Aramwa 17–18

Amon

Te toro ae mangori

Amon ma tarina a tangiria n reireiniia Reimwanaite taekan te Uea. A nakon te tabo are a maeka iai Reimwanaite. Inanon kawaia, a karaoa aia aki mamatam ao a tataro n butiia te Uea buokaia. Te Uea e karaui nanoia. E tuangiia bwa a na taotaona nanoia ao n riki bwa banna ni katooto aika tamaroa. A nako n kawaia aika kakaokoro bwa ana reiakinia aomata.

Motiaea 28:1–2; Aramwa 17:6–13

Amon e nakon te tabo ae aranaki bwa Itimaera. Aomata ikekei a kabaea ao a uotia nako matan te Uea ae Ramonaai. Amon e tuanga Ramonaai bwa e kan maeka ibuakoia Reimwanaite. Ramonaai e tatangira Amon ao e a kainaomataa. E tangira Amon bwa e na mare ma temanna natina te aine, ma Amon e rineia bwa e na riki bwa ana toro Ramonaai.

Aramwa 17:20–25

Ramonaai e tuanga Amon bwa e na kawakinii ana man. Te bong teuana, Amon ma taian toro riki tabeman a kairiia aia man nakon te ran. Ngke a mooi aia man, a kaoti taan iraa ao a kataia n kabirinakoia. Tooro ake tabeman a maaku bwa miina ana katuuaeaki ngkana a bua ana man Ramonaai.

Aramwa 17:25–28; Aramwa 18:7

E ataia Amon bwa aio ana tai ni kamanena mwaakan te Uea. E tuangiia raona n toro bwa ana aki raraoma ao e buokiia n kakaeia aia man ake a birinako.

Aramwa 17:29–32

A manga kaoti naba taan iraa n kataia n kabirinakoi aia man. N te tai aio, Amon e tuangiia tooro ake tabeman bwa a na tiku n tararuai aia man bwa ana aki birinako.

Aramwa 17:33

E nako Amon n kaitaraia taan iraa bwa ana aki kabirinakoi aia tiibu. Aki maaka Amon taan iraa. N aia iango ao a taku bwa a korakora riki nakoina. Ma a aki ataia ae te Uea e buoka Amon.

Aramwa 17:34–35

Amon e kareia taan iraa n taian atiibu n ana bana. Tabeman ibuakoia a mate. Aio e karika te un irouia taan iraa ake tabeman, ao a tangiria n kamatea Amon. A kubanako bwa e bon aki teke Amon n aia atiibu. A bon aki kantaningaia bwa e na rangi ni korakora.

Aramwa 17:36

A kataia taan iraa n orea Amon n aia kai. Ma ni katoaa te tai, Amon e korei baia n ana kabaang n te aro are aikoa kona n oro. E aki maan, ao a maaku n oro ao a birinako.

Aramwa 17:37–39

A tuanga Ramonaai taan toro akekei aron Amon n kamaiuiia ana man. Ramonaai e rangi ni miimi. E taku n ana iango bwa Amon bon te Tamnei ae Korakora, are iai irouna te mwaaka ae korakora ao e atai bwaai ni kabane.

Aramwa 18:1–5, 18

Ramonaai e tangiria n marooro ma Amon, ma e rangi n raraoma.

Aramwa 18:8–11

Amon e nako n kawara Ramonaai, ma e aki ataa te bwai ae ena taekinna Ramonaai. Te Uea e buoka Amon ni kaotii kanoan ana iango Ramonaai nakoina. E kabwarabwaraa Amon bwa tiaki ngaia te Tamnei ae Korakora. E tuanga Ramonaai bwa te Tamnei ae Korakora bon te Atua. Ramonaai e tangiria n reiakina ae bati ibukin te Atua.

Aramwa 18:12–28

Amon e tuangnga bwa te Atua ae karika te aonaaba ao kaaina ni kabane. Ngkanne Amon e a tuanga Ramonaai bwa bon iai ana babaire ni kamaiu te Atua. N mwakoron te kainibaire anne, e na roko Iesu Kristo. Ramonaai e kakoauai ana taeka Amon. Ramonaai e tataro ao e bubutia te Atua bwa ena nanoangaia ma ana botanaomata.

Aramwa 18:24–36, 39–42