Amon ao te Uea ae Ramonaai,, iroun Scott M. Snow

Tuurai 1–7: “N na Karaoi Ngkami bwa Bwaai ni Mwakuri inanon Baiu”

Aramwa 17–22

Iangoi ni kabane aia kaeka aomata ake a anga ibukin aki tibwauaan te euangkerio: “E aki bati au atatai” ke “I aki koaua raoi ngkana a bon kan ongoraa” ke tao “I maaku bwa mwiina I aki butimwaeaki.” Tao ko bae ni kunea bwa ti te arona am iango ma akanne n taai tabetai. Iai bukina riki irouia Nibwaite bwa a aki tibwaa te euangkerio ma Reimwanaite: a kabwarabwaraaki bwa a “moaanti ma ni matoatoa ma n iowawa, aomata aika kukurein nanoia tiringakia Nibwaite” (Aramwa 17:14; taara naba Aramwa:26 23-25). Ma natin Motiaea mwaane iai bukina ae e korakora irouia ae a namakinna bwa a riai n tibwaua te euangkerio ma taian Reimwanaite: “Nanoia e tangiria bwa e na karokoaki taekan te kamaiuiaki nakoia ana kariki bwai aika a maiu ni kabane, bwa a aki kona moan ae e na iai tamnein te aomata temanna ae e na kamaunaaki” (Motiaea 28:3). Te tangira aio are e kaungaa Amon ao tarina a kona naba ni kaungako bwa ko na tibwaua te euangkerio ma am utu, raoraom, ao ake ko kinaia—–ao naake kanga a taraa n aki tangiria ni kan butimwaia.

Iango ibukin Reiakinana n te Mweenga ao n te Taromauri

Aramwa 17:1–4

Bebetena, karaoan taromaurian Kristo ae reitinako e buokai ni karekea Mwaakana.

Tera ae ko reiakinna man Aramwa 17:1–4 ibukin aron kawakinan am kakoaua ao nanomwaakam ae matoatoa iroun Iesu Kristo? Tera ae a tia ni karaoia natin Motiaea mwaane, ao e kanga te Uea ni kakabwaiaia?

Ngkai ko wareka taekan aia taneiai natin Motiaea mwaane n Aramwa 17–22, taraia bwa e kanga aron aia katauraoi n te taamnei n rooti aia mwakuri n ibuobuoki ibuakoia Reimanaite (ibukin te katooto, taraa Aramwa 18:10–18, 34–36; 20:2–5; 22:12–16). Tera ae ko namakinna bwa ko kaungaaki bwa ko na karaoia n ira aia banna ni katooto?

Aramwa 17:6–12; 19:16–36

I kona n riki bwa te bwai ni mwakuri ni bain te Atua.

Rongorongon te rairaki are ti warekia ni koroboki aika tabu a bon kangaanga taekaia, ma te bwai ae moan te kakaawaki n te rongorongo ti teimatoa kuneia tabeman ae iai irouia te ninikoria n taetae ao n tibwaa aia onimaki iroun Iesu Kristo. Iangoa taekan aio ngkai ko wareka rongorongon Abiti ao natin Motiaea mwaane n te wiiki aei.

Tera n ami iango ae nanonaki bwa te tia mwakuri ni bain te Atua? E na kona ni ibuobuoki ngkana ko iangoa te bwai ni mwakuri ke bwaai ni mwakuri ae ko kabongana ni maium ni katoabong. N Aramwa 17:6–12, kakaea bwa tera ae a karaoia natin Motiaea mwaane bwa aonga n riki bwa bwaai ni mwakuri ni bain te Atua. Ko na kanga n riki bwa te bwai ni mwakuri ae nakoraoi riki ni buokia aomata bwa a na roko nakon Kristo?

Tera ae anaa nanom n rongrongon Abiti n Aramwa 19:16–36? Tera ae ko reiakinna mairouna ibukin buokaia aomata bwa a na karikirakea aia onimaki iroun Kristo? N aron te katooto, tera ae ko namakinna ae buokia aomata ae ko tangiria ni “kakoaua ni mwaakan te Atua”? (Aramwa 19:17).

Ko na bae naba ni kabotaua ana taneiai Abiti ma ana reirei Unimwaane Dieter F. Uchtdort are e reiakinaki i nanon “Missionary Work: Sharing What Is in Your Heart” (Riaona, Meei 2019, 15–18). E kanga Abiti n anga te kamataata nakon “Nimaua Kaoti Iango aika a Bebete” Unimwaane Uchtdorf”? Kataia korei tabeua bwaai ake ko na taekinna ibukin Iesu Kristo. N aron, “I bukiu, Iesu Kristo …” ke “E buokai te Tia Kamaiu …”

Taraa naba Atuun Rongorongo n te Euangkerio, “Ministering as the Savior Does,” Gospel Library; “Brightly Beams Our Father’s Mercy,” Anene n Taromauri, no. 335; “Come and See,” “Come and Help,” “Come and Belong” (videos), Gospel Library.

Kabongana te reirei ma bwaai ni kabotau. N te tai are e kona aomata n noori ke n riingi bwaai ake a irekereke nakon are a reiakinna, a na kona n ururingnga raoi riki n te tai ae maan. Ngkana ko anga reirei iaon Aramwa 17:11, katooto, iangoa kaotan bwaai ni katangtang ke bwaai ni koroboki ni buokiko ni kaunga maroroakinan taekan te riki bwa te bwai ni mwakuri ni bain te Atua.

Aramwa 17–19

Ngkana ti kaota ara tangira ibukia aomata, ti kona ni buokiia ni karekea ana euangkerio Iesu Kristo.

Kakaei kiibu n Aramwa 17–19 ae kaota aron ana tangira Amon ibukia taian Reimwanaite ae kaira korakorana n tibwaan ana euangkerio Iesu Kristo. Tera koaua tabeua ibukin tibwaakin te euangkerio ae ko reiakinna man ana katooto?

Taraa naba “Ammon Serves and Teaches King Lamoni” (witeo), Gospel Library.

Minerva Teichert (1888–1976), Amon E Kamaiuiia ana Nanai n Tiibu te Uea,1949–1951, te oera iaon te mitionaite, 35 15/16 x 48 te inti. Brigham Young University Museum of Art, 1969.

Aramwa 19:36

E na buokai te Uea n raira nanou.

Imwiin manga karakinan rairakin Ramonaai ao ana botanaomata, e kakimototoa te rongorongo Moomon ma ana noonori ae kabotoa iaon Iesu Kristo. Teraa ae reiakinna nakoim Aramwa 19:36 ibukin anuan te Uea? Tera riki man te rongorongo n Aramwa 19:16–36 ae reiakiniko ibukin Rongorongona? Nningai ae ko a tia n namakina bain te Uea bwa e arori nakoim?

Aramwa 20:23; 22:15–18

Ataakin te Atua bwa e tau ibukin te angakarea.

Kabotaua are e kukurei n anga taman Ramonaai ni kamaiua iai (taraa Aramwa 20:23) ma are e kukurei ni karaoia imwiina ni katokia bwa e aonga ni karekea kimwareirein te euangkerio ao n ataa te Atua (taraa Aramwa 22:15, 18). Iangoia raoi bwa tera ae ko kukurei ni katokia bwa ko aonga n ataa riki raoi te Atua.

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Aramwa 17:2–3

Au koaua iroun Iesu Kristo e rikirake ngkana I wareki koroboki aika a tabu, I tataro, ao n aki mamatam.

• A na kanga aia katooto natin Motiaea mwaane ni buokia natim ni karikirakea aia kakoaua iroun Iesu Kristo? Ko kona ni buokia natim bwa a na kunea are a karaoia natin Motiaea mwaane ni karikirakea korakoraia n taamnei n Aramwa 17: 2–3. Imwiina a kona ni korei tamnei ke ni kakaei bwaai are a tei ibukin bwaai aikai. Buokia bwa na baireia bwa tera ae a na karaoia ni kakorakorai aia koaua iroun te tia Kamaiu.

Aramwa 17–19

I kona n tibwaa ana euangkerio Iesu Kristo ma aomata.

• N reiakina riki aron te riki bwa te bwai ni mwakuri ni baain te Atua, n ai aroia ngkoa natin Motiaea mwaane, ngkoe ma natim kam kona n tara te bwai ni mwakuri ao ni maroroakinna bwa tera ae kabonganaaki iai. Imwiina ko kona ni wareka Aramwa 17:11 ao n taetae iaon te bwai ae nanonaki bwa te bwai ni mwakuri ibukin Tamara are i Karawa ni buokia aomata n reiakina taekan Iesu Kristo.

• Te waaki ni kakukurei n te iteranibaa n te wiiki aei iai tamnei iai aika a tei ibukin koaua ake Amon e reiakina iai te Uea ae Ramonaai. Ko kona ni buokia natim ni kunei koaua aikai n Aramwa 18:24–40. A kona naba natim n riki bwa aongkoa mitinare ao n tibwaa are a ataia ibukin koaua aikai.

• Imwiin warekan rongorongon Abiti iroum ma natim (taraa Aramwa 19: 16–20, 28–29), a kona n riki bwa aongkoa Abiti ao ni biribiri n aia tabo, karebwerebwe n mataroa, ao n taekina te bwai are e riki n Aramwa 19: 1–17. Ti na kanga n riki n ai aron Abiti ao n tibwaa are ti ataia ibukin Iesu Kristo ao Ana Euangkerio? A kona natim ni korei taamneia n tibwaakin te euangkerio ma temanna ke a kaai n anene ibukin tibwaakin te euangkerio, n ai aron “Called to Serve” (Aia Boki n Anene Ataei, 174–75).

Aramwa 17:21–25; 20:8–27; 22:1–3

I kona ni buokiia tabeman n nakon Kristo man kaotan au tangira nakoia.

• N te moantai, te Uea ae Ramonaai ma tamana a kaai ni matoa nanoia nakon te euangkerio. Imwiina, a marau nanoia, ao a kakoaua iroun Iesu Kristo. E kanga n riki aio? Buokiia am ataei ni kunei kaeka nakon te titiraki aei ngkai ko waaki ma ngaiia n rinanon ana taneiai Amon. A kona ni karaoa te kaotioti “Mwakoro 23: Te Toka ae Korakora” ao “Mwakoro 24: E Kaitibo Amon ma Taman te Uea ae Ramonaai” (Ana Boki Moomon, 64–68, 69–70). Ke tao a tangiria ni korei taamnein rongorongon karaki aika a kakaokoro ao ni kabonganai taamnei ni taekinan taian karaki. Tera ae e a tia ni karaoia Amon ni buoka Ramonaai ao tamana ni kauki nanoia nakon ana euangkerio Iesu Kristo? (taraa Aramwa 17:21–25; 20:8–27; 22:1–3).

• Tao kam kona ni iangoa temanna ngkoe ma natim are e kainanoia bwa e na ataa taekan Iesu Kristo. Buokia bwa a na iangoi kawai ae a konna n riki iai bwa katooto aika a tamaroa ao ni kaota te tangira nakon te aomata anne, n ai aron are e karaoia Amon ibukin Ramonaai ao tamana.

Ibukin iango riki tabeua, taraa te beeba ni kaongora n te namwakaina aio n te Te Rao maekatiin.

Tamnein Abiti, iroun Dilleen Marsh