“Kanikinaean Bungiakin Iesu,” Karaki man Ana Boki Moomon (2023)
Kanikina ni Bungiakin Iesu
Te onimaki n aia reirei burabeiti
Ai nimaua te ririki imwiin ana reirei Tamuera are te burabeti iaon kanikinaan bungiakin Iesu Kristo. A mwaiti aomata aika a kakoauaa ao a tatatarai kanikinaa. Tabeman aomata a taku bwa Tamuera e kairua ao ni bwakanako tain kanikina aikai. A bwainingareiia taan kakoaua ao n taku bwa e na bon aki roko Iesu.
Ereman 14:2–7; 3 Nibwaai 1:4–6
Taan kakoaua a raraoma, ma iai aia onimaki. A teimatoa n tatarai kanikinaa. Teuana te kanikina bwa ena aki roo ngkana e bong. E na oota n ai aron te ngaina imwiin bungin taai. Te tairiki n akean te roo bon te kanikinaa bwa Iesu ena bungiiaki n te bong are imwiina n te aba teuana.
Ereman 14:2–4; 3 Nibwaai 1:7–8
Iai aia kainibaire aomata ake taan aki kakoaua. A rinea te bong teuana bwa ngkana e aki kaoti te kanikina n te bong anne, ana kamateia taan kakoaua.
Te mmwane ae arana Nibwaai bon te burabeti n te tai anne. E rangi n nanokawaki irouia aomata ake a tangiria n kamateia taan kakoaua.
Nibwaai e katorobubua i aontano n tataro nakon te Atua ibukiia taan kakoaua ake a nang kamateaki ibukin aia onimaki. E bong ana bong n tataro.
Ni kaekaan ana tataro, Nibwaai e ongo bwanaan Iesu. E taku Iesu bwa ena kaoti te kanikina n te tairiki anne ao E na bungiiaki n te bong are imwina.
N te tairiki anne ao akea te rootongitong e ngae ngke ea tia n bung taai. Aomata ake aki kakoauai ana taeka Tamuera a rangi ni kubanako ao a bwaka nako aontano. A maaku ibukina bwa a tia n aki kakoaua. Aomata ake a kakoaua aki kamateaki.
Te bong are imwina, e oti taai ao e teimatoa n oota karawa. Aomata ni kabane ataia bwa te bong aio are e a bungiiaki iai Iesu.
Aomata a manga nora riki te kanikina teuana. Te itoi ae boou e a kaoti i karawa. A kakoroaki nanon taian kanikina are taetaekinna Tamuera. A mwaiti aomata aika a kakoauaa Iesu ao a bwabetitoaki.