“Te Buraeki n Inaomata,” Karaki man Ana Boki Moomon (2023)
Te Buraeki n Inaomata
Kamanoan te eti n onimakina iroun te Atua
Amarakaai bon te Nibwaite ae bubura man korakora. E tangiria bwa e na uea. E berita nakoia aomata ake a buokia bwa ena anganiia te mwaaka. A mwaiti aomata aika a tangiria ao n kataia n kairiia aomata ao ana iriria. Amarakaai e kairiia aomata bwa ana karaoi bwaai aika buakaka. Ngaia ma taan iriria a tangiria n kamateia aomata ake a reiakina taekan Iesu Kristo.
Kaaben Moronaai, aia tia kairiiri ana taanga n buaka Nibwaite, e kakoauaa Iesu. E ataia bwa Nibwaite a kakabwaiaaki man kawakinan ana tua te Atua. E rangi n un iroun Amarakaai ngke e kairiia nako aomata mairoun te Atua, ni kataia n riki bwa te uea, ao ni kataia n kaikoakiia aomata.
E raeuaaka oneana Moronaai. E koroia iaona bwa aomata a riai n ururinga Atuaia, inaomataia, ao aia utu. E kabaea nakon te kai ao e aranna bwa te buraeki n inaomata. E tataro Moronaai ibukin ana kakabwaia te Atua. E kaotia nakoia Nibwaite te buraeki n inaomata ao n tuangiia bwa ana iria n buaka n kaitara Amarakaai.
Aomata a katokai otangaia ao ni biri nakon Moronaai. A tauraoi n buka ibukin te Atua ao mwengaia, aia utu, ao inaomataia. A karaoa te berita ae tabu, ke te berita ea onoti, ma te Atua bwa ana Iriiria n taainako. Ngkane a oki katauraoia n buaka ma Amarakaai.
E bubura ana taanga n buaka Moronaai. E maaku Amarakaai. E kataia n birinako ma naake a iriiria. Ma e mwaiti ibuakoia ake a raraoma bwa Amarakaai e buaka iaan bukina aika kairua. E mwaiti ae a rawa n iriiria. Ana taanga n buaka Moronaai a tauiia ake a teimatoa n iriira Amarakaai, ma Amarakaai ao tabeman riki a reke birinakoia.
Amarakaai e nakon abaia Reimwanaite. E tangiriia Reimwanaite bwa ana buokia n buakaniia Nibwaite. E tangira te taanga n buaka ae bubura man korakora riki. E kauekei nanoia Reimwanaite n un irouia Nibwaite. Aia uea Reimwanaite e tuangiia Reimwanaite bwa na katauraoi n buaka ma Nibwaite.
Te uea e tatangira Amarakaai. E karika Amarakaai bwa temanna te tia kairiri iaoia aia taanga n buaka Reimwanaite. Ma Amarakaai e tangira te mwaaka riki are iaona.
E karaoa ana kainibaire Amarakaai bwa e na tautaeka iaoia Reimwanaite. E taua taekan aia taanga n buaka Reimwanaite. Ngkanne e manga kanakoia ana toro bwa ana tiringa te uea ao n kewe bwa antai ae karaoia.
E bakaea te un Amarakaai ngke e tiringaki te uea. Reimwanaite a tatangira Amarakaai. E iein ma te ueanaine ao e riki bwa te uea ae boou. E tangiria n tautaeka iaoia naba Nibwaite. E kabuakakaia Nibwaite bwa aonga n un Reimwanaite irouia. N te tai ae e aki maan, a mwaiti Reimwanaite ake a tangiria n buaka ma ngaiia.
Ngke e karekea mwaakana Amarakaai rinanon te kewe, Moronaai e katauraoia Nibwaite bwa ana onimakina te Atua. E katioi buraeki n inaomata iaon taian taua ni kabane ni kabutaa te aba bwa ena kauringiia taekan aia berita. Ana taanga n buaka Moronaai a katauraoi naba aia kaawa ibukin te buaka. A katei ooia ao a kenii noono bwa ana kamanoi man kakorakorai aia kaawa.
Ngke a kaoti n buaka Reimwanaite, ao aikoa kona n rinnakoi aia kaawa Nibwaite. A tuukaki n te oo ma taian nono ake a katei ma ni kenii ana taanga n buaka Moronaai. A mwaiti Reimwanaite n mate ngke a buaka ma Nibwaite. E rangi n un Amarakaai. E berita bwa ena tiringa Moronaai.
Nibwaite a karabwaa te Atua ibukin buokakiia ao kawakinaia. A kamanoi riki aia kaawa ao ni katei aia kaawa riki tabeua. Te buaka ma Reimwanaite e reitinako, ma te Atua e buokiia n kamanoia Moronaai ma ana taanga n buaka. A kukurei Nibwaite. A kawakin ana tua te Atua ao a teimatoa n kakaonimaki Nakoina.