“Ana Onimaki te Uea n Aine,” Karaki man Ana Boki Moomon (2023)
“Ana Onimaki te Uea n Aine,” Karaki man Ana Boki Moomon
Ana Onimaki te Uea n Aine
Karekean te Kimwareirei iroun Kristo
E tautaeka te uea n aine ae te Reimwanaite ma buuna, ae te Uea ae Ramonaai. E tua te uea nakon te Nibwaite ae arana Amon bwa e na reireinna taekan te Uea. E kakoauai bwaai ake taekin Amon te uea. E katorobubua te uea ao n tataro nakon te Uea bwa e na kabwarai ana bure. N ana tai n tataro, e a nako aontano te uea. E taraa n ae e a mate.
E a uotaki irouia ana toro n nakon te uea n aine. A katikua iaon ana kainiwene. E wene ai aron ae mate i nanon te maan ae uoua te ngaina ao uoua te tairiki.
A rootaki n te nanokawaki te uea n aine ma natina, n te tai anne. A tiku irarikin te uea ao n tang iaona. Tabeman aomata a taku bwa e nang riai n taunaki te uea. Ma e tangiria moa te uea n aine ni marooro ma Amon. E ongoongo bwa iai irouna mwaakan te Atua. A nako ana toro te uea n aine n tuanga Amon bwa e na nakon te uea n aine.
E tuanga Amon te uea n aine bwa e ongoo ae ngaia ana burabeti te Atua. E tuanga Amon bwa e na nako ni kawara te uea. E ataia Amon bwa e bon maiu te uea. Bon man mwakan te Atua are karika te uea bwa e na matuunako. E tua Amon nakon te uea n aine bwa e na uti buuna n te bong are i mwiina.
E kakoaua Amon te uea n aine ao ni korakora ana onimaki iroun te Atua. E kakoaua bwa e na uti buuna n te bong are i mwiina. E taekinna Amon bwa e rangi ni kakabwaiaki ibukin ana onimaki ae korakora. E tuanga te uea n aine bwa e korakora riki ana onimaki nakon aia onimaki ana botanaomata. Te uea n aine e tiku ao n te tairaki anne ao n tararua buuna.
N te bong are i mwina, e a uti te uea. E tuanga te uea n aine bwa e noora Iesu Kristo. A namakina ana tangira Iesu te uea n aine ao te uea ni mwaane, ao a kaonaki n te kimwareirei.