Alma eo Edik ej katakin riZoram ro

Juun 10–16: “Kom̧ Ar Bōk ke Oktak In Ekajoor ilo Būruōmi?”

Alma 5–7

Alma ekar jab jeļā ke raan kein renaaj kar m̧wijm̧wij bōro an armej n̄an jānij menono n̄an kōmour armej, rej jāniji juon menono ejorrāān ak ewōr nan̄inmej ie n̄an juon menono eo ewāmouruur. Ak ekar jeļā kōn juon men ekabwilōn̄lōn̄ “oktak in bōro” (Alma 5:26—juon eo me Rilo̧mo̧o̧r ej letok n̄an kōj juon mour in jetōb ekāāl, āinwōt “bar ļotak” (lale Alma 5:14,49). Alma ekar lo bwe oktak in bōro ekar menin aikuj eļap n̄an elōn̄ iaan riNipai ro. Jet raar m̧weie im jet raar jeram̧ōl, jet raar uteej bōro im jet raar ettā, jet rikakkure im jet raar en̄taan jān kakkure ko (lale Alma 4:6–15). Ak aolepāer raar aikuj itok n̄an Jisōs Kraist bwe en kōmour er—āinwōt bar kōj aolep. Men̄e jej kappukōt n̄an anjo̧ jān utiej bōro ak n̄an niknik ioon en̄taan ko, enaan eo an Alma ejja en̄eo wōt: “Itok im jab mijak” (Alma 7:15). Kōtļo̧k bwe Rilo̧mo̧o̧r en ukōt juon bōro eo epen, ejerawiwi, ak ekinejnej n̄an juon bōro ettā, erreo, im kāāl.

Ļōmņak ko n̄an Ekkatak ilo M̧weeo im ilo Kabun̄ in

Alma 5:14–33

Ij aikuj en̄jake—im wōnm̧aanļo̧k wōt im en̄jake—juon oktak ekajoor.

Būreejtōn M. Russell Ballard ekar ba: “Ij aikuj bōk iien n̄an kajjitōkin eō make, ‘Ejet aō pād?’ … Āinwōt juon unin tōl n̄an n̄a ilo iien intōrpiu in ettiņo̧ im aō make, ikōņaan riit im kejōkļo̧kjeņ kōn naan ko me rej pād ilo ļalem jebta in Alma” (“Return and Receive,” Liahona, May 2017, 64).

Ļōmņak in riiti Alma 5:14–33 āinwōt n̄e kwoj intōrpiuik kwe make n̄an etale būruōm̧. Komaron̄ kōņaan je uwaak ko am̧ n̄an kajjitōk ko. Ta eo kwoj ekkatak kōn kwe make? Ta eo kwoj en̄jake im ej im̧we eok n̄an kōm̧m̧an āinwōt juon tōprak in intōrpiu eo am̧?

Lale Dale G. Renlund, “Preserving the Heart’s Mighty Change,” Liahona, Nob. 2009, 97–99.

Ilo ad oktakļo̧k n̄an Anij, jemaron̄ en̄jake juon “oktak in bōro.”

Alma 5:44–51

Imaron̄ bōk juon aō make kam̧ool kōn Rilo̧mo̧o̧r im gospel eo An kōn Jetōb Kwojarjar.

Ilo Alma 5, ke Alma ekar kōmeļeļeik elmen an kar bōk naan in kam̧ool eo An kōn Rilo̧mo̧o̧r, ekar jab kwaļo̧k en̄jake eo an kōn enjeļ eo eaar loe (lale Mosaia 27:10–17). Elman an Alma jeļā m̧ool eo kōn e make? Bōlen kwomaron̄ kōjerbal ta eo kwoj loe ilo Alma 5:44–51 n̄an je juon “iiōk” n̄an bōk juon naan in kam̧ool kōn Jisōs Kraist im katak ko An. Ta “kein kere ko” (m̧ool ko ilo gospel in) im “kōmeļeļe ko” (men ko jej kōm̧m̧ani n̄an pukot m̧ool eo) Alma ekar kobaiki? Ta “kiin iiōk ko” im “kōmeļeļe ko” remaron̄ kobaiktok n̄an iiōk eo am̧ jān en̄jake ko ad make ak en̄jake ko an ro jet ilo jeje ko rekwojarjar?

Alma 7

“Ij kile bwe kom̧ij pād ilo iaļ ko in wānōk.”

Jet iien jej āinwōt armej ro ilo Zaraemla, ro raar aikuj in ukweļo̧k (lale Alma 5:32). Iien ko jet jej āinwōt armej ro an Gideon, ro raar kajjieon̄ etetal “ilo iaļ ko in wānōk” (Alma 7:19) Ta eo kwoj loe ilo ennaan eo an Alma n̄an Gideon (ilo Alma 7) me rej āinwōt juon n̄an ta eo eaar ba ilo Zaraemla (ilo Alma 5)? Ta oktak ko kwoj kūli? Pukot men ko Alma ekar kwaļo̧ki me remaron̄ jipan̄ eok pād “ilo iaļ in eo ej tōl n̄an aelōn̄ in Anij” (Alma 7:19).

Alma 7:7–16

Rilo̧mo̧o̧r ekar bōk ioon Make jerawiwi ko aō, metak ko, im en̄taan ko.

Em̧ōj ke am̧ kar en̄jake ke ejjeļo̧k emeļeļe kōn apan̄ ak mōjņo ko am̧? N̄e āindein, m̧ool ko Alma ekar kwaļo̧ki emaron̄ jipan̄. Ilo am̧ riit, kōļmenļo̧kjeņ kōn ta eo eoon kein rej katakin kōj jibadbad in en̄taan eo an Rilo̧mo̧o̧r. Kwomaron̄ kōm̧m̧ane juon jaat in naan ko Ta eo Rilo̧mo̧o̧r eaar en̄taan kake im Etke Eaar en̄taan im laajrake ta eo kwoj loe Alma 7:7–16 (bar lale Aiseia 53:3–5). Kwomaron̄ ke ļōmņake jejjet in iien eo Eaar en̄taan kōn jet iaan men kein? Errein jet iaan waanjon̄ak ko jān jeje ko rekwojarjar: Matu 4:1–13; 26:55–56; 27:39–44; Mark 14:43–46; Luk 9:58. Kwomaron̄ kobaik jabdewōt men n̄an laajrak eo am̧ jān eoon kein?

Ej juon men n̄an tōmake bwe Rilo̧mo̧o̧r eaar en̄taan kōn kwe. Ak elmen an en̄taan eo An kōm̧m̧an oktak ilo mour kajjojo raan in am̧ mour? Errein jet iaan eoon ko me rej kwaļo̧k elmen an Jisōs Kraist maron̄ jipan̄ ak “jipan̄” eok: Inōs 1:5–6; Mosaia 16:7–8; 21:15; 24:14–15; 3 Nipai 17:6–7; Ether 12:27–29; Katak im Bujen Ko 121:7–10. Ta eo kwoj katak jān eoon kein? Ta jet iaan wāween ko E ej itok n̄an jipan̄ eok? N̄āāt eo kwaar en̄jake An jipan̄?

Al juon al āinwōt “Ij Aikuij Yuk Aolep Awa” ak “Ij Jela Bwe Aō Dri Pinmuur Ej Mour” (Al, no. 8, 28) enaaj kam̧wilaļļo̧k kam̧m̧oolol eo am̧ kōn jipan̄ eo an Rilo̧mo̧o̧r. Ta naan ko ilo al kein rej lewaj n̄an eok en̄jake ko kōn E?

Bar lale Gospel Topics, “Atonement of Jesus Christ,” Gospel Ļāibrāre; “His Grace” (video collection), Gospel Ļāibrāre.

Kwaļo̧k kam̧ool kōn Jisōs Kraist. Ļōmņaki wāween ko kwomaron̄ kwaļo̧k naan in kam̧ool eo am̧ kōn Rilo̧mo̧o̧r im An kwojarjar, jouj, im iakwe. Kwomaron̄ kōketak armej ro kwoj katakin n̄an kam̧ool kōn E n̄an kajjitōk kajjitōk ko me reim̧we er n̄an kwaļo̧k elmen aer en̄jake kōn E.

N̄an ļōm̧ņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

Ļōmņak ko n̄an Katakin Ajri ro

Alma 5:44–48

Imaron̄ bōk aō make naan in kam̧ool jān Jetōb Kwojarjar.

• N̄an jipan̄ ajri ro nejum̧ katak n̄an kōkajoorlo̧k naan in kam̧ool eo aer, kwomaron̄ kwaļo̧k n̄an er pija in ilaļ im kajjitōk ippāer elmen ad jipan̄ menin mour in edik rūttoļo̧k. Kwomaron̄ keidi menin n̄an kōjparok naan in kam̧ool eo ad. Ta kōjparok eo naan in kam̧ool eo ad eaikuji? Elmen ad jeļā ke ej kajoorļo̧k?

  

  N̄e jej bōk gospel in, ej āinwōt jino juōn mour ekāāl.

• Elmen an kar Alma bōk naan in kam̧ool eo an ekajoor kōn Jisōs Kraist? Kwomaron̄ riit Alma 5:44–46 n̄an ajri ro nejum̧ n̄an pukot uwaak ko n̄an kajjitōk in. Bōlen ajri ro nejum̧ remaron̄ je juon karōk n̄an kōm̧m̧ane juon men ilo wiik in n̄an kōkajoorļo̧k naan in kam̧ool eo aer.

Jurōn Meram

Elder Dushku ej katakin kōj bwe en̄jake ko an jetōb rekōpaļpaļ rōjeja im bwe Irooj ekkā an litok n̄an kōj eļapļo̧k meram juon ilo̧k juon.

Alma 7:10–13

Rilo̧mo̧o̧r Make eaar bōk ioon jerawiwi ko aō, metak ko, im en̄taan ko.

• Elmen am̧ maron̄ jipan̄ ajri ro meļeļe Alma 7:10–13 bwe ren maron̄ jeļā bwe Jisōs Kraist ej kea kōn er im maron̄ jipan̄ er? Kajjitōk ippān ajri ro n̄an kwaļo̧k en̄jake ko ke raar nan̄inmej ak metak ak jorrāān ko jet me raar kōm̧m̧an aer būrom̧ōj. Elmen an ro jet kar jipan̄ er en̄jake em̧m̧anļo̧k? Kwaļo̧k am̧ naan kam̧ool bwe Rilo̧mo̧o̧r eaar bar en̄taan kōn men kein, im kōnono kōn juon tōre ke Eaar kaenōm̧m̧an im jipan̄ eok.

• Ilo am̧ im ajri ro nejum̧ riiti Alma 7:11–13, pukot men ko Jisōs Kraist ekar en̄taan kaki kōn kōj. Kajitōk ippān ajri ro n̄an kōjerbal naan ko im eoon ko rej loi n̄an kadedeo̧k jentōj in: “Jisōs ekar en̄taan bwe En maron̄ jipan̄ eō.” Elmen an jipan̄ kōj jeļā bwe Jisōs Kraist ejeļā apan̄ ko ad? Elmen ad bōk jipan̄ eo An? Kwaļo̧k naan in kam̧ool eo am̧ kōn Jisōs Kraist.

Alma 5:14; 7:19–20

Ļoor Jisōs Kraist ej dāpij eō ilo iaļ in ļo̧k n̄an ippān Jemedwōj Ilan̄.

• Kōtļo̧k bwe ajri ro nejum̧ ren kalimjōk kūlaaj eo ilo am̧ riiti Alma 5:14 (bar lale peij in m̧akūtkūt eo an wiik in). Ta meļeļein n̄an bōk annan̄in Rilo̧mo̧o̧r ilo paoktokiid?

• Elmen am̧ maron̄ kōjerbal naan ko an Alma kōn iaļen ro̧o̧lļo̧k eo n̄an Jemedwōj Ilan̄ n̄an jipan̄ ajri ro jeļā n̄an kōm̧m̧ani kāālet ko rem̧m̧an? Kwomaron̄ riiti Alma 7:19–20 n̄an er im kōtļo̧k aer kōm̧m̧ane etetal ilo “iaļ ko raankeke” im etetal ilo iaļ eo ejim̧we. Jipan̄ er ļōmņaki kāālet ko me ejipan̄ kōj pād wōt ilo iaļin im kāālet ko jet me rej bōk kōj jen iaļ in. Kwomaron̄ bar lale pijain Jisōs ippān doon im kōnono kōn men ko Eaar kōm̧m̧ani n̄an kwaļo̧k n̄an kōj iaļ n̄an ro̧o̧lļo̧k n̄an ippān Jemedwōj Ilan̄. Al juon al āinwōt “I’m Trying to Be like Jesus” (Children’s Songbook, 78–79) emaron̄ letok ļōmņak ko jet.

N̄an ļōmņak ko reļļapļo̧k, lale ennaan eo an allōn̄ in eo Jera māākjiin.

Ad Rijojomar, jān Jay Bryant Ward