Choq’ re li osob’tesink re li ach’ab’aak, xb’aan laj Scott M. Snow

12–18 agosto: “Xaqxo chi kaw sa’ xpaab’ankil li Kristo”

Alma 43–52

Naq naqileb’ li aatin a’in sa’ xtiklajik Alma ch’ol 43—“Ut anajwan ninsutq’i sa’ li esil chirixeb’ li pleet ke’wan wi’ laj Nefita rik’ineb’ laj Lamanita”—naru naqapatz’ k’a’ut naq laj Mormon kixtz’iib’a resileb’ li pleet naq b’ab’ay ajwi’ li na’ajej chiruheb’ li perel ch’iich’ (chi’ilmanq Raatin laj Mormon 1:5). Yaal naq wankeb’ naab’al li pleet sa’ roso’jikeb’ li kutan a’in, a’ut nim wi’chik xloq’al li raatin chiru ka’ajwi’ xch’olob’ankil chan ru ki’uxman li pleetik ut xch’olob’ankil resil li rahilal nak’ulman xb’aan li pleetik. Li raatin nokoxkawresi ajwi’ choq’ re li pleet wulaj wulaj rik’in li maa’usilal, li “b’oqb’ilo chixpleetinkil” (Eb’ li B’ich, 250). Yaal ut naq yoo li pleet a’in, ut wanq xtoch’om rik’in li qajunelik yu’am. Jo’eb’ laj Nefita, musiq’anb’ilo xb’aan jun li santil na’leb’—“li qaDios, li qapaab’aal, ut li ach’ab’aak wanko wi’, ut li qatuqtuukilal, li qixaqil, ut li qakok’al”—a’an “lix na’leb’eb’ laj Kristiano” chan laj Moroni (Alma 46:12, 16).

Li na’leb’ re tzolok sa’ li ochoch ut sa’ li iglees

Alma 43–52

Li Jesukristo naru nikinixtenq’a rik’in lin musiq’ejil pleet.

Naq yooqat chirilb’al Alma 43–52, k’e reetal li ke’xb’aanu laj Nefita li kixk’eheb’ chi q’axok-u (malaj chi q’axe’k-u). Chirix a’an, k’oxla chan ru naru nakawoksi li xatzol re aatenq’ankil chixq’axb’aleb’ ru li musiq’ejil pleet wankat wi’. Tz’iib’aheb’ laa k’oxlahom arin:

• Alma 43:19: Eb’ laj Nefita kawresinb’ileb’ rik’in kolb’a-ib’ aq’ej. (Laa’in naru tinyal inq’e chixkawresinkil wib’ rik’in li musiq’ejil kolb’a-ib’ aq’ej.)

• Alma 43:23–24: Neke’xsik’ lix b’eresihom li profeet.

• Alma 44:1–4:

• Alma 45:1:

• Alma 46:11–20:

• Alma 48:7–9:

• Alma 49:3, 12–14:

Jo’kan ajwi’, k’e reetal li naru nakatzol rik’in lix yalb’aleb’ xq’e li xik’ neke’ilok reheb’ laj Nefita. K’oxla chan ru naq laj Satanas maare tixyal aapleetinkil jo’ chanruheb’ a’an:

• Alma 43:8: Laj Tzerahemnah kixsik’ xjosq’ob’resinkil lix tenamit re naq taawanq xwankil sa’ xb’eeneb’. (Laj Satanas tixyal waalenkil chi josq’o’k.)

• Alma 43:29:

• Alma 46:10:

• Alma 47:10–19:

Chi’ilmanq ajwi’ Russell M. Nelson, “Xk’ulb’al li k’a’ru chalel rik’in paa’b’aal,” Jolomil ch’utub’aj-ib’ re octubre 2020; “Kawil ochoch a’an li Dios,” Eb’ li B’ich, 34.

Li xMinerva K. Teichert (1888–1976), Jun pleet re xkolb’al rix jun tenamit aj Nefita, 1949–1951, óleo en masonite, 36 × 48 pulgadas. Museo de Arte, Universidad de Brigham Young, 1969.

Alma 46:11–28; 48:7–17

“Xaqxo chi kaw sa’ xpaab’ankil li Kristo.”

Ma nakawaj xka’ch’inob’resinkil lix wankil laj tza sa’ laa yu’am? Jun na’leb’ re xb’aanunkil a’in, a’an naq taab’aanu li yeeb’il sa’ Alma 48:17 re naq tat-ok “jo’ chanchan laj Moroni.” Naru nakatz’iib’aheb’ li aatin li neke’xch’olob’ ani laj Moroni naq yooqat chirilb’al Alma 46:11–28; 48:7–17. K’a’ru nakatzol rik’in laj Moroni chirix “xaqliik chi kaw sa’ xpaab’ankil li Kristo”? (Alma 46:27).

Naru ajwi’ nakatzol chan ru laj Moroni kixmusiq’aheb’ li tenamit sa’ “lix na’leb’eb’ laj Kristiano” (chi’ilmanq Alma 46:11–22). Chan ru taachʼolobʼ raj li naʼlebʼ aʼan? K’a’ru naru nakab’aanu re tzʼaqonk saʼ li naʼlebʼ aʼan? Chan ru naru nakamusiqʼahebʼ laa was wiitzʼin chi tzʼaqonk ajwiʼ?

Re xmusiq’ankileb’ li ras riitz’in, laj Moroni kixyiib’ li eetalil re ach’ab’aak, li kixka’jultika li na’leb’ re xmusiq’ankileb’ laj Nefita (chi’ilmanq li raqal 12). K’a’ruheb’ li na’leb’ neke’xka’jultika laj jolominel re li Iglees sa’ li qakutankil? Naru nakataweb’ sa’ Choq’ re Xkawilaleb’ li Saaj:Jun tenq’ re xsik’b’al ru laa b’e (hu, 2022), “Li Junkab’al: Jun Jek’inb’il Aatin choq’ re li Ruchich’och’,” li ch’ol aatin choq’ reheb’ li Saaj Ixq ut choq’ reheb’ li molam re li Tijonelil re Aaron, malaj sa’eb’ li aatin re li jolomil ch’utub’aj-ib’. Naru nakak’os ru lix k’utumeb’ sa’ kok’ ch’ol aatin re xyiib’ankil jun eetalil re ach’ab’aak—jun eetalil li tixjultika aawe naq tatkanaaq rik’in li Kolonel ut lix evangelio.

Chi’ilmanq ajwi’ Temas del Evangelio, “Fe en Jesucristo,” Biblioteca del Evangelio.

Alma 47

Laj Satanas nokoraale ut nokoxb’alaq’i chi b’ayatq.

Laj Satanas naxnaw naq maare ink’a’ taab’aanu li ninqi maak ut ink’a’ taapaab’ li ninqi tik’ti’. Jo’kan ut naq naroksi li kok’ tik’ti’ ut aaleek—jo’ k’ihal naxk’oxla naq taak’ulub’a—re aajalb’ehinkil chiru lix kolb’al li tiikil wank.

K’e reetal li na’leb’ a’an sa’ Alma 47 ut k’oxla chan ru naq laj Satanas naxyal xq’e aab’alaq’inkil. K’oxla li na’leb’ kixye li Elder Robert D. Hales:

“Laj Amalikiah kirelaji laj Lehonti chi “kub’eek chiroq li tzuul” re aatinak rik’in sa’ li ru taq’a. A’b’an, naq laj Lehonti ki’el chaq chi tzuul, kik’ehe’ re li b’an nakamsin “chi timil” roj reetal naq kikam, ut lix teep aj pleet kit’ane’ sa’ ruq’ laj Amalikiah (chi’ilmanq Alma 47). Rik’in li wech’ok-ib’ ut li jitok, wankeb’ li kristiaan li nokorelaji chi elk chaq chi tzuul. Aran chi tzuul wan li saqen. … A’an li kolb’a-ib’ na’ajej” (“Valor cristiano: El precio del discipulado},” Liahona, noviembre 2008, 74).

K’a’ru nakatzol sa’ li video “La tentación se desvanece al buscar a Cristo en todo pensamiento” (Biblioteca del Evangelio) li nakatxtenq’a chixtz’eqtaanankil li aaleek?

Chi’ilmanq ajwi’ Nehemias 6:3; 2 Nefi 26:22; 28:21–22.

Alma 50–51

Li junajil naxk’am chaq li kolok-ib’.

Us ta ke’wan xkolb’a-ib’ aq’ ut xkawil na’aj laj Nefita, eb’ laj Lamanita ke’xchap naab’al reheb’ lix tenamiteb’ (chi’ilmanq Alma 51:26–27). Chan ru naq kik’ulman a’an? Sik’ xsumenkil a’an naq nakawileb’ li ch’ol a’in (chi’ilmanq Alma 51:1–12). K’oxlaheb’ li tijom choq’ re laa junkab’al li maare wankeb’ sa’ li ch’ol a’in.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Alma 43:17–21; 48:7–8; 49:1–5; 50:1–6

Naru nintaw xkolb’al wix sa’ musiq’ej sa’ lix evangelio li Jesukristo.

• Naru nakawoksi “Ch’ol 31: Laj Moroni aj taqlanel naxq’ax ru laj Tzerahemnah” (Eb’ li Esilal sa’ lix Hu laj Mormon, 85–88) re xseraq’inkil chiruheb’ laa kok’al li pleet ke’wan wi’ laj Nefita ut laj Lamanita. Naq nakawil resil lix kolb’a-ib’ aq’ laj Nefita sa’ Alma 43:19, naru nakajuntaq’eeta li kolb’a-ib’ aq’ej li naxkol rix li qatib’el rik’in li k’a’aq re ru naxk’e li Dios re xkolb’al rix li qamusiq’. Naru nekeyiib’ xjalam-uuch jun li ch’ina al ut teetiq jun xcha’al li kolb’a-ib’ aq’ej chiru li jalam-uuch rajlal sut naq lee kok’al neke’xye jun k’a’aq re ru naxkol qix sa’ musiq’ej.

• Eb’ li raqal a’in neke’xye resileb’ li kawil na’ajej ke’xyiib’ laj Nefita: Alma 48:7–9; 49:1–9; 50:1–6. Chirix rilb’aleb’ li raqal a’in sa’ komonil, maare taawulaq chiruheb’ laa kok’al xyiib’ankil jun kawil na’ajej rik’in chunleb’aal ut isb’, malaj jalan chik k’a’aq re ru. Wankeb’ li video sa’ li Biblioteca del Evangelio li naru nekexxtenq’a chi aatinak chirix xkawresinkil lee rochoch sa’ musiq’ej.

Alma 46:11–16; 48:11–13, 16–17

Naru naq “xaqxookin chi kaw saʼ xpaabʼankil li Kristo” joʼ laj Moroni aj taqlanel.

• Laa kok’al naru neke’rileb’ li jalam-uuch sa’ li tusleb’ aatin a’in re xseraq’inkil li seraq’ chirix li eetalil re ach’ab’aak (chi’ilmanq Alma 46:11–16; “Ch’ol 32: Laj Moroni aj taqlanel ut li eetalil re ach’ab’aak,” Eb’ li Esilal sa’ lix Hu laj Mormon, 89–90). K’a’ru kiraj laj Moroni naq taajultiko’q raj reheb’ li kristiaan? (chi’ilmanq li raqal 12)? K’a’ru naraj li qaChoxahil Yuwa’ naq taajultiko’q qe laa’o? Laa kok’al naru neke’xyiib’ lix “eetalil re li ach’ab’aak” rik’ineb’ ch’ol aatin malaj jalam-uuch li te’tenq’anq reheb’ chixjultikankileb’ li k’a’aq re ru a’an.

• Re xtzolb’aleb’ laa kok’al chirix li “xaqliik chi kaw chixpaab’ankil li Kristo” jo’ laj Moroni (chi’ilmanq Alma 48:13), naru nakatenq’aheb’ chixtawb’al ut chixtoch’b’al jun k’a’aq re ru kaw rib’. K’a’ru naraj naxye naq li paab’aal a’an “kaw”? Ilomaq Alma 48:11–12 re xnawb’al k’a’ut naq xaqxo chi kaw laj Moroni chixpaab’ankil li Kristo. Naru ajwi’ nekeb’icha li b’ich “Kawaq inch’ool” (B’ichleb’aal choq’ reheb’ li Kok’al, 85). K’a’ru naru taqab’aanu re naq “xaqxooqo chi kaw saʼ xpaabʼankil li Kristo”?

Alma 47:4–19

Laj Satanas nokoraale ut nokoxb’alaq’i chi b’ayatq.

Ilomaq junjunqeb’ li raqal sa’ Alma 47:4–19. K’a’ raj ru kik’ulman wi laj Amalikiah kixye raj re laj Lehonti li k’a’ru kixk’uub’ xb’aanunkil chalen chaq sa’ xtiklajik? K’a’ru neke’xk’ut chiqu eb’ li raqal a’an chirix chan ru naq laj Satanas naxyal qab’alaq’inkil?

Tenq’aheb’ laa kok’al chixnimob’resinkil xkawileb’ xch’ool. Wankeb’ li kok’al te’reek’a naq moko te’ruuq ta chixtzolb’al li evangelio xjuneseb’ rib’. Naru naniman xkawileb’ xch’ool wi nakawaklesiheb’ xch’ool naq neke’tz’aqon sa’ li tzolok. B’ar naru nakawoksiheb’ li na’leb’ a’in rik’ineb’ li kok’ k’anjel wankeb’ sa’ li tusleb’ aatin a’in?

Re xtawb’al xkomon chik li na’leb’, chi’ilmanq li hu Amigos re li po a’in.

Li eetalil re ach’ab’aak, xb’aan laj Larry Conrad Winborg.

© 2018 xb’aan laj Larry Conrad Winborg