Aramwa 23–27

Kaain Aentaai-Nibwaai-Riaai

Aomata ake a rineia bwa ana tangiriia aia kairiribai

Amon n reireiniia aomata iaan te aroka

A mwaiti Reimwanaite ake a reiakina taekan te Atua mairoun Amon ma tarina. Reimwanaite aikai e korakora aia onimaki iroun te Uea ao a iriiri ana tua te Atua. A tangira araia ae boou, ngaia are a araniia bwa Aentaai-Nibwaai-Riaai ao ai tiaki Reimwanaite.

Aramwa 23:3–7, 16–17

Utu a ongora n ana reirei Amon

A bitaki Aentaai-Nibwaai-Riaai man aia onimaki iroun te Atua. A rairi nanoia man bwaai ake a buakaka ake a kakaraoi ngkoa. A ataia bwa te Atua e tangiriia ao e a tia ni kabwarai aia bure.

Aramwa 24:8–14

Aentaai-Nibwaai-Riaai a karenakoi aia bwai ni buaka nako nakon te rua

A un Reimwanaite ao a katauraoia bwa ana tiringiia Aentaai-Nibwaai-Riaai. N aki tabe ni kan uun, Aentaai-Nibwaai-Riaai a karaoa te berita ma te Atua. A taku bwa ana aki manga kaikoakiia aomata. A kaota nanoia aei, ngke a taunii aia bwai ni buaka. A rineia bwa ana tangiriia aia kairiribai ao n aki kaikoakiia ke n tiringiia.

Aramwa 24:1–19; 26:31–34

Reimwanaite aika a un a tauii aia bwai n buaka

Reimwanaite ake a aki kakoaua te Atua a tiringiia Aentaai-Nibwaai-Riaai.

Aramwa 24:20

Uoman Aentaai-Nibwaai-Riaai a katorobubua n tataro

Iai aia onimaki Aentaai-Nibwaai-Riaai bwa ngkana a mate, ana maeka ma te Atua. A kawakina aia berita ma te Atua ao n aki un ma Reimwanaite.

Aramwa 24:16, 21

E toki aia tiritiri Reimwanaite

N aki tabe ma te un, a tataro taian Aentaai-Nibwaai-Riaai. Ngke a nora aio Reimwanaite, e mwaiti buakoia ae e aki tiritiri. A nanokaawaki ngke a tiringiia aomata. Reimwanaite aikai a rineia bwa ana aki manga kaikoakiia aomata. A raoniia Aentaai-Nibwaai-Riaai.

Aramwa 24:21–27; 25:13–16

Amon ma Aentaai-Nibwaai-Riaai a mwananga

N aia tai ni mwananga, ao a bon mwaiti aomata ake a kaaitaraia. Amon ma tarina a nanokawaki n korakaia Aentaai-Nibwaai-Riaai. A butiia te uea bwa ena kairiianako ana botanaomata bwa ana maeka ma Nibwaite. E taku te uea bwa ana nako ngkana e tangiriia te Uea bwa ana nako. E tataro Amon. E taku te Uea bwa ana nako ao E na kawakiniia.

Aramwa 27:2–15

Nibwaite a butimwaiia Aentaai-Nibwaai-Riaai

Nibwaite anganiia Aentaai-Nibwaai-Riaai abaia bwa ana maeka iai ao a kamanoia. N kabooan miin anne, Aentaai-Nibwaai-Riaai a anga te amwarake nakoia Nibwaite. Taian Aentaai-Nibwaai-Riaai e korakora aia onimaki ao a tangira te Atua. A kokoaua nakoia aomata ao a kawakin aia berita bwa ana aki manga un. A kakaonimaki inanon maiuiia.

Aramwa 27:20–30