Ammōn im Kiin̄ Lamonai, jān Scott M. Snow

Juļae 1–7: “Inaaj Kōm̧m̧ane Eok Kein Jerbal ilo Peiū”

Alma 17–22

Ļōmņak kōn aolep un ko unin an armej jab kwaļo̧k gospel eo: “Ejabwe aō jeļā” ak “Ijjab lukkun jeļā n̄e rekōņaan” ak bōlen “imijak n̄e inaaj kainepataik er?” Bōlen kwoj kile ippām make ke kwoj ļōmņak kōn men rōt kein jet iien. Ewōr bar unin an riNipai ro kar jab kwaļo̧k gospel eo n̄an riLaman ro: “rawiia im kijn̄en̄e im juon armej rellāj; juon armej ro reitok-limo ilo uror e RiNipai ro” (Alma 17:14; bar lale Alma 26:23–25). Ak ekar ļap unin an ļōmaro nejin Mosaia kar en̄jake etke rej aikuj kwaļo̧k gospel eo n̄an riLaman ro: “Raar kōņaan bwe mour en kar ajeededļo̧k n̄an aolep armej, bwe ren maron̄ jab ļōmņak bwe jabdewōt armej en jako” (Mosaia 28:3). Iakwe in me eaar im̧we Ammōn im ļōmaro jatin emaron̄ barāinwōt im̧we eok n̄an kwaļo̧k kōn gospel eo n̄an baam̧le eo am̧, ro m̧ōttam, im ro kwoj iiaio ippāer—barāinwōt ro me remaron̄ jab m̧ōņōņō in bōke.

Ļōmnak ko n̄an Ekkatak ilo M̧weeo im ilo Kabun̄

Alma 17:1–4

Epidodo, wujlepļo̧k in kōm̧m̧an ko rejejjet an Kraist rejipan̄ eō bōk An kajoor.

Ta eo kwoj katak jān Alma 17:2–4 kōn wāween n̄an kōkajoor wōt naan in kam̧ool im kallim̧ur eo am̧ n̄an Jisōs Kraist? Ta eo ļōm̧aro nejin Mosaia rekar kōm̧m̧ane, im elmen an kar Irooj kōjeraam̧m̧an er?

Ilo am̧ riit kōn en̄jake ko an ļōm̧aro nejin Mosaia ilo Alma 17–22, keememej elmen aer kar kōppopo ilo jetōb n̄an jerbal eo aer ilubwiljin riLeman ro (n̄an waanjon̄ak, lale Alma 18:10–18, 34–36; 20:2–5; 22:12–16). Ta eo kwaar en̄jake n̄an kōm̧m̧ane n̄an ļoor waanjon̄ak eo aer?

Alma 17:6–12; 19:16–36

Imaron̄ erom juon kein jerbal ko ilo pein Anij.

Bwebwenato in oktak eo jej riiti ilo jeje ko rekwojarjar ekkā aer kabwilōn̄lōn̄, ak m̧ōttan eo eaorōk ekkā ad loe ippān kajjojo ro ewōr aer peran n̄an kōnono im kwaļo̧k tōmak eo aer ilo Jisōs Kraist. Ļōmņake menin ilo am̧ riit kōn Abij im ļōm̧aro nejin Mosaia wiik in.

Ta eo ilo am̧ ļomņak ej meļeļei n̄an erom̧ juon kein jerbal ilo pein Anij? Emaron̄ jipan̄ n̄an ļōmņak kōn kein jerbal ko me kwomaron̄ kōjerbali kajjojo raan in am̧ mour. Ilo am̧ riiti Alma 17:6–12, pukōt ta eo me ļōmaro nejin Mosaia raar kōm̧m̧ane bwe ren maron̄ kar erom kein jerbal ilo pein Anij. Elmen am̧ maron̄ erom̧ juon kein jerbal eļap n̄an jipan̄ ro jet itok n̄an Kraist?

Ta eo ej im̧we eok kōn Abij ilo Alma 19:16–36? Ta eo kwoj katak jān e n̄an jipan̄ ro jet kalōk tōmak ilo Kraist? N̄an waanjon̄ak, ta eo kwoj en̄jake enej kar jipan̄ armej ro kwoj iakwe “tōmak ilo kajoor an Anij”? (Alma 19:17).

Kwomaron̄ bar keidi en̄jake ko an Abij ippān pedped ko Elder Dieter F. Uchtdorf eaar kwaļo̧ki ilo “Jerbal in Mijenede: Kwaļo̧k Ta eo Kwoj Lukkuun Tōmak im En̄jake” (Liaona, Māe 2019, 15–18). Elmen an Elder Uchtdorf kalikkar “Elmokwot ko Ļalem” an Abij? Kajjieon̄ je men ko kwomaron̄ ba kōn Jisōs Kraist. N̄an waanjon̄ak, “N̄an n̄a, Jisōs Kraist …” ak “Rilo̧mo̧o̧r ej jipan̄ eō …”

Bar lale Unin Kōnono ko an Gospel, “Ministering as the Savior Does,” Gospel Library; “Brightly Beams Our Father’s Mercy,” Hymns, no. 335; “Come and See,” “Itok im Jipan̄,” “Itok im Pād” (videos), Gospel Ļaibrāre.

Kōjerbal men ko kein katakin. Jabdewōt iien armej remaron̄ loe im jibwe juon men eo āinwōt ta eo rej ekkatak, eto aer naaj keememeje. N̄e kwoj kwaļo̧k kake Alma 17:11, n̄an waanjon̄ak, ļōmņak in kwaļo̧k kein kōjan̄jan̄ ko ak kein jeje al ko n̄an jipan̄ im̧we ekōnono eo n̄an erom̧ juon kein jerbal ilo pein Anij.

Alma 17–19

N̄e jej kwaļo̧k ad iakwe n̄an ro jet, jemaron̄ jipan̄ er bōk gospel eo an Jisōs Kraist.

Pukot eoon ko ilo Alma 17–19 me ej kwaļo̧k elmen an kar iakwe eo an Ammōn n̄an riLeman ro kar im̧we kijejeto ko aer n̄an kwaļo̧k gospel eo an Jisōs Kraist. Ta m̧ool ko jet kōn kwaļo̧k gospel eo kwoj ekkatak jān waanjon̄ak eo an?

Bar lale “Ammon Serves and Teaches King Lamoni” (video), Gospel Library.

Minerva Teichert (1888–1976), Ammon Saves the King’s Flocks, 1949–1951, oil on masonite, 35 15/16 × 48 inches. Brigham Young University Museum of Art, 1969.

Alma 19:36

Irooj enaaj jipan̄ eō ukweļo̧k.

Ālkin etale oktak eo an Lamonai im armej ro an, Mormon ekar kōmeļeļeik bwebwenato eo ippān juon ekkatak kōn Jisōs Kraist. Ta eo Alma 19:36 ej katakin eok kōn paoktokin Irooj? Ta ko jet bwebwenato in ilo Alma 19:16–36 ej katakin eok kōn E? N̄āāt eo kwar en̄jake pein Irooj ej erļo̧k n̄an eok?

Alma 20:23; 22:15–18

Jeļā kajjien Anij eaorōkļo̧k jen jabdewōt wujlepļo̧k.

Keidi ta eo jemān Lamonai ekar kōņaan leļo̧k n̄an lo̧mo̧o̧re mour eo an (lale Alma 20:23) tokālik eaar kōņaan leļo̧k n̄an bōk m̧ōņōņō eo an gospel in im n̄an jeļā kajjien Anij (lale Alma 22:15, 18). Kōļmenļo̧kjeņ ta eo kwonaaj aikuj kaarmejete n̄an maron̄ jeļā eļapļo̧k kōn Anij.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

Ļōmņak ko n̄an Katakin Ajri ro

Alma 17:2–3

Naan in kam̧ool eo aō kōn Jisōs Kraist ej eddōkļo̧k n̄e ij riiti jeje ko rekwojarjar, jar, im jitlo̧k.

• Elmen an waanjon̄ak ko an ļōm̧aro nejin Mosaia maron̄ jipan̄ ajri ro nejum̧ kalōk naan in kam̧ool eo aer ilo Jisōs Kraist? Kwomaron̄ jipan̄ ajri ro nejum̧ lale ta eo ļōm̧aro nejin Mosaia rekar kōm̧m̧ane n̄an kalōk kajoor eo aer ilo jetōb ilo Alma 17:2–3. Innām remaron̄ jin̄a pija ak pukot kein katakin ko me rej pinej jenkwan men kein. Jipan̄ er peek ta eo rekōņaan kōm̧m̧ane n̄an kōkajoorļo̧k naan in kam̧ool eo aer kōn Rilo̧mo̧o̧r.

Alma 17–19

Imaron̄ kwaļo̧k gospel eo an Jisōs Kraist n̄an ro jet.

• N̄an katak n̄an erom̧ juon kein jerbal ilo pein Anij, āinwōt kar ļōm̧aro nejin Mosaia, kwe im ajri ro nejum̧ maron̄ pukot juon kein jerbal im kōnono kake ta jerbal eo an. Innām kwomaron̄ riiti Alma 17:11 im kōnono kōn ta meļeļein n̄an erom̧ kein jerbal ilo pein Jemedwōj Ilan̄ n̄an jipan̄ armej ro katak kōn Jisōs Kraist.

• Ilo peij in m̧akūtkūt eo an wiik in ewōr ie pija ro rej pinej jenkwan m̧ool eo Ammōn eaar katakin Kiin̄ Lamonai. Kwomaron̄ jipan̄ ajri ro nejum̧ n̄an pukot m̧ool ko ilo Alma 18:24–40. Ajri ro nejum̧ remaron̄ katen wōt n̄e er mijinede ro n̄an kwaļo̧k ta eo rejeļā kōn m̧ool kein.

• Ālkin am̧ riit kōn Abij n̄an ajri ro nejum̧ (lale Alma 19:16–20, 28–29), remaron̄ katen wōt n̄e er Abij n̄an etal n̄an jikin, kaḷḷaḷḷaḷ ilo kōjem ko, im kwaļo̧k ta eo ekar waļo̧k ilo Alma 19:1–17. Elmen ad maron̄ āinwōt Abij n̄an kwaļo̧k ta eo jejeļā kōn Jisōs Kraist im gospel eo An? Ajri ro nejum̧ remaron̄ jin̄aik aer make kwaļo̧k gospel eo n̄an ro jet ak al ippān doon juon al kōn kwaļo̧k gospel eo, āinwōt “Called to Serve” (Children’s Songbook, 174–75).

Alma 17:21–25; 20:8–27; 22:1–3

Imaron̄ jipan̄ ro jet itok n̄an Kraist ilo aō kwaļo̧k iakwe n̄an er.

• Ilo jinoin, jim̧or Kiin̄ Lamonai im jemān raar kepen būruweer n̄an gospel eo. Tokālik, eaar pidodo būruweer, im raar tōmak ilo Jisōs Kraist. Ekōjkan an kar menin waļo̧k? Jipan̄ ajri ro pukot uwaak ko n̄an kajjitōk in ilo am̧ etale ippāer en̄jake ko an Ammōn. Remaron̄ arrin “Jebta 23: Ammon: A Great Servant” im “Jebta 24: Ammon Meets King Lamoni’s Father” (Bwebwenato ko an Bok in Mormon, 64–68, 69–70). Ak bōlen ro uwaan baam̧le eo remaron̄ jin̄n̄aiki pija ko reoktak jān doon kōn bwebwenato eo im kōjerbal pija ko n̄an kwaļo̧k bwebwenato eo. Ta eo Ammōn ekar kōm̧m̧ane n̄an jipan̄ Lamonai im jemān n̄an kōppeļo̧k būruweer n̄an gospel eo an Jisōs Kraist? (lale Alma 17:21–25; 20:8–27; 22:1–3).

• Bōlen kwe im ajri ro nejum̧ maron̄ ļōmņak kōn juon eo me eaikuj n̄an jeļā kōn Jisōs Kraist. Jipan̄ er ļōmņaki wāween ko remaron̄ in erom juon waanjon̄ak n̄an kwaļo̧k iakwe n̄an armej eo, āinwōt kar Ammōn n̄an Lamonai im jemān.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Kōmeļeļe eo kōn Abij, jān Dilleen Marsh