Ixq, xb’aan li xJen Tolman, maawisi reetalil

29 julio–4 agosto: “Tat-iloq wan wi’ li Dios ut taawanq aayu’am”

Alma 36–38

Naq laj Alma kiril li maa’usilal sa’ xsutam, a’an kireek’a “rahil ch’oolejil,” “rahilal,” ut “xyot’b’al li raam” (Alma 8:14). Li “maaʼusilal saʼ xyanq li tenamit aʼin,” chan a’an chirixeb’ laj Tzoramita, “naxrahob’tesi li waam” (Alma 31:30). Kireek’a ajwi’ chi jo’kan naq kisutq’i sa’ xmision sa’ xyanqeb’ laj Tzoramita—kiril naq li raameb’ naab’aleb’ aj Nefita “ke’ok chi kawuk, ut naq ke’ok chi ch’a’ajko’k xch’ooleb’ xb’aan xkawil li aatin,” ut xb’aan a’in naq “kiraho’ xch’ool chi numtajenaq” (Alma 35:15). K’a’ru kixb’aanu laj Alma chirix li kiril ut li kireek’a? Ink’a’ yal kika’ch’ino’ xch’ool chi moko ki’ok choq’ aj b’ach’b’ach’ chirix xwanjik li ruchich’och’. Ruuchil a’an, “kixtaqla xch’utub’ankileb’ li ralal” ut kixk’ut chiruheb’ “li k’a’aq re ru re tiikilal” (Alma 35:16). A’an kixk’ut chiruheb’ naq “maak’a’ chik junaq b’e chi moko chan chik ru naru nakole’ wi’ li winq, ka’ajwi’ rik’in ut sa’ xk’ab’a’ li Kristo. … K’e reetal, a’an li aatin re yaal ut tiikilal” (Alma 38:9).

Li na’leb’ re tzolok sa’ li ochoch ut sa’ li iglees

Alma 36; 38:5–6

Naru tinyo’laaq rik’in li Dios.

Moko k’iheb’ ta qe li took’uluq re li jalok ch’oolej tz’aqal jo’ chanru kixk’ul laj Alma. A’b’an tento naq chixjunileb’ “te’yo’laaq rik’in li Dios,” us ta timil timil nak’ulman chi kok’ aj xsa’ (Alma 36:23; 38:6). Naq yooqat chirilb’al Alma 36, k’oxla lix yaalalil li yo’laak rik’in li Dios. Qayehaq, naq yookat chi yo’laak rik’in li Dios, k’a’ru nakaweek’a chirix li maak? chirix li Jesukristo? Chan ru naq li yo’laak rik’in li Dios naxjal li nakab’aanu naq nakatpaalto’? K’a’ chik ru najala sa’ laa paab’ahom ut laa b’aanuhom? Tz’il rix li jalaak yookat chixk’ulb’al.

Chi’ilmanq ajwi’ Mosiah 5:7; 27:25–26; Alma 5:14; 22:15; Helaman 3:35; “Alma, hijo, se convierte al Señor” (video), Biblioteca del Evangelio.

Alma 36:12–24; 38:8–9

Li Jesukristo naxk’e li sahil ch’oolej sa’ xna’aj li rahil ch’oolej.

Wan naq li kristiaan neke’xxuwa li jalb’a-k’a’uxlej xb’aan naq neke’xk’oxla naq a’an jun rahil tojb’a-maak. K’a’ raj ru tixye laj Alma chirix li na’leb’ a’an? Re xnawb’al, naru nakajuntaq’eeta lix yu’am laj Alma naq maji’ naxjal xk’a’uxl (chi’ilmanq Alma 36:6–17) rik’in li kixch’olob’ a’an chirix naq kixjal xk’a’uxl (che’ilmanq li raqal 18–27). Jo’ naxye sa’ Alma 36:17–18, chan ru naq kikuye’ xmaak laj Alma?

Chi’ilmanq ajwi’ Matthew S. Holland, “Li maatan q’axal nim re li Alalb’ej,” Jolomil ch’utub’aj-ib’ re noviembre 2020.

Alma 37

K’uulanb’ileb’ li loq’laj hu “choq’ re jun chaab’il ajom.”

K’oxla li sachb’a-ch’oolej ut li osob’tesiik naq wankeb’ li loq’laj hu qik’in anajwan! Naq yooqat chirilb’al Alma 37, k’e reetal chan ru naq osob’tesinb’ilo xb’aaneb’ li loq’laj hu (che’ilmanq, jo’ eetalil, li raqal 7–10, 18–19, 44–45).

Sa’ Alma 37:38–47, laj Alma kixjuntaq’eeta “li raatin li Kristo” rik’in li Liahona. Naq yookat chixk’oxlankil li juntaq’eetank a’in, k’oxla chan ru naq ak xak’ul li sachb’a-ch’oolej ut li wankilal re li raatin li Kristo “wulaj wulaj” (Alma 37:40).

Chi’ilmanq ajwi’ D. Todd Christofferson, “La bendición de las Escrituras,” Liahona, mayo 2010, 32–35; “Naq nintzol li loq’laj hu,” Eb’ li B’ich, 179; “Alma testifica a su hijo Helamán” (video), Biblioteca del Evangelio.

Eb’ li loq’laj hu neke’xk’ut chiqu chan ru xtaaqenkil li Dios

Alma 37:1–14

“Rik’in li k’a’ru ka’ch’in ut moko nimob’resinb’il ta, nak’ehe’ chi uxmank li xninqal ru na’leb’.”

Wan naq taqeek’a tana naq jwal ninqeb’ li qach’a’ajkilal, jo’kan naq jwal nim ajwi’ li na’ajman ru re xtuqub’ankileb’. A’b’an moko a’an ta li junelik naraj li Qaawa’. Naq yooqat chirilb’al Alma 37:1–14, k’e reetal k’a’ru naxtoch’ aach’ool rik’in chan ru a’an naxb’aanu lix k’anjel. Tz’il rix ut tz’iib’a chan ru naq aawilom li na’leb’ a’an sa’ laa yu’am.

Wi ta taak’ut li na’leb’ a’in chiru jun kristiaan, k’a’ruheb’ li eetalil re li yu’amej wulaj wulaj li taawoksi raj re xk’utb’al? Naru nakataw junjunq reheb’ sa’ li raatin li Awa’b’ej Dallin H. Oaks, “Li k’a’ru ka’ch’in ut moko nimob’resinb’il ta,” Jolomil ch’utub’aj-ib’ re abril 2018).

K’a’ruheb’ li k’a’aq re ru kok’ ut moko nimob’resinb’ileb’ ta li nakate’xnach’ob’resi rik’in laa Choxahil Yuwa’ ut li Jesukristo?

Chi kok’ aj xsa’, a’aneb’ li qab’aanuhom li “kok’eb’ ut moko nimob’resinb’ileb’ ta” li neke’xk’e chi uxk li nimla jalaak sa’ li qayu’am. Naru nakasik’ ru jun na’leb’ sa’ Choq’ re Xkawilaleb’ li Saaj: Jun tenq’ re xsik’b’al ru laa b’e ut taapatz’ aawib’ a’in: Chan ru naq li ninsik’ ru xb’aanunkil rik’in li na’leb’ a’in naxtoch’ inyu’am malaj xyu’ameb’ li was wiitz’in? Ma wankeb’ li jalaak kok’eb’ ut moko nimob’resinb’ileb’ ta naru ninb’aanu re naq tintaw xkomon chik lin tuqtuukilal ut xsahil inch’ool?

Chi’ilmanq ajwi’ Michael A. Dunn, “Jun raqal chik xoochaab’ilo’,” Jolomil ch’utub’aj-ib’ re octubre 2021; Temas del Evangelio “Albedrío y responsabilidad,” Biblioteca del Evangelio.

Oksi li k’a’ru ka’ch’in ut moko nimob’resinb’il ta. Jo’ naab’al chik sa’ li yu’am a’in, li xk’utb’al ut xtzolb’al li evangelio naru nab’aanuman rik’in kok’ na’leb’ moko nimob’resinb’ileb’ ta. Qayehaq, chan ru naq li atzʼam malaj xyu li kaxlan wa naru na’oksiman re xk’utb’al li nimla wankilal na’ux rik’in li k’a’ru ka’ch’in ut moko ch’a’aj ta? (chi’ilmanq Mateo 5:13; 13:33).

Alma 37:35–37

“Sik’ aana’leb’ rik’in li Qaawa’.”

Sa’ Alma 37:35–37, k’e reetal lix b’oqom laj Alma choq’ re laj Helaman, li ralal. B’ar wan reheb’ li b’oqom a’in nakaweek’a naq tento taak’anjela? Qayehaq, maare taatz’il rix k’a’ru naraj naxye “sik’ aana’leb’ rik’in li Qaawa’” (raqal 37). Chan ru naq ak xayal xb’aanunkil a’in? Chan ru naq a’an xatxb’eresi choq’ re chaab’ilal?

Alma 38

Xwotzb’al lix nawom inch’ool chirix li Jesukristo naru tixkawob’resiheb’ li kristiaan ninra.

Li raatin laj Alma re laj Xiblon, li ralal, naxk’ut chi chaab’il chan ru naru naqakawob’resi ut naqawaklesi xch’ooleb’ li kristiaan neke’qara chixyu’aminkil li evangelio. Xtzolb’al Alma 38 maare tixk’e aana’leb’ chirix xtenq’ankileb’ laa komon ut laa wamiiw chixtawb’al xmetz’ew rik’in li Jesukristo. Tz’iib’a li k’a’ru nakatzol.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Alma 36:6–24

Xjalb’al ink’a’uxl naxk’e xsahil inch’ool rik’in li Jesukristo.

• Re xtenq’ankileb’ laa kok’al chixtawb’al ru naq li jalb’a-k’a’uxlej nak’ehok sahil ch’oolej, naru nakak’e jun perel hu reheb’, wan jun xnaq’ uhej sa xch’ool chiru jun pak’al, ut jun li ra xch’ool sa’ li jun pak’al chik. Patz’ reheb’ naq te’ab’inq naq taayaab’asi malaj taak’os ru Alma 36:13, 17–20 ut naq te’xtaqsi jun reheb’ li xnaq’ uhej re xk’utb’al li nareek’a laj Alma. Eb’ li kok’al ak ninqeb’ naru neke’xtz’iib’aheb’ li aatin li neke’xch’olob’ li reek’ahom. K’a’ru kixk’e laj Alma chi raho’k, ut k’a’ru kixk’e chi saho’k? Chirix a’an naru nakaye reheb’ resil li sahil ch’oolej nakaweek’a naq nakajal aak’a’uxl.

Alma 37:6–7

“Rik’in li k’a’ru ka’ch’in ut moko nimob’resinb’il ta, nak’ehe’ chi uxmank li xninqal ru na’leb’.”

• Maare taawulaq chiruheb’ laa kok’al xtawb’aleb’ kok’ k’a’aq re ru li neke’xk’e chi uxk li k’a’ru nim. Maare a’an li bateriiy, xlaaw li b’eleb’aal ch’iich’, malaj jun b’atz’uul li nak’ojob’an ch’oolej. Chirix a’an naru nekeril Alma 37:6–7, ut teek’oxla wiib’ oxib’ li k’anjel kok’eb’ ut moko nimob’resinb’ileb’ ta naraj li Dios naq taqab’aanu. K’a’ruheb’ li ninqi k’a’aq re ru naru neke’k’ulman naq neke’qapaab’ li kok’ taqlahom moko nimob’resinb’ileb’ ta?

• Laa kok’al naru te’xyal xb’aanunkil a’in: nujob’resi jun li sek’ rik’in ha’, chi tz’uqul. Chan ru naq wan rilom a’an rik’in Alma 37:6─7? Chirix a’an naru neketz’il rix chan ru naq “li k’a’ru ka’ch’in ut moko nimob’resinb’il ta,” jo’ rilb’aleb’ li loq’laj hu wulaj wulaj, chanchaneb’ li tz’uqul sa’ jun sek’.

• Tenq’aheb’ laa kok’al chixk’oxlankil chan ru naq naru te’xk’e chi uxk li xninqal ru sa’ ochoch, eskweel, malaj iglees. Li b’ich “Li roq li ha’ naxye” (B’ichleb’aal choq’ reheb’ li Kok’al, 116) naxk’ut ajwi’ xyaalalil li na’leb’ a’in.

Alma 37:38–47

Li loq’laj hu naru nikinixtenq’a wulaj wulaj.

• Chan ru naru nakatenq’aheb’ laa kok’al chixraab’al li raatin li Dios, jo’ kixb’aanu laj Alma choq’ re laj Helaman? Naru nakak’ut chiruheb’ xjalam-uuch li Liahona (maare Hu reheb’ li Jalam-uuch re li Evangelio, 68) malaj nakapatz’ reheb’ naq te’xyiib’ xjalam-uuch naq yooqeb’ chi aatinak chirix li neke’xnaw chirix (chi’ilmanq Alma 37:38–47; 1 Nefi 16:10, 28–29). Chan ru naq li loq’laj hu a’an chanchan li Liahona?

Re xtawb’al xkomon chik li na’leb’, chi’ilmanq li hu Amigos re li po a’in.

Li anjel naxk’ut rib’ chiru laj Alma ut eb’ li ralal laj Mosiah, xb’aan laj Clark Kelley Price