Alma eo Edik Ej Kwaļo̧k Naan, jān Gary L. Kapp

Juun 3–9: “Raar Dim im Jamin M̧akūtkūt”

Mosaia 29–Alma 4

Jet rej ļōmņak bwe karōk eo an Kiin̄ Mosaia n̄an jeneji kiin̄ ro n̄an ri ekajet ro me renej kālet er ej āinwōt juon jerbal in ekāleel an kien. Ak n̄an RiNipai ro, eļaptata n̄an ro me raar pād ium̧win kōmakoko an Kiin̄ Noa, oktak in ekar barāinwōt ļap tokjen ilo mour in jetōb. Raar loe an juon kiin̄ enana kōm̧m̧an n̄an armej ro an, im raar “kijooror otem kijooror” n̄an rōlo̧k jān kain kōm̧m̧an rot in. Oktak in ekar kōm̧m̧an bwe ren eddoik mour wānōk eo aer make im “uwaak kōn jero̧wiwi ko [aer] make” (Mosaia 29:38).

Aaet em̧ool, jemļo̧kin iien tōl eo an kiin̄ ro ekar jab meļeļein ejemļo̧k būrabōļōm ko ilo jukjuk in pād ko an RiNipai ro. Armej ro re etao āinwōt Nior im Amlikai ro rekar kwaļo̧k ļōmņak ko reriab, ro me rejjab tōmak rekar kakkure ro Rekwojarjar, im elōn̄ membōr ilo Kabun̄ eo raar jino utiej bōro im bun̄ jān aer tōmak. Aaet “ro rettā an Anij” raar dāpdep wōt “dim im jamin m̧akūtkūt” jekdoon ta ko raar waļo̧k ipeļaakier (Alma 4:15; 1:25).

Ļōmņak ko n̄an Ekkatak ilo M̧weeo im ilo Kabun̄ in

Mosaia 29:26–27; Alma 2:1–7

Imaron̄ erom̧ juon eo me ej kōm̧m̧an em̧m̧an ilo jukjuk in pād eo aō.

Laļem iiō in tōl an riekajet ro, juon būrabōļōm eaar waļo̧k eo me ekar mālijjon̄e enaan eo an Mosaia me eaar ba bwe ainikien armej ro renaaj kālet ta eo ejim̧we (lale Mosaia 29:26). Alma Alma 2:1–7 n̄an pukot ta kar ennaan eo im ta eo riNipai ro rekar kōm̧m̧ane. Ta eo emaron̄ kar waļo̧k eļan̄n̄e “armej ro an kabun̄ eo” rekar jab kōm̧m̧an bwe ainikier en maron̄ ron̄? Ta ko jet kwoj katak jān bwebwenato in kōn wāween an Irooj kōņaan bwe kwon bōk kuņaam̧ ilo jukjukinpād eo am̧? (bar lale Mosaia 29:26–27).

Ta men ko raorōk jukjukinpād eo am̧ ej jelm̧aeiki? Ļōmņake elmen am̧, āinwōt riNipai ro, lukkuun lale bwe ainikiem en kobaļo̧k ilo “ainikien armej ro.” Ilo wāween rōt kwomaron̄, āinwōt juon rikaļooraņ Jisōs Kraist, kōm̧m̧an bwe jukjukinpād eo am̧ en em̧m̧an?

Bar lale Dallin H. Oaks, “Iakwe ro Rikōjdat Kom̧,” Liaona, Nob. 2020, 26–29.

Alma 1

Naan eo an Anij emaron̄ jipan̄ eō kile katak ko rebōd.

Men̄e Nior ekar kwaļo̧k ke ebōd katak eo ekar katakin, katak ko an rekar pād wōt ippān riNipai ro ium̧win elōn̄ iiō ko. Etke kwoj ļōmņak em̧m̧an ippān armej ro ta eo Nior ekar kwaļo̧ke? Ilo Alma 1:2–6, pukot katak ko reriab an Nior—im m̧ool ko kar kōjerbali n̄an ņooj riab ko.

Gideon eaar anjo̧ ioon Nior “kōn naan ko an Anij” (Alma 1:7,9). Errein jet iaan jeje ko rekwojarjar me Nior ekar kabōddi: Matu 7:21–23; 2 Nipai 26:29–31; Mosaia 18:24–26; im Hilamōn 12:25–26. Kajjieon̄ kōmeļeļeik kajjojo jebta ko. Ta eo kwaar ekkatak jān rikanaan ro remour me rej jab errā ilo katak ko rebōd ilo tōre in ad?

Alma 1:19–31; 4:6–15

Rikaļoor ro rem̧ool an Jisōs Kraist rej “rikaļoor ro rettā an Anij.”

Jebta 1 im 4 ilo Alma rej jim̧or kōmeļeļeik tōre ko Kabun̄ eo eaar jeraam̧m̧an, ak membōr ro ilo Kabun̄ eo ekar oktak kilen aer jeraam̧m̧an. N̄an waanjon̄ak, keidi Alma 1:19–30 ippān Alma 4:6–15 n̄an lale elmen an membōr ro an Kabun̄ in kar oktak ilowaan wōt jejjo̧ iiō. Pedped ioon ta eo kwaar riiti, elmen an rikaļoor ro rem̧ool an Jisōs Kraist en̄jake kōn armej ro eoktak tōmak ko aer? Ta m̧wiļ eo an rikaļoor ro rem̧ool an Kraist kōn m̧weie im jeraam̧m̧an? Ta eo en̄jake eo am̧ n̄an ukōt m̧wiļim make?

Keidi jeje ko rekwojarjar n̄an mour eo am̧ make. Ļōmņak kōn wāween am̧ mour kaki bwebwenato ko im katak ko ilo jeje ko rekwojarjar. N̄an waanjon̄ak, kwomaron̄ lo an ejjeļo̧k oktak ikōtaan laļ in rainin im būrabōļōm ko me riNipai ro raar iooni ilo jukjukinpād eo aer ilo Alma 1–4.

Alma 4:6–20

Waanjon̄ak im naan in kam̧ool eo aō emaron̄ ukōt bōro ko.

Bōlen kwomaron̄ keidi n̄an būrom̧ōj eo Alma ekar en̄jake ke eaar loe ta eo ekar waļo̧k ilubwiljin armej ro an. Lali būrabōļōm̧ ko ad jej loi ilo Alma 4:6–15. Kwonan̄in ke lo ejja kain būrabōļōm̧ kein? Bōlen kwaar inepata kōn juon eo ejitenbōro eo ekar ioon ejja būrabōļōm̧ kein. Kwonan̄in ke ļōmņak ta eo kwomaron̄ kōm̧m̧ane n̄an jipan̄?

Jet remaron̄ ba bwe Alma, āinwōt juon riekajet eutiej, ekar armej eo em̧m̧antata n̄an mijaļ būrabōļōm̧ kein. Ak Alma ekar en̄jake bwe ekar bar wōr juon wāween em̧m̧anļo̧k. Ilo am̧ riiti eoon 16–20, ta eo ej im̧we eok kōn kōm̧m̧an eo an n̄an jipan̄ armej ro an?

Tōmak eo ekajoor an Alma kōn naan in Anij im “lukkuun naan in kam̧ool” (eoon 19). Ta waanjon̄ak eo emōj ad loi kōn kajoor eo an lukkuun naan in kam̧ool? Ilo am̧ ļōmņaki wāween ko kwomaron̄ kwaļo̧k naan in kam̧ool eo am̧ kōn Jisōs Kraist im gospel eo An, kwomaron̄ bar riiti Alma 4:6–14. Ta kōm̧m̧an ko an membōr ro an Kabun̄ in ilo eoon kein kwaļo̧k kōn naan in kam̧ool ko aer kōn Jisōs Kraist im katak ko An? Ta eo kwoj keememej eaar jelet jerbal ko aer—er make im ro jet? Kwomaron̄ bar ļōmņaki wāween ko kwaar jeraam̧m̧an kaki jān naan in kam̧ool eo ekwojarjar an ro jet, men̄e eaar waļo̧k jen naan ak kōm̧m̧an.

Ļōmņaki wāween ko kwomaron̄ kwaļo̧k naan in kam̧ool eo am̧ kōn Jisōs Kraist—ilo naan ak kōm̧m̧an. Wōn enaaj jeraam̧m̧an jān kam̧ool eo am̧?

Bar lale Gary E. Stevenson, “Najdik im Kwaļo̧k Naan in Kam̧ool eo Am̧,” Liaona, Okt. 2022, 111–14; “Testimony,” Hymns, no. 137; “Alma the Younger Steps Down as Chief Judge” (video), Gospel Lāibrāre; Gospel Topics, “Revelation,” Gospel Ļāibrāre.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin ko.

Ļōmņak ko n̄an Katakin Jodikdik ro

Alma 1:2–9

Irooj emaron̄ jipan̄ eō kile katak ko rebōd.

• Juon wāween n̄an ekkatak Alma 1:2–4 ippān ajri ro nejūm̧ ej n̄an jipan̄ er ejaake juon teej in m̧ool ak riab kōjerbal ennaan ko kar kwaļo̧ki jen Nior, juon riab in rikaki. Innām kwomaron̄ kōnono kaki etke Setan emakijkij an kobaik m̧ool ko ippān riab ko. Jipan̄ ajri ro nejūm̧ ļōmņak kōn jet waanjon̄ok ko. Ilo eoon 7–9, elmen an Gideon kar jutak ņae riab ko an Nior? (Bar lale “Jebta 20: Alma im Nior,” Bwebwenato ko an Bok in Mormon, 54–55.)

Alma 1:19–25

Āinwōt juon membōr in Kabun̄ eo an Jisōs Kraist, ij aikuj iakwe im jerbal n̄an ro jet.

• Jet membōr in Kabun̄ eo an Irooj ilo raan ko an Alma raar jouj im kar liļo̧k, im membōr ro jet raar jab jouj im kar juwa. N̄an jipan̄ ajri ro nejum̧ ekkatak kōn en̄jake kein, komi maron̄ riit ippān doon Alma 1:27, 30 im kōm̧m̧ane juon laajrak in kain armej ro membōr ro ilo Kabun̄ in an Irooj rekar jipan̄ er. Wōn ro jejeļā me rej “[rej] aikuji” (Alma 1:30) iakwe im jipan̄ eo ad? Al juon al ippān doon kōn iakwe im jerbal in jipan̄, āinwōt “Kindness Begins with Me” (Children Songbook,,145), im jipan̄ ajri ro ļōmņak kōn m̧akūtkūt ko remaron̄ ļoor ilo al eo.

• Ta eo jej aikuj kōm̧m̧ane n̄e armej ro rejjab jouj n̄an kōj? Ļōmņak in riit n̄an ajri ro nejum̧ elmen an rikaļoor ro an Kraist kar kōm̧m̧an n̄an er ilo Alma 1:19–20. Kōnono elmen aer kar em̧m̧akūt ilo eoon 22 im 25. Bōlen kwomaron̄ kaminene wāween ko n̄an jipan̄ n̄e ro jet rejjab jouj.

Alma 4:8–20

Aō naan in kam̧ool emaron̄ kōkajoor ro jet.

• Emakijkij an “lukkuun naan in kam̧ool” (Alma 4:19) eo an juon ajri maron̄ in bōk eļap im̧we ioon ro jet. N̄an jipan̄ ajri ro lo menin, kwomaron̄ riit ippāer Alma 4:8–12, 15, jipan̄ er kalikkar būrabōļōm̧ ko me raar waļo̧k ilo Kabun̄ in. Ta eo Alma eaar kōm̧m̧ane n̄an mijaļ būrabōļōm̧ kein? Jipan̄ er lale ta eo Alma ekar pepe n̄an kōm̧m̧ane ilo Alma 4:16–20. Bōlen kom̧ maron̄ kwaļo̧k n̄an doon elmen an naan in kam̧ool eo an ro jet kōn Kraist kar kōkajoorļo̧k eok.

• N̄e ajri ro nejum̧ raikuj waanjon̄ak ko kōn ta in naan in kam̧ool, ļōmņak in kwaļo̧k juon pija ekadu in juon rikōnono ilo juon kweilo̧k eo eļap kwaļo̧k naan in kam̧ool. Kwomaron̄ kōjerbal peij in m̧akūtkūt eo an wiik in ak al ippān doon juon al āinwōt “Naan in Kam̧ool” (Al, no. 137). Ta eo jej ekkatak kōn naan in kam̧ool jān eoon kein? Kōtļo̧k an ajri ro nejum̧ kōmālmel kwaļo̧k naan in kam̧ool eo aer.

N̄an ļōmņak ko reļļapļo̧k, lale ennaan eo an allōn̄ in eo Jera māākjiin.

Alma im Amlikai, jān Scott M. Snow