Silalawag nga ipakita dagiti pakaammuan iti Alma 30–31 ti bileg dagiti balikas—para iti dakes ken para iti nasayaat. Dagiti “makapatiray-ok” ken “sipapanakkel a balikas” ti palso a mannursuro nga agnagan iti Korihor ket nangbutbuteng a “pukawen[na] ti adu a kararua” (Alma 30:31, 47). Maipada, dagiti pannursuro ti maysa a simmina a Nephite nga agnagan iti Zoram ket nagbanag iti pannakatnag ti sibubukel a grupo ti tattao “iti dakkel a biddut” ken “binarusngida dagiti wagas ti Apo” (Alma 31:9, 11).
Iti kasupadina, addaan iti di maisin a pammati ni Alma a ti balikas ti Dios ket “nabilbileg nga amang ti ibungana iti panunot dagiti tao ngem iti espada, wenno ania man a banag” (Alma 31:5). Impeksa dagiti balikas ni Alma ti agnanayon a kinapudno ket nangala kadagiti bileg ni Jesucristo a nangpaulimek ken ni Korihor (kitaen iti Alma 30:39–50), ket inyawisda ti bendisionna kadagiti kimmuyog kenkuana a mangisubli kadagiti Zoramite iti kinapudno (kitaen iti Alma 31:31–38). Dagitoy ti napateg a pagwadan para kadagiti pasurot ni Cristo ita no gagangay dagiti ulbod a mensahe. Ngem masarakantayo ti kinapudno babaen iti panagtalek, kas iti inaramid ni Alma, “iti saguday ti balikas ti Dios” (Alma 31:50.
Dagiti Kapanunotan iti Panagsursuro iti Pagtaengan ken iti Simbaan
Padasen ti kabusor a mangallilaw kaniak kadagiti palso a doktrina.
Iti Alma 30, maawagan ni Korihor iti “Anti-Cristo” (bersikulo 6). Ti anti-Cristo ket siasino man wenno ania man a sipapanayag wenno nalimed a sumupsupiat ken ni Jesucristo ken ti ebangheliona. Ania kadagiti bersikulo iti Alma 30:6–31 ti mangipakita a maibagay ken ni Korihor daytoy a pannakailadawan? Ti panagadal kadagiti palso a pannursuro ni Korihor ti makatulong kenka a mangbigbig ken mangsupring kadagiti maipada a pannursuro. Dagiti sumaganad nga aktibidad ti mabalin a makatulong iti panagadalmo:
Ania dagiti banag nga adalen a mabalinmo a panunoten tapno ad-adda a maawatan ti nagdumaan dagiti pannursuro ti Mangisalakan ken dagiti ulbod a panangtulad ni Satanas? Dagiti sumagmamano a pagarigan ti pangallukoy a mausar iti panagkalap, peke a kuarta, ken ulbod a panag-advertise. Kasano a maibagam no peke ti maysa a banag? Kasano a mabigbigmo ti kinapudno?
Ibilangmo ti panagaramid iti maysa a listaan dagiti palso a doktrina nga insuro ni Korihor iti Alma 30:6–31. Ania kadagiti pannursurona ti makaguyugoy iti agdama? (kitaen iti Alma 30:12–18, 23–28). Ania a pagdaksan ti mabalin nga ibunga ti panangawat iti kakasta a kapanunotan? Ania dagiti palso a mensahe nga us-usaren ti kabusor tapno padasennaka nga allilawen ita?
Ania ti inaramid ni Alma a mangsuppiat kadagiti pannursuro ni Korihor iti kinapudno? (kitaen iti Alma 30:31–54). Kasano a mausarmo dagitoy met laeng a pagbatayan iti biagmo?
Kas ken ni Alma, tulongannatayo dagiti moderno a propeta ken apostol a mangammo iti pagdumaan ti kinapudno ken dagiti kinaulbod ni Satanas. Ania a balakad ti masarakam kadagitoy a mensahe: Gary E. Stevenson, “Deceive Me Not” (Liahona, Nob. 2019, 00–00); Dallin H. Oaks “Be Not Deceived” (Liahona, Nob. 2004, 00).
Kitaen met iti Gospel Topics, “Seek Truth and Avoid Deception,” Gospel Library; “Oh Say, What Is Truth?,” Hymns, no. 272.
Mamati ti adu a tao ita nga awan ti Dios. Ania ti masarakam iti Alma 30:39–46 a mangtulong a mangipakaammo kenka a pudno ti Dios? Ania ti manglapped kadatayo a mangam-ammo Kenkuana? Ania dagiti dadduma pay a pammaneknek nga inted ti Dios kenka nga isu ket sibibiag?
Ania ti masursurom manipud iti Alma 30:56–60 maipapan iti no kasano a tratuen ti sairo dagiti pasurotna? Ania ti maaramidam a mangsaluad iti pagtaengam a maibusor iti impluensiana?
Adda bileg ti balikas ti Dios a mangiturong kadagiti tao iti kinalinteg.
Ti parikut dagiti Zoramite a maisina manipud kadagiti Nephite ket mabalin nga iti dadduma kasla agkasapulan daytoy iti maysa a pangrisut iti politika wenno militar (kitaen iti Alma 31:1–4). Ngem nasursuro ni Alma ti agtalek “iti saguday ti balikas ti Dios” (Alma 31:5). Ania ti masursurom manipud iti Alma 31:5 maipapan iti bileg ti balikas ti Dios? (Kitaen met iti Hebreo 4:12; 1 Nephi 15:23–24; 2 Nephi 31:20; Jacob 2:8; Helaman 3:29–30).
Bayat ti panangbasam iti Alma 31, ania dagiti dadduma pay a kinapudno ti ebanghelio a masarakam a mayaplikar kadagiti padasmo iti biag? Kas pagarigan:
Kasano a nakitamon nga iturong ti balikas ti Dios “dagiti tao nga agaramid kadagiti nasayaat a banag? (kitaen iti bersikulo 5).
Idiligyo dagiti kababalin, rikna, ken tignay ni Alma maipanggep kadagiti dadduma (kitaen dagiti bersikulo 34–35) kadagiti Zoramite (kitaen dagiti bersikulo 17–28). Kasano a makapagbalinka nga ad-adda a kas ken ni Alma?
Ania ti masarakam iti Alma 31:30–38 a makatulong kadagiti tao nga agladladingit iti basbasol dagiti dadduma?
Gapu ken ni Jesucristo, makapagbalbaliw ti asino man.
Kitaen ti grupo dagiti tao nga inkuyog ni Alma tapno isurona ti ebanghelio kadagiti Zoramite (kitaen iti Alma 31:6). Ania ti masursurom maipapan iti biag dagitoy a tao iti Mosiah 27:8–37; 28:4; Alma 10:1–6; 11:21–25; 15:3–12. Ania ti mensahe a mabalin nga adda para kadakayo iti padpadasda?
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Ballaagannak ti Libro ni Mormon a maibusor kadagiti ulbod a pannursuro.
Ibilang ti panangi-display iti sumagmamano a banag (kas iti kuarta wenno taraon) ken dagiti ay-ayam a kapada dagitoy a banag. Makaiturong daytoy iti panaglilinnawag maipapan no kasano a maammuan ti nagdumaan dagiti banag a pudno ken dagiti banag a palso. Kalpasanna, mabalinmo a tulongan dagiti annakmo a mangilasin manipud iti Alma 30:12–18 dagiti ulbod ken palso a pannursuro nga insuro ni Korihor maipapan iti Dios. Iti Alma 30:32–35, kasano a nagresponde ni Alma kadagita nga inuulbod? Ania ti masursurotayo manipud iti pagwadanna?
Insarita ni Alma maipapan iti no kasano a paneknekan dagiti banag nga adda iti tangatang ken iti daga a sibibiag ti Dios. No mabalin, magna iti ruar a kaduam dagiti annakmo wenno tumakder iti abay ti maysa a tawa bayat ti panangbasam iti Alma 30:44. Kiddawem kadakuada a mangitudo kadagiti banag a makitada a makatulong kadakuada a mangammo a pudno ti Dios ken ay-ayatenna ida. Mabalinda met ti agdrowing kadagiti ladawan dagiti banag a matakuatanda (kitaen iti panid ti aktibidad daytoy a lawas).
Bayat nga agkankantakayo ken dagiti annakyo iti “My Heavenly Father Loves Me” (Children’s Songbook, 228–29), mangipasa iti maysa a bola wenno sabali a banag. Sagpaminsan nga isardeng ti musika ket kiddawem iti ubing a mangiggem iti banag a mangibinglay iti maysa a banag a pinarsua ti Nailangitan nga Ama a pagyamananna.
Agsursuro dagiti ubbing babaen kadagiti bisual. Makatulong dagiti bisual kadagiti annakmo a makaawat a nasaysayaat ken napapaut a manglagip iti no ania ti naisuro kadakuada. Kaaduan kadagiti aktibidad para kadagiti ubbing iti daytoy a balabala ket mangisingasing kadagiti bisual nga usaren. Ibilang ti panangipakita manen kadagiti isu met laeng a bisual iti masakbayan tapno matulongan dagiti annakyo a manglagip kadagiti nasursuroda.
Kasano a matulonganyo dagiti annakyo a makaawat a nabilbileg ti balikas ti Dios ngem iti “ania man a banag”. Alma 31:5 Ibilang ti panangidawat kadakuada a mangpanunot iti maysa a banag wenno maysa a nabileg a tao, wenno mangipakita kadagiti ladawan ti sumagmamano a nabileg a banag. Ania ti mangpabileg kadagitoy? Basaen ti Alma 31:5 nga aggigiddan, ken saludsodenyo kadagiti annakyo no ania iti panagkunada ti kaipapanan daytoy a bersikulo. Ibinglay ti maysa a padas idi adda nabileg nga impluensia kadakayo ti balikas ti Dios.
Irebyu biit ti estoria ni Alma ken dagiti Zoramite, nga us-usarenyo dagiti bersikulo manipud iti Mosiah 31:8–35 (kitaen met iti “Kapitulo 28: Dagiti Zoramite ken ti Rameumptom,” Dagiti Estoria iti Libro ni Mormon, 78–80). Tulonganyo dagiti annakyo a mangilasin kadagiti banag nga insawang dagiti Zoramite iti kararagda (kitaen iti Alma 31:15–18) bayat ti panangtulongda kenka a mangipatakder iti torre ti Rameumptom nga usaren dagiti bloke wenno bato. Ilawlawag a saan a kastoy ti nasken a panagkararagtayo. Bayat ti panagsaritayo ken dagiti annakyo no kasano ti rumbeng a panagkararagtayo, bay-anyo nga ikkatenda a saggaysa dagiti bloke wenno bato. Nalabit a mabalinda nga idulin ti maysa kadagiti bato iti abay ti pagiddaanda kas palagip nga agkararagda iti tunggal bigat ken rabii Mabalin a magustuanda pay nga arkosan ti batoda.
Para iti ad-adu pay a kapanunotan, kitaen ti isyu ti magasin a Friend iti daytoy a bulan.
Ladawan
Zoramite nga agkarkararag iti rabaw ti Rameumptom
Dagiti Zoramite ket “naital-o ti puspusoda iti nalabes a kinapalangguad, iti kinatangsitda” (Alma 31:25).