧ kōppopo n̄an katakin, ijjello̧k peek men ko n̄an ba, kajjitōk ippām make, “Ta eo ajri ro renaaj katak?” Ajri ro renaaj katak em̧m̧anļo̧k im keememeji wōt n̄e renaaj bōk kuņaer.
Karōk eo an Anij ej juon karōk in lo̧mo̧o̧r.
-
Bōlen ajri ro nejum̧ remaron̄ jin̄aik juon pija ej bōk jikin pedped ko kōn karōk in lo̧mo̧o̧r, āinwōt Wōtļo̧k eo an Adam im Iv, Pinmuur eo an Jisōs Kraist, ukweļo̧k, mej, jerkakpeje, im ekajet. Innām remaron̄ jipan̄ er karōki pija ko aer n̄an eoon ko ilo Alma 11–12 me ej kwaļo̧k kōn pedped in katak kein.
Imaron̄ erom̧ juon m̧ōttā eo em̧m̧an.
-
Kajjitōk ippān juon ajri n̄an erom̧ āinwōt n̄e e Amulek im bar juon ajri n̄an erom̧ āinwōt n̄e e Alma ilo am̧ kwaļo̧k bwebwenato in ilo Alma 8:18–22. Elmen an kar Amulek erom̧ juon m̧ōttan Alma eo em̧m̧an? Innām ajri ro nejum̧ remaron̄ kwaļo̧k elmen an ro jet kar m̧ōttā ippāer im elmen aer kar en̄jake en̄jake eo.
-
Bōlen kwomaron̄ kōm̧m̧ane juon puzzle in jem̧jerā: pukote ak jin̄aiki juon pija ej bōk jikin jem̧jerā im m̧wijitiļo̧k m̧ōttan puzzle ko. Ilo tulikin kajjojo m̧ōttan, je men eo jemaron̄ kōm̧m̧an n̄an erom̧ juon m̧ōttā em̧m̧an. Ajri ro nejum̧ remaron̄ bōk kuņaer kāālet juon m̧ōttan im kobaiki ilo puzzle eo ilo am̧ riiti ta eo kar je ilo tulikin. Wōn eo ej aikuji jem̧jerā eo ad?
Jemaron̄ erom̧ m̧ōttā rem̧m̧an n̄an ro jet.
Kōn wōt Jisōs Kraist, Inaaj jerkakpeje.
-
Ļōmņake juon kein katakin āinwōt in n̄an katakin kōj Jerkakpeje: peim̧ emaron̄ bōk jikin jetōb eo am̧, im kūļob eo emaron̄ bōk jikin ānbwinnum̧. Wūtki kūļob ko jān peim n̄an kwaļo̧k n̄an ajri ro bwe jetōb ko im ānbwin ko renaaj bar jepeļo̧k ilo iien mej. Innām bar kōņaki tebukro ko n̄an kwaļo̧k bwe jetōb ko im ānbwin ko renaaj bar koba ippān doon ilo iien Jerkakpeje eo. Kōm̧m̧an bwe ajri ro ren kajjojo bōk koņaer kōņaki tebukro ko im wūtki n̄e kwoj riiti Alma 11:43 n̄an er. Kajutak juon pija in Meri im Jisōs ālkin an kar jerkakpeje (lale Bok in Gospel Pija, no. 59), im kam̧ool bwe Jisōs Kraist ekar kōm̧m̧an bwe aolep armej ren maron̄ bar jerkakpeje.
N̄an ļōmņak ko reļļapļo̧k, lale ennaan eo an allōn̄ in eo ̄Jera māākjiin.
Pija in Alma ej m̧ōn̄ā ippān Amulek, jān Dan Burr