“Te Uea ae Beniamina,” Karaki man Ana Boki Moomon (2023)
Te Uea ae Beniamina
Beku ibukia aomata ao te Atua
Te Uea ae Beniamina bon ana burabeti te Atua ao n tautaekana te aba ae Taraemera. E mwakuri korakora ibukin tobwaan ana botanaomata ao n reireiniia taekan te Atua. Man aia ibuobuoki ana burabeti te Atua ake temwaangina, Beniamina e karika te kaawa ae Taraemera bwa e na rau ao ni mano.
Ana Taekan Moomon 1:17–18; Motiaea 1:1–7
E rikirake ni kara Beniamina. E tuanga natina te mwaane ae Motiaea bwa e na bobotiia aomata nakoina. E tangiria Beniamina n tuangiia bwa e nang riki Motiaea bwa aia uea ae boou.
A mwaiti aomata ake a roko man te aba. A katei aia umwanrianna ni uakaan ma te tembora bwa a na ongora iroun Beniamina.
E taetae Te Uea ae Beniamina man te taua bwa aonga n ongo aomata bwanaana. E taekinna Beniamina bwa bon te Atua are ngaia e buokia n ana tai ni kairiia. Ngkai ngaia te uea, e reireiniia bwa a na ongeaba nakon ana tua te Atua. E bon aki kan anai aia mwane ke tao ni kainnanoia bwa a na toro irouna. Ma, e mwakuri ao ni beku ibukia ana botanaomata ao te Atua.
E tua Beniamina nakoia ana botanaomata bwa ngkana a ibuobuoki i marenaia, ao a bon beku naba ibukin te Atua. Ao i mwiina e tuangiia bwa aia bwai ni kabane ake a karekei a bon nako mai iroun te Atua. E tangiriia te Atua bwa a na ongeaba nakon Ana Atua, bwa boon mwiin bwaai ake a karekei. Ngkana a ongeaba, a na roko riki taian kakabwaia mai iroun te Atua.
E tua Beniamina nakoia bwa e nang toki man nakoana ni uea ao n tia reirei. Natina te mwaane ae Motiaea bon aia uea ae boou.
I mwiina ao e tua Beniamina nakoia ana botanaomata bwa e a tia n roko irouna te anera. E taetae nakoina te anera ibukin Natin te Atua, Iesu Kristo, are e na roko i aon te aba. E na karaoi kakai ao ni kamaiuia aomata. E na maraki ao ni mate ibukin kamaiuaia te botanaomata. E reirei Beniamina bwa Iesu e na kabwarai aia bure aomata ake iai aia onimaki Irouna ao n rairi nanoia.
A kakoaua ana reirei Beniamina aomata i aon taekan Iesu. A ataia bwa a riai n raira nanoia. A bane botanaomata n tataro ao ni butia te Atua kabwaraan aia bure. I mwiin aia tataro, a namakina Tamnein te Atua irouia. A namakina te kukurei ao n ataia bwa a kabwaraaki aia bure iroun te Atua ibukin aia onimaki iroun Iesu.
A namakina te bitaki aomata ao te nano ae boou ibukina bwa iai aia onimaki iroun Iesu. A tangiria ni kan karaoi bwaai aika a raoiroi n taainako. A berita bwa a na kawakin ana tua te Atua ni karokoa tokin maiuia. A karaoi aia berita ibukina bwa a onimakina Iesu, ao a aranaki bwa ana aomata Iesu.