“Abinataai ao te Uea ae Noa,” Karaki man Ana Boki Moomon (2023)
Abinataai ao te Uea ae Noa
Te Rongorongo mairoun te burabeti
Te Uea Nooa e uea iaoia Nibwaite ake a maeka n te aba ae Nibwaai. Nooa e tuangiia ana aomata bwa ana anganna te mwane ae mwaiti ao e kabooi iai bwaai aika tamaroa i bon ibukina. E weteia ibonga aika a kainikatonga bwa ana buokia ni kairiiri. Nooa e aki kawakin ana tua te Atua. Ma, e karaoi bwaai aika buakaka.
Nooa e kairiia ana aomtaa nakon te buakaka. Aki iriira te Uea.
Ana burabeti te Atua ae arana Abinataai e maeka naba n te aba aei. Te Uea e kanakoa Abinataai bwa e na tuangiia Nooa ma ana aomata bwa ana rairi nanoia.
Abinataai e tuangiia aomata bwa e tangiriia te Uea bwa a na rairi nanoia. Ngkana aki kona n rairi nanoia, te uea e na karokoia aia kairiribai bwa ana roko n abaia ao n tautaeka iaoia. Aia kairiribai a na karawawataa maiun Nooa ma ana aomata.
A un aomata n ana taeka Abinataai. A tangiria n tiringnga, ma te Uea e kawakina Abinataai ao e buokia n birinako.
Nooa e tangiria n tiringnga naba Abinataai. Nooa e aki kakoaua te Uea. Ngaia ma ana aomata a rawa n rairi nanoia.
Uoua te ririki imwina, te Uea e a manga kanakoa riki Abinataai bwa e na kauringiia aomata. Abinataai e tuangiia aomata bwa ana roko aia kairiribai n tautaekana abaia bwa a tuai man rairi nanoia. A un aomata iroun Abinataai. A taku bwa akea te bwai ae a karaoia ao a rawa n rairi nanoia. A kabaea Abinataai ao a uotia nakon Nooa.
Nooa ma ana ibonga a karaoa aia babaire. A kataia taan ibonga n kamwanea Abinataai n titirakinna titiraki aika a mwaiti. Ma Abinataai e kaekai ma te ninikoria. Ibonga a rang miimi n ana kaeka Abinataai. Aki kona n kamwanea. Abinataai e tuangiia ibonga bwa a tabeakina riki te mwane nakon karaoan ae raoiroi.
Nooa e tuangiia ibonga bwa a na tiringa Abinataai. Ma Abinataai e tuangiia bwa ana aki ringnga. E kaotaaki moana n mwaakan te Atua. Abinataai e tuangiia ibonga bwa aki reirei ana tua te Atua. Abinataai e reiakiniia bwa Iesu Kristo e na bungiiaki, mate ibukira, ao e na manga uti. E taku bwa Iesu e na kabwarai aia bure ngkana a rairi nanoia.
Abinataai e bane ana rongorongo are e kanakoa te Uea bwa e na nikiria. E bon un naba Nooa. E tuangiia ana ibonga bwa na kamatea Abinataai.
Temanna te ibonga, Aramwa, e kakoauaa Abinataai. Aramwa e kataia n kamaiua Abinataai. Ma ngkai e a un Nooa iroun Aramwa naba ao e kanakoa.
A taku ibonga nakon Abinataai bwa e na maiu ngkana e taekinna bwa bwaai ake e reireiniia aki koaua. Ma Abinataai e taku bwa e koaua bwaai ake e reireiniia. A manga un naba Nooa ma ana ibonga. A kauraa n te ai Abinataai. Ana tautia Nooa a kataia n tiringa naba Aramwa. Ma Aramwa e karabaa ao e korei ana taeka Abinataai ni kabane.