Aentaai-Nibwaai-Riaai a Tauni aia Bwai ni Buaka,, iroun Jody Livingston

Turai 8–14: A bon “Aki Manga Tannako”

Aramwa 23–29

Iai n taai tabetai ko aki koaua raoi ngkana a kona ni bitaki aomata? Tao ko kona n raraoma bwa ko kona n tokanikai iaon rinerine aika buakaka aika ko a tia ni karaoi ke katei aika a buakaka aika ko a tia ni karikirakei, ke ko kona ni karekea te aeka n raraoma anne ibukiia aika ko tangiriia. Ngkana ngaia anne, karakinaia Aentaai-Nibwaai-Riaai e kona ni buokiko. Aomata aikai bon aia kairiribai Nibwaite. Ngke a iangoia natin Motiaea bwa a na kabwarabwaraa te euangkerio nakoia, tenaan Nibwaite “a [ngareakinia] ni bwainingareia.” Kamateakiia Reimwanaite e taraa n ae katokana ae raoiroi riki nakon rairakiia. (Taraa Aramwa 26:23–25.)

Ma Reimwanaite a bon bitaki—rinanon mwaakan Iesu Kristo ni bitiia. A kinaaki ngkoa bwa “aomata aika a moaanti ma ni matoatoa ma n iowawa” (Aramwa 17:14), ma a riki ni “kinaaki man nanomatoaia nakon te Atua” (Aramwa 27:27). Ni koauana, a bon “aki manga tannako” (Aramwa 23:6).

Tao a na iai iango tabeua ke kateim aika a riai ni bitaki ke “bwaai ni buaka … ake a kakaitara iai” bwa ko na kawenei (Aramwa 23:7). Ke tao ko bon riai n nanomatoa riki teutana nakon te Atua. N aki taraia bwa tera bitaki aika ko kainnanoi, Aramwa 23–29 e kona n anganiko te kaantaninga bwa rinanon mwaakan Iesu Kristo ni kamaiu, te bitaki ae na maan e boni kona n riki.

Iango ibukin Reiakinana n te Mweenga ao n te Taromauri

Aramwa 23–25; 27

Rairakiu nakon Iesu Kristo ao Ana euangkerio e na bita maiu.

Reimwanaite taraan ae a na aki riki bwa aomata aika a rairaki, ma bon angiina a rinanon te bitaki ae moan te kamiimi bon ibukin Iesu Kristo. Reimwanaite aika a rairaki aikai a aranaki bwa Aentaai-Nibwaai-Riaai.

Warekan Aramwa 23–25; 27 e na kona ni kairiko bwa ko na iangoa oin rairakim. Ukoria bwa a kanga ni bitaki Aentaai-Nibwaai-Riaai—ao a kanga n rairaki “nakon te Uea” (Aramwa 23:6). Ko kona ni moanna man kiibu aikai:

• Aramwa 23:6–7

• Aramwa 23:17–18

• Aramwa 24:15–21

• Aramwa 25:13–16

• Aramwa 27:26–30

N te anga raa ae bitiko Iesu Kristo ao Ana euangkerio? Nningai ae ko namakinna bwa ko kaan ma Ngaia? Ko na kanga n ataia bwa ko a rairaki nakon Iesu Kristo? Tera ae e kaunga nanom te Tamnei bwa kona karaoia imwiina?

Taraa naba David A. Bednar, “Converted unto the Lord,” Riaona, Nov. 2012, 106–9; Dale G. Renlund, “Unwavering Commitment to Jesus Christ,” Riaona, Nov. 2019, 22–25; Gospel Topics: “Become like Jesus Christ,” Gospel Library.

Aramwa 24:7–19; 26:17–22

Ibukina bwa e nanoanga te Atua, E kabwarai au bure ngkana I raira nanou.

Te bitaki are a rinanona Aentaai-Nibwaai-Riaai e riaon riki ae tii bitakin te anua—bon te bitaki n nano ae riki man te onimaki iroun Iesu Kristo ao te rairannano ni koaua. Tao ko kona ni kunea te koaua n taekan te Rairannano ni katoai kiibu n Aramwa 24:7–19. Tera ae reiakinaki ni kiibu aikai ibukin ana nanoanga te Atua nakoia ake a rairi nanoia? Tera koaua riki tabeua aika ko reiakin man Aramwa 26:17–22?

Iangoia inanom bwa e kanga te Atua ni kaota Ana nanoanga inanon maium. Ko na kanga ni kaota am kakaitau Nakoina?

Aramwa 26; 29

Tibwauakin te euangkerio e uota te kimwareirei nakoiu.

Te taeka ae kimwareirei e kaoti 24 te tai n Aramwa 23–29, ni karaoi mwakoro aikai bwa te tabo ae tamaroa n reiakina aron karekean te kimwareirei ni maiu—ao n tibwauakin—ana euangkerio te Tia Kamaiu. Iangoia ni kamatebwaia Aramwa 26:12–22, 35–37; ao 29:1–17, ni kakaea bukina bwa bukin tera Amon, natin Motiaea mwaane, ao Aramwa ngkai a kimwareirei. Tera ae ko reiakinna man kiibu aikai are e kona ni karekea riki te kimwareirei nakon maium?

E reirei Marcus B. Nash: “Tibwauakin te euangkerio e karekea te kukurei ma te kantaninga iroun te tia anga ao te tia karekea. … Tibwauakin te euangkerio bon te kimwareirei iaon te kimwareirei, te kantaninga iaon te kantaninga” (“Hold Up Your Light,” Riaona, Nob. 2021, 71). Tera taneiai aika ko karekei n tibwauankin te euangkerio ma tabeman? Tera kangaanga aika ko kaitara ma ngaai ngke ko ukeria bwa ko na tibwaua te euangkerio? E kanga ni buokiko Tamara are i Karawa n tokanikai iaon kangaanga aikai?

Ibukin taetae ni burabeti iaon kaetieti bwa ko na kanga n tibwaua te euangkerio—ao ni kunea te kimwareirei ni karaoakina—iangoia ni kamatebwai ana marooro Beretitenti Dallin H. Oak “Sharing the Restored Gospel,” (Riaona, Nob. 2016, 57–60). Tera iango ni ibuobuoki aika ko kunei n ana rongorongo?

Taraa naba “The Bush Family Story,” “Sharing Your Beliefs,” “Sharing the Gospel” (videos), Gospel Library.

Iangoia ni korei rinanin bwaai ake ko na tibwaia ma raoraom iaon Ana Boki Moomon. Kataia tibwa Ana Boki Moomon ni kabongana te Book of Mormon app.

Kakaei banna ao botoniango. Ngkana ti kamatebwai booki aika tabu, ti kona ni kunei koaua aika a onoti man kakaean taeka, kibuntaeka, ke iango aika a okioki. Taeka akana a okioki a kona n riki bwa bwaai n ibuobuoki ni kaota te tabo are e reke iai te rongorongo ke ma ane e irekereke ma am booki aika tabu are a na bebete ni kai nooraki.

Aramwa 26:5–7

I kona ni kunea te tabo ni katantan iroun Iesu Kristo ao Ana euangkerio.

N tain te tai, n taainako a ikotaki wiita nakon taian bwabwati are e aranaki bwa ikota ni wiita ao ni nneaki n te auti ni kaikobwai, n tabetai a aranaki bwa auti ni wiita. N Aramwa 26:5–7 iangoia inanom tera ikota ni wiita, auti ni wiita ao te angibuaka ae a tei ibukin maium. Ko na kanga ni kunea te tabo ni katantan iroun Iesu Kristo?

Taraa naba Russell M. Nelson, “Te Tembora ao Aan Maiun Tamneim,” Riaona, Nob. 2021, 93–96; David A. Bednar, “Honorably Hold a Name and a Standing,” Riaona, Meei 2009, 97–100; “Jesus, Lover of My Soul,” Anene n Taromauri, nambwa. 102.

Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Aramwa 24:6–24

Te Uea e kakabwaiaai ngkai I kataia ni kawakin au berita Nakoina.

• Tao a na bae ni kukurei nanoia am ataei ngkana a tauni aia “bwai ni buaka” n aroia Aentaai-Nibwaai-Riaai. Ko kona ni wareki tabeua kiibu man Aramwa 24:6–24 n reireiniia ataei taekan berita ake a karaoi Aentaai-Nibwaai-Riaai n iriira te Tia Kamaiu. Ngkanne a kona n iangoa teuana te bwai ae a na bitia bwa aonga n Iriiria, koreia iaon te iteraniba ibukin te waaki ni kakukurei n te wiiki aei, ao karaoa ae aongkoa are ko a kekena te bwangabwanga ao n taunii aia bwai ni buaka.

• A kona am ataei ni wareka Aramwa 24:15–19, n taraia bwa are a tia ni karaoia Aentaai-Nibwaai-Riaai e riki “bwa te kakoaua nakon te Atua.” Ngkanne ko kona ni maroro mangaiia bwa a na kanga n riki ara berita aika tabu bwa “te kakoaua nakon te Atua” (kibu 18). Tuangiia am ataei bwa a na maroroakinna bwa a na kanga ni kaotia nakon te Atua ae a tangiria ni kan Iriiria. N aneanean te kuna n aron “I Want to Live the Gospel” (Aia Boki n Anene Ataei, 148) e kona ni buokiia ni kaungai nanoia.

Aramwa 24:7–10; 26:23–34; 27:27–30

I Kona n raira nanou.

• Ni buokiia am ataei n nooria bwa e kanga Iesu Kristo ni buokira ni bitaki ngkana ti rairi nanora, ko kona n reireiniia rongorongoia Aentaai-Nibwaai-Riaai. Ni karaoa aei, ko kona ni koreia iaon uoua te boora te taeka ae “imwaaina” ao “imwiina.” Ngkanne a kona am ataei ni wareka Aramwa 17:14–15 ao 27:27–30, koreia bwa tera aroia Reimwanaite mai imwaaina ao imwiin are a rairi nanoia, ao karinii inanon te boora ae eti. Ni kaineti ma Aramwa 24:7–10, tera are e buokiia ni bitiia? Ti na kanga ni kaota ara kakaitau nakon te Atua ao Ana nanoanga?

Aramwa 26; 29

Iesu Kristo e anganai te kimwareirei, ao I kona ni tibwaua te kimwareirei aei.

• Tao ngkoe ma am ataei kam na kukurei ni koroi tamnein bwaai n ana euangkerio Iesu Kristo are e anganingkami te kimwareirei. Tibwaua am tamnei ma am ataei, ao kaungaia bwa a na tibwaua aia tamnei ma temanna ni buoka te aomata anne n namakina naba te kimwareirei.

• Buokiia am ataei bwa a kakaea te taeka ae kimwareirei ao kukurei n Aramwa 26 ao 29. Tera ae karekea kimwareirein Amon ao Aramwa ke ae karika kukureia? E kona te titiraki aei ni kaira aron maroroakinan te kimwareirei are e roko man maiuakinan ke n tibwauakin ana euangkerio Iesu Kristo.

Aramwa 27:20–30

I kona ni buokiia raoraou ni maiuakina ana euangkerio Iesu Kristo.

• A kona am ataei ni wareka Aramwa 27:22–23, n taraia bwa tera are a tia ni karaoia Nibwaite ni buokiia Aentaai-Nibwaai-Riaai ni kawakina aia berita bwa a na aki manga buaka. Tera arora ni buokiia raoraora bwa a kawakina aia berita? A kona am ataei ni karaoa te kaotioti iaon bwaai aika riki aikai. Te katoto, tera ae ti kona n taekinna nakon raoraora ae tangiria ni kewe ke ni moakakung?

Ibukin iango riki tabeua, taraa te beeba ni kaongora n te namwakaina aio n te Te Rao maekatiin.

Kamataata n tamneia Aentaai-Nibwaai-Riaai ngke a tauni aia bwai ni buaka, iroun Dan Burr