Bwaai ni Kabane a Kaotia bwa Iai te Atua (Aramwa ao Korioa), iroun Walter Rane

Tuurai 15–21: “Tamaroan Ana Taeka te Atua”

Aramwa 30–31

Te rongorongo n Aramwa 30–31 e kamatataa raoi mwaakan taian taeka—ibukin te buakaka ao ibukin te raoiroi. Te “taeka ni kababa” ao “korakoran ana kauntaeka” te tia reirei ae kewe ae arana Korioa e kakamaaku bwa e na uoti “tamnei aika mwaiti nakon te kamateaki” (Aramwa 30:31, 47). N aron naba aei, ana reirei te tia birinako ae te Nibwaite ae arana Tioram e kairiia aomata ni kabane bwa a na bwaka “nakon bure aika korakora” ao ni “kabwaouai kawain te Uea” (Aramwa 31:9, 11).

Ni kaitarana, iai ana onimaki Aramwa ae matoatoa are ana taeka te Atua “bon iai korakoran riki korakorana iaon aia iango aomata nakon te kabaang, ke te bwai riki teuana” (Aramwa 31:5). Ana taeka Aramwa e kamatataa te koaua ae akea tokina ao ni wetea mwaakan karawa bwa e na kaina wiin Korioa (taraa Aramwa 30:39–50), ao a kaoa ana kakabwaia karawa iaoia naake a nako ma ngaia ni uotiia rikaaki Tioramwaite nakon te koaua (taraa Aramwa 31:31–38). Aikai katooto aika a kakawaki ibukiia taan ririmwiin Kristo ngkai a bati rongorongo aika a kaairua. Ti kona ni kunea te koaua man kakoauaan, n aron ae karaoia Aramwa, “tamaroan ana taeka te Atua” (Aramwa 31:5).

Iango ibukin Reiakinana n te Mweenga ao n te Taromauri

Aranwa 30:6–31

Teuare e buakaka e kataia ni mwamwanaai ma reirei aika a kewe.

N Aramwa 30, Korioa e aranaki bwa te “Tia Kakewea-Kristo.” (te kibu 6). Te anti-Kristo bon temanna ke te bwai teuana ae kai ootara ke ni kakaitara n ae karaba nakon Iesu Kristo ao Ana euangkerio. Kiibu raa n Aramwa 30:6–31 ae a kaotia bwa e kaeineti te kabwarabwara aei nakon Korioa? Kamatebwaia ana reirei ni kewe Korioa e kona ni buokiko ni kinai ao n totokoi reirei ae aekakin akanne. Karaoan waaki aikai a kona ni ibuobuoki n am kamatebwai:

• Tera bwaai n reirei ae ko kona ni iangoia ae e na kaotako riki n te kaokoro i marenan ana reirei te tia Kamaiu ao ana waaki ni katooto Tatan aika a kewe? Tabeua katooto bon bwaai ni kabaru ibukin te akawa, te mwaane ae tiaki raoi te mwane, ao katanoata ni kewe. Kona kanga n ataia ngkana te bwai teuana tiaki te koaua? Ko na kanga ni kinaa te koaua?

• Iangoia ni korei ni karinani reirei aika kewe aika e reirei Korioa n Aramwa 30:6–31. Baikara mai buakon ana anga reirei aika a kamwamwane ni boong aikai? (taraa Aramwa 30:12–18, 23–28). Tera kabuanibwai ae a konaa n riki man butimwaean koaua n aron aikai? Tera rongorongo ni kewe ae kabongana teuare e buakaka ni kamwaneko ni boong aikai?

• Tera ae e a tia ni karaoia Aramwa ni kaaitarai ana reirei Korioa ma te koaua? (taraa Aramwa 30:31–54). Ko na kanga ni kabonganai moan tuaa aika ai aron aikai ni maium?

N ai aron Aramwa, a buokira burabeti ao abotoro ni boong aikai n ataa te kaokoro i marenan te koaua ao ana kewe Tatan. Tera reirei ae ko kunea i nanon rongorongo aikai: Gary E. Stevenson, “Deceive Me Not” (Riaona, Nobembwa 2019, 00–00); Dallin H. Oaks “Be Not Deceived” (Riaona, Nobembwa 2004, 00).

Taraa naba Gospel Topics, “Seek Truth and Avoid Deception,” Gospel Library; “Oh Say, What Is Truth?,” Anene n Taromauri, nambwa. 272.

Korioa e Kaewenakoa Aramwa, iroun Robert T. Barrett

Aramwa 30:39–46

Bwaai ni kabane a kaota koauan te Atua.

Angiina aomata n te bong aei a kakoaua bwa akea te Atua. Tera ae ko kunea ni Aramwa 30:39–46 ae e buokiko n ataia bwa bon iai te Atua? Tera ae totokoira man ataakin Atuara? Tera koaua riki tabeua ae e a tia n anganiko te Atua bwa E bon maiu?

Aramwa 30:56–60

Teuare e buakaka e aki boutokia taan iriiria.

Tera ae ko reiakinna man Aramwa 30:56–60 bwa e kanga aron te riaboro nakoia ana taan iriiria? Tera ae ko kona ni karaoia ni kamanoa mweengam man ana kairoro?

Taraa naba Aramwa 36:3.

Aramwa 31

Iai mwaakan ana taeka te Atua ni kairiia aomata nakon te raoiroi.

Aia kaangaanga Tioramwaite ni kaokoroaki mairouia Nibwaite e na bae n taraaki irouia tabeman bwa e kainnanoa katokana man te tautaeka ke te taanga ni buaka (taraa Aramwa 31:1–4). Ma e a tia Aramwa n ataia bwa e na onimakina “tamaroan ana taeka te Atua” (Aramwa 31:5). Tera ae ko reiakinna man Aramwa 31:5 ibukin mwaakan ana taeka te Atua? (taraa naba Ebera 4:12; 1 Nibwaai 15:23–24; 2 Nibwaai 31:20; Iakobo 2:8; Ereman 3:29–30).

Ngkai ko kamatebwaia Aramwa 31, tera koaua tabeua man te euangkerio ae ko konaa ni kunea ae kaineti nakon baika a riki ni maium? Ibukin te katooto:

• Ko a tia n noora ana taeka te Atua ae kairiia aomata ni karaoan bwaai aika a raoiroi? (taraa kiibu 5).

• Kabotaua anuan maiun Aramwa, ana namakin, ao ana mwakuri ma ake tabeman (taraa kiibu 34–35) n aroia Tioromwaite (taraa kiibu 17–28). Ko na kanga n riki kanga ai aron Aramwa?

• Tera ae a kunea n Aramwa 31:30–38 are e kona ni buokiia aomata ake a rawawata ibukin aia bure tabeman?

Aramwa 31:5–6

Ibukin Iesu Kristo, aomata ni kabane a kona ni bitaki.

Noriia kurubu n aomata ake e kairiia Aramwa ma ngaia n nako n reirei te euangkerio nakoia Tioramwaite (taraa Aramwa 31:6). Tera ae ko reiakinna ibukin maiuia aomata aikai n Motiaea 27:8–37; 28:4; Aramwa 10:1–6; 11:21–25; 15:3–12. Tera rongorongo ae na konaa n reke ibukim n aia taneiai?

Ibukin iango riki tabeua, taraa te beeba ni kaongora n te namwakain aio n te Liahona ao Ibukin Kakorakoraia Kairake maekatiin.

Iango ibukin Reiakinaia Ataei

Aramwa 30

Ana Boki Moomon e kauringai ni kaitarai reirei aika kairua.

• Iangoia ni kaoti tabeua bwaai (n aron te mwane ke te amwarake) ao katotongan bwaai aikai ake bwaai n takakaro. Aei e kona ni karekea te marooro ibukin ataakin te kaokoro imareman bwaai aika a bon koaua ao bwaai aika akea koauaia. Imwiina ko kona ni buokia am ataei ni kunea man Aramwa 30:12–18 taian kewe ke reirei aika kairua ake e reirei Korioa ibukin te Atua. N Aramwa 30:32–35, e kanga Aramwa ni kaeka nakon keewe akanne? Tera ae ti reiakinna man ana banna ni katooto?

Aramwa 30:44

Bwaai ni kabane a kakoaua te Atua.

• E taekini taekan bwain karawa ao bwain aonteaba are a kakoauaa bwa e maiu te Atua. Ngkana e riai, nakonako i tinaniku ma am ataei ke teei n te wintoo ngkana kam wareka Aramwa 30:44. Tuangiia bwa a na kotei bwaai ake a nooria bwa e buokiia n ataia bwa bon iai te Atua ao bwa E tangiriia. A kona naba ni korei taamnei bwaai ake a kunei (tara iteranibaan te bwai ae e na karaoaki n te wiiki aei).

• Inanon am tai n anenea ma natimi “My Heavenly Father Loves Me” (Aia Boki n Anene Ataei, 228–29), kabuta te booro ke te bwai teuana imarenami. Katoka te katangitang ao tuanga te ataei are e taua te booro bwa e na tibwaa teuana te bwai ae karikia Tamara are i Karawa ae e karabwarabwa iai teuanne ke neienne.

Ataei a karekea te reirei rinanon bwaai ake a nooraki. Bwaai ake a nooraki a na buokia ami ataei n oota riki ao n ururingnga n te tai ae maan bwaai ake a tia n reiakinaki. Angiin waaki ni kakukurei ibukia ataei ae kaotaki ikai e tangira kabonganaan bwaai aika a na matakuakinaki. Bairea kaotaan bwaai ake a na manga nooraki riki n taai aika a na roko ni buokia ami ataei n uringii ake a tia n reiakinna.

Aramwa 31:5

Ana taeka te Atua e korakora.

• Ko na kangaa ni buokia am ataei bwa a na ota bwa ana taeka te Atua e korakora riki mwaakana nakon “bwaai riki tabeua”? (Aramwa 31:5). Titirakiniia bwa a na iangoa te bwai teuana ke te aomata ae korakora, ke kaoti tamnein tabeua bwaai aika korakora. Tera ae kariia bwa a na korakora? Bootaki ni wareka Aramwa 31:5 ao titirakinia ataei bwa tera ae irouia nanon te kibu aei. Tibwa te bwai ae ko a tia n rinanona ngke ana taeka te Atua e korakora mwaakana iaom.

Aramwa 31:8–35

Tamara are i Karawa e ongo au tataro.

• Kakimototoa karakinan Aramwa ao taian Tioromwaite, man kiibu man Aramwa 31:8–35 (taraa naba “Mwakoro 28: Tioromwaite ao Ramantam,” Book of Mormon Stories, 78–80). Buokiia ataei bwa a kinai bwaai ake a taekin Tioromwaite n aia tataro (taraa Aramwa 31:15–18) ngke a buokiko ni katea te taua ae te Ramantam man taian buraoki ke atibu. Kamatata bwa tiaki aio aron te tataro. Ngkai kam marooro ma natimi bwa ti na kanga n tataro, tuangia bwa ana kamwawaa te buraoki ke atiibu teuana mwiin teuana. Tao a kona ni kawakina taian atiibu irarikin aia kainiwene bwa te kauring bwa a na tataro ni katoa ingabong ao n tairiki. A na bae ni kukurei ni katamaroa aia atiibu.

Ibukin iango riki tabeua, taraa te beeba ni kaongora n te namwakaina aio n te Te Rao maekatiin.

Nanoia tenaan Tioramwaite “a tabekaki rake n te kamoamoa ae korakora, ibukin aia kainikatonga” (Aramwa 31:25).