1 Nibwaai 4–5

Nibwaai ma Bwaatua aika Buraati

Reiakinna n Iriira te Tamnei

Reimwan, Remuera, Taam, ao Nibwaai a mwananga n oki nako Ierutarem n te tairaki. E nako Nibwaai n ana auti Raban ao a karabaiia tarina itinanikun te kaawa.

1 Nibwaai 4:4–5

E kariaia te tamnei Nibwaai bwa e na kairia. E aki ataa te bwai ae na karaoia, ma e ataia bwa e na buokaki iroun te Uea ni karekei bwaatua buraati.

1 Nibwaai 4:6

Ngke e a uakaan Nibwaai ma ana auti Raban, e a noora Raban ni wene i aon tano. E koronimanging Raban. Nibwaai e noora ana kabaang Raban ao e anaia.

1 Nibwaai 4:7–9

Ngke tabe Nibwaai n taraa te kabaang, e roko bwanaan te Tamnei bwa e na tiringa Raban. Ma e rawa Nibwaai ni kan tiringnga. E tuangaki Nibwaai iroun te Tamnei bwa e raoiroi ae e na mate Raban nakon ae e na aki reke koroboki aika tabu irouia ana utu Nibwaai. A kainanoa ana tua te Atua ake a koreaki iaon bwaatua buraati.

1 Nibwaai 4:10–11, 13–17

E ataia Nibwaai bwa Raban e a tia ni kataia n tiringnga. E a tia naba Raban ni kimoai aia bwai ao n aki ongeaba nakon ana tua te Atua.

1 Nibwaai 4:11

E a manga tuangaki riki kaua Nibwaai iroun te Tamnei bwa e na tiringa Raban. E ataia Nibwaai bwa e katauraoa te kawai nakoina te Uea ni karekei bwaatua buraati. E rineia bwa e na ongeaba nakon te Tamnei. Nibwaai e tiringa Raban ao ni karina i aona ana kunnikai Raban.

1 Nibwaai 4:12–13, 17–19

Imwiina Nibwaai e nakon ana tabo ni kaawakin mwane Raban ao ni kaitibo ma ana toro Raban ae Tioram. Nibwaai e karikia ao n taetae n ai aron bwanaan Raban.

1 Nibwaai 4:20–23, 35

Nibwaai e tuanga Tioram bwa e na anai bwaatua buraati. I mwiina ao e tua Nibwaai nakon Tioram bwa e na iria. Tioram e taku bwa Nibwaai bon Raban, ngaia are e karaoa te bwai are taekinna Nibwaai.

1 Nibwaai 4:24–26

Ngke a otinako man te kaawa Nibwaai ao Tioram, Reimwan, Remuera, ao Taam a taku n aia iango bwa Nibwaai bon Raban. A maaku ao a nang moana birinakoia.

1 Nibwaai 4:28

E weteia tarina Nibwaai. Ngke a ataia bwa bon Nibwaai, ao a tei. Ma e rootaki n te maaku Tioram ao ni kataia n oki nako Ierutarem.

1 Nibwaai 4:29–30

E tuangaki Tioram iroun Nibwaai bwa e na aki nako. E tuanga Tioram bwa e tua te Uea nakoia bwa a na anai bwaatua buraati. E kaoa Tioram bwa e na airi ma ngaiia nakon te aba ni berita. E ataia Tioram bwa e nang riki bwa te aomata ae inaomata, n aki tautoronaki, ao ni motikia bwa e na iri ma Nibwaai ao ana utu.

1 Nibwaai 4:31–37

A mwananga n oki nakoia Riaai ao Tiera. A rangi n kukurei Riaai ao Tiera n nooria natiia mwaane. E taku Tiera n ana iango bwa a tia ni mate natina mwaane aikai. Ibukina bwa a kawakinaki raoi natina mwaane iroun te Uea, e kakoaua raoi ngkai bwa ana utu a bon tuangaki bwa a na kitana Ierutarem. A anga aia karea ae kabuekaki ana utu Riaai ao Tiera ni kaota aia kakaitau nakon te Uea.

1 Nibwaai 4:38; 5:1–9

E wareware ni bwaatua aika buraati Riaai. E nooria bwa iai aia reirei burabeti inanon te bwaatua aio. E reiakinna naba bwa Iotebwa bon temanna naba ana bakatibu, are kabonakoaki nako Aikubita irouia tarina n taai aika a bwakanako. E ataia Riaai bwa a rangi ni kakawaki bwaatua buraati. E ataia bwa e tangiria te Uea bwa a na karekei tua kain ana utu.

1 Nibwaai 5:10–22