Motiaea 23-25

Aramwa ao Ana Botanaomata

Te korakora mairoun te Atua n taai ni karawawataaki

A maeka Aramwa ma ana botanaomata n te aba ae tamaroa. A unikii kora ao a katei mweengaia. Aramwa bon ana ibonga te Atua. E reireiniia ana botanaomata bwa ana itangitangiri imarenaia. A ongo aomata nakon Aramwa ao a kawakin ana tua te Atua. A rikirake aia utu, ao a katea aia kaawa.

Motiaea 23:4–5, 15–20

N te bong teuana, e a kaoti aia tanga ni buaka Reimwanaite. A konaaki. A berita Reimwanaite bwa ana katikuia Aramwa ma ana botanaomata ngkana e buokiia n kaota kawaia n okira abaia. E kaota te kawai n oki Aramwa nakoia Reimwanaite.

Motiaea 23:25, 30, 36–37

Ma Reimwanaite aki kawakina aia berita. Ma, a taua te aba ao a kateia aia tautia bwa ana tataraia ana botanaomata Aramwa. A katokaa te Nibwaite ae Amuron bwa e na uea iaoia ana botanaomata Aramwa. Amuron bon te tia kairiri irouia ibonga ni kewe. Ngaia ma ana ibonga a tia ni kamatea ana burabeti te Atua ao a rawata riki bwaai aika buakaka ae a tia ni karaoi.

Motiaea 17:12–13; 23:31–32, 37–39; 24:9

E un Amuron iroun Aramwa. E kamwakuriia ana botanaomata Aramwa ao e iowawa nakoia. E rangi n rawawata irouia ana botanaomata Aramwa.

Motiaea 24:8–9

A bubutiia te Atua ibukin buokaia. E tuangiia Amuron bwa a na katoka te tatataro. E tuangiia bwa e na kamateaki are e tataro.

Motiaea 24:10–11

Aramwa ma ana botanaomata a katoka te tataro n takarua. Ma, a tataro inanoia. E ongo te Atua aia tataro. E karauii nanoia ao e berita bwa e na buokiia n kabirinakoia. Te Atua e kabebetei rawawatan aia mwakuri. A tataona nanoia aomata ao a kukurei n ongo iroun te Atua. A ataia ae E buokiia.

Motiaea 24:12–15

Ana botanaomata Aramwa a onimakina te Atua ao e korakora aia onimaki Irouna. Te bong teuana, e tuangiia te Atua bwa e a roko aia tai n birinako. N te tairiki anne, Aramwa ma ana botanaomata a katauraoiia. A booti aia man ao kanaia. N te ingabong, te Atua e kamwaninganakoia n matu Reimwanaite. Ngkane Aramwa ao ana botanaomata a birinako ao e bong aia bong n mwananga.

Motiaea 24:16–20

N te tairiki anne, ni kabane mwane, aine, ao ataei a karabwa te Atua. A ataia bwa bon ti te Atua a kona n buokiia. A mwananga inanon boong aika mwaiti ao a roko n te aba ae aranaki bwa Taraemera. A butimwaeaki irouia Nibwaite, ao Aramwa e reireiniia aomata ni kabane taekan karekean te onimaki iroun Iesu Kristo. E mwaiti aomata aika a kakoauaa ao a bwabetitoaki.

Motiaea 24: 20– 25; 25: 14– 24