Iakobwa 5–6

Te Kai te Oriwa

Ana tangira te Atua ibukiia Ana aomata

Iakoba bon ana burabeti te Atua. E tangiria ni kan reireiniia Nibwaite taekan ana tangira te Atua ibukiia Ana aomata. E tuangiia Iakoba taekan te nne ni kurebe ibukin te kai ae te oriwa. Uean te nne ni kurebe ao Ana tia mwakuri a uaia n tararua raoi te nne ni kurebe.

Iakoba 5: 1–4, 7; 6: 4–5

Iai arokan te Uea ae te kai te oriwa ae e tei n okoro man kariki uaa aika a raraoi. E taekinna Iakobwa bwa te kai aei titebo ma ana aomata te Atua, ke te bata are Iteraera. Uaan te kai aei e kabotauaki ma aron aia mwakuri aomata. E tabeakina te kai aei te Uea. E buokia bwa e na rikirake man kakamwarakean wakaana ao ni koroi mwaanga ake a mate. E anganna kainnanona ni kabane bwa e na maiu.

Iakobwa 5:1–3, 5; 6:1, 7

I mwiin te tai ae aki maan, arokana are e tei n okoro arei e a moanna ni mate. Ai tii tabeua n tiku mwaangana aika maiureirei. Aio are e a bon karika iai nanokawaakin te Uea. E tangiria bwa e na teimatoa ni karekei uaa aika a tamaroa.

Iakobwa 5:3, 6–8

E koroi te Uea mwaanga ake a maiureirei, ao ni katoma ma tenaan kai ake tabeua bwa e aonga ni maiu. E a manga onea mwiina ngkanne ma mwaanga aika a maiureirei man aroka ake tabeua.

Iakobwa 5:7–14

Te tai ae maan imwiina. A roko Uean te nne ni kurebe ma ana tia mwakuri n nakon te nne ni kurebe. A bon tararua raoi ana kai te Uea ake tei n okoro. A bon tararua naba raoi mwaanga ake a onoti ake a kamaenakoi nakon aroka ni kabane ake inanon te nne ni kurebe. Angiin uaa ake a raoiroi a bwebwerake. Uaa ake raraoi a bon kakukureia nanon te Uea ao Ana tia mwakuri.

Iakobwa 5:15-29, 31

Inanon tabeua te tai, aroka n tatabeua a kariki uaa aika a mwaiti. Ma ngkai ao a bane ni buakaka uaana. E nanokaawaki iai te Uea. E aki tangiria bwa e na bua Ana nne ni kurebe ke uaaia! E a tia ni mwakuri korokora ibukin maiun Arokana. E iangoia bwa tera riki ae E na karaoia. E marooro ma ana tia mwakuri ao n rineia bwa a na kataia riki.

Iakobwa 5:29–51

Ni kamaiua ana nne ni kurebe, e tua te Uea bwa a na ikotii mwaanga ake E a tia ni kanakoi man te kai are tei n okoro. E tua bwa a manga moan katomaaki riki ma te kai are tei n okoro.

Iakobwa 5:51–60

Aio bon ana kabanea n tai te Uea ni mwakuri inanon Ana nne ni kurebe. E weteiia ana taan mwakuri ake tabeman bwa a na buokia. A mwakuri ni kabane ni ikotii ao ni katomatomai mwaanga.

Iakobwa 5:61–72

A tararuai ni kabane arokaia. A tewenakoi mwaanga ake a buakaka ao ni katukui ake a raraoi. I mwiin te tai ae aki maan, arokan te Uea ake tei n okoro e a manga moan kariki uaa aika a raraoi. Aroka ake tabeua a bon kariki uaa naba aika a raraoi ai aron uaan te kai ake tei n okoro. E rangi ni kukurei te Uea. A bane ni maiu arokana! A bane ni kariki uaa are E tangiria bwa a na karekea.

Iakobwa 5:73–75

E kakaitau te Uea nakoia ana tia mwakuri. E tuangiia bwa na bon kakabwaiaaki ibukin aia mwakuri korakora ao ni kawakinan Ana tua. E tibwaa nakoia uaan te kai, ao a bon rangi ni kukurei. E namakina te kimwareirei te Uea ni uaan te kai, n te tai ae rangi n maan.

Iakobwa 5:75–77

E motika karakinan te kai ae te oriwa Iakoba. E tuangiia aomata bwa a tabeakinaki raoi iroun te Atua kangaa ai aron Uean te nne ni kurebe ngke E tararuai raoi Arokana. E tua Iakoba nakoia ni kabane bwa a na rairi nanoia ao ni katenaia ma te Atua. E reireiniia bwa a na bwaina te tangira ao ni beku ibukin te Atua ibukina bwa e teimatoa te Atua n iai nanona ni kan buokiia.

Iakobwa 6: 1–5, 7, 11